Aktualitet

Meta kthen për rishqyrtim në Kuvend ligjin “Për shërbimet e pagesave”

Aktualitet, Lajmi i fundit, Politike / /

Presidenti i Republikës Ilir Meta dekretoi kthimin për rishqyrtim në Kuvend të ligjit “Për shërbimet e pagesave”.

Meta u shpreh se disa nga arsyet e kthimit të ligjit janë mospërcaktimi i kritereve të qarta të licencimit të institucioneve të pagesave; mospërcaktimi i shkeljeve konkrete që çojnë në vendimmarrjen për heqjen e licencës të institucioneve të pagesave; mospërcaktimi i funksioneve të qarta dhe shteruese mbikëqyrëse të autoritetit licencues dhe mekanizmave mbi mënyrën e ushtrimit të kësaj mbikëqyrjeje.

Ligji është propozim i Këshillit të Ministrave dhe ka për qëllim krijimin e kuadrit ligjor për funksionimin e shërbimeve të pagesave në Republikën e Shqipërisë, duke e përafruar pjesërisht me Direktivën 2015/2366 BE të Parlamentit Europian dhe të Këshillit, të datës 25 nëntor 2015, “Për shërbimet e pagesave në tregun e brendshëm”.

Presidenti shprehet se e shqyrtoi ligjin “Për shërbimet e pagesave” duke iu referuar përmbajtjes së aktit të dërguar për dekretim dhe shpallje, praktikës parlamentare të ndjekur për këtë qëllim, duke bërë një vlerësim dhe analizë të kujdesshme të parashikimeve të aktit, edhe në raport me rekomandimet që duhet të përmbushë Republika e Shqipërisë në kuadër të raporteve të organizmave ndërkombëtare për eleminimin e rreziqeve për parandalimin e pastrimit të parave dhe luftës së financimit të terrorizmit, përfshirë rekomandimet e Komitetit të Moneyval të Këshillit të Evropës.

“Rregullimi i shërbimeve të pagesave me ligj të posaçëm është shumë i mirëpritur, veçanërisht kur ky ligj, duke parashikuar mundësinë e operatorëve të tjerë ekonomikë për të zhvilluar aktivitet në fushën e shërbimit të pagesave përkundrejt licencës përkatëse, rrit konkurrencën në treg. Rritja e konkurrencës patjetër që do të ndikojë si në uljen e kostos së transaksioneve të pagesave, si në rritjen e cilësisë së shërbimit, ashtu dhe në rritjen e aksesit në informacion të qytetarëve mbi mundësitë e kryerjes së pagesave përmes këtij shërbimi. Gjithashtu, ky ligj vlerësohet pasi ofron një mundësi më shumë zgjedhjeje për konsumatorin. Ndërsa parashikimi i krijimit të një zyre të veçantë për shqyrtimin e ankesave të konsumatorit, forcon edhe më shumë mbrojtjen e tij”, u shpreh Meta.

Por nga ana tjetër, sipas tij, në raport me vetë procesin e licencimit dhe mbikëqyrjes së shoqërive të licencuara që do të zhvillojnë aktivitetin në fushën e shërbimit të pagesave, ligji paraqet disa problematika të cilat krijohen nga paqartësia e disa dispozitave; mungesa e harmonisë së tyre me legjislacionin ekzistues; apo nga hapësira që disa dispozita krijojnë për keqzbatim në praktikë, të cilat do të shtjellohen në vijim.

“Reflektimi mbi këto problematika dhe adresimi i tyre nga Kuvendi i Shqipërisë do të ofrojë një terren më të sigurtë ligjor për operatorët ekonomikë dhe në ruajtjen të pacenuar të interesit publik në tërësi”, shprehet Meta. /atsh

Meta kthen për rishqyrtim në Kuvend ligjin “Për shërbimet e pagesave” Read More »

Basha me Shoqatën e Pronarëve: Zgjidhje përfundimtare sipas standardeve europiane për pronarët

Aktualitet, Politike / /

Kryetari i Partisë Demokratike, Lulzim Basha pati sot një takim me përfaqësues nga Shoqata e Pronarëve, me të cilët, siç u shpreh “ndau shqetësimin për qëndrimin dhe lobimin negativ të qeverisë Rama për çështjen e pronave”.

