Aktualitet

Natën që kaloi ishin me mijëra qytetarët që u detyruan të blejnë aparate të reja për të parë kanalet televizive në Tiranë dhe Durrës, pasi Autoriteti i Mediave Audioviziuale ndërpreu transmetimet analoge. Qytetarët u dyndën, duke krijuar radhë të gjata nëpër dyqane deri natën vonë, siç duket edhe nga fotot më poshtë.

Për familjet në nevojë janë shpërndarë 88 mijë aparate, por shumë të tjerë ankohen se përse duhet të paguajnë sërish për të parë transmetimet televizive, për të cilat tashmë paguajnë taksën e Televizionit Publik Shtetëror.

Gjithsesi, pakënaqësia nga vendimi i institucioneve shtetërore, u shkarkua edhe kësaj radhe me ndonjë të sharë nëpër dhëmbë, ndonjë status në rrjetet sociale, ndonjë intervistë kuturu në ato pak televizionë që ia dhanë mundësinë të shpreheshin dhe pastaj, të gjithë paguan paratë, kur i erdhi radha, për të blerë aparatin.

Sipas Kreut të AMA, Gentian Sala, fushata e informimit ka nisur prej një viti e gjysëm dhe kjo situatë do të zgjasë pak ditë, maksimumi një javë.

Si turistët e huaj në Shqipëri, ashtu dhe shqiptarët jashtë, kanë shpenzuar më shumë në gjashtë muajt e parë të këtij viti. Sipas statistikave të Bankës së Shqipërisë, shpenzimet e të huajve në vend për periudhën janar-qershor arritën në 785 milionë euro, duke shënuar një nivel rekord maksimal historik, që pas viteve ’90.

Rritja e fluksit të turistëve të huaj, teksa Shqipëria po kthehet në një destinacion të preferuar turistik, ka bërë që të hyjë më shumë valutë nga turizmi në vend. Në raport me të njëjtën periudhë të një viti më parë, të ardhurat nga shpenzimet e të huajve në Shqipëri janë rritur me 8.7%.

Të dhënat e mëparshme të INSTAT kanë treguar se ka një rritje të hyrjeve të të huajve në vend. Për periudhën janar-qershor, Shqipërinë e vizituan 1.9 milionë të huaj, me një rritje prej 9.1% në krahasim me të njëjtën periudhë të një viti më parë.

Peshën kryesore vijojnë ta mbajnë shtetasit nga Kosova, me rreth 29% të totalit, të ndjekur nga maqedonasit, me 15%, grekët me 11.5%, malazezët me 9.3%, italianët me 7.3%. Rreth 30% e hyrjeve ishin për qëllime pushimi, sipas INSTAT. Shpenzimi mesatar i të huajve në Shqipëri rezulton rreth 410 euro, sipas të dhënave nga INSTAT për numrin e të huajve dhe Bankës së Shqipërisë për shpenzimet gjithsej.

Edhe shqiptarët që udhëtojnë jashtë kanë qenë më të shumtë në numër dhe si rrjedhojë kanë shpenzuar më shumë. Sipas të dhënave të Bankës së Shqipërisë, për periudhën janar-qershor, paratë e shpenzuara jashtë ishin 624 milionë euro, me një rritje prej 10% me bazë vjetore. Edhe shpenzimet e shqiptarëve jashtë kanë arritur nivelet rekord të larta që pas viteve ’90.

Sipas të dhënave të tjera të INSTAT, për 6 muajt e parë të vitit, daljet e shtetasve shqiptarë arritën në 2.4 milionë, me një rritje prej 6% me bazë vjetore. Shpenzimi mesatar i shqiptarëve jashtë rreth 327 euro, sipas të dhënave nga INSTAT për numrin e të huajve dhe Bankës së Shqipërisë për shpenzimet gjithsej.
Mesatarja e shpenzimeve të shqiptarëve jashtë rezulton më e ulët për shkak se një pjesë e madhe e pushuesve shkojnë në vendet fqinjë, ku është relativisht lirë dhe qëndrojnë pak ditë.

Por kur udhëtojnë në vendet e Europës Perëndimore, shqiptarët nuk kursehen dhe shpenzojnë më shumë sesa mesatarja europiane. Për në Gjermani, ku mesatarisht rrinë 10.9 ditë, shpenzimi mesatar është 496 euro, ose 47% më shumë se mesatarja europiane. Vetë gjermanët për pushime jashtë vendit të tyre shpenzojnë mesatarisht 443 euro për udhëtim, sipas Eurostat.

