Arsim

Ministrja e Mbrojtjes Olta Xhaçka njoftoi sot se Forcat e Armatosura të Shqipërisë ofrojnë falas dhe për më tepër në akademitë ushtarake më prestigjioze të NATO-s, jo vetëm tarifat, por gjithë shpenzimet që lidhen me shkollimin.

Bëhet fjalë për 3 bursa në akademitë ushtarake në Modena, Livorno dhe Pozzuoli dhe afati i aplikimit përfundon më 7 shkurt.

“Qendra e Personel Rekrutimit do të rekrutojë kandidatë për studime në akademitë ushtarake të Italisë për vitin akademik 2019-2020, 3 (tre) të drejta studimi si më poshtë vijon: në Akademinë Ushtarake Modena, 1 (një) kuotë në degën “Karabinieri”; në Akademinë Ushtarake Detare, Livorno, 1 (një) kuotë në degën “Xhenio detare”; në Akademinë Ushtarake të Forcës Ajrore, Pozzuoli, 1 (një) kuotë në degën “Pilot”. Afati kohor për dorëzimin e dokumentacionit pranë Qendrës së Personel Rekrutimit është deri në 07 shkurt 2019”, tha Xhaçka. /atsh

Rektori i Universitetit “Ismail Qemali”Vlorë, Roland Zisi, theksoi sot se “4164 studentë të këtij universiteti përfitojnë nga reduktimi i tarifës, ndërsa 154 janë studentët që përjashtohen nga tarifa e studimit dhe që përfitojnë bursë”.

Në një prononcim për Agjencinë Telegrafike Shqiptare, rektori Zisi shprehet se “janë 77 studentë që përjashtohen nga tarifa e studimit, si dhe po 77 studentë që përfitojnë bursë, 42 prej tyre janë në vitin e dytë dhe të tretë dhe 32 prej tyre vijnë nga lista e ardhura nga qendra e shërbimeve arsimore, pra nga shkolla e mesme”.

“I gjithë pakti fokusohet në tre aspekte kryesore së pari gjithë vëmendja e shoqërisë, e politikës dhe qeverisë në veçanti kthehet në universitet me fokus të veçantë studentin. Pakti për Universitetin realizon tre gjëra. e para reduktim apo përgjysmim të kufirit maksimal të tarifës së studimit, së dyti, shkolla ndan bursa pra zgjeron gamën dhe kategoritë që përfitojnë bursa dhe e treta përjashton nga tarifa disa kategori studentësh”, tha Zisi.

Rektori i Universitetit të Vlorës shprehet se “së pari, për ciklin e parë të studimeve reduktimi i kufirit maksimal të tarifës vjetore të shkollimit, domethënë kufiri maksimal i studimit paguhet nga studenti në masën 50%, ndërsa pjesa tjetër do të rimbursohet nga shteti në institucionet e arsimit të lartë. Së dyti, për studentët nga viti I-III të ciklit të parë të studimeve përjashtohen nga tarifa vjetore studentët e ekselencës, ata që kanë mesataren 9.00 deri në 10.00. E treta, përjashtohen studentët e vitit të parë që vijnë nga arsimi i mesëm dhe janë regjistruar në vitin e parë në programet e studimit të Universitetit “Ismail Qemali”, ata që kanë mesataren 9.00 deri në 10.00″, nënvizoi Zisi.

Së katërti, shtoi rektori, përfitojnë bursë studentët e vitit të parë të regjistruar në çdo program studimi që kanë mesatare nga arsimi i mesëm 9.00 deri në 10.00.

Sipas tij, nëse studentët e mbajnë këtë mesatare ata e përfitojnë bursën edhe vitin pasardhës.

“Çdo ditë sekretaritë mësimore, kryesekretaret, specialistët e informimit të studentëve pranë fakulteteve, gjithë rektorati, gjithë përgjegjësit e departamenteve janë në funksion për të sqaruar, shpjeguar dhe mbushur boshllëqet e studentëve në lidhje me informimin”, tha Zisi.

Në lidhje me rikonstruksionin dhe investimet për godinat dhe konviktet, rektori shprehet se edhe kjo çështje gjen zgjidhje.

“Qeveria ka kërkuar nga universitetet dhe ne kemi dërguar sot në MAS dhe në Ministrinë e Financave nevojat tona infrastrukturore dhe kemi kërkuar mbështetjen nga qeveria për ngritjen e godinës së Infermierisë, që është e menjëhershme”, tha Zisi.

Ai sqaron se para se të fillonin protestat në muajin nëntor qeveria me një VKM të posaçme i ka dhënë Universitetit “Ismail Qemali” 6 mijë metra katrorë tokë për të ngritur këtë godinë.

