Aktualitet

Pas datës 4 korrik të gjitha qeset plastike që janë në përdorim nuk do të përdoren më. Ky është një vendim i Ministrisë së Mjedisit për të mbrojtur natyrën, por edhe shëndetin e njerëzve. Ky propozim i ministrisë së Mjedisit është mirëpritur edhe nga ricikluesit.
Zv.ministrja e Mjedisit dhe Turizimit, Ornela Çuçi, shpjegoi për TemA TV ndryshimet dhe efektet.

“Vendimi konsiston në 3 pika kryesore: rritja e trashësisë së qeses plastike. Nuk po e bëjmë kot, por që ajo të jetë ë përdorueshme disa herë dhe nga ana tjetër të jetë e riciklueshme. Qeset e holla kanë zero vlerë në ricilkim.

Ajo që synojmë së dyti është fakti që të gjitha qeset në Shqipëri të kenë aditivë biodegradues, lëndë që nxisin vetëshkatërrimin e qeseve në një periudhë 36-mujore. Dhe e treta ka të bëjë më gjurmueshmërinë. Disa parametra të treguar në qesen plastike treojnë nga vjen kjo qese, kohën e prodhimit dhe kush e ka prodhuar”, thotë Çuçi.

Por a preket biznesi i riciklimit dhe prodhimit të plastikës në vend nga ndryshimet?

“Qeset plastike që do të lejohen të përdoren duhet të kenë trashësinë për anë, minimum 35 mikron, qqë do të thotë që do të prodhohen qese të atilla që do të jenë disa herë të ripërdorueshme dhe pjesa tjetër e rëndësishme në këtë kriter teknik është se këto qese edhe pas ripërdorimit të tyre, edhe pasi të dëmtohen do të kenë një peshë specifike të rëndësishmepër grmbulluesit që grumbullojnë materiale plastike për t’i çuar te ricikluesit. Pra kemi një përfitim në të dyja anët”, thotë Vullnet Haka”, president i Shoqatës së Konvertuesve të Plastikës.

Për Ministrinë e Mjedisit, përdorimi i qeseve në vend deri para 3 vitesh ishte në nivele alarmante, dhe megjithë masat e marra për kufizimin sërish cilësohet jashtë kritereve.
Masat për shkeljen e vendimit variojnë në gjoba nga 1.000.000 deri në 1.500.000 lekë, ndërsa objekt i këtyre sanksioneve do të jenë prodhuesit dhe importuesit që duhet të zbatojnë me përpikëri sistemin e shenjimit të ambalazhave. Në mbikëqyrje të zbatimit të vendimit do të jenë edhe marketet, që tregtojë mallra me këto ambalazhe.

Ish-kryeprokurori i arratisur maniak përgjimesh, përgjonte të afërmit dhe vartëset dhe dëgjonte bisedat e tyre private në zyrë
Gjatë hetimeve të thelluara për pastrim parash dhe fshehje pasurie, janë zbuluar detaje tronditëse nga veprimtaria e zezë e Adriatik Llallës, gjatë kohës kur ushtronte detyrën si Prokuror i Përgjithshëm, në shërbim të dy tutorëve të tij, Sali Berishës dhe Ilir Metës. Adriatik Llalla i futur në listën e zezë nga Departamenti Amerikan i Shtetit, i arratisur nga Shqipëria nga frika e Vetingut dhe e prangave, rezulton një maniak përgjimesh.

Nga hetimet e deritanishme dyshohet se Llalla ka shfrytëzuar pushtetin si kryeprokuror dhe kontrollin që i jepte ligji mbi bërthamën e përgjimeve në Prokurorinë e Përgjithshme, për të përgjuar familjarët e tij, miq dhe të afërm. Ligji për përgjimin e telekomunikimeve parashikonte që çdo kërkesë për përgjim kalonte nga duart e Prokurorit të Përgjithshëm ose nga një person i autorizuar posaçërisht prej tij. Ndërsa bërthama komanduese e përgjimeve është e instaluar pranë zyrës së Prokurorit të Përgjithshëm.

