Intervista

Kryeministri Edi Rama ka vlerësuar dorëzimin e mandatit të deputetit nga Saimir Tahiri, duke e konsideruar akt dinjitoz.

Në një intervistë për emisionin “Opinion” në Tv Klan, Kryeministri Rama ka mohuar që t’i ketë sugjeruar Tahirit të dorëzojë mandatin e deputetit.

Ai thotë se nuk ka pasur dijeni paraprakisht për dorëheqjen e Tahirit, duke arsyetuar se prej 6 muaj ish-ministri i Brendshëm nuk është pjesë e grupit parlamentar të PS.

Sa i përket akuzave të opozitës se dorëheqja e Saimir Tahirit është kërkuar nga Gjermania, Kryeministri Edi Rama i mohon këto pretendime.

Z.Rama çfarë mendoni ju për dorëheqjen e Tahirit?

Edi Rama: Një akt dinjitoz, në kujtesën time i pari i këtij lloji në historinë e parlamentit shqiptar, i respektueshëm plotësisht. Unë gjykoj asgjë nga ato që thuhen në këtë rast, sepse ky është një rast për të cilin jam shprehur qartë këtu e 6 muaj më parë, se i takon Saimir Tahirit dhe drejtësisë.

A ja keni kërkuar ju dorëheqjen?

Edi Rama: Besoj që është humbje kohe të merremi me llafet e kazanit politik dhe mediatik, pasi ky është një akt që flet vetë dhe është i respektueshëm për atë që është. Unë s’kam pasur asnjë dijeni dhe s’ka asnjë arsye pse unë duhet të kisha dijeni. Saimir Tahiri prej 6 muajsh nuk është pjesëtar i grupit tonë parlament dhe nuk ka asnjë rol në Partinë Socialiste.

Ky vendim i Tahirit, e çliron Parlamentin shqiptar qoftë në sytë e publikut apo qoftë edhe në ato akuzat e inkriminimit që janë bërë?

Edi Rama: Parlamenti shqiptar, fatkeqësisht nuk është një i tërë sot, është i ndarë. Parlamenti shqiptar ka një shumicë, ka dhe një pakicë. Në rast se flasim për shumicën, nuk ka pasur asnjë lloj nevoje të çlirohet nga asgjë. Shumica ka mbajtur qëndrimin e duhur për këtë rast. 100 herë të ktheheshim mbrapsht, 100 herë do kishim mbajtur të njëjtin qëndrim.

Lidhur me deklaratat që Tahiri ka bërë për qëndrimet që ministri i Brendshëm ka mbajtur ndaj policisë dhe krimit, a keni ju një koment?

Saimir Tahiri ka qenë ministër i Brendshëm pothuajse një mandat të plotë me mua dhe unë nuk i heq asnjë presje të gjithë atyre që kam thënë në kohën kur ai ishte ministër i Brendshëm, sepse kam mbështetur dhe vlerësuar punën e tij. Ashtu sikundër mbështes dhe vlerësoj punën e ministrit aktual të Brendshëm. Janë natyra të ndryshme, janë qasje të ndryshme, janë stile të ndryshme.

Kryetarja e LSI Monika Kryemadhi, njëkohësisht z.Berisha sot kanë artikuluar që në fakt Europa kërkon largimin tuaj, jo largimin e Saimir Tahirit. Si i komentoni ju këto deklarata?

Përfytyroni se në ç’mjerim do të ishte Europa nëse do të fliste për shqiptarët nëpërmjet Sali Berishës dhe Monika Kryemadhit. Por, ata nuk kanë asnjë lidhje me Europën në kuptimin e zëdhënies në emër të Europës dhe fatkeqësisht janë sot kundërshtarë të vendosur të rrugës sonë për të ecur më shpejt drejt Europës për të çelur negociatat për anëtarësim në Bashkimin Europian, dhe kjo është një fatkeqësi e jona e përbashkët, por në këtë mes Europa s’ka asnjë lidhje. Patjetër ata thonë kaq dhe shumë më tepër se sa kaq dhe ajo që unë mund të them për ato që ata thonë, është Zoti i ndihmoftë ata që i dëgjojnë.

 Kreu i demokratëve Lulzim Basha tha se kjo është një lojë që bëhet pas presionit që juve keni patur në Gjermani.

