Arsim

Zëvendësministrja e Financave dhe Ekonomisë, Dajna Sorensen, deklaroi sot se “35 shkollat profesionale në vend do të hapen për maturantët nga data 18 maj deri në datën 5 qershor, në bazë të vendimit të marrë nga Ministria e Arsimit, duke u nisur nga vendimet e taskforcës për përballimin e situatës së pandemisë së COVID-19 në Shqipëri dhe mbështetur në vlerësimin e modeleve të vendeve të tjera që kanë filluar hapjen graduale të shkollave”.

Nëpërmjet një deklarate, zv/ministrja Sorensen informoi nxënësit, prindërit dhe drejtuesit e shkollave mbi procedurat që do të ndiqen për mbylljen e vitit shkollor 2019-2020, duke vënë theksin në katër elementë të rëndësishëm.

“Së pari, viti shkollor do të mbyllet në qershor 2020 për të gjithë nxënësit, sipas planifikimit në udhëzimet e deritanishme, së dyti, provimet e Maturës Shtetërore do të mbahen, sipas planifikimit, mes datave 8 dhe 18 qershor 2020, gjë që jep mjaftueshëm kohë që të përgatiten edhe diplomat për të gjithë maturantët që planifikojnë të studiojnë jashtë vendit dhe i duhen ato në korrik”, – tha ajo.

Zv/ministrja Sorensen theksoi se “së treti në mënyrë që provimi i maturës të jetë sa më i drejtë për maturantët dhe ata të kenë mundësinë për t’u përgatitur, është vendosur hapja e shkollave vetëm për nxënësit e klasave e 13-ta, pra për maturantët, në periudhën 18 qershor deri në 5 maj, gjatë së cilës do të punohet vetëm për lëndët e Maturës Shtetërore dhe me plan-programet e reja që nuk përmbajnë temat e zhvilluara në kushte shtëpie”.

Së katërti, shtoi ajo, mësimi nga shtëpia do të vazhdojë për të gjithë nxënësit e klasave 10-12 deri në fund të majit, duke planifikuar të mbyllet dy javë më herët se sa parashikimet në mënyrë që të krijohet mundësia që mësuesit të shkojnë nëpër shkolla dhe të bëjnë të gjithë punën administrative të hedhjes së notave dhe kalkulimit të vlerësimeve përfundimtare.

Zv.ministrja Sorensen informoi gjithashtu se hapja e pjesshme e shkollave do të realizohet duke zbatuar rigorozisht të gjitha rregullat e distancimit social dhe kushtet higjieno-sanitare nëpër shkolla, për 4200 maturantë në 35 shkolla.

“Do të sigurohet minimumi 1.5 m largësi mes nxënësve, ashtu siç parashihet nga rregullat e institucioneve shtetërore, dhe numri i nxënësve për klasë të mos jetë më shumë se 10-12 nxënës (apo maksimumi 15 nxënës për klasë, në rastet kur klasa ofron hapësirë të mjaftueshme)”, – tha Sorensen.

Zv/ministrja u shpreh se “duke konsideruar situatën e krijuar nga pandemia e shkaktuar nga COVID-19, për të mbështetur procesin e vijimit të mësimit online dhe realizimin e Provimeve të Maturës Shtetërore Profesionale dhe të Provimeve të Niveleve në shkollat profesionale, udhëzimet janë si më poshtë: mësimi në kushtet e shtëpisë do të vazhdojë në përputhje me udhëzimet e mëparshme duke synuar një pjesëmarrje sa më të madhe dhe sa më aktive të nxënësve”.

“Nga data 4 maj, duke filluar me mësim nga shtëpia dhe pastaj në shkollë me datë 18 maj, puna me maturantët do të fokusohet në provimet e Maturës Shtetërore. Për nxënësit Maturantë, parapërgatitja, për vitin shkollor në vijim, nuk do të përfshijë temat mësimore të trajtuara gjatë mësimit në kushtet e shtëpisë”, nënvizoi ajo.

Sipas saj, për periudhën e mbetur deri në datat e provimeve të Maturës Shtetërore Profesionale do të synohet përfshirja dhe mbështetja sa më e madhe e nxënësve maturantë që kanë patur vështirësi dhe pamundësi për t’u angazhuar në mësimin në kushtet e shtëpisë.

“Modalitetet e realizimit të provimeve të Maturës Shtetërore Profesionale do të jenë sipas udhëzimeve të Ministrisë së Arsimit, Sporteve dhe Rinisë. Provimi i Praktikës Profesionale të Integruar i Nivelit nuk do të zhvillohet në vitin shkollor 2019. Për të gjithë nxënësit (përfshirë dhe nxënësit maturantë), nota e këtij provimi praktik do të llogaritet si mesatare e thjeshtë, e rrumbullakosur, e notave të moduleve praktike që nxënësi ka përmbushur në nivelin përkatës”, tha ajo.

