Aktualitet

Bashkëpunimi i Policisë me komunitetin si dhe rritja e besimit të qytetarëve ndaj forcave të rendit mbetet një faktor thelbësor në mbarëvajtjen e rendit dhe sigurisë në vend.

Duke shprehur mirënjohjen për forcat e policisë, një grup fëmijësh në qytetin e Vlorës u kanë dhuruar sot shishe me ujë shërbimeve të Policisë Rrugore.

Fëmijët kanë bërë gjestin human nën shoqërinë e prindërve të tyre, ndërsa falënderuan efektivët e policisë për mundin dhe sakrificën në këto ditë të nxehta vere.

Ndërtimi i partneriteteve të qëndrueshme mes policisë dhe komunitetit mbetet një prioritet i Policisë shqiptare. Duke qenë më afër komunitetit, më profesionale dhe më komunikuese me të, Policia përcjell besueshmëri, ndaj dhe policimi në komunitet vlerësohet si mjaft i rëndësishëm./atsh

Invalidët dhe pensionistët në bashkinë e Urës Vajgurore tashmë kanë një ambient dedikuar për t’u çlodhur.

Kryetarja e bashkisë së Urës Vajgurore, Juliana Memaj thotë se për disa shtresa të rëndësishme sociale, bashkia ka çelur një ambient të dedikuar, ku jo vetëm mund ta përdorin për lojëra të ndryshme, por edhe si bar-kafe, ku përfitojnë produktet me çmime të reduktuara.

“E nisëm javën me një lajm të mirë për disa shtresa të rëndësishme sociale që janë në fokus të bashkisë sonë, duke hapur një ambient të dedikuar, ku jo vetëm mund ta përdorin për lojëra të ndryshme, por edhe si bar-kafe, ku përfitojnë produktet me çmime të reduktuara”, – thotë Memaj. /atsh

Policia e Shtetit ftoi sërish sot qytetarët që të denoncojnë çdo shkelje apo abuzim përmes aplikacionit “Komisariati Dixhital”.

““Komisariati Dixhital” – Policia në dorën e qytetarit. Shkarko aplikacionin falas e denonco çdo shkelje e abuzim”, i drejtohet policia qytetarëve.

“Komisariati Dixhital” është një instrument për t’i dhënë mundësi qytetarëve të denoncojnë në çdo moment shkeljen e ligjit dhe atyre që shkelin ligjin.

Përmes këtij aplikacioni, qytetari ka mundësi jo vetëm të denoncojë, por edhe të mbikëqyrë veprimin e policisë mbi denoncimin e tij, si dhe të shikojë e ndjekë jo vetëm raportimin e tij, por edhe të qytetarëve të tjerë.

Komisariati Dixhital është i disponueshëm falas në App Store për përdoruesit e iOS.
Gjithashtu është i disponueshëm falas dhe në Google Play, për përdoruesit e Android./atsh

Vijojnë me ritme të shpejta punimet në Qendrën Historike të Vlorës. Çdo ditë që kalon shikon ndryshimet pozitive, ku 68 objektet që gjendet në këtë zonë po marrin ‘shkëlqimin’ e strukturës bazë të shtëpive të Vlorës, mes tyre edhe godina të një rëndësie të veçantë, duke e bërë këtë qytet të rëndësishëm dhe me vlera të veçanta, jo vetëm për bregdetin e saj, por edhe për Qendrën Historike.

Tashmë po shkojnë drejt përfundimit punimet në Rrugën “Justin Godard” dhe atë të “Hebrenjve”, ku ndërhyrjet kanë qenë në disa fronte: në infrastrukturën rrugore, unifikimin e fasadave dhe nxjerrjen në dritë të hijeshisë së ndërtesave historike, të kësaj zone, të cilat janë mbuluar prej ndërtimeve pa kriter të disa dhjetëvjeçarëve.

Së bashku me partnerë si AADF dhe Bashkia e Vlorës, po punohet për restaurimet e fundit duke i dhënë një tjetër pamje qytetit dhe vlerë të shtuar për zhvillimin e turizmit, biznesit dhe duke rritur të ardhurat ekonomike të zonës.

