Aktualitet

Albpetrol ka mohuar të jetë shkaktari i helmimit të banorëve të Zharrzës, të cilët përfunduan në spital. Shoqëria Albpetrol sqaron se ka kryer matjet në vendin ku banorët kanë thënë se dilte uji i helmuar dhe ajri ka rezultuar i pastër, nën nivelin minimal të ndotjes. “Mesnatën e datës 18 Shtator 2018 shoqëria Albpetrol sh.a është njoftuar për pretendimin e disa banorëve të zonës së Zharrëzës se kishin hasur probleme shëndetësore nga gazrat dhe se këta banorë janë shtruar në Spitalin Rajonal të Fierit. Albpetrol sh.a ka ngritur menjëherë një grup specialistësh teknikë, të cilët në orën 00:50 të datës 19 Shtator 2018 kanë shkuar në vendin e pretenduar se kishte ndodhur problemi.

Ekspertët e Albpetrol sh.a kanë kryer matjet e ajrit dhe ka rezultuar se situata ishte normale dhe nuk kishte probleme me gazrat. Matjet janë bërë në pikën ku po kryhej derdhja e ujit, e cila presupozohet që të jetë burimi i ndotjes. Matjet e ajrit të kryera në këtë pikë nuk arrinin as vlerën 5 ppm, e cila është vlera më minimale që shkakton edhe rënien e alarmit. Matje në terren ka kryer edhe Drejtoria Rajonale Mjedisore dhe rezulton se nuk ka ndotje nga gazrat apo produkte të tjera hidrokarbure. Pra, nga të gjitha matjet dhe analizat e kryera nuk rezulton prezencë gazi në ajër”, deklaron Albpetrol.

Më tej shoqëria thotë se personat e helmuar kishin qenë në një lokal në zonë ku kishin konsumuar ushqime dhe pije, duke larguar kështu përgjegjësinë. “Nga verifikimi në terren ka rezultuar se personat që pretendojnë që janë helmuar nga gazi ndodheshin në një prej lokaleve të zonës prej disa orësh ku kanë konsumuar pije dhe ushqime të ndryshme”, thotë Albpetror. Më tej shoqëria deklaron se në të gjithë zonën e Zharrzës, zonë mjaft e populluar, këta janë personat e vetëm që pretendojnë që kanë probleme shëndetësore si pasojë e gazit apo produkteve të tjera hidrokarbure.

Kjo sipas Albpetrol ngre pikëpyetje dyshimi në lidhje me arsyen e vërtetë të pretendimeve. “Përfaqësuesit e Albpetrol sh.a dhe mjeku i shoqërisë kanë shkuar në Spitalin Rajonal Fier për të ndjekur nga afër situatën. Personat që kanë shkuar gjatë natës në spital janë trajtuar nga mjekët dhe kanë lënë ambientet pas disa orësh. Sipas informacionit zyrtar të Spitalit Rajonal Fier, me nr. Prot 2524/1, datë 19.09.2018, ‘Personat e paraqitur në urgjencën e Spitalit Rajonal Fier pretendonin për helmim nga gazi, por referuar të gjitha ekzaminimeve të kryera nga mjekët e urgjencës dhe mjeku specialist toksikolog, diagnoza nuk shkon për Suspekt Toksikim Akut Gazi.

Një nga personat e paraqitur ka rezultuar se kishte konsumuar alkool në masën 0.73 mg/l’. Mjekët e spitalit kanë sqaruar se pas marrjes së ndihmës së parë mjekësore, personat janë larguar nga spitali. Një prej tyre ka refuzuar të marrë ndihmë shëndetësore ndërsa një person tjetër nuk ka pranuar të vazhdojë kurën. Në spital nuk është paraqitur asnjë person tjetër që të pretendojë për probleme shëndetësore përveç shtatë personave që ndodheshin në lokal duke konsumuar pije dhe ushqime”, thotë me tej shoqëria. Sipas saj, ndotjet në zonën e Zharrzës janë krijuar paralelisht me industrinë e naftës në këtë zonë dhe konsiderohen si ndotje të vjetra historike dhjetëra vjeçare. Albpetrol sh.a ka marrë masa konkrete për përmirësimin e mjedisit në këtë zonë.

Pas fluturimit të parë ditën e shtunë me studentët e ekselencës, udhëtimi i radhës i “Air Albania”, ka ndodhur ditën e sotme dhe të përgjedhurit këtë herë janë 100 pensionistë.Në një video të shkurtër të publikuar në Instagramin e kryeministrit Edi Rama, dëgjohet teksa një stjuard iu uron udhëtim të mbarë, ndërsa mes tyre shihet edhe Ministrja e Shëndetësisë, Ogerta Manastirliu.

Prokuroria e Përgjithshme nuk po gjen dot një prokuror të lexojë pretencën për Emiljano Shullazin dhe të akuzuarit e tjerë të të njëjtit proces. Pas komandimit të Elisabeta Ymerajt si drejtuese e Prokurorisë së Tiranës dhe pas “sëmundjes” që i ka rënë prokurorit Ened Nakuçi, prokuroria ka dështuar të zgjedhë një prokuror tjetër.

Shorti për caktimin e një prokurori i organizuar nga Prokuroria e Krimeve të Rënda ka dështuar. 19 prokurorët e thirrur nga Donika Prela sot paradite nuk kanë pranuar të zgjidhen me short dhe kanë braktisur mbledhjen.