“I gjithë korpusi ligjor dhe veprimet e qeverisë Rama, kanë qenë kundër pronës private dhe në shërbim të planeve korruptive të biznesmenëve të lidhur me të, pjesë e të cilit është edhe ligji i investimeve strategjike në vitin 2015. Sikundër dhe ligji i ri i pronave i cili e trajton pronën private të individit si një mall në shportën e oligarkëve, pa pasur respekt për shenjtërinë e pronës dhe zotëruesit e saj”, u shpreh Basha.

Duke pranuar përgjegjësitë e PD në të shkuarën për këtë çështje, Basha u shpreh se “i sigurova përfaqësuesit e shoqatës së pronarëve se qeveria e ardhshme do të mundësojë një zgjidhje përfundimtare sipas standardeve europiane për pronarët, gjithmonë në konsultim me ta”.

“Së bashku me ta u dakordësuam për të hartuar një projekt të qartë dhe gjithashtu piketat kyçe të një projektligji që do të zëvendësojë korpusin kriminal të projektligjeve në lidhje me pronën, të miratuar nga qeveritë Rama. Nën koordinimin e zonjës Ledina Mandia, ne do të ndihmojmë dhe do të ideojmë së bashku me shoqatën e pronarëve një korpus ligjor që do të përpiqet të japë zgjidhjen e duhur për pronën në Shqipëri”, – nënvizoi Basha. /atsh

Basha me Shoqatën e Pronarëve: Zgjidhje përfundimtare sipas standardeve europiane për pronarët Read More »

Skema Kombëtare/ Elsoni dhe Oltioni, dy prodhues të fidanishteve të hardhisë së rrushit, përfituan mekanikë të re bujqësore

Aktualitet / /

Në Sukth të qarkut Durrës, Elsoni dhe Oltioni janë dy nga prodhuesit më të mëdhenj në vend të fidanishteve të hardhisë së rrushit.

Falë mbështetjes nga Agjencia e Zhvillimit Bujqësor dhe Rural ata janë pajisur me mekanikë të re bujqësore që ua ka bërë më të lehtë procesin e prodhimit të rrënjëve të hardhive të rrushit.

Kryeministri Edi Rama duke sjellë në vëmendje historinë e tyre, theksoi se “deri më 19 qershor, duke aplikuar online në https://e-albania.al me zero dokumente, përfitoni financime nga Skema Kombëtare, për një të ardhme më të sigurt të fermerit shqiptar”.

Frida Krifca, drejtoresha e AZHBR-së që ka vizituar këtë sipërmarrje tha se “si drejtoreshë e kësaj agjencie me duhet shpeshherë të shpjegoj se përse programi IPARD është jo i pamundur për fermerët shqiptarë, pse kemi 124 kontrata sot, nga fermeri më i vogël që ka hedhur 10 mijë euro investim, deri në 2 milionë euro investim”.

“Kemi pasur rreth 2 mijë fermerë të mbështetur me buxhetin e shtetit për masa të ndryshme që i duhen fermës, mbjelljet, që nga sistemi i ujitjes, teknikat e ndryshme të mekanizimit të fermave të vreshtarive. Në programin IPARD kemi 14 projekte që janë ose për ndërtim vreshtarish të mëdha, ose për kantina për përpunimin e mëtejshëm të rrushit që shkon për prodhimin e verës apo pijeve të tjera. Veç 2 mijë fermerëve që janë mbështetur me vreshtarinë për prodhimin kemi rreth 1600 ha vresht që është mbështetur nga AZHBR nëpërmjet këtyre projekteve”, – theksoi Krifca.