Rikualifikimi i qendrës historike synohet të jetë një nga rrugët më historike dhe turistike të Shqipërisë.

Në kompleksin muzeal të rrugës “Justin Godard” “strehohen” godina tejet të rëndësishme si; shtëpia e qëndistares së Flamurit Marigo Posio, godina e ish-klubit Labëria (sot Muzeu Etnografik) apo edhe rruga e Hebrenjve, ku pritet të ndërtohet dhe një muze enkas për ata./atsh

Presidenti i Republikës, Ilir Meta e ka cilësuar sot At Zef Pllumi si simbol të humanizmit dhe sakrificës së paharruar në emër të vlerave hyjnore.

Duke e përkujtuar në 95-vjetorin e lindjes së tij, Meta është shprehur se ne përkujtojmë sot me nderim e respekt të thellë veprën e jashtëzakonshme dhe porositë e tij të urta për një Shqipëri më të drejtë dhe më humane, ku respektohen të drejtat e liritë themelore të njeriut.

“Në 95-vjetorin e lindjes së At Zef Pllumit, udhëheqësit të ndritur shpirtëror, simbolit të humanizmit dhe sakrificës së paharruar në emër të vlerave hyjnore, lirisë dhe dinjitetit njerëzor, ne përkujtojmë sot me nderim e respekt të thellë veprën e jashtëzakonshme dhe porositë e tij të urta për një Shqipëri më të drejtë dhe më humane, ku respektohen të drejtat e liritë themelore të njeriut”, ka theksuar Meta.

“Me një kontribut të çmuar për ringritjen e Kishës Katolike në Shqipëri, At Zef Pllumi ishte dhe do të mbetet shembulli i jashtëzakonshëm i dashurisë për dijen dhe demokracinë, i cili si klerik por dhe si qytetar i angazhuar, nxiti dhe frymëzoi mbarë shoqërinë tonë, në veçanti të rinjtë, për të ndjekur rrugën e duhur përmes dijes, demokracisë dhe drejtësisë, drejt vlerave perëndimore të mohuara për 45-vite”, ka nënvizuar Meta.

“Rrno vetëm për me tregue”, veprat dhe dëshmitë e tij të tjera rrënqethëse për krimet dhe monstruozitetin e regjimit komunist, mbeten gjithmonë aktuale si udhërrëfyes, jo vetëm për të njohur me transparencë të kaluarën tonë dhe për të mos ta harruar kurrë atë, por edhe për të na ndihmuar për të luftuar çdo të keqe dhe formë despotike që na largon nga Europa e Bashkuar dhe synon ta kthejë Shqipërinë 30 vite pas”, është shprehur Meta./atsh

Turizmi, sipërmarrja, strategjitë e punësimit dhe fuqizimi i të rinjve për tregun e punës ishin në qendër të aktivitetit të zhvilluar në Karavasta nga SMILE Albania me mbështetjen e DIMAK Albania.

Ky aktivitet pati pjesëmarrje të lartë të të rinjve, ku gjithashtu pati diskutime dhe ushtrime konkrete, të cilat japin një perspektivë të re mbi mundësitë që gjenden në Shqipëri.

1 nga 14

Në Karavasta, SMILE Albania me mbështetjen e DIMAK Albania, zhvilloi me sukses një aktivitet me të rinjtë shqiptarë! Fokusi qëndronte në temat: turizmi, sipërmarrja, strategjitë e punësimit dhe fuqizimin e të rinjve për tregun e punës. Ky aktivitet u shoqërua me një pjesëmarrje të lartë, së bashku me diskutime dhe ushtrime konkrete, të cilat japin një perspektivë të re mbi mundësitë që gjenden në Shqipëri.

Projekti “Smile Albania” është një projekt që shoqëron të gjithë sezonin turistik, është një projekt të cilin Ministria e Turizmit dhe e Mjedisit e fokuson në paraqitjet e bukurisë së natyrës shqiptare, por edhe në mikpritjen e turistëve që vijnë në vendin tonë.

Përveç informimit turistik, aktivistët e rinj që angazhohen janë pjesë e një ndërgjegjësimi për mjedisin e plazheve e përreth, zona që përballen me presionin e aktivitetit turistik dhe rritjes së pranisë njerëzore./atsh