Aktualitet

Kryeministri Edi Rama deklaroi se Shqipëria është në rreshtin e parë të vendeve që po ekzekutojnë masa drastike për frenimin e përhapjes së COVID-19.

“Ne jemi në rreshtin e parë të vendeve në ekzekutimin e masave shtrënguese por asnjë vend, asnjë ekspertizë dhe asnjë llogari fantazi ekonomike nuk e ka pëfshirë deri më sot, pjesën kritike të zinxhirit ekonomik dhe planit të masave drastike të kufizimit të aktivitetit njerëzorë brenda territorit, asnjë. As Italia tani që flasim nuk i ka mbyllur fabrikat, as Izraeli që ka mbyllur në karantinë të detyruar mbi 100 mijë vetë dhe që i dënon me burg nëse e shkelin, nuk i ka mbyllur fabrikat. As Franca që nesër kalon në shtetrrethim total, pas orës 18.00 të ëdo dite nuk do të mbyllë asnjë fabrikë, madje ne deri tani që flasim jemi po ashtu i pari vend që mbyllim totalisht transportin publik qytetas dhe ndërqytetas në rang republike. Apo jemi ndër të paktët akoma, me saksionet e reja për këmbësorët që hyn në fuqi nesër. Kur Kina mbylli Vuhanin me 40 milionë banorë, hapi fabrikat fason për prodhimin e maskave dhe sot që flasim, vendet po bëjnë të njëjtën gjë. Njëri pas tjetrit. asnjë vend nuk është gjendur i përgatitur me të gjithë sasinë e nevojshme të maskave për përdorim masiv dhe respirator mjekësor për pacientët në gjendje të rëndë. Kudo është shpërndarë stoku, i ashtuquajtur i skaduar dhe po ngrihet me shpejtësi marrëmendëse, një industri e tërë për prodhimin e maskave, ashtu sikundër vendet kanë ndaluar qysh herët eksportet e materialeve mjekësore që duhen për përballimin e kësaj situate”, u shpreh Rama.

Sipas Rames, ekspertët ndërkombëtarë lidhur me punonjësit që duhet të shkojnë në punë thonë se “masat mbrojtëse në një mjedis të kontrolluar pune, në hallkat kritike të zinxhirit ekonomik dhe zbatimi i këshillave nga vetë punonjësit për të ruajtur distancën, për të larë duart, për të shmangur kontaktet fizike, funksionojnë. Ne u kemi kërkuar pa pushim kompanive të marrin masat e thjeshta por të domosdoshme për të mbrojtur personelin dhe jemi në komunikim të vazhdueshëm me ta. Kemi përcaktuar në aktin normativ, masat special ndëshkuese për kompanitë që do të kapen në shkelje dhe kemi në terren grupet e inspektimit. E di shumë mirë që idealja do të ishte që e nesërmja e ardhshme të na garantohej nga zoti dhe asnjë frymë e gjallë të mos dilte nga dera e shtëpisë, por zoti na ka dhënë fuqinë e shpirtit dhe të mendjes që nëse duam t’i përdorim sa dhe si duhet, të bëjmë mrekullira për njëri-tjetrin dhe për vendin tonë. Ndërsa punët e tjera na i ka lënë ne, njerëzve. Prandaj duhet të jem i qartë fare, motra e vëllezër. Kjo është luftë dhe në luftë jemi një, por nuk jemi të githë njësoj. Sepse disa prej nesh duhet të dalin sot nga shtëpia që kur të mbarojë lufta, të mos na zërë brenda shtëpia jonë e përbashkët./atsh

Kryeministri Edi Rama deklaroi sot se “po përgatitemi për ndalimin total të daljes së pensionistëve nga shtëpia, deri kur kjo luftë të mbarojë”.

“Nuk mund të presim më ndërgjegjësimin e asaj pakice që vazhdon sfidon rregullat, duke vënë në rrezik shumë serioz veten dhe të tjerët. Pensionistët kryefamiljarë në qytete duhet të shërbehen me vajtje-ardhjet për shpezat ushqimore dhe farmaceutike nga fëmijët e tyre. Ata që nuk i kanë fëmijët në të njëjtin qytet, do të shërbehen nga shteti përmes skuadrave të përbashkëta të bashkive dhe qeverisë”, tha Rama.