Ajo bëri të ditur se “aplikimet për Skemën Kombëtare i çelëm në 29 maj dhe deri tani kemi mbi 5 mijë aplikime. Nuk duhen nënvlerësuar në asnjë moment fermerët dhe dëshira e tyre për të përqafuar të renë dhe mënyrat e reja të përthithjes së shërbimeve. Vitin e kaluar në ditën e parë kemi patur 700 aplikime, ndërsa këtë vit ditën e parë kemi pasur 4500 aplikime”.

Elsoni dhe Oltioni u shprehën se “ne kemi që në 2002 që merremi me prodhimin e vreshtave. Duke dëgjuar për skemën e IPARD morëm iniciativën për të bërë letrat, dolëm fitues të kësaj skeme, morëm mjetet bujqësore dhe agregatët. Kemi bërë një investim prej 50 mijë euro, ndërkohë qe ne jemi subvencionuar me rreth 39 milionë lekë të vjetra. Jemi shumë të kënaqur”.

“Më parë punën e bënim me mjete me qira, ndërsa tani është ulur forca punëtore. Kemi filluar prodhimin në 2006. Jemi dy nga prodhuesit më të mëdhenj të fidanëve në Shqipëri. Pjesa më e madhe shkon në kantina dhe individë”, – thanë ata./atsh

Skema Kombëtare/ Elsoni dhe Oltioni, dy prodhues të fidanishteve të hardhisë së rrushit, përfituan mekanikë të re bujqësore Read More »

Meta: Shqipëria dhe Italia kanë sot marrëdhënie të veçanta e të partneritetit strategjik

Aktualitet, Politike / /

“Shqipëria dhe Italia kanë sot marrëdhënie të veçanta e të partneritetit strategjik”, thekson Presidenti Ilir Meta në një mesazh urimi drejtuar Presidentit të Republikës italiane, Sergio Mattarella me rastin e Festës së Republikës italiane.

“Shqipëria dhe Italia kanë sot marrëdhënie të veçanta e të partneritetit strategjik, të cilat reflektohen në të gjitha fushat e dimensionet e bashkëpunimit dypalësh, shumëpalësh si dhe iniciativave apo organizatave të tjera rajonale dhe ndërkombëtare. Konstatoj me kënaqësi se falë traditës dhe vullnetit të mirë të të dyja palëve, këto marrëdhënie janë bërë më të forta e shumë më intensive”, ka theksuar Meta.

“Dy popujt tanë, miq prej shekujsh, ndërveprojnë gjithnjë e më shumë me njëri-tjetrin. Arbëreshët e Italisë, një urë lidhëse e vjetër dhe e qëndrueshme, si dhe mijëra shqiptarë që pas viteve ’90 gjetën mikpritje e mbështetje në Itali e kanë forcuar në mënyrë të vazhdueshme miqësinë midis dy vendeve. Gëzohem pa masë kur mësoj se numri i qytetarëve italianë që investojnë, bëjnë biznes, punojnë, studiojnë apo që vijnë për turizëm në Shqipëri rritet çdo ditë, duke i bërë më të forta e të pazgjidhshme marrëdhëniet midis dy kombeve tona”, ka shtuar Meta.

“Përfitoj nga rasti të shpreh mirënjohjen e thellë për të gjithë mbështetjen që Ju personalisht dhe të gjitha autoritetet dhe institucionet italiane po i japin Shqipërisë në kuadër të procesit të integrimit europian. Ndjehemi me fat që në realizimin me sukses të kësaj aspirate kemi një mbështetës dhe avokat të jashtëzakonshëm si Italia”, ka nënvizuar Meta.

“I nderuar mik, ndërsa pandemia e COVID-19-ës po godet mbarë botën dhe vendet tona, uroj që së bashku, me përpjekje të mirëmenduara e të koordinuara, me mençuri dhe forcë, ta kapërcejmë këtë situatë, të rikthehemi së shpejti në normalitetin e jetës së përditshme dhe të kemi një të ardhme sa më të mirë për të gjithë ne”, ka vijuar Meta.