Nga hetimet si dhe bazuar në bisedat e ish-bashkëpunëtorëve të Llallës, dyshohet se ky i fundit e ka shfrytëzuar këtë mundësia për të shuar kureshtjen personale, duke survejuar jetën private të familjarëve të tij dhe të afërmeve të tjerë. Sipas burimeve, mes personave që Llalla kishte më shumë fiksim për ta përgjuar dyshohet se ishte edhe vajza e tij, e njohur nëpër media për një jetë luksi. Llalla dyshohet se përgjonte bisedat e saj në ambiente të ndryshme dhe më pas i dëgjonte në zyrën e tij.

Pre e abuzimit me përgjime të paligjshme thuhet se kanë rënë edhe vartëse të Adriatik Llallës. Ish-kryeprokurori duket se ishte i fiksuar të dinte se çfarë bisedojnë vartëset e tij në ambiente imtime. Në shënjestër të përgjimeve ka qenë edhe një ish-funksionare e lartë në Prokurorinë e Përgjithshme, e njohur për afrimitetin me Adriatik Llallën. Sipas burimeve, kjo prokurore ishte fiksimi numër një i Llallës për ta përgjuar kudo që shkonte. Burimet thonë se për interesa të politikanëve të ndryshëm janë përgjuar edhe dashnoret e tyre.

Krahas përgjimeve për shuarjen e kureshtjeve personale, është treguar kujdes për të fshehur çdo gjurmë të kësaj veprimtarie, duke fshirë të dhënat e mbetura nga serveri i përgjimeve. Megjithatë, përgjimet nuk janë realizuar nga një person i vetëm. Me arratisjen e Adriatik Llallës dhe përbetimin e ambasadorit amerikan se do të përfundojë në burg, bashkëpunëtorët e tij kanë nisur të flasin./Pamfleti

Policia e Tiranës është përfshirë në një valë tjetër ndryshimesh, pasi sot janë emëruar dy shefa të rinj në komisariate. Sipas një njoftimi nga zyra e shtypit të policisë, mësohet se lëvizje kanë pësuar komisariatet 2 dhe 6.

Njoftimi i plotë

Kryekomisar Pal Marku, me detyrë Specialist në Njësinë për Hetimin e Krimeve ndaj Personit dhe Pasurisë në Drejtorinë Hetimore Qëndrore në Depratamentin e Policisë së Shtetit, është caktuar përkohësisht në detyrën Shef i Komisariatit të Policisë Nr.6.

Komisar Gilbert Hoxha, me detyrë Shef Sektori, në Sektorin për Hetimin e Krimeve të Rënda ndaj Jetës dhe Pronës, në Drejtorinë Vendore të Policisë Tiranë është caktuar përkohësisht në detyrën Shef i Komisariatit të Policisë Nr.2.

Nënkomisar Neritan Boçi, me detyrë shef i Komisariatit të Policisë Nr.6, në Drejtorinë Vendore të Policisë Tiranë, emërohet në detyrën Specialist në Seksionin për Hetimin e Krimeve ndaj Jetës dhe Pronës, në Drejtorinë Vendore të Policisë Tiranë.

Ndërkohë që përpos Tiranës ndryshime janë firmosur nga Drejtori i Përgjithshëm edhe në qarqe. Barjam Mara nga zv/ drejtor i Policisë së Durrësit është emëruar në të njëjtin pozicion në Gjirokastër, ndërsa Ervin Ndreu nga shef komisariati në Krujë është emëruar zv/ drejtor në Durrës në vendin e Bajram Marës.

Ditën e sotme në orën 13:00, Kolegji i Posaçëm i Apelimit do të jap vendimin përfundimtar për ish-Kryeprokurorin Adriatk Llalla, nëse ai do t’i nënshtrohet ose jo procesit të Vettingut. KPA, pas dy seancave të para ka marrë në shqyrtim kërkesën e Komisionerit Publik, Florian Ballhysa, ku ky i fundit kërkon që Llalla të mos përjashohet nga sistemi i Drejtësisë.

“Llalla e gëzon ende statusin e magjistratit për shkak se është ish- kryeprokuror. Ai nuk e ka dhënë dorëheqjen në formën e kërkuar”, tha Ballhysa.

Nga ana tjetër avokati i Adriatik Llallës, Sokol Azizaj u shpreh se: “Parashikimet ligjore thonë se nëse subjekti jep dorëheqjen, procesi i Vetingut ndërpritet. Më shumë se kaq unë nuk mund ta shpjegoj dot. Unë kërkoj lënien në fuqi të vendimit për Adriatik Llallën. Unë nuk dua ta paragjykoj vendimin tuaj, por dua që të ndiqni standardin ligjor”.

