Aktualitet

Kryetari i Partisë Demorkatike, Lulzim Basha është shprehur se, “asnjë vend nuk është imun ndaj rrezikut të koronavirusit dhe tani që kemi rastet e para të konfirmuara edhe në Shqipëri, është më e rëndësishme se kurrë që të gjithë të reagojmë me kujdes dhe me përgjegjshmëri”.

“Të gjithëve do na duhet të bëjmë sakrifica në mënyrë që të luftojmë përhapjen e virusit: të kujdesemi shumë për higjienën tonë personale, të kufizojmë udhëtimet dhe nëse nuk ndihemi mirë të rrimë në shtëpi”, ka theksuar Basha.

“Sot nuk është koha për panik, por për masa të shpejta dhe të vendosura”, ka shtuar Basha./atsh

Dy qytetarët e konfirmuar me koronavirusin e ri, babë e bir, 54 vjeç dhe 28 vjeç kanë qëndruar disa ditë në Firence dhe kanë udhëtuar në rrugë tokësore nga Firence drejt Tiranës, nëpërmjet pikës së Hanit të Hotit me makinë personale.

“Menjëherë pas shfaqjes së shenjave klinike dhe lajmërimit të urgjencës kombëtare në nr.127 i janë marrë mostrat, të cilat u konfirmuan mbrëmjen e sotme nga laboratori i virologjisë në IShP. Dy rastet e konfirmuara me COVID-19 janë në gjendje të stabilizuar dhe po trajtohen në spitalin infektiv”, thuhet në njoftimin për shtyp.

Ndërkohë strukturat e shëndetit publik po realizojnë hetimin epidemiologjik dhe marrjen e mostrave të kontakteve./atsh

Kryeministri Edi Rama ka uruar sot në Ditën Ndërkombëtare të Grave të gjithë vajzat dhe gratë shqiptare duke i konsideruar gjysma më e mirë e popullit.

“ Mirëmëngjes, me një urim të përzemërt të gjitha grave e vajzave shqiptare, që janë gjysma me e mirë e këtij populli”, shprehet ai.

Po ashtu Kryeministri postoi një video të titulluar qeveritë shqiptare ndër vite, ku nga viti 1991 deri në ardhjen në pushtet të qeverisë Rama, në qeveritë e mëparshme pushtetin e kishin burrat, ndërsa sot balanca mes grave dhe burrave është e barabartë.

Duke ju referuar statistikave qeverisëse pushteti i grave në qeveri ishte nga zero, deri 24 % në vitin 2001.

“Qeveria e Ylli Bufit, 11 qershor 1991-6 dhjetor 1991 100% burra, zero gra. Qeveria e Vilson Ahmetit 18 dhjetor-13 prill 1992 100% burra, zero gra, qeveria e Aleksandër Meksit 13 prill 1992-6 gusht 1996 100% burra. Zero gra, qeveria e Bashkim Finos, 11 mars 1997-24 korrik 1997 100% burra zero gra, qeveria e Fatos Nanos 25 korrik-28 shtator 1997-28 shtator 1998, 91% burra. 9% gra. Qeveria e Pandeli Majkos 2 tetor 1998-25 tetor, 1999 89% burra. 11% gra. Qeveria e Ilir Metës 28 nëntor 1999- 6 shtator 2001, 76% burra-24% gra. Qeveria e Sali Berishës 9 shtator 2005-10 shtator 2009 94% burra, 6% gra. Qeveria e Edi Ramës 50% burra. 50% gra”./atsh

Presidenti Ilir Meta ka uruar sot në Ditën Ndërkombëtare të 8 marsit gratë shqiptare.

“Një urim të përzemërt për më të shtrenjtat, më të dashurat dhe të pazëvendësueshmet e familjeve tona, për çdo nënë, grua, vajzë e motër shqiptare: Gëzuar 8 marsin! Sot është vetëm një ditë simbolike, por e gjithë jeta e marrë së bashku nuk do mjaftonte për t’ju shprehur me përulje mirënjohjen më të pakufishme për dashurinë, përkushtimin dhe sakrificat e jashtëzakonshme për familjen e ngrohtë, shoqërinë e zhvilluar dhe begatinë e vendit”, shprehet presidenti Meta në urimin e tij.

“Fuqizimi i vajzave dhe grave i bën sfidat më të lehta! Por ne ende kemi një hendek të rëndësishëm për të kapërcyer për t’i vënë përgjithmonë në histori vargjet e Çajupit, i cili protestonte ndaj burrave. Shqipëria do të bëhet një vend edhe më i bukur, vetëm me vajza e gra të lumtura e të realizuara në çdo aspekt, të barabarta me burrin si në jetën publike ashtu edhe atë profesionale, dhe që nuk keqpërdoren nga politika. Duhet të çlirojmë potencialet e vërteta dhe të plota të vajzave dhe grave të Shqipërisë, që të ndalim shpopullimin e Atdheut dhe degradimin e familjes. Lidershipi i tyre do të ndihmojë që Shqipëria të bëhet e shkëlqyeshme dhe frymëzuese për fëmijët dhe të rinjtë tanë”, tha ai.

“Një falenderim të veçantë kam sot edhe për dhjetëra mijëra nëna, gra dhe të reja, të cilat ju bashkuan më 2 mars Pranverës Kuqezi, duke i dhënë me energjinë dhe vitalitetin e tyre më shumë forcë zërit të sovranit”, përfundoi Presidenti urimin e tij./atsh

Ministrja e Shtetit për Marrëdhëniet me Parlamentin, njëherazi drejtuesja politike e PS Tiranë, Elisa Spiropali ka uruar të gjitha gratë dhe vajzat për ditën e 8 marsit.

Në mesazhin e saj, Spiropali shprehet se çdo ditë duhet t’i mësojmë vajzat se askush nuk mund t’ua thyejë ëndrrat.

“Jo vetëm për 8 Mars, por çdo ditë t’i mësojmë vajzat se asnjë nuk mund t’ua thyejë ëndrrat, se s’ka tavan që i ndal dhe s’ka forcë që i pengon të bëhen ato që janë!”- shprehet Spiropali në urimin e saj.

Urimin e saj ministrja e shoqëron me një foto domethënëse, teksa shihet buzë detit, përkrah vajzës së saj Nalta. ‘I’M A WOMAN’. WHAT’S YOUR SUPERPOWER’? (Unë jam një grua, cila është superfuqia jote”?) – është shprehja që shoqëron foton e që ministrja ka zgjedhur të uroj 8 marsin./atsh

Kryeministri Edi Rama ka uruar sot gratë shqiptare me rastin e 8 marsit Ditës Ndërkombëtare të Grave.

Kryeministri Rama ka zgjedhur urimin e Zahos që i bënë gjyshes së tij, Anetës, me rastin e 8 marsit për të uruar të gjithë nënat dhe gratë shqiptare.

“Nona gëzuar 8 marsin”, shprehet Rama.

Foton e veçantë të Zahos duke i dhuruar lule gjyshes së tij, Kryeministri Rama e publikoi si si simbol të urimit për çdo nënë shqiptare./atsh