Gazetari Basri Çollaku paralajmëron se një tjetër dosje edhe me e rëndë se ajo e Habilajve po qarkullon, por nuk ka mbërritur ende në Tiranë.
Sipas tij njerëz të pushtetshëm janë angazhuar që ngjarja e kësaj dosjeje të mos ndodhë sot.
Çollaku teksa ka folur për Ora News thotë se për shkak të temperaturave të larta që do të shkaktonte kjo dosje në Tiranë, është zhvendosur në Romë edhe Nezar Seitaj, i cili sipas gazetarit, ka ende hesape me trafikun e drogës me emra që nuk kanë dalë.
“Ka episode të tjera të trafikut të drogës me Shqipërinë, dosje e cila nuk ka mbërritur në Tiranë. Është një histori më e rëndë nga ajo që ka ardhur deri më tani dhe kjo është arsye kryesore pse është shtyrë ajo që do të ndodhte sot”, tha Çollaku në Oraneës.
“Unë them që ka aktorë nga Tirana të pushtetit që janë angazhuar dhe investuar që gjërat të mos ndodhin sot”, tha Çollaku
Kryeministri Edi Rama është nisur mbrëmjen e djeshme për në Berlin, në një vizitë zyrtare dy ditore. Mes shumë vizitash që ka zhvilluar në kryeqytetin gjerman, kjo e fundit është më e rëndësishmja. Rezultatet e takimeve në Berlin do të përcaktojnë nëse Shqipëria do të marrë çeljen e negociatave me Bashkimin Europian apo procesi do të shtyhet për më vonë, pa afat. Qëndrimi i politikës gjermane sot do të vulosë nëse Shqipëria do të marrë përgjigje pozitive në muajin qershor.
Pavarësisht se vendimi zyrtar jepet në muajin qershor, sinjalet që Edi Ramës do t’i përcjellin nga Berlini do të përcaktojnë dhe vendimin final të gjithë vendeve të BE. Ndaj dhe gjithë vëmendja e qeverisë dhe opozitws është sot në Gjermani. Kreu i qeverisë ka parashikuar një axhendë të ngjeshur takimesh, e cila pritet të ketë edhe zhvillime të paparashikuara. Mesazhet më të rëndësishme do të jepen në konferencën për shtyp me kancelarin Agela Merkel. Takimi mes dy politikanëve është parashikuar në orën 15:30. Tema e bisedimeve është publikuar nga zyra e shtypit e kancelares Merkel. Në njoftim theksohet se Merkel dhe Rama do të diskutojnë për “marrëdhëniet dypalëshe, çështjet rajonale dhe procesin e integrimit të Shqipërisë në BE”. Mes temave kryesore, ajo e integrimit është dhe më e nxehta, bile më e rëndësishmja për qeverinë shqiptare. Në 28 dhe 29 qershor Këshilli i Ministrave të BE pritet të vendos për hapjen ose jo të negociatave me Shqipërinë. Në këtë institucion të BE, qëndrimi i Gjermanisë, si vendi lider i Unionit Europian është orientues dhe për shtetet e tjera. Nëse Gjermania jep votën e saj pro, gjasat janë që shumica e vendeve të tjera të mos kenë asnjë rezervë. Nga mesazhet që do të japë Merkel në deklaratën me Edi Ramën do të parashikohet edhe vota e thuajse gjithë vendeve të Bashkimit Europian për Shqipërinë. Përgjithësisht politike gjermane nuk i përdor fjalitë e spërdredhura diplomatike, ndaj nëse Merkel thotë “po” Rama kthehet në Tiranë me “negociata në xhep”. Nëse qëndrimi është “jo” nuk duhet të presim qershorin për të parë se çfarë do të ndodhë. Por veç takimit me Merkel, kryeministri Edi Rama ka një detyrë aspak të lehtë me anëtarët e parlamentit gjerman, Bundestagut. Sipas axhendës provizore, sot është parashikuar dhe një takim informues i kreut të qeverisë shqiptare me një grup