Procesi ndaj Adriatik Llallës u ndërpre nga Komisioni i Pavarur i Kualifikimit pas dorëheqjes së ish-kryeprokurorit nga e drejta për t’u emëruar gjyqtar apeli dhe rrjedhimisht nga i gjithë sistemi i drejtësisë.

Verdikti u mor në atë kohë nga trupi gjykues i KPK me kryesues Roland Ilia dhe anëtarët Pamela Qirko dhe Olsi Komçi. Por, ky është rezultat i njëjtë sikurse edhe ai i një trupe tjetër gjyqësore të KPK, e cila po për shkak të dorëheqjes si gjyqtar kushtetues i ndërpreu vettingun edhe Besnik Imerajt.

Ish-kryeprokurori Llalla është subjekti i parë që kalon në këtë situatë i cili pas dorëheqjes kërkon t’i ndërpritet edhe procesi i Vettingut. Pezullimi i Vettingut apo çelja e filtrave të tij për verifikimin e pasurisë dhe aftësive profesionale për Llallën, mbetet për t’u mësuar vetëm mesditën e sotme.

Pas sekuestrimit të 2.5 tonëve marijuanë në brigjet italiane, Policia e Shtetit ka reaguar, ku në një njoftim pëmediat, deklaron se nuk dihet ende origjina e droges së kapur, por po punohet për të zbardhur çdo detaj.

Sipas policisë shqiptare nuk dihet ende origjina dhe vendi nga ku u nis gomonia drejt Italisë, ndërsa në operacion janë angazhuar Guardia di Finanza, Policia Kufitare Shqiptare dhe ajo e Malit të Zi.

“Në datë 9 Qershor 2018, rreth orës 16:25, një avion i Guardia di Finanza të Pulias gjatë kontrollit në hapësirën detare, pikasi një mjet lundrues që lëvizte me shpejtësi në ujërat italiane, në largësi rreth 40 milje nga bregu.

Menjëherë në ndjekje janë vënë 2 mjete lundruese të GdF duke e interceptuar mjetin lundrues të llojit gomone, i cili ishte i ngarkuar dhe lëvizte me shpejtësi”, thuhet në njoftimin e policisë.

Më pas autoritetet italianë kanë njoftuar Policinë Kufitare në Shqipëri, ku menjehere disa mjete të Policisë Kufitare dhe të Guardia di Finanza në Durrës dhe Vlorë janë vënë në gadishmëri, në pritje të hyrjes së gomones në ujërat territoriale shqiptare. Por sipas policise shqiptare gomonia e ngarkuar, në ndjekje nga GdF ka shtuar shpejtësinë duke hedhur në det ngarkesën.

“Më pas ajo i është drejtuar territorit të Malit të Zi, duke u futur në këto ujëra. Policia malazeze e ka interceptuar gomonen, por pas një ndjekje për rreth 1 orë, ka humbur gjurmët e saj”, thotë policia.

Ndërkohë që Guardia di Finanza ka rikuperuar mallin e hedhur në det në ujërat ndërkombëtare në afërsi të ujërave territoriale të Malit të Zi, ku rezultoi 2 ton e 475 kilogramë marijuanë.

Autoritetet policore në 3 shtetet po vijojnë hetimet dhe shkëmbimin e informacionit për zbulimin dhe ndalimin e trafikantëve, por ende nuk ka të dhëna për origjinën e mallit dhe shtetin nga ku mund të jetë nisur gomonia./shqip

Një anije me 629 emigrantë të shpëtuar në Mesdhe ende nuk dihet se ku do ta pranojnë, pasi u refuzua nga Italia dhe Malta. Italia ka thënë se nuk lejon që anija të mbërrijë në një nga portet e saj, duke kërkuar që Malta ta bëjë këtë.

Malta, megjithatë hodhi poshtë thirrjen, duke thënë se nuk ka të bëjë me operacionin e shpëtimit.Ministri i ri i Brendshëm italian, Mateo Salvini, gjatë fushatës zgjedhore ka premtuar për të ndaluar fluksin e emigrantëve në vend.