Prej disa vitesh bilanci i udhëtimeve në Shqipëri është pozitiv, ndërsa deri në 2014-n shqiptarët shpenzonin më shumë jashtë sesa të huajt harxhonin në Shqipëri. Për 6-mujorin e parë 2017, bilanci i udhëtimeve ishte pozitiv me 162 milionë euro, 4% më shumë se janar-qershor i një viti më parë./ Monitor

Vetëm pak ditë më parë, kryeministri i Greqisë, Aleksis Tsipras, bëri një deklaratë të fortë kundër shqiptarëve, teksa u shpreh se çështja çame nuk ekzistonte, kur po fliste për marrëdhëniet mes dy vendeve.

“Të rishikohen kufijtë e detit, varrezat dhe librat e historisë. Duhet të rishikohen edhe të drejtat e pakicës greke. Nuk do të ketë ndryshim kufijsh dhe nuk do të diskutohet çështja çame. Ajo nuk ekziston!”, tha Tsipras

Por për këtë deklaratë, Tsipras ka marrë një përgjigje të fortë nga historiania shqiptare, Elena Kocaqi, e cila ka ‘shokuar’ botën greke, teksa e ka quajtur kryeministrin Tsipras ‘çam’.

 “Kjo është një deklaratë arrogante e një Çami që është bërë Grek modern”, është shprehur Kocaqi.

Më tej, ajo shkruan se Greqia popullsinë e saj autoktone e ka Arvanite, Shqiptaro- Maqedone dhe Çame dhe se shqiptarët po të duan e kanë në dorë Greqinë, ndaj ata duhet t’i harrojnë kërcenimet arrogante.

“Ne duam të drejta etnike për pjesën më të madhe të popullsisë së Greqisë që i përket gjakut shqiptar dhe që një helenizëm artificial dhe qesharak, ju ka mohuar të gjitha drejtat etnike”, ka shkruar Elena Kocaqi.

Deklaratat e saj kanë bërë bujë në mediat e vendit fqinj, por ajo që vihet re është një raportim shumë i saktë prej tyre. Në të gjitha mediat e lexuara për statusin e historianes është bërë vetëm një raportim duke lënë mënjanë interpretimet që mund të ishin bërë mbi rastin.

Ish-deputeti i Kuvendit të Kosovës, Numan Balic dyshohet se është përfshirë në një skandal seksual.
Indeksonline mëson se Balic, i cili për një kohë të shkurtër ushtroi edhe postin e zëvendës/ministrit në Qeverinë “Haradinaj”, ka abuzuar me një të mitur.

Burimet thonë se 60-vjeçari (1958) është përfshirë në një abuzim seksual me një 17-vjeçare të komunitetit boshnjak, Selma M..

Rasti në fjalë është raportuar nga prindërit e viktimës. Menjëherë pas marrjes së informacioneve, organet e sigurisë kanë marrë në pyetje ish-zv/ministrin Balic i cili më pas është liruar në procedurë të rregullt.

Lidhur me këtë çështje ka reaguar edhe Stacioni i Policisë së Kosovë në Pejë. Zëdhënësi për Informim në këtë rajon, Driton Rugova ka konfirmuar për “Indeksonline” rastin në fjalë.

“Po, është njfotuar një rast për abuzim seksual me një të mitur. Rasti është në Prokurorinë e Shtetit. Personi nuk është arrestuar, por është vetëdorzuar në polici dhe më pas prokurori përkatës e ka liruar në procedurë të rregullt”, ka deklaruar ai.

Numan Balic që nga paslufta njihej si numri një i boshnjakëve në Kosovë. Ai ishte deputet në legjislaturën e tretë (2007 -2010). Po ashtu, Balic ishte edhe ministër i Shëndetësisë në vitin 2003. Mirëpo, as ky post nuk i kishte zgjatur shumë.

Kryeministri i atëhershëm, Bajram Rexhepi e kishte shkarkuar për disa arsye. E ky vendim e kishte irrituar tej mase Balicin.

“Derisa as vetë kryeministri nuk është zgjedhur me procedurë ligjore, nuk ka të drejtë të më shkarkojë nga ky post”, kishte deklaruar ai, duke shtuar se prapa vendimit të kryeministrit Rexhepi për shkarkimin e tij nga posti i ministrit të Shëndetësisë qëndronin edhe strukturat e PDK-së.

Vlen të theksohet se së fundmi Numan Balic nuk arriti të ushtrojë detyrën e zv/ministrit për më shumë se 30 ditë.

Kryeministri i Republikës, Ramush Haradinaj kishte shkarkuar meë 23 dhjetor. “Shkarkimi i tij vjen si rezultat i marrëveshjes politike që ekziston me partinë nga Komuniteti i të cilës vjen z.Balic”, ishte konfirmuar nga Zyra e Kryeministrit.