deputetësh të komisionit për Europën në Bundestag. Ky komision do të orientojë dhe debatin politik në Bundestag lidhur me votën gjermane për Shqipërinë. Pavarësisht dëshirës për integrimin e Shqipërisë, fakti është se ka jo pak deputetë gjermanë që e shohin me rezerva integrimin e Shqipërisë pwr shkak tw korrupsionit dhe krimit tw organizuar e sidomos pwr rastin Tahiri. Edhe më problematik duket takimi me deputetët e Bundestagut, për shkak se komisioni për Europën drejtohet nga Gunther Krichbaum. Për këtë të fundit në Tiranë prej një jave ka nisur një sherr pozitë-opozitë. Partia Demokratike dhe eurodeputetë akuzuan Edi Ramën se ka urdhëruar një fushatë denigruese ndaj Gunther Krichbaum për shkak të qëndrimeve që ai ka mbajtur kundër integrimit të Shqipërisë. Shkrimet e mediave shqiptare kanë mbërritur deri në duart e deputetëve të Bundestagut dhe tashmë kryeministrit shqiptar, përveç kritereve të BE duhet të japë llogari dhe për sulmet që mediat afër tij kanë bërë ndaj një politikani gjerman. Nga kjo pikëpamje debati në komisionin gjerman pritet të jetë jo i lehtë, kur dihet se qëndrimi i deputetëve do të pasohet dhe nga qëndrimi i parlamentit gjerman. Është një situatë jo fort e favorshme për kreun e qeverisë shqiptare, ku bashkë me problemet e reformave duhet të jap llogari dhe për mëkatet e politikës së brendshme në Tiranë.
Pas Gjermanisë janë dhe dy vende të BE që shihen si jo në favor të Shqipërisë për çeljen e negociatave. Ministri i Jashtëm, Ditmir Bushati tha dje se Franca dhe Holanda mund të kenë rezerva për Shqipërinë. Është parashikuar që kryeministri Edi Rama të zhvillojë dhe një seri vizitash në këto vende.
Gjithsesi, fati i negociatave vendoset sot në Berlin. Djersë të ftohta e presin kryeministrin Rama në vendin me të fuqishëm të Bashkimit Europian. Nëse i bind e kaloi lumin në Shqipëri, nëse jo atëhere mot me rrebesh e pret në Tiranë.
Ministria e Brendshme deklaron se ka hequr tarifat e vendosura për vettingun e policisë. Ky reagim erdhi pas shqetësimit të ngritur nga Sindikata e Policisë, se qindra policë po enden nëpër zyrat e institucioneve për të marrë dokumentet që nevojiten për plotësimin e formularëve të vetingut.
Por sipas Ministrisë së Brendshme një pjesë e këtyre dokumenteve nuk janë të nevojshme.
“Sindikata thotë se duhen 20 dokumente, unë ju them që nuk janë të nëvojshme. Ligji lë si opsion që kush i ka, ose do i tërheqë për saktësi mund t’ja bashkangjisë. E rëndësishme është formularët t’i plotësojnë të saktë dhe të vërtetë. E kuptoj që efektivët mund të jenë në stres edhe për shkak të këtyre keqkuptimeve”, deklaron Julian Hodaj, zv.ministër i Brendshëm.
Ministria e Brendshme ka arritur marrëveshjen edhe me disa banka për të hequr tarifat për vërtetimet që kërkojnë policët. “Kemi patur një problem me nje bankë, e cila mbante një tarifë të lartë sipas nesh, 2000 lekë të reja”, thotë Hodaj.
5 maji është afati i fundit për plotësimin e 3 formularëve që rreth 11 mijë punonjësit e Policisë së Shtetit duhet të plotësojnë.
E ka quajtur një ngjarje të rëndë vetëvrasjen e efektivit të policisë në Fier, por për zëvendësministri i Brendshëm, Julian Hiodaj duhet pritur që hetimet të zbardhin të vërtetën.