Më shumë se 600 emigrantë janë në bordin e anijes SAS Mediterranean. Prej tyre 123 fëmijë të mitur të pa shoqëruar nga prindërit, 11 fëmijë dhe shtatë gra shtatzëna.

Partnerët ndërkombëtarë kanë nisur trajnimet për të zbuluar paratë e fshehura nga pushtetarët shqiptarë dhe “kokat” e krimit. Teksa na ndajnë disa muaj nga ngritja e Strukturës së Posaçme Antikorrupsion (SPAK), kanë filluar përgatitjet për të çuar para drejtësisë të gjithë të korruptuarit. Në datat 7-8 qershor në qytetin e Vlorës përfaqësues të Këshillit të Evropës kanë zhvilluar takime dy-ditore me përfaqësues të Drejtorisë së Pastrimit të Parave dhe institucioneve të tjera, të cilët janë trajnuar në sekuestrimin e parave të pista.

Gjatë këtij procesi trajnues janë angazhuar plot shtatë institucione. Një gjë të tillë e ka bërë të ditur vetë Këshilli i Evropës përmes një njoftimi në faqen e saj zyrtare në internet, ku lajmëronte para takimit se përfaqësuesit e saj do të viheshin në punë për të trajnuar shqiptarët për pastrimin e parave. “Gjatë trajnimit përfaqësuesit e Drejtorisë së Përgjithshme të Pastrimit të parave, Autoriteti i Mbikëqyrjes Financiare, Ministria e Drejtësisë, Prokuroria e Përgjithshme, Policia e Shtetit, Banka Qendrore dhe bankat komerciale, do të mësojnë mjetet dhe praktikat e mira ndërkombëtare për këmbimin e informacionit dhe trajtimin e kërcënimeve të pastrimit të parave dhe korrupsionit.

Përpjekjet i bashkërenditen qasjes së mbikëqyrjes për përdorimin efektiv të burimeve dhe fokusimin në fushat e riskut më të madh, sipas standardeve evropiane dhe ndërkombëtare”, thuhet në njoftimin e KiE. Ndërkohë, burimet i thanë gazetës ”SOT” që pas këtij eventi përfaqësues të Drejtorisë së Pastrimit të Parave do të ndërmarrin një tur në disa vende të Bashkimit Evropian, përfshirë këtu edhe Gjermaninë për tu trajnuar në sekuestrimin e parave të pista dhe në parandalimin e fenomenit të pastrimit të parave.

Lëvizje të tilla po bëhen pak para ngritjes së SPAK me qëllim që sapo të hidhet edhe ky hap, të nisin menjëherë goditjet në nivele të larta të fenomenit të korrupsionit dhe pastrimit të parave. Pra, përfaqësuesit shqiptarë janë në fazën e mbledhjes së informacioneve dhe materialeve për pushtetarët e implikuar në pastrimin e parave dhe pritet që me ngritjen e SPAK të nisin edhe goditjet e para.

Raporti i KiE për Shqipërinë
Ndërkohë, në faqen zyrtare të KiE, është bërë publik edhe raporti vjetor për vitin 2017, ku midis të tjerash përmendet edhe Shqipëria. Duke i cekur nga pak të gjitha ato që konsiderohen si gjëra shqetësuese në vendin tonë, Këshilli i Evropës thekson se Shqipëria ka bërë progres në forcimin e ligjeve për financimin e partive politike, deklarimet e pasurive, luftën kundër pastrimit të parave, si edhe për luftën kundër terrorizmit.

“Në 2017 grupi Kundër Krimit Ekonomik në Shqipëri (AEC-AL) kontribuoi në forcimin e kuadrit ligjor e institucional për partitë politike dhe financimet e fushatave, deklarimin e pasurive, pastrimin e parave dhe lufta kundër financimit të terrorizimit. Projekti prodhoi 14 dokumente këshilluese në lidhje me problemet e mësipërme.

Progres po bëhet gjithashtu drejt forcimit të legjislacionit të financimit të partive dhe rritjes së kapaciteteve të auditimit të stafit të Komisionit Qendror të Zgjedhjeve, të auditorëve, dhe OJQ-ve me anë të trajnimeve specifike. Legjislacioni i deklarimit të pasurive është përmirësuar me amendamente të ligjeve ekzistuese sipas këshillave të grupit kundër krimit ekonomik AEC-AL”, thuhet në raportin vjetor të Këshillit të Evropës.