“Projekti për ngritjen e këtij fakulteti është gati, është tenderuar dhe pritet të fillojë puna”, tha Zisi.

Po ashtu, shton ai, ne kemi kërkuar mbështetje financiare për infrastrukturë laboratorike për të riformuar dhe mbështetur sistemet e ngrohjes.

Rektori Zisi bën të ditur gjithashtu se në Universitetin “Ismail Qemali”, nuk ka pasur ndërprerje të mësimit kjo është e faktuar me regjistrat e mësimit, me korrektësinë e pedagogëve që kanë shkuar në mësim. Universiteti nuk ka humbur asnjë orë mësimi dhe për pasojë nuk do të shtyjë as provimet dhe as procesin mësimor”. /atsh

https://www.facebook.com/Agjencia.Telegrafike.Shqiptare/videos/336941340245527/?t=0

Kostoja për studentë që studiojnë në universitetet e vendit , në varësi të programit dhe Institucionit të Arsimit të Lartë, luhatet nga më e ulëta 55,000 lekë në Universitetin e Durrësit deri në 470,000 lekë më e larta në Universitetin e Arteve në Tiranë.

Kontributi i buxhetit të shtetit tek kjo kosto luhatet nga 54% në Institucionit të Arsimit të Lartë me kosto më të ulët, në 91% në koston më të lartë. Si rezultat, deri më sot studenti paguante 25,000 lekë për programin me koston më të ulët deri në 45,000 lekë për programin me koston më të lartë.

Por tashmë, Qeveria ka marrë një sërë vendimesh duke i dhënë zgjidhje kërkesave të ngritura nga studentët për përgjysmimin e tarifave në nivelin e studimeve master për disa kategori, të cilat janë të publikuara edhe në Paktin për Universitetin.

Kështu, për studentët e nivelit të studimeve master, Qeveria ka përgjysmuar tarifat deri në 50% për ato studentët me notë mesatare mbi 9 në hyrje, për studentët nga familje në ndihmë ekonomike, të verbrit, studentët paraplegjikë e tetraplegjikë, jetimët dhe për fëmijët e policëve të rënë në krye të detyrës.

Përfitues janë studentët që vijnë nga familjet e të cilëve trajtohen/përfitojnë ndihmë ekonomike të plotë apo të pjesshme nga njësitë bazë të qeverisjes vendore, si dhe studentëve deri në moshën 25 vjeç, që kanë vetëm njërin nga prindërit, pasi prindi tjetër është ndarë nga jeta, me të ardhura vjetore të familjes të pamjaftueshme për përballimin e kostos së studimeve dhe studentët që kanë përfituar statusin e jetimit, deri në moshën 25 vjeç.

Po ashtu, janë përfitues edhe studentët të cilët deri në moshën 25 vjeç, që kanë humbur kujdestarinë prindërore me vendim gjykate të formës së prerë; Studentët deri në moshën 25 vjeç, që janë identifikuar si viktima të trafikut të qenieve njerëzore dhe kanë përfituar statusin ligjor për trajtim si viktima të trafikut të qenieve njerëzore.

Një kategori tjetër janë edhe studentët, fëmijë të punonjësve të Policisë së Shtetit, të Gardës së Republikës, të Shërbimit për Çështjet e Brendshme dhe Ankesat, të Shërbimit të Mbrojtjes nga Zjarri dhe Shpëtimin, të Forcave të Armatosura, të Shërbimit Informativ Shtetëror dhe të Policisë së Burgjeve, që kanë humbur jetën në krye dhe për shkak të detyrës, të konfirmuar nga ministria/institucioni përgjegjës.

Nga vendimet e qeverisë për uljen e tarifave, përfitojnë dhe studentë e ish- të përndjekurve politikë, romët dhe egjiptianët.

Pakti për Universitet fut në kategorinë e uljes së tarifave edhe studentët romë dhe ballkano-egjiptianë, të konfirmuar si të tillë nga ministria përgjegjëse për mbrojtjen sociale; Studentët, fëmijë të ish-të dënuarve dhe të përndjekurve politikë nga sistemi komunist, ose fëmijë me prindër të dënuar politikë me heqje lirie.

Përfitues janë dhe studentët që fillojnë vitin e parë të ciklit të dytë të studimeve në Institucionet publike të Arsimit të Lartë dhe që kanë përfunduar ciklin e parë të studimeve në Institucionet publike të Arsimit të Lartë me notën mesatare vjetore 9 (nëntë) deri në 10 (dhjetë); Studentët që rezultojnë me notën mesatare vjetore 9 (nëntë) deri në 10 (dhjetë), të regjistruar në vitin pas të parit dhe që kanë shlyer të gjitha detyrimet akademike, të parashikuara për vitin akademik paraardhës.