Në një intervistë të dhënë për Neës 24, Hodaj deklaron ky rast është në hetim ndërsa zbulon se polici kishte marrë disa dokumente nga juristja.
Pyetja dhe përgjigja
A ka patur presion, sepse vetëm sot një polici të paktën sipas familjarëve vetëvrasja erdhi sipas vettingut?
Rasti është tragjik, siç është në çdo rast kur një punonjës policie humbet jetën dhe kur një qytetar humbet jetën. Unë e kuptoj dhimbjen e familjarëve, që kanë humbur njeriun e tyre të dashur, por gjithsesi ka një hetim që do ec përpara, dhe do të zbuloj të gjithë ngjarjen dhe shkaqet që çuan në vetëvrasje. Polici kishte folur me juristen dhe kishte marrë dhe dokumente që nuk duheshin.
Arta Marku ka depozituar në Kuvend një strategji për luftën kundër korrupsionit dhe krimit në javët dhe muajt në vijim.
Dhe me këtë rast, të gjithë ata të cilët janë në dyshim për abuzim me pushtetin, akte korruptive, kriminale dhe trafiqe të ndryshme do të vihen nën përgjim dhe komunikimet elektronike.
Nën përgjim do të jenë rrjetet sociale dhe të gjitha aplikacionet elektronike që ky kontigjent krimi merr nga kompanitë celulare dhe google, youtube, facebook, twitter etj.
Përgjimi do të jetë pa kufizim, përderisa nën Vetting do të jetë sistemi i drejtësisë, policia por dhe politika, gjithnjë nën asistimin e prokurorit që ndjek një çështje të caktuar.
Në këtë kontekst, politika, sistemi i drejtësisë dhe policia do të jenë nën një monitorim të jashtëzakonshëm, për të arritur në këtë mënyrë pastrimin e shoqërisë shqiptare nga fenomenet që i kanë marrë frymën tërë këto vite.
Ndërkohë vetë Kryeprokurorja e përkohëshme Arta Marku paralajmëroi përdorimin më me efiçencë të përgjimeve të komunikimeve elektronike.
“Ka qenë një objektiv i vazhdueshëm i prokurorisë realizimi i veprimeve teknike të përgjimit nga oficerët e policisë gjyqësore nën drejtimin dhe kontrollin e prokurorit që heton, duke vlerësuar si një pikë të fortë në rritjen e eficencës së hetimit, mundësinë e ndjekjes në dinamikë të përgjimit dhe nga ana tjetër ngushtimin e rrethit të subjekteve që marrin informacion.
Ndryshimet ligjore të vitit 2017, i hapën rrugën këtij procesi dhe hapat e mëtejshëm synojnë: Krijimi dhe funksionimi i strukturave të posaçme dhe të specializuara për kryerjen e përgjimit të komunikimeve elektronike pranë prokurorive; Pajisja e strukturave të mësipërme me mjetet teknike të nevojshme dhe trajnimi për përdorimin; Zgjerimin e kapaciteteve për përgjimin aktiv”, parashikon strategjia./Pamfleti.com
Qendra Psiko-sociale Vatra hapi në Vlorë të parën klinikë ligjore në mbështetje të viktimave të dhunës.
Bashkimi Europian po financon një seri projektesh të tilla, të cilat po zbatohen nga organizata Save the Children në bashkëpunim me Qendra Shqiptare e Praktikave Ligjore te Integruara.
Klinika është pjesë e projektit të Qendrës “Vatra” për mbështetjen e viktimave të gjithë llojeve të dhunës para organeve të drejtësisë dhe shërbime ligjore për to.
“Dhuna ndaj grave dhe vajzave po bëhet një problem shqetësues për gjithë vendin, një plagë për shoqërinë dhe Vlora është një nga zonat më të vështira, dhe nga viti në vit janë shtuar rastet e vajzave dhe grave që dhunohen në familje” – tha Brikena Puka, drejtuesja e qendrës psikosociale Vatra.
