Aktualitet

Kënga që mori gjithë vëmendjen në rrjet pas daljes së këngëtares Filloreta Raçi nga BBV mesa duket i ka pëlqyer dhe kryeministrit Edi Rama i cili ka postuar një reels në Instagram me të në sfond.
“Valbona Magjike”-shkruan ai, ku kënga i shton efektin stilistik pamjeve magjepsëse.

Ambasadorja amerikane Yuri Kim ka uruar nga Vlora, Ditën e Pavarësisë. Përpara Shtëpisë së Flamurit, diplomatja amerikane thotë në shqip: “Gëzuar Ditën e Pavarësisë”. Në një postim në rrjetet sociale, Kim shkruan se 100 vjet më parë asgjë nuk mundi t’i ndalonte SHBA-të të mbronin pavarësinë e Shqipërisë, dhe asgjë nuk mund të na ndalojë të festojmë sot.

“Asgjë nuk mundi ta ndalojë SHBA që të mbronte pavarësinë e Shqipërisë njëqind vjet më parë. Asgjë nuk mund të na ndalojë të festojmë sot 109-vjetorin e #DitëssëPavarësisësëShqipërisë. Gëzuar!”, thekson ambasadorja amerikane.

Sot në 109 vjetorin e Pavarësisë së Shqipërisë ka nisur nga puna edhe ndërtimi i aeroportit të Vlorës.

Në këtë nisje ka marrë pjesë edhe biznesmeni i njohur Behgjet Pacolli i cili njihet për raportin e ngushtë me kryeministrin Rama.

Gjatë fjalës së tij Pacolli shpërtheu në lëvdata ndaj kryeministrit Rama duke e konsideruar shembull dhe kryeministri që ai do të ketë.

Behgjet Pacolli: Ky është kryeministri që unë preferoj, një kryeministër me energji të paparë, një kryeministër me dashuri dhe dëshirë shumë të madhe për të ndryshuar Shqipërinë.

Kryeministër ja keni ndalë kësaj pune, ju përgëzoj në rrugëtimin tuaj, jeni duke punuar për qytetarët më të mirë dhe ne kemi të drejtë të kemi të ardhme më të mirë për fëmijët tanë, për vetveten dhe për gjithë miqtë tanë. Na qoftë e mbarë fillimi i kësaj vepre madhështore”, tha Pacolli.

Sot është 28 nëntori, Dita e Shpalljes së Pavarësisë së Shqipërisë, dhe të gjithë zgjedhin ta festojnë në mënyra të ndryshme.

Akrobatja e njohur, Fiona Rushiti, e cila njihet për performancat e saj në qiell të hapur ka zgjedhur të ngrejë “shqiponjën” te “Sheshi Nënë Tereza”.

Së bashku me tifozët kuqezi, pjesë e të cilëve është dhe vetë, ajo ka dhuruar një performancë të jashtëzakonshme, me të gjitha ngjyrat dhe simbolet kuq e zi, ulur mbi shqiponjën dykrenare.

Fiona tregon se realizimi i performacës nuk ka qenë aspak i lehtë dhe shpesh ka menduar se nuk do ia dilte.

“Doja që këtë 28 nëntor të vija si shqiponjë e shqiptarëve”, si dhe për të treguar vlerat dhe bukurinë e flamurit tonë.
Përgatitja e shqiponjës ishte shumë e vështirë sepse është punuar e gjitha me dorë.
Për mua kjo do të jetë një ndër performancat më të veçanta , dhe më të bukura sepse nisi thjesht si një ide. Ka qenë shumë e vështirë gjithë përgatitja e saj, më kanë dalë shumë pengesa rrugës, saqë nga momenti në moment mendoja që do e kisha të pamundur ta realizoja”, tha Fiona për abcnews.al.

Përmes kësaj performance, mesazhi që akrobatja ka dashur të japë është të mos harrojmë kush jemi dhe nga vijmë.

“Mesazhi më i mirë është që të mos harrojmë kush jemi e nga vijmë, mos ta harrojmë gjuhën, kulturën, traditat dhe vlerat që kemi si komb. Jemi të gjithë shqiptarë, pavarësisht territorit ku jetojmë dhe veprojmë dhe nuk na ka hije të fusim frymë përçarjeje”, thotë ajo./e.b-abcnews.al

VLORË
Presidenti i Republikës Ilir Meta dhe kryeministri Edi Rama ndodhen sot në Vlorë për 109-vjetorin e Pavarësisë së Shqipërisë.

Meta e Rama kanë marrë pjesë në ceremoninë e ngritjes së flamurit, teksa më pas kanë zhvilluar homazhe dhe kanë vendosur kurora me lule në monumentin e Pavarësisë.

E pranishme ishte dhe kryetarja e Kuvendit Lindita Nikolla, si dhe drejtues lokalë. Disa aktivitete janë parashikuar të mbahen gjatë ditës së sotme me rastin e 28 nëntorit Ditës së Flamurit.

Presidenti Ilir Meta ka uruar 28 nëntorin, festën e Pavarësisë së Shqipërisë me një foto.

Ai ka publikuar një foto me nipin e Presidentit të ndjerë të Kosovës Ibrahim Rugova, teksa të dy bëjnë me duar simbolin e shqiponjës.

“Të dashur miq, Së bashku me Lekën, nipin e Presidentit historik të Kosovës, Ibrahim Rugova, ju urojmë të gjithë shqiptarëve kudo ndodhen: Gëzuar Pavarësinë e Shqipërisë, Ditën e Flamurit tonë Kombëtar! 🇦🇱”, shkruan Presidenti Meta.

Në Vlorë u zhvillua sot ceremonia e ngritjes së Flamurit me rastin e 109 vjetorit të Pavarësisë. Por vëmendjen e ka tërhequr sjellja e Kryeministrit Edi Rama, i cili është shfaqur mospërfillës ndaj Kryebashkiakut të Vlorës, Dritan Leli, me të cilin prej disa muajsh ndodhet në një përplasje politike, edhe pse të dy i përkasin Rilindjes.

Leli ishte një nga pjesëmarrësit në ceremoni, por ka mundur të takohet vetëm me Kryeparlamentaren Lindita Nikolli, e cila gjithashtu shfaqet në krah të Ramës, teksa ecin mbi tapetin e kuq.

Ndërkohë në anën tjetër Presidenti Ilir Meta ka shmangur çdo kontakt me Kryeministrin dhe i vetmi moment kur ai dhe Rama ndodhen në një distancë prej të paktën 2 metra, ishte momenti i ngritjes së Flamurit dhe ekzekutimi i himnit kombëtar.

Më pas, Meta shkëputet duke vijuar ceremoninë, ashtu sikundër edhe Rama, që preferon për disa momente të qëndrojë në krah të Kryeparlamentares, ndërsa Kryebashkiakun Leli e shpërfill totalisht.

Kreu i Qeverisë, pavarësisht se kalon përpara Lelit, duket se ruan ende inatet e pak muajve më parë, kur pas refuzimit nga ana e Kryebashkiakut të ofertës për të kandiduar për deputet më 25 prill, bëri çdo lëvizje që ta largonte nga drejtimi i Bashkisë, por dështoi. Në fund, Rama vendosi të përjashtojë Lelin nga rradhët e socialistëve, ndërsa vijon kritikat ndaj tij, sa herë shfaqet në Vlorë.

Së fundmi, Rama duket se zgjodhi të japë një tjetër mesazh publik, duke shpërfillur Kryebashkiakun edhe në festën e Flamurit.