Aktualitet

Prokuroria e Krimeve të Rënda i fokuson hetimet për përgjimin e vëllait të ministrit Xhafaj në Vlorë.

Tashmë, në fokus të hetimeve është personi i përmendur në video me emrin “Ermal”, që do të ndihmonte “dëshmitarin X” të bënte trafikun e drogës. Burime brenda organit të hetimit thonë për “Panorama”, se dy oficerë të Policisë Gjyqësore kanë qenë në qytetin e Vlorës këto ditë në kërkim të të dhënave për personin e quajtur “Ermal”.

Kështu, sipas burimeve, janë marrë kamerat e sigurisë së mjediseve përreth për datat kur dyshohet se mund të jetë konsumuar takimi mes Albert Veliut dhe Agron Xhafajt në lokalin e këtij të fundit. Gjithashtu, burimet thonë se janë verifikuar edhe të gjithë efektivët e Policisë së Vlorës, pasi ka pasur dyshime se “Ermali” mund të ketë qenë një zyrtar i lartë i uniformave blu. Lidhur me këtë gjë, Krimet e Rënda shprehen mjaft të rezervuar për rezultatet e hetimeve.

Deri më tani, në Prokurorinë e Krimeve të Rënda janë thirrur për dëshmi Albert Veliu, i njohur si “dëshmitari X” në video, dy deputetët e PD-së, Ervin Salianji dhe Enkelejd Alibeaj, si edhe Gazment Bardhi. Gjithashtu, në Prokurori është pyetur edhe gazetari Jetmir Olldashi, i cili mendohet se ka kryer përgjimin.

Të dhëna për “Ermalin” ka dhënë vetëm Albert Veliu dhe në bazë të të dhënave të tij po kryhen verifikimet. Më herët, në Prokurori ka qenë edhe vëllai i ministrit Xhafaj, që ka dhënë versionin e tij për ngjarjen dhe ka lënë një regjistrim të zërit për krahasim me përgjimin.

Agron Xhafaj pretendon se zëri nuk është i tij dhe se përgjimi i publikuar nga PD është montazh. Ai është nisur drejt Italisë, ku ka shkuar me avokatin për të zgjidhur çështjen e dënimit në Itali. Lidhur me ekspertimin e videos, një burim i tha “Panoramës” se Prokuroria e Krimeve të Rënda ende nuk ka vendosur se ku do ta dërgojë regjistrimin për ekspertim. Deri më tani po shqyrtohen marrëveshjet që janë me vendet partnere dhe më pas do të vendoset të dërgohet atje.

I njëjti burim i tha “Panorames” se po pritet që të identifikohet dhe të merret dëshmia e “Ermalit” në mënyrë që të vendoset për hapin tjetër të hetimit. Kujtojmë se fundjavën që lamë pas, Prokuroria e Krimeve të Rënda vendosi që të bashkojë dy çështjet për regjistrimin. Kështu, denoncimi i Agron Xhafajt për “kallëzim të rremë” ndaj tre zyrtarëve të PD-së në Prokurorinë e Tiranë iu bashkua të premten procedimit të nisur kryesisht me akuzat e PD-së për përgjimin e vëllait të ministrit Xhafaj.

Në këtë audioregjistrim të zhvilluar në Vlorë, Albert Veliu, sipas PD-së, i kërkon Agron Xhafajt ta ndihmojë me një ngarkesë droge. Personi ka qenë i njohuri i Agron Xhafajt dhe, sipas PD-së, pasi u burgos, Agron Xhafaj nuk u interesua më për të.

Në audioregjistrim, bashkëbiseduesi që mendohet se është Agron Xhafaj, i thotë bashkëpunëtorit Veliu se kohët e fundit po sulmohej shumë nga opozita dhe se ishte hera e parë dhe e fundit që e ndihmonte. Ai e adreson te një person me emrin “Ermal” dhe më pas biseda mbyllet. Mirëpo, audioregjistrimi është konsideruar si i manipuluar nga qeveria.

Deputeti i Partisë Demokratike Edmond Spaho ka paralajmëruar publikimin e përgjimeve të reja. Gjatë mbledhjes së Komisionit të Integrimit deklaroi se deri ditën e shtunë kur do të mbahet protesta, opozita do të publikojë disa materiale se si bëhen trafiqet e drogës.