Në seancën e kaluar përballë të akuzuarve doli prokurori Besim Hajdarmataj, ndërsa prokurori Ened Nakuçi nuk u paraqit pasi dërgoi një raport që tregonte se ishte i sëmurë.

Por në intervistën e fundit që dha në media, ambasadori amerikan Donald Lu tha se Emiljano Shullazi ka kërcënuar gjykatës dhe prokurorë.

“Dhe jam i skandalizuar që këtë javë që keni gjyqin e Shullazit, ku Shullazi vetë ka kërcënuar gjykatës dhe prokurorë, aq sa prokurorët as nuk shkojnë në gjyq. Si ka mundësi që ky vend të ecë përpara kur ndodhin këto gjëra? ” u shpreh Donald Lu.

Prokuroria pranë Gjykatës së Shkallës së Parë Tiranë, pas referimit te Drejtorisë Vendore të Policisë Tiranë, ka vendosur sekuestro mbi shumën 1,2 milionë euro, të depozituar në një bankë të nivelit të dytë për llogarinë e shtetasit me iniciale A.H.

Nga aktet paraprake, transaksionet bankare në lidhje me këtë shumë janë justifikuar me anë të kontratave të dyshimta që nuk përputhen me të dhënat e shoqërisë, aksionet e të cilës janë shitur në shumën 1.2 milionë euro, shkruan tch.

Deri në këtë fazë të hetimeve ka dyshime të arsyeshme se shuma e sekuestruar do të përdorej në aktivitet kriminal të personave të dyshuar dhe personave të tretë.

Ka dhjetëra e dhjetëra histori me drejtorin e Top Channel, apo me politikanin e dështuar Ben Blushi, i cili që kur ka shkuar në krye të këtij televizioni duket se i ka hapur një gropë të madhe pa kthim një nga mediave ikonë në vend.

Por, përtej kësaj ne shohim përditë një stil të Ben Blushit, atë që ka pasur këtu e 20 vite më parë për t’u imponuar e për të kapur atë që do për interesa krejt të ngushta dhe klienteliste. A thua se Ben Blushit i digjet barku për parime.

Njeriu që fliste e buçiste në parlament për varfërinë, për shqiptarët, për mjerimin, për nacionalizëm, me një parti të vogël që katandisi si mos më keq, kërkon tashmë të ketë protagonizëm, duke u kapur pas disa pikave të nxehta sociale.

Për shembull le të marrim si rast Valbonën, a thua se Ben Blushit i “digjet barku” për të. Askush të mos e mendojë këtë. E ka me qitje të largët. Ose kërkon pazare me biznesin që po ndërton HEC-et në Valbonë, ose kërkon ç’të mundet, ç’ti japin që të hajë, ose kërkon të dalë diku tjetër. Të nxjerrë inatin pse gazetarët kanë ikur nga televizioni i tij.

Askush të mos mendojë se Ben Blushit i “digjet barku” për Valbonën, kur atij nuk i është djegur asnjëherë shpirti për shqiptarët edhe pse në media apo në parlament fliste e buçiste.

Për këtë po sjellim një rast, gjatë kohës që Blushi ka qënë prefekt në Korçë.  Në vitin 2001 e solli Fatos Nano si prefekt i qarkut të Korçës, ku dhe u bë deputet.

Blushi në atë kohë erdhi si një djalë me profil të lartë, ish-kryeredakto i “Koha Jonë”, zv.ministër i Jashtëm, i larguar nga detyra pas skandalit dhe nxjerrjes së sekretit të takimit me Medllin Ollbrait, por gjithësesi performonte ndryshe një djalë i ri që vinte nga Tirana, një djalë me origjinë nga Korça, nga i cili diçka pritej.

Po sjellim një ngjarje që ndodhi gjatë kohës kur Blushi ishte prefekt. Një nënë shtatzënë, rreth 35 vjeç, pra në një moshë pak më të madhe, me një luftë për të pasur një fëmijë në jetën e saj, punonte thjeshtë si sanitare në një shkollë dhe në muajin e shtatë të shtatzanisë hiqet nga puna me barkun te goja. Kur afërsisht po hynte në muajin e tetë të shtatzanisë drejtohet tek prefekti dhe i kërkon pse drejtori i arsimit e ka hequr nga puna. I kërkoi që ta ndihmojë sepse ishte shtatzënë dhe pas disa javësh merrte lejen e lindjes, do të shkonte në shtëpi dhe vendi i punës do të ishte i lirë për të paktën një vit. Do të humbte ato pak para që merrte, ato pak të ardhura që i vinin nga leja e lindjes, atë rrogën për të ushqyer fëmijën e saj, për t’u ushqyer vetë. Për të rritur një fëmijë në shtëpi në kushte normale.

Pas shumë përpjekjesh e takon Ben Blushin në korridor, i cili fjalës së nënës shtatzënë “Ju lutem më ndihmoni se po më heqin nga puna, se jam dhe me barkun te goja. Do gelem pa bukë unë dhë fëmija im”, Ben Blushi i përgjigjet “A më pyete mua kur ngele shtatzënë që të të mbaj unë në punë”, e pra ky është Ben Blushi, fytyra e vërtetë e