“Me urimet më të mira për shëndetin dhe lumturinë Tuaj, si dhe dëshirën për të vijuar së bashku me Ju forcimin e mëtejshëm të marrëdhënieve miqësore midis dy vendeve tona, ju lutem pranoni, Zoti President, shprehjen e konsideratës sime më të lartë”, ka përfunduar urimin e tij Presidenti Ilir Meta./atsh

Meta: Shqipëria dhe Italia kanë sot marrëdhënie të veçanta e të partneritetit strategjik Read More »

Rama: Autoritetet e Kosovës të lehtësojnë kalimin e shtetasve shqiptarë, siç është pa asnjë kusht hyrja në Shqipëri e shqiptarëve të Kosovës

Aktualitet, Problematika / /

Kryeministri Edi Rama deklaroi sot se “beson se autoritetet e Kosovës i kanë të gjitha mundësitë ta lehtësojnë procesin e lëvizjes në kufi për qytetarët shqiptarë që shkojnë në Kosovë, siç është pa asnjë kusht dhe kërkesë të tepërt, veç ardhjes me targa të rregullta, hyrja në Shqipëri e qytetarëve shqiptarë të Kosovës”.

Rama tha se “ne nuk kemi në Shqipëri një shërbim tamponimi privat”.

“Ne nuk mendojmë, dhe kur them ne, jemi ne që e kemi marrë përsipër këtë vendim, por janë ekspertët që e kanë sugjeruar, që çështja e tamponit është si analizat e gjakut. Tamponimi bëhet mbi bazën e strategjisë së gjurmimit. Vlera e tij është shumë, shumë relative kur bëhet kot, ose si analizë gjaku sepse mund ta bësh sot dhe ende nuk ke shenja të kapshme se është në inkubim dhe nesër të shfaqen shenjat”, tha Rama.

Kryeministri theksoi se “është diçka që nuk e kemi si shërbim”. /atsh

Rama: Autoritetet e Kosovës të lehtësojnë kalimin e shtetasve shqiptarë, siç është pa asnjë kusht hyrja në Shqipëri e shqiptarëve të Kosovës Read More »

Hapja e kufijve/ Nuk do të bëjmë as tampon as nuk e kemi detyrim vetëkarantinimin për ata që hyjnë

Aktualitet / /

Kryeministri Edi Rama deklaroi sot se hapja e kufijve ajrorë nuk është vetëm një vendim i yni pasi lidhet edhe me vendimet që marrin shtetet e tjera.

Gjatë një konference për shtyp, Kryeministri tha se nuk do të bëjmë as tampon as nuk e kemi detyrim vetëkarantinimin për ata që hyjnë.

“Përsa i përket kufijve ajrorë, kjo nuk lidhet thjeshtë me ne, por edhe me palët e tjera. Ne kemi hapur kufijtë tokësorë nga ana jonë, pra ne lejojmë çdo kënd të hyjë në Shqipëri nga kufijtë tokësorë, por jo të gjitha vendet që ne lidhemi përmes kufijve tokësorë i kanë hapur kufijtë apo edhe ato që do ti hapin do ti hapin njësoj si ne”, bëri të ditur Rama.

Ne, tha Rama, i hapëm kufijtë he ju e shikoni që vetëm kufiri me Malin e Zi është fluid komplet dhe kufiri me Kosovën, pas një moment të çuditshëm dje.

Lidhur me kufijtë ajrorë, Rama tha se ne mund ti hapim, por duhet patur parasysh se këto bëhen mbi bazë marrëveshjesh.

“Sepse nëse ti hap fluturimet me një vend, që vendet e tjera nuk janë hapur me të atëherë edhe ti mbyllesh me ato vende. Sot debati është brenda BE-së lidhur me Italinë dhe Spanjën, sepse konsiderohen kanal transmetimi. Shpresoj që këto do të zgjidhen, pasi është lënë një afat kohor që është 15 qershori”, u shpreh Rama.