Unë në Gjermani nuk kam pasur asnjë presion. Në Gjermani në komisionin çështjeve europiane, unë thjesht i jam përgjigjur interesimit të një deputeti për këtë çështje duke dhënë edhe shpjegime bazuar në qëndrimin tonë që është publik këtu. Sa për lojën, lojë është t’i ikësh drejtësisë me raporte mjekësore siç ka bërë Lulzimi.

A është një sinjal për hapjen e negociatave gjesti i Tahirit?

Edi Rama: Hapja e negociatave nuk ka lidhje fare me këtë rast dhe leje më pastaj me këtë gjest. Hapja e negociatave është tani më një çështje politike. /tvklan.al/

Avokati Spartak Ngjela ka komentuar zhvillimet e fundit politike në emisionin ’45 minuta’, të gazetarit Denis Minga, në Report Tv. Ngjela vlerësoi vendimin e ish-ministrit Saimir Tahiri për dorëzimin e mandatit të deputetit, duke thënë se bëri mirë, pasi vendosi të përballet.

Avokati komentoi dorëheqjen e Tahirit, duke e lidhur me dy arsye kryesore, që sipas tij, e para ka të bëjë me betejën politike, pra që ish-ministri ka vendosur të përballet dhe jo të fshihet si kalama pas hijes së Ramës, dhe e dyta, mund të jetë një kompromis me kryeministrin Rama.

Nga ana e tij, Ngjela tha se shpreson të jetë arsyeja e parë dhe që Tahiri të përballet, duke treguar të vërtetën për të rimarrë dinjitetin, ndërsa shtoi se një ministër i Brendshëm nuk mund të bëjë kurrë trafik narkotikësh pa dijeninë e kryeministrit. Duke sulmuar kryeministrin Rama, avokat Ngjela deklaroi se ai ka më lidhje me amerikanët dhe se këta të fundit në union dhe me gjermanët nuk do ta mbajnë pas largimit të Tahirit.

Intervista e avokatit Spartak Ngjela në emisionin ’45 minuta’:

Ju e keni paralajmëruar, e prisnit sot dhe a ka lidhje me vizitën e Ramës?

Ka dy arsye për dorëheqjen e tij. Kur nuk di të bësh betejë ke hyrë kot në politikë. Ai thotë ‘jam i pafajshëm’, por i pafajshmi të rrëzon, të shkatërron. Mënyra si foli sot tregon se ka hyrë në betejë, por më mirë të kishte hyrë 6 muaj më parë.

Fliste kundër të gjithëve …

Nuk e di çfarë sensi ka. Arsyeja e parë e dorëheqjes së tij, po ke hyrë në politikë duhet të bësh beteja. Është normale të përplasesh. Në Shqipëri nuk kishte ndodhur, bëri mirë. Do fshihej si kalama pas hijes së Ramës, do ishte e turpshme. Arsyeja e dytë mund të jetë një kompromis me Ramën. Tahiri duhet të luftojë i pavarur, se nëse është e vërtetë ajo që ka bërë e ka me urdhër. Nuk mund të bëjë ministri i Brendshëm trafik droge pa dijeninë e kryeministrit, harroje. Nga Tahiri shqiptarët do të kërkojnë të vërtetën. Tahiri duhet të tregojë të vërtetën. Kjo është njëra anë e medaljes. Medalja tjetër, nuk besoj të ketë kompromis me Ramën. Edhe nëse ka kompromis nuk mund të zbatohet. ‘Çdo njeri në kohë të ndryshme del nga vetvetja’. Shpresoj të jetë e para, që Tahiri të rimarrë dinjitetin dhe të tregojë të vërtetën.
Nëse nesër arrestohet Tahiri, do ishte më i predispozuar të thoshte të vërtetën?

Nuk e di, unë i kam kërkuar të jetë dinjitoz, të thotë të vërtetën. Mesa pashë, më duket se qarqet gjermane thonin se Hahn ka humbur avionin. Do presim të shohim. Gjersa thotë se ‘humba avionin’, është kthyer për t’u konsultuar me Merkel, sepse ka ardhur siç duket me motiv të rëndë. Ai motiv nuk ekziston më.

Ka lidhje të fortë me vizitën e Ramës dhe rastin Tahiri?

Pa diskutim.