Debati:

Balla: Nuk ka ndodhur ne bashke vend te be qe ka qene ne kete faze qe jemi ne qe te kete nje opozite si kjo

Spaho: Nuk ka pas nje minister te brendshem te lidhur me drogën (Nga PD)

Spaho: Si Frroku…

Balla: Pusho ti, pusho. Ik e merru me tenderat e ilaceve

Spahia: Fol per drogen, fol per Fatmir Xhafen

Balla: Pusho, kur flas une ketu nuk flet njeri. Per Fatmir Xhafen do flas se po ju godet aty ku ju dhemb me shume

Balla: Ka vetëm një person qe quhet Sali Ram Berisha qe është regjisori

Balla-Bumcit: Te njëjtën procedure qe ndoqe ti per Izet Haxhine qe i dhe garanci shtetit…

Spaho: Deri diten e shtune do te keni përgjime te tjera ku do tregohen se si bëhen trafiqet e drogës.

Pas Gerta Lokut, mirditores e cila foli në foltoren e Kuvendit për të mirat që të ofron fshati, një tjetër vajzë që ka vendosur të investojë në fshat.

Dje nga Ballabani i Përmetit, ajo i rrëfeu kryeministrit Edi Rama gjatë drekës shtruar në fermë se si ka vendosi të investojë në fshatin e saj, bashkë me burrin francez. Bëhet fjalë për Elona Bejon dhe francezin Majid.

Ferma e tyre quhet “Grand Albanik”, dhe siç rrëfyen, interesi i të huajve dhe shqiptarëve i ka tejkaluar pritshmëritë.

“Historia është edhe e thjeshtë edhe e komplikuar. Im shoq është francez, kemi gati 2 vjet e gjysmë që punojmë e investojmë këtu dhe kemi shumë pak kohë që jemi hapur. Gjithçka po shkon shumë mirë, është edhe më lart nga sa e kemi pritur interesi dhe suksesi i fermës.

Tani me sezonin turistik, edhe sepse kemi bërë pak publicitet nëpër guida turistike, ka të huaj edhe shqiptarë që vijnë se kemi eksperiencë në këtë fushë, kemi qenë në një qytet tjetër në Elbasan, eci aty dhe erdhëm ta përsërisim në vendin e origjinës sime”, tha Elona nga Ballabani duke marrë komplimentet e kryeministrit.

“Ju jeni një ndër shembujt pozitivë dhe ne jemi të interesuar t’i promovojmë e të nxisim të tjerët të hyjnë në këtë rrugë”, u shpreh Rama.

“Vetëm receta është franceze këtu se gjithçka tjetër është shqiptare”, përforcoi Elona.

“Nuk kemi tokë bujqësore, prandaj kemi shkuar te ferma, kultura. Mënyra se si është ndarë toka në Shqipëri është shumë e mirë, sepse është e ndarë në parcela të vogla, gjë që të jep mundësi të krijosh kopshte të vogla. Atëherë kjo është një mënyrë shumë e mirë për t’i shërbyer tokës dhe për t’ja treguar të gjithëve si funksionon.

Ata që janë të interesuar janë të mirëpritur të vijnë ta shohin. Ne nuk prodhojmë vetë por ua blejmë banorëve të zonës”, shpjegoi Elona e cila shërbeu edhe si përkthyese e bashkëshortit të saj francez i cili gjithashtu me shumë entuziazëm tregoi për fermën e tyre në fshatin Ballaban.

“Kur shkova në Elbasan, të gjithë banorët talleshin me mua. Askush nuk e besonte se do funksiononte. Sepse ishin në atë botëkuptimin që duhet mbjellë vetëm grurë e misër. Kur nisa të ndërtoja shtëpitë e drurit u tallën edhe më keq: Si po ndërton pa gurë pa beton? Më thanë do të bjerë në tokë. Mbas 8 vjetësh ika, i çmontova, i solla këtu dhe ja ku montova një të dytë. Tani e njohin të gjithë Labinotin, atëhere s’e njihte askush. Pastaj erdhën të më kërkonin këshilla si e ndërtove me dru. Ne donim të ndryshonim ambient dhe erdhëm këtu. Këtu bëjmë edhe bujqësi edhe turizëm”, rrëfeu francezi duke theksuar se nuk ka hasur  problem në këtë rrugëtim me qeverisjen lokale aq sa me banorët që s’janë të hapur ndaj ndryshimeve.