Numri gjithnjë në rritje i rasteve të cilat Vatra mbështet tregon praninë dhe rritjen e dukurisë dhe ndërgjegjësimin e viktimave për ta denoncuar atë.
Gjate 3 viteve te fundit Vatra ndihmoi me shërbime sociale e ligjore 95 raste të reja dhe 39 fëmijë në vitin 2015, 125 raste dhe 43 fëmijë në vitin 2016 dhe vitin e fundit 2017 gati dy herë më shumë se vitet e tjera, 212 raste të reja dhe 85 fëmijë.
Rritja e numrit të denoncimeve dhe viktimave bëri të domosdoshme shtimin e psikologëve dhe juristëve për ndihmë ligjore e psikologjike, si dhe hapjen e klinikës ligjore pranë institucioneve të ligjit, aty ku denoncueset kërkojnë drejtësi.
Qendra Vatra po ndihmon fëmijët me shërbim psikologjik në Gjykatë, kryesisht me çështje të kujdestarisë, në bashkëpunim të ngushtë me Qendrën për Zhvillim dhe Promovim Social në Vlorë, e specializuar për shërbime sociale për femijet.
Pjesë e projektit është edhe informimi i të rinjve në shkolla dhe i banorëve në 13 njësi administrative të qarkut Vlorë mbi ligjet që mbrojnë viktimat e dhunës, mbrojtjes së fëmijëve. Studentë të Fakultetit të Drejtësisë në Universitetin Ismail Qemali të Vlorës po bashkëpunojnë me Qendrën Vatra dhe me Klinikën e saj ligjore.
Në bashkëpunim me Qarkun, bashkinë dhe institucione të Vlorës dhe me rrethet e tjera nga vijnë viktimat, Qendra Vatra po i mbështet ato në rrugën e vështirë të riintegrimit në jetën sociale./zerieamerikes.com
Lozana shumë shpejt do të ketë shtatoren e Shën Nënë Terezës, shenjtores katolike me kombësi shqiptare. Meritat për vendosjen e shtatores i ka një këshill iniciues i përbërë nga: Gjergj Prenkoçaj, prof. Ibrahim Syla, prof. Sabri Alidema, veprimtari Cen Kabashi, veprimtarja Fatime Kalimashi, Abée Christophe Godel – Mme Suzanne Duc.
Siç bën të ditur Gjergj Prenkoçaj në një bisedë për albinfo.ch, të shtunën, më 28.04.2018 në ora 16:30 nē qytetin e Lozanës, në adresën: Rte de Pavement 97, Eglise St Amedée, do të bëhet zbulimi, gjegjësisht inaugurimi i Shtatores së Shë Nënë Terezes. Ai me këtë rast falënderon të gjithë bashkatdhetarët por siç e thotë: “në veçanti më ka bërë përshtypje gatishmëria e vëllezërve e motrave shqiptare të besimit Islam, të cilët u treguan të përgjegjshëm, dhe të përkushtuar, të na ndihmojnë nē menyra të ndryshme, që të jenë pjesëmarrës nē këtë projekt madhështor për kombin e shqiptar”.
Skulpturën e shtatores së Nënë Terezës e ka realizuar artisti i njohur nga Prishtina, Agron Bytyçi, dhe ajo tashmë është vendosur në vendin ku do të inaugurohet, thotë Prenkoçaj për albinfo.ch.
Më tutje ai na njofton se për ketë inaugurim vjen enkas, Monsinjor Don Lush Gjergji prej Kosovēs. Po ashtu do të jetë i pranishëm kori i Kishës Katolike Shqiptare, misioni në Arau tē Zvicrës i drejtuar nga z. Don Prenkola. Ndërsa një nderim të veçantë manifestimit do t`ia bëjë prania e pasardhësit të Kryeheroit tonë, z. Loris Kastrioti Skënderbeu nga Italia, thekson ai.