Kush është kthjelluar?

70% e fjalimit tregonte se ka marrë forcë ai, 30% thoshte që jo. Ai e ka marrë forcën, por duhet të rregullojë motivin. Motivi është ‘ruaj dinjitetin tënd në funksion të së vërtetës’

Ai sulmoi edhe Xhafajn, pse?

Tre goditje kanë lidhje me njëra-tjetrën. Goditja e Xhafajt dhe dy ambasadorëve kanë konfeksion.

Paralajmërohen zhvillime?

Ta lëmë me kaq.

Largimi i Ramës për negociatat, i mbeteni kësaj?

Kur i kërkojnë Tahirin e kanë me Ramën apo me Tahirin? Është pyetja. Nëse Rama nuk kishte frikë se Tahiri mund ta implikonte nuk do ta mbronte. Rama nuk është burrë shteti dhe as do bëhet ndonjëherë. Që është në dijeni kryeministri këtë harroje se kjo është abc-ja, s’bën ministri një veprim të tillë pa e ditur kryeministri. Është budalla, nëse thotë se e ka bërë vetë. Ç’e do pushtetin ky mavri, që s’ka as para.

Deri në qershor priten zhvillime të tjera, tronditje nga të dyja anët?

Sot i tronditi të dyja anët, edhe Saliu ishte i trembur. Rama pret, se thotë ‘do më mbajnë pas Tahirit’. Unë them se nuk do ta mbajnë. Nuk ka lidhje më me Amerikën Rama.

Nëse nuk do pranojnë Ramën, kë do pranojë perëndimi?

Perëndimi nuk është anti-votë, por anti-politikë. Nëse ti bllokon politikën, unë zhbllokoj politikën. Mazhoranca nuk diskutohet, por ç’do bëhet me Ramën do presim.

Shikoni njeri pas Ramës?

Nëse Rama ikën, konsultimi kryesor për kryeministrin e ri do jetë me Uashingtonin.

E keni bindje këtë, se mbetet e paqartë që një kryeministër të japë dorëheqjen …

E ka dhënë Nano dy herë dorëheqjen dhe s’ka qenë në pozita kaq të vështira. Njëherë ishte në pozita të vështira, kur e ndjeu se nuk e mbështeste Amerika. Këta janë nën nivelin e detit, Nano nuk ishte kaq keq.

A është fushatë që paralajmëron zgjedhje?

Hoxhizëm. Do ketë nga ata të vjetrit që e mësojnë. Skema e tij prej budallai, por ai e izoloi, këtu tallet populli me të.

Si e priti opozita largimin e Tahirit?

Ishte befasi. Saliu ishte çoroditur, kreu i grupit foli përçart, Rama nuk diti t’i përgjigjej fare. Rama notonte në zhivë, nuk merrte vesh gjë fare, ishte i mbytur. Ishin të tre të mërzitur, por motivin nuk e di. Rama nuk di si do dalë Tahiri, kurse ata ishin të mërzitur për Ramën. Nëse bie Rama, s’ka më Sali. Saliun e mban Rama.

Peshqit e mëdhenj, ky është në këtë drejtim?

Saliu flet ato që nuk i beson, mos e dëgjoni. E ka psikikën gënjeshtare, nuk di të thotë të vërtetën. Ambasadori Lu është politika amerikane këtu dhe e ka bërë shumë mirë. S’kam folur ndonjëherë me të. Me aq kohë sa ndenji i njohu, se është vështirë të njihet psikologjia otomane. Fakti që ka thënë se do ketë ngjarje deri në qershor, futjen e Shqipërisë në BE e do Uashingtoni dhe Gjermania e ka pranuar, duke ndarë dhe interesat e veta. Ka një kërkesë amerikane që Shqipëria do të hyjë në BE, sepse ka një aleancë të fortë me Shqipërinë në zonë. Amerika dhe Gjermania janë në union sa i përket lidershipit shqiptar. Erdogan është i papranueshëm për Amerikën, ky niset dhe shkon në Ankara.