Studentët, sipas kategorive të individëve që plotësojnë kriteret e mësipërme, do të paguajnë tarifën vjetore të studimeve në masën 50%, pas paraqitjes së dokumentacionit vërtetues për statusin e tyre ligjor, me vendim të Bordit të Administrimit të Institucionit publik të Arsimit të Lartë. /atsh

Për të adresuar problematikën e ngritur nga studentët dhe stafet pedagogjike, lidhur me transparencën me buxhetin nga Ministria e Arsimit dhe institucionet e Arsimit të Lartë dhe publikimin e të gjitha shpenzimeve online, qeveria miratoi vendimin “Për garantimin e transparencës në Institucionet publike të Arsimit të Lartë”.

“Ky vendim ka për qëllim garantimin e transparencës në Institucionet publike të Arsimit të Lartë. Ministria e Arsimit, Sportit dhe Rinisë do të bëjë publike të dhëna e informacione në kuadër të programit të transparencës dhe të trajtimit të ankesave ndaj Institucioneve të Arsimit të Lartë, përmbajtja e të cilave do të publikohet në portalin e transparencës dhe të trajtimit të ankesave”, thuhet në Paktin për Universitetin.

Në këtë portal, do të publikohen online të ardhurat dhe shpenzimet e universiteteve, vendimet e bordit, të senatit dhe organeve të tjera dhe zyrës pranë MASR për transparencën dhe adresimin e ankesave.

Aktualisht institucionet publike të Arsimit të Lartë gëzojnë të drejtën: për të caktuar rregullat e brendshme të financimit, të shpërndarjes dhe përdorimit të të ardhurave, sipas veprimtarisë dhe nevojave të institucionit; për të përcaktuar tarifat e studimit në përputhje me këtë ligj;për të përfituar fonde nga shteti dhe organizma të tjerë; për të krijuar të ardhura të ligjshme nga veprimtaritë e mësimdhënies, nga veprimtaritë kërkimore-shkencore, nga të drejtat intelektuale, nga markat dhe patentat, nga shërbimet, nga veprimtaritë artistike e sportive, si dhe nga veprimtari të tjera ekonomike, të cilat përdoren në përputhje me legjislacionin në fuqi; për të administruar pasuritë e luajtshme dhe të paluajtshme që institucionet zotërojnë ligjërisht, në përputhje me misionin e tyre.

Po ashtu IAL-të i hartojnë vetë buxhetet e tyre, duke filluar nga niveli i çdo departamenti, në nivel fakulteti e më pas buxhetet konsolidohen në nivel IAL-je, ndërsa buxheti miratohet paraprakisht nga Senati Akademik dhe më pas i kalohet për aprovim final Bordit të Administrimit.

Buxheti i miratuar administrohet nga Administratori i IAL-së, në përputhje me zërat e aprovuar dhe sipas ligjeve për shpenzimet publike.

Studentët, por edhe një pjesë e madhe e stafeve pedagogjike, kanë informacion të limituar mbi buxhetin, si në nivelin e hartimit dhe aprovimit të tij, si edhe të shpenzimeve që kryhen nga çdo Institucion i Arsimit të Lartë./atsh

“Pedagogët nuk mund të marrin peng qeverinë duke bërë presione dhe duke mos shkuar në mësim”, deklaroi sot Kryeministri Edi Rama, ndërsa u kujtoi universiteteve se transparenca me titujt akademik është kompetencë e tyre.

Gjatë diskutimit mbi Paktin për Universitetin, Kryeministri Edi Rama u shpreh se “qeveria është përqendruar me të gjithë kapacitetin e vetë për t’i dëgjuar studentët, por edhe pedagogët dhe universitetet duhet ta bëjnë këtë”.

Lidhur me çështjen e plagjiaturave, Kryeministri theksoi se “universitetet nuk mund ta lënë këtë si një top mes studentëve dhe qeverisë”.

Kryeministri ritheksoi se me plagjiaturat duhet të merret universiteti. “Ju peng qeverinë nuk mund ta merrni dot duke bërë presione dhe duke mos shkuar në mësim. Nuk ka kuptim që qeveria të bëj vetting akademik për titujt, duhet ta bëni ju”, tha Rama.