Sipas saj, provimi i Teorisë Profesionale të Integruar i Nivelit, për vitin shkollor në vijim, do të zhvillohet online.

“Përgatitja e testeve teorike, realizimi i provimit, korrigjimi dhe nxjerrja e rezultateve do të kryhen nga vetë shkollat, bazuar në Programet Orientuese përkatëse dhe sipas udhëzimeve të Ministrisë së Financave dhe Ekonomisë dhe të Agjencisë Kombëtare të AFP dhe Kualifikimeve. Nota përfundimtare e Provimit të Teorisë Profesionale të Integruar të Nivelit për çdo nxënës do të llogaritet duke marrë në konsideratë jo vetëm rezultatet e provimit të teorisë profesionale online, por edhe mesataren e notave në lëndët profesionale të përfshira në Programin Orientues përkatës”, – theksoi zv/ministrja.

Ndërsa për nxënësit që do ta kenë të pamundur të marrin pjesë në provimin e teorisë profesionale online, në përshtatje me rrethanat dhe kushtet që do të krijohen në vijim, Sorensen tha se “do të jepen udhëzime të mëtejshme për të mundësuar edhe realizimin e këtij provimi dhe nxjerrjen e notës përfundimtare përkatëse”.

Në përfundim të deklaratës së saj, zv.ministrja Sorensen ritheksoi se të gjitha shkollat profesionale do të vijojnë mësimin online dhe përgatitjet për provimet përfundimtare sipas udhëzimeve të mësipërme./atsh

Drejtoresha e Përgjithshme e Politikave të Arsimit, Zamira Gjini, deklaroi sot se “kishim përgatitur disa skenarë, ndërsa vendimmarrja ishte në akordim edhe me taskforcën dhe dolëm në përfundimin që në shkollë të shkojnë vetëm maturantët”.

Në një intervistë televizive, Gjini theksoi se “do të përdoren edhe shkollat 9-vjeçare për të zhvilluar mësim maturantët që të krijohen distancat. Duke pasur parasysh që shkollat 9-vjeçare nuk do të jenë do të ketë një rindarje të re të nxënësve në klasa”.

Sipas saj, janë marrë të gjitha masat për mbarëvajtjen e mësimit për maturantët.

“Kemi njoftuar që më parë, kemi nxjerrë edhe programe të reja për maturantët, ku nxënësit do të shikojnë programin orientues, ku janë hequr ato tema që janë zhvilluar në kushtet e shtëpisë. Do të kenë teste vetëm me alternativa. Do të shikohet që mënyra e testeve të bëhet dixhitale, por janë procedura për më pas”, – nënvizoi Gjini.

Ndërsa duke folur për nxënësit e klasave të pesta, Gjini u shpreh se “ provimi i klasës së 5-të nuk është provim me notë por një vlerësim si arritjeve të nxënësit të klasës së pestë , që Ministria e Arsimit e realizon çdo vit, më këtë grup nxënësish për të parë se cilat janë arritjet, problematikat, pikat dhe sfidat e këtij niveli të arsimit parauniversitar. Për këtë vit ky provim nuk do të zhvillohet ,nuk ka qenë me notë dhe nuk ka lidhje me nxjerrjen e notave përfundimtare të nxënësve të klasës së pestë”, – tha Gjini.

Për sa i përket nxënësve të klasave të 9-ta Gjini u shpreh se “tre provimet kombëtarë, gjuha angleze, gjuha shqipe dhe matematika për klasat e 9-ta nuk do të zhvillohen, por në dëftesat e tyre do të jenë notat e provimeve. Për këtë kemi parë shumë modele të vendeve të ndryshme edhe të Europës edhe të rajonit sesi po veprojnë me provimet kombëtare, sepse ka qenë një çështje për Ministrinë e Arsimit sesi do të veprojmë”.

Sipas saj, notat e provimit do të nxirren duke konsideruar notat e lëndës nga klasa e 6-të deri në klasën e 9-të.

E pyetur nëse do të ketë ndryshim programesh për nxënësit nga klasa e 1-11-të, Gjini tha se “këto klasa deri në 29 maj do ta zhvillojnë mësimin online siç po i zhvillojnë, dhe natyrisht kur të hartojmë planet shkollore për vitin tjetër shkollor shtator 2020-2021 do të kemi parasysh që në periudhën e fillimit të vitit shkollor do të bëjmë një përsëritje dhe do të kalojmë të gjitha temat që nuk janë realizuar apo kanë pasur problematikë”./atsh

Luljeta Kullolli është përgjegjëse çerdheje e bashkisë Tiranë prej disa vitesh.