Rama tha ne nuk do të bëjmë as tampon as nuk e kemi detyrimin për vetëkarantimin për ata që hyjnë, pasi, tha ai, është e kotë. “Ne do ti besojmë njerëzve tanë“, theksoi Kryeministri.

Edhe me Greqinë, tha Kryeministri, që kemi ndjekur në vijimësi atë që po bën dhe kemi parë metodologjinë, kemi parë se si edhe Greqia ka relaksuar planin paraprak, pikërisht sepse është e pamundur.

“Ti hapesh kur do turizëm, hap kufijtë dhe pastaj do ti mbash njerëzit dy ditë nëpër aeroporte e kufij për të bërë tampon. Por duhet të theksojmë faktin se ti mund të bësh tamponin sot e nuk del i infektuar, pasi mund ta kesh ende të inkubuar virusin dhe nuk të shfaqet. Sot e gjitha po bazohet mbi gjurmimin. Ka vende që e bëjnë tamponin masivisht, por ne nuk e kemi zgjedhur këtë strategji” deklaroi Kryeministri.

Sipas Ramës, për sa kohë rezultati flet në favorin tonë, qartë dhe fort, duhet të keni besim dhe të mos vini në dyshim fjalët tona. Sepse tha, ai nuk janë as shpikje e as produkte bio të politikbërjes, por një politikë e ndërtuar mbi dëgjimin me vëmendje si nxënës dhe mbi leximin si nxënës që do të japin provimin e jetës të ekspertëve./atsh

Hapja e kufijve/ Nuk do të bëjmë as tampon as nuk e kemi detyrim vetëkarantinimin për ata që hyjnë Read More »

Nuk ka arsye për të shtyrë gjendjen e fatkeqësisë natyrore në gjithë vendin, po diskutohet shtyrja në vijën bregdetare

Aktualitet, Turizem / /

Kryeministri Edi Rama informoi sot se “për sa i përket gjendjes së jashtëzakonshme nuk ka arsye për të bërë shtyrje të përgjithshme por po ekzaminojmë idenë e një zone të kufizuar vetëm në vijën bregdetare”.

Rama tha se “kjo po diskutohet për të pasur gjatë sezonit të verës mundësinë që të ushtrojmë fuqinë legjislative në përballje të kësaj situate, për të ndihmuar në mbrojtjen nga përhapja”.

“Nëse nuk do të kemi një shtyrje të përgjithshme do të kemi një zonim vetëm në vijën bregdetare pa përfshirë zonat urbane. Jo në Durrës por në plazhin e Durrësit, jo në Vlorë por në plazhin e Vlorës. Kjo është diçka që po e studiojmë sepse mendojmë se do të ishte ndihmëse për njerëzit e shtetin”, tha Rama.

Ai theksoi se “sot ka përfunduar edhe gjithë procesi i ndërtimit të platformës për të aplikuar online për administrimin e plazheve nga subjektet private, një proces i qendërzuar nga një autoritet i përkohshëm për këtë fazë. Do të bëjmë atë që duhet për të mos lejuar pushtimin e plazheve publike masivisht”.

Rama tha se “do të jemi racional sepse nuk është se do ta fshijmë fare administrimin privat të hapësirave publike, kjo do të bëhet edhe sipas kushteve të caktuara”.

“Do të kërkohet për një sipërfaqe të caktuar apo për një numër të caktuar çadrash për të cilat përgjigjet para ligjit. Kjo për të mbrojtur njerëzit. Nuk besoj se ka arsye për të shtyrë gjendjen e fatkeqësisë natyrore në gjithë vendin përveç plazhit, por akoma nuk e kemi marrë këtë vendim”, tha Rama. /atsh

Nuk ka arsye për të shtyrë gjendjen e fatkeqësisë natyrore në gjithë vendin, po diskutohet shtyrja në vijën bregdetare Read More »