Për këtë, gjermanët gjetën rastin dhe ja shpërthyen të gjitha pakënaqësitë në funksion të politikës gjermane dhe jo të asaj amerikane. Për këtë, ata në union nuk e pranojnë kryeministrin Rama, por ky është kaq mendjelehtë sa thotë se ‘po shkoj tek Erdogan’. Ata i nxorën Philips, i cili ja bëri të qartë se ai flet kot, i tha se ‘ti ke thënë 30 mln euro për xhami dhe thua se ke frikë nga islamizmi’. Për këtë, ky njeri nuk mund të vazhdojë të rrijë kryeministër, mund të diskreditojë totalisht PS. Ata presin që ky të largohet, kështu mendoj unë dhe nuk gaboj.

4 gjyqtarë e prokuror mbeten në rrjetën e Vettingut, dy prej tyre shumë të lartë, kjo do të thotë se reforma është në rrugën e duhur?

Lu tha se janë gati KLGJ dhe KLP. Vettingun e bëjnë të huajt, pra ata kanë mbaruar, por nuk kanë hyrë në proces. Mendoj se do t’i fusin bashkë të gjithë. 60% e gjyqtarëve do të eliminohen. Kemi kapacitete për t’i zëvendësuar. Do vazhdojnë magjistratët.

Mund të jenë në lartësinë e duhur këta magjistratë të rinj?

Pse këta që kemi çfarë janë? Të gjitha gjykatat do kenë këshilltarë të nivelit të lartë, siç është ONM sot.

Zhvillimet politike në PD, si doli kjo parti pas Kuvendit?

Kërkon shpëtim, duke shkatërruar krejt partinë. Saliu dhe Basha duan të djegin partisë që të shpëtojnë shtëpinë e tyre.

Marrëveshja me Greqinë do arrihet në maj?

Mund të jetë e mundur nëse palët kanë rënë dakord. Është marrëveshje e bërë nga Uashingtoni. Është mbyllur ajo histori, mos e zgjasni kot. S’ka votë greke që guxon të dalë kundër Gjermanisë. Ku ka Greqi të pavarur.

Skenari për Mitrovicën …

Nuk mund të ekzistojë. Për problemin e Kosovës nuk ka Gjermania asgjë në dorë. Luftën e ka bërë SHBA. Ai ka në dorë të bëjë iluminatin demokratik të Kosovës. Mendimi i tyre ka qenë të bënin një Shqipëri të dytë të nivelit të lartë, por nuk po e bën dot. Haradinaj është më në linjë të fortë për këtë që po them.

Raportet e Ramës me Erdogan kë rrezikojnë Shqipërinë apo Ramën?

Ramin, asgjë Shqipërisë. Ata qeshin. Rama nuk është më te pikëpyetja, por te shkrepësja, që të marrë zjarr, të shuhet si kryeministër.

Pse dështoi Rama të ndryshojë sistemin?

Mendon se Rama krijon sistem? Rama nuk ka një doktrinë. Unë kam bashkëpunuar politikisht me të. Ai s’ka doktrinë.

Aleanca PD-LSI mund ta përballojë PS në zgjedhjet e ardhshme?

Jo nuk e përballon. Socialistët janë të garantuar, sepse do goditen më pak nga korrupsioni. Shenjat janë që atyre ju ikën një masë shumë e madhe, një bashkësi më e madhe se socialistët, që do preken pak, në majë të tyre. Faktet e Tahirit nuk i ka nxjerrë e hetuar Shqipëria, por ndërkombëtarët. Ata e dinë vetë si i nxjerrin. Tahiri u eliminua me presion gjerman, por që kërkoi të automotivonte veten. Pas kësaj do vijë Hahn në Shqipëri, të shohim çfarë do na thotë.

E djathta do jetë kështu gjithmonë?

Opozita nuk humbet asnjëherë si frymë, por si politikë. Fryma opozita është shumë e madhe ndaj Ramës, por politika e Berishës nuk është për opozitën, por për veten. Realiteti nuk është ky. Krizat opozicionale mund të nxjerrin lëvizje të forta.

LSI, frymë opozitare apo …?

Nuk ka funksion fare.

Keni koment për Liri Belishovën?

Ishte nga më të mençurit në partinë Komuniste, por jo në rangun e të parëve që vrau Enver Hoxha, ishin më perëndimor se kjo. Kjo nuk e rrëzoi, sepse u lëkund. Gaboi në politikë. Ajo nuk pati kurajo ta mbante vetën dhe mendoi të drejtonte Hoxhën, por ky i fundit nuk bëhej kukull.