Deputeti i Partisë Socialiste, Ervin Bushati përcolli sot shembullin e Luljetës në njësinë 7, e cila punon në bashkëpunim të ngushtë me stafin edukator dhe psikologen e çerdhes.

“Me shumë punë dhe përkushtim zhvillojnë çdo ditë online lojëra dhe aktivitete sipas programit të çerdhes. Kështu i vijnë në ndihmë prindërve që të kalojnë kohe sa më cilësore me fëmijët e tyre gjatë qëndrimit në shtëpi”, – thekson Bushati.

Ndërsa vetë Luljeta shprehet se ”motivi im për të shkuar çdo ditë me dëshirë në punë është pasioni im personal dhe profesional për të punuar në fushën e zhvillimit dhe edukimit të fëmijëve. Mendoj se për të qenë e suksesshme në punën me fëmijët, çelësi është dashuria dhe përkushtimi. Puna me fëmijët është sa sfiduese aq edhe e bukur”.

“Secila prej nesh përpiqet fort të kaloj kohë cilësore me fëmijët duke zhvilluar lojëra energjike dhe duke i lexuar përralla. Fëmijët kanë dëshirë, interes, kuriozitet për të mësuar lojëra të reja dhe energji pafund për tu argëtuar”, – tha Kullolli.

Për Kullollin të qëndruarit gjithë kohës me fëmijët dhe kalimi i një kohe cilësore me ta është sfida më e bukur që po ndodh përtej situatës në të cilën ndodhemi./atsh

Kryeministri Rama ka thënë mbrëmjen e sotme se nesër do të merret vendimi final për hapjen e shkollave.

“Kemi parë shumë vende që kanë vendosur të mos i hapin, Italia e fundit. Sot kemi pasur një diskutim me ministren, besoj nesër do kemi një vendim përfundimtar. Ideja është të mbrojmë vitin shkollor, Maturën Shtetërore dhe nxënësit të mos humbin vitin shkollor. Si do të bëhet kjo pa hapur shkollën? Nesër do detajohet”, u shpreh Rama në emisionin Real Story.

Më tej, kryeministri tha se në Tiranë dhe Durrës ka dhe një problematikë tjetër veç koronavirusit, shumë shkolla u dëmtuan nga tërmeti duke e shtuar numrin e nxënësve në shkollat e padëmtuara.

“Kujtoj që në zonën më të populluar të Shqipërisë Tiranë-Durrës ne në nëntor morëm goditje edhe nga tërmeti gjë që ka bërë të rritet shumë numri i nxënësve në shkollat e padëmtuara, ku hapja e procesit mësimor është faktikisht e pamundur, nga ana tjetër ne nuk duam të humbim vitin shkollor. Ne kemi hartuar një proces disi tjetër nga vendet e tjera. Besoj që do bëjmë dicka në këtë drejtim. Kemi skenar pozitiv qoftë për të mbrojtur shëndetin, qoftë për të mbrojtur nxënësit dhe qoftë për të mbrojtur vitin”, përmbylli kryeministri Edi Rama

Ministria e Arsimit, Rinisë dhe Sportit ka publikuar programet e reja orientuese të rishikuara si pasojë e pandemisë COVID-19 për maturantët.

Pesë muaj para provimeve maturantët kanë filluar përgatitjet e tyre për provimet e detyruara dhe provimet me zgjedhje. Këtë vit, maturantët që prej marsit, po marrin leksionet online.

Programet orientuese janë publikuar për arsimin e mesëm, atë profesional si dhe për shkollat me drejtim të orientuar gjuhësor.

“Programe orientuese për lëndët: Gjuhë shqipe dhe letërsi, gjuhë e huaj, matematikë, biologji, ekonomi-bërthamë, fizikë, gjeografi, histori, kimi, qytetari-psikologji, sociologji-filozofi. Programet orientuese për arsimin profesional në lëndët: gjuhë e huaj 1, gjuhë shqipe, letërsi dhe matematikë.

Programet Orientuese për Shkollat me Drejtim të Orientuar sportive dhe artistike në lëndët: Gjuhë e huaj, gjuhë shqipe dhe letërsi, histori arti 2019-2020, histori baleti 2019-2020 si dhe histori muzike.

Ministria e Arsimit ka publikuar po ashtu edhe programet orientuese për shkollat me drejtim të orientuar gjuhësor si: Gjuhë e huaj, gjuhë shqipe dhe letërsi, si dhe matematikë.

Agjencia e Sigurimit të Cilësisë së Arsimit Parauniversitar ka vënë në dispozicion për maturantët linkun e mëposhtëm me të gjithë programet e detajuara për çdo lëndë: https://www.ascap.edu.al/programet-orientuese-2019-2020/atsh