“Ju nuk mund të refuzoni t’u jepni mësim studentëve për të bërë presion, që qeveria dhe studentët të tërhiqen nga transparenca e titujve. Si do të bëhet transparenca kjo është një çështje e hapur, por qeveria po dëgjon sot ato që ju duhet t’i kishit dëgjuar gjithë këto vite, sepse ligji i Arsimit të Lartë ju ngarkon ju me të gjitha ato, që sot po i merr përsipër qeveria. Ne po e bëjmë këtë, sepse këta së pari janë fëmijët tanë dhe nuk mund t’i bëjmë top ping-pongu, duke e kthyer çështjen e tyre në një betejë publike kompetencash, por ligji i Arsimit të Lartë ju detyron dhe sot ju duhet ta kishit bërë transparencën për të gjithë titujt”, tha Rama, duke iu drejtuar pedagogëve dhe universiteteve.

Ne nuk duam të bëjmë detyra përtej atyre që kemi për të bërë, tha Kryeministri, duke shtuar se, “transparenca e titujve është detyrë e universiteteve”.

“Universitetet kanë kërkuar liri, por liria vjen bashkë me përgjegjësinë”, shtoi Rama. “Mos prisni ditën kur të bashkohem unë me studentët dhe të vij përballë jush dhe t’u thoni studentëve çfarë ju nuk doni. Do të mbaroj historia e Doktorëve të Shkencave që vetëm me shkencën nuk kanë lidhje. Ju e dini shumë mirë sot se çfarë po ndodh, problem janë pedagogët që nuk shkojnë t’u japin mësim, jo studentët e ngujuar”, tha Rama.

Sipas tij, “studentët e bënë detyrën e tyre duke ngritur zërin dhe ne e dëgjuam, por unë edne nuk kam kuptuar sa kanë dëgjuar universitetet nga kjo”.

“Ne jemi gati të kalojmë edhe përtej mundësive tona, por nuk mund të marrim përsipër që të bëjmë detyrat që ligji ia ngarkon universitetit. Kush e ka ndaluar universitetin në gjithë këto vite t’i drejtohet qeverisë apo ministrisë dhe të kërkojë të marri pjesë në proces dhe të përfitoj të ardhura. Ne duam që universiteti të hyjë në treg, pasi universitetet në gjithë botën gjenerojnë të ardhura, ndërsa këtu këto të ardhurat gjenerohen nga prindërit që paguajnë tarifat dhe nga buxheti i shtetit”, tha Rama. /atsh

Ministrja e dekretuar e Arsimit, Rinisë dhe Sportit, Besa Shahini, i bëri apel sot studentëve që po pengojnë punën e sekretarive në disa fakultete, të mundësojnë funksionimin e tyre, sepse është shumë e rëndësishme të zbatojmë Vendimet e Këshillit të Ministrave që kanë të bëjnë me tarifat dhe dhënien e bursave.

Në një deklaratë për mediat, Shahini theksoi se “në ato fakultete ku një grup studentësh po pengojnë mësimin, ka pasur raste ku janë penguar edhe sekretaritë që të funksionojnë, si dhe janë penguar njerëzit që të shkojnë edhe deri në zyrat e sekretarive. Aty për fat të keq ka qenë e pamundur që të kemi personat e Ministrisë së Arsimit që t’iu asistojnë juve”.

Shani u shpreh se “është e rëndësishme dhe ftoj edhe universitetet dhe studentët që janë në këto fakultete duke protestuar të mundësojnë punën e sekretarive dhe të mundësojnë sot pjesëmarrjen e personave nga Ministria e Arsimit që t’iu asistojnë me pyetjet e çfarëdollojshme që ju keni”.

“Në rast se sekretaritë nuk funksionojnë ne nuk e marrim listën e plotë të studentëve që janë përfitues të bursave dhe përfitues të përjashtimeve të ndryshme nga tarifat dhe kjo vonon procesin e marrjes së bursave dhe përjashtimit të tarifave nga ana juaj”, nënvizoi Shahni.

Po ashtu, Shahini tha se “ne kemi mundësuar që përmes portalit “shqiperiaqeduam.al” të kthejmë përgjigje për pyetjet që mund të keni për të sqaruar sa më shumë mënyrën sesi zbatohen këto VKM, që prekin direkt çështjet që kanë të bëjnë me tarifat dhe bursat”.

“Do të ketë persona të dedikuar të MAS që do të kenë përgjigje në kohën e duhur, mundësisht edhe live. Përveç portalit kemi edhe Facebook e MAS, ku do të kemi mundësinë që të kthejmë përgjigje. Do të bëjmë një njoftim që të dimë sesi do të jetë komunikimi mes ministrisë dhe studentëve sa më shpejt të jetë e mundur”, bëri të ditur Shahini.

Ajo sqaroi se “sot është dita e fundit që personat e Ministrisë së Arsimit janë në zyrat e fakulteteve të ndryshme dhe nga sot pasdite këta persona i keni në celularë dhe mund t’i dërgoni pyetjet aty”./atsh