Ardhjen e kanë konfirmuar edhe Ambasadori i Shqipërisë dhe Ambasadorja e Kosovës si dhe kryeimami nē Bernë të Zvicrës z. Mustafë Memeti.
Prenkoçaj tregon më tutje se është ftuar edhe At Nikolle Marku, nga Kisha Ortodokse Shqiptare, por për shkak të gjendjes shëndetësore, ai nuk do të ketë mundësi të vijë..
Në kuadrin e aktiviteteve të inaugurimit, do të jepet edhe një shfaqje teatrale, kushtuar jetës dhe veprimtarisë Humanitare të Shën Nënüe Terezës, përgatitur nga regjisori Valton Jakupi, drejtor i “International Film Europe”.
Po ashtu të pranishëm do të jenë, Shkolla Shqipe e Mësimit Plotsues në Lozanë (LAPSH “Naim Frashëri”)” si dhe shoqatat kulturore artistike “Teuta” dhe “Ilirët” të Lozanës.
Manifestimin do ta nderojnë me praninë e tyre edhe personalitete të politikës së qytetit të Lozanës e kantonit të Vaudit./albinfo.com
Sot në emisionin “Stop” u trajtua një temë mjaft delikate, largimi i fëmijës nga nëna e tij në mënyrë të padrejtë. Lisiana Hoxha përpos faktit që kaloi një martesë të dështuar, endet prej vitesh për të fituar kujdestarinë e të bijës, Theodhorës.
“Unë kam pasur vajzën të martuar me Renato Xhogun. Nga martesa e tyre lindën një fëmijë, Theodhora Xhogun. Gjatë martesës së tyre patën shumë kontradikta me njëri – tjetrin, ishin shumë të dhunshëm si vetë personi, edhe prindërit e tij, sidomos e ëma dhe e motra. Vajza nuk i duroi dot dhe një ditë mori fëmijën dhe erdhi në Shqipëri. Vjen i ati dhe e merr vajzën me dhunë. Nuk kishte orë që të mos merrnim kërcënime dhe vajzës i thoshte që do ta fuste në qese të zezë dhe do ma sillte në Shqipëri. Për këtë ka tabulate telefonike, janë të gjitha të vendosura dhe të shkruara. Ia la kujdestarinë e tij. Martesa e tyre zgjati deri në vitin 2008”, u shpreh i ati i Lisianës, Naim Hoxha.
Më datë 8 Maj të vitit 2008, Gjykata e Rrethit Gjyqësor Vlorë pranoi kërkesë-padinë e Lisiana Xhogut dhe zgjidhi martesën me të paditurin Renato Xhogu, duke ia lënë kujdestarinë e vajzës këtij të fundit dhe duke i lënë të drejtën paditëses ta takojë dy herë në muaj.
Por ky vendim nuk e respektua, pasi Lisiana Xhogu nuk e ka parë më vajzën e saj, Theodhorën. Naim Hoxha tregoi se më 13 Prill 2017, ish-bashkëshorti i të bijës ndërroi jetë në Greqi, si pasojë e një aksidenti. Familja e tij u rikthye në Shqipëri dhe fillimisht i premtoi familjes Hoxha se do të mund ta takonin vajzën e vogël, por rezultoi krejt e kundërta.
Ndaj dhe Lisiana iu drejtua sërish Gjykatës së Rrethit Gjyqësor Vlorë me një kërkesë-padi për ndryshimin e përgjegjësisë prindërore të Theodhora Xhogut, por gjyqtarja Mirela Mishgjoni e rrëzoi kërkesën e saj, duke ia lënë kujdestarinë gjyshërve nga ana e të atit.
Motra e Lisianës, Eriselda Hoxha tregoi se mbesa e saj ka kaluar kufirin e Shqipërisë me vendim të prokurorit Aurel Zarka, pa qenë në dijeni e ëma. Gjatë një takimi me këtë prokuror, Lisiana ka mundur ta regjistrojë duke i thënë se është ai që vendos se çfarë ndodh me denoncimin e saj.
Lisiana – Si jeni? Mirë?
Prokurori Aurel Zarka Mirë!
Lisiana – Mund të hyj brenda?
Prokurori Aurel Zarka – Çfarë ke?
Lisiana – Dua të bëj një pyetje!
Prokurori Aurel Zarka – Po!
Lisiana – Kam pasur një denoncim që kam bërë dhe doja të dija, çfarë është bërë me këtë denoncim?
Prokurori Aurel Zarka – Është mosfilluar.
Lisiana – Pse është mosfilluar?
Prokurori Aurel Zarka – Se ashtu e kam vendosur unë
Lisiana – Si mund të vendosni juve ashtu?
Prokurori Aurel Zarka – Unë jam ai që vendos!
Lisiana – Po kush është arsyeja, që keni vendosur ashtu?
Prokurori Aurel Zarka – Po i kam shkruajtur aty. Ke të drejtën e ankimimit në gjykatë!
Naimi tha se disponon gjithashtu një regjistrim të bisedës së të bijës me ish-kunatën e saj, Entela Mehmetit, e cila është shprehur se ajo dhe prindërit e saj janë kompetentë për vajzën dhe Lisianës do t’i duhej ta harronte kujdestarinë.
Lisiana – Dua vajzën!
Ish-kunata – Ok, lëre kujdestarinë mënjanë!
Lisiana – Si ta lë kujdestarinë?
Ish-kunata – Lëre! Kaq kohë vajza me kë ka jetuar? Kush e ka pasur atë kujdestari? Atë kujdestari e ka pasur Spirua (Renato, ish-bashkëshorti)
Lisiana – E kishte Spirua…
Lisiana – Entela, unë nuk shoh…
Ish-kunata – Ne tek ajo çupë i kemi sytë! Vajzën e kemi ne. Jemi ne kopetentë, Ana. Unë, mami, babi. Asnjë tjetër! Po më dëgjon, çfarë them?
Lisiana – Po, të dëgjoj!
Ish-kunata – Unë, mami dhe babi. S’ka asnjë tjetër në mes! Çdo gjë e kam në dorë! E kemi në dorë, Ana! Do t’i japësh drejtim… do të vazhdosh me gjyqet? Jepi! Do dalësh e humbur! Do dalësh e humbur!
Por sipas nenit 225 të Kodit të Familjes, nëse një nga prindërit ka vdekur, përgjegjësia prindërore ushtrohet automatikisht nga prindi tjetër.
Ndërsa gjykata e ka vlerësuar këtë një natyrë tjetër konflikti dhe kërkesën të pabazuar në ligj dhe prova e si rrjedhojë e ka rrëzuar.
Moderatorët e emisionit “Stop” thanë se gjyqtarja ka bërë parashtrimin e ligjit e më pas e ka rrëzuar kërkesën, çka rezulton e pakuptimtë.
“Kjo është e tmerrshme! Është një paçavure!”, u shpreh Saimir Kodra.
Lisiana rrëfeu historinë e saj të trishtë të martesës së dështuar dhe kërkesës së pashpresë për të qenë pranë vajzës së saj tanimë 12-vjeçare.
“Vajza nuk e dinte që ekzistonte mamaja e saj dhe sot e kësaj dite ajo i flet gjyshes ‘ma’. Pas 12 vitesh m’u dha mundësia ta takoj vajzën time vetëm në Gjykatën e Greqisë”.
Ajo tha se ka kryer tre denoncime për kujdestarinë e të bijës, por nuk ka mundur dot të gjejë zgjidhje.
“Nuk kërkoj asgjë më shumë, kërkoj vetëm fëmijën tim! I drejtohem shtetit shqiptar: Jam nënë! Vjehrri im është marrë me drogë dhe ka bërë 5 vjet burg në Shqipëri. Burri im punonte me punë të pista, me prostituta në rrugë. Si mund të jetoj vajza ime me ata njerëz?”, u shpreh Lisiana Hoxha