Ai theksoi se “të gjitha bashkitë në bashkëpunim me Ministrinë e Shëndetësisë e Mbrojtjes Sociale, Institutin e Sigurimeve Shoqërore, Shërbimin Social Shtetëror dhe Agjencinë Kombëtare të Teknologjisë së Informacionit, janë në punë për planin e mbështetjes në shtëpi të pensionistëve kryefamiljarë në çdo qytet”.

“I lutem çdo biri dhe bije prindërish të moshuar, bëni të pamundurën të mbani në shtëpi babain e nënën tuaj, gjyshin e gjyshen e fëmijëve tuaj! T’i lesh të dalin është njësoj si t’u hapësh derën të shkojnë për të marrë pjesë në një bombardim! O Zot çfarë sikleti ta thuash: Mos u jepni dorën dhe rrini tek dera në distancë kur u çoni ushqimet apo ilaçet në shtëpinë e tyre më vete”, tha Rama.

Po ashtu, ai tha se “kudo ku e keni të mundur në shtëpitë tuaja, mbajini në dhomë më vete”.

“Që t’i përqafojmë fort nesër dhe t’i kemi sa më gjatë pranë nesh, duhet t’i izolojmë sot nga çdo kontakt i mundshëm, me botën po e po, por edhe me vetë ne, që as dorën nuk duhet t’u japim dhe as pragun nuk duhet t’ua shkelim kur u çojmë ushqimet a ilaçet tek dera”, tha ai.

Ndjesë 1.000.000 herë, tha Rama duke shtuar se “kjo ishte më e vështira që duhet të nxirrja nga goja dhe s’do doja kurrë të isha unë që duhet ta bëja këtë, por s’kam si ta mbaj për vete, kur s’ka absolutisht as edhe një rrugë tjetër”.

“Kur themi frikë jo, kujdes po, fjala kujdes në këtë luftë ka fytyrën e prindërve tanë”, tha ai./atsh

Kryeministri Edi Rama deklaroi sot se “duke nisur nga sot, çdo ditë në vijim pas orës 18.00 do të ndalohet edhe lëvizja me këmbë në të gjithë territorin e Republikës së Shqipërisë”.

“Nga nesër, me urdhër të Ministres së Shëndetësisë do të hyjnë në fuqi gjoba edhe për këmbësorët dhe për ata që ulen në parqe apo mjedise të tjera të hapura. Ndjesë 1000 herë, po s’ka rrugë tjetër për ta fituar këtë luftë, ku askush përveç atyre që shërbejnë në strukturat kritike të shtetit dhe atyre që punojnë në hallkat themelore të zinxhirit ekonomik të vendit, nuk duhet të dalë nga shtëpia përveçse për nevojat bazë të furnizimit me ushqim apo ilaçe”, tha Rama.

Ai theksoi se “shëtitjet nuk janë domosdoshmëri jetike në këtë kohë lufte dhe uljet nëpër parqe janë të palejueshme”.

“Më shani e talluni me mua sa të doni, s’ka asnjë problem, po mos diskutoni dhe aq më keq thyeni rregullat! Frikë aspak, po kujdes po! Deri në fund! Kjo nuk është lojë kukafshehthi që mbaron kur duam ne, po luftë që ne do ta fitojmë vetëm duke i bërë me vullnet të hekurt të gjitha këto që nuk duam”, tha Rama./atsh

Posta Shqiptare publikoi 2 numra kontakti për të gjithë pensionistët në qarkun e Tiranës.

Në këto dy numra kontakti, pensionistët mund të kontaktojnë në rast se kanë paqartësi apo kërkojnë ndonjë informacion sa i përket shpërndarjes së pensioneve në shtëpi.

Për të shmangur prekjen nga COVID-19 për pensionistët, si grupmosha më e riskuar, qeveria përmes një akti normativ vendosi dërgimin në shtëpi të pensioneve, duke shmangur kështu radhët në sportele.

“Të gjithë pensionistët e qarkut Tiranë, përveç informacioneve të afishuara në zyrat postare dhe në faqen zyrtare të Postës Shqiptare, për çdo informacion apo paqartësi në lidhje me shpërndarjen e pensioneve në adresë, mund të kontaktojnë në numrat e kontaktit të Filialit të Postës Tiranë: 0692285591 dhe 0694316998”, njoftoi Posta Shqiptare./atsh