Ish-ministri i Brendshëm, Saimir Tahiri i akuzuar si bashkëpunëtor në trafikun e drogës me Habilajt do kërkojë heqjen e ‘arrestit shtëpiak’ në Apelin e Krimeve.

Seanca do zhvillohet në datën 28 maj. Gjykata e Shkallës së Parë vendosi dy javë më parë të lërë në arrest shtëpia ish-ministrin pas mbërritjes së provave të reja nga Italia dhe Greqia ku pretendohet se Tahiri ka bashkëpunuar me Habilajt.

Madje, sipas prokurorisë ka dyshime se ish-ministri i Brendshëm ka takuar në një hotel në Korfus Artan Habilajn, vëllain e Moisi Habilajt i arrestuar në Itali si kreu i grupit kriminal të trafikut të kanabisit.

Duke postuar shkrimin e prestigjiozes amerikane “Lonely Planet” që boton guidat më të famshme në botë për udhëtimet dhe qe e ka renditur Tiranën ndër 10 vendet që duhen vizituar patjetër nga turistët këtë verë, Kryeministri Edi Rama kete mengjes ka zgjedhur te ironizoje ata qe thone se Tirana eshte bere e pajetueshme.

POSTIMI I PLOTE:

dhe me ftesën që të shkoni vetë deri tek numri 10 e pastaj t’i lini të vazhdojnë “kokat e mëdha” të klubit të llafeve të Tiranës të thonë se Tirana është bërë qytet i pajetueshëm👎 ju uroj një ditë të bukur😉

Një shtetase franceze, e quajtur Michèle Passas, ua ka liruar prindërve dhomën e saj. Dhoma e miqve është e zënë me fëmijët e moshës 8 e 10-vjeçare.
HISTORIA

Në Gap të Francës, një familjes shqiptare i është refuzuar kërkesa për azil. Asaj nuk i mbetet gjë tjetër vetëm kthimi në vendlindje. Mirëpo, një shoqatë humanitare franceze është mobilizuar dhe bën ftesë për t`i ndihmuar familjes me dy fëmijë të moshës 8 e 10-vjeçare.

Shtetasja franceze Michèle Passas, ua ka liruar prindërve dhomën e saj. Dhoma e miqve është e zënë me fëmijët e moshës 8 e 10-vjeçare. Tani tre ditë me radhë, kjo banore e Gapit e ka ndarë banesën e saj me familjen shqiptare. Ajo që është më keq, francezja fle në divanin e sallonit. “Dua që ata të kenë sado pak intimitet, që të mund të pushojnë, pasi ata janë shumë të stresuar”, ka pohuar francezja që është anëtare e shoqatës, për “France 3”, përcjell Albinfo.ch.

Më tej ajo spjegon se çifti fle nën ndriçimin e dritave pasi kanë frikë të vazhdueshme nga errësira.

Çifti i cili ka kërcënime nga mafia në Shqipëri, ka parashtruar kërkesë për azil, njofton më tej Albinfo.ch. Mirëpo, ajo iu refuzua. Pa Michèle, familja do të mbetej në rrugë. “Më parë, ka ekzistuar mundësia për të thirrë numrin telefonik 115 që është përgjegjës për strehim, por tani ata refuzojnë të ndihmojnë familjet që gjenden në këtë situatë”, thekson Cécile Leroux, vullnetare e shoqatës, e cila vazhdon: “Na kanë thënë se nuk janë të prekshëm, por çfarë do të thotë i prekshëm kur bëhet fjalë për një familje me dy fëmijë të mitur që nuk ka të holla?”

Familja do të vazhdojë përpjekjet e saj. Megjithatë, shqiptarët përbëjnë nacionalitetin e parë në vitin 2017 që ka parashtruar kërkesa për azil në Francë. Në këtë vend me vështirësi të mëdha ekonomike, i cili është vlerësuar si vend me prejardhje të sigurt, shqiptarët shumë pak e kanë të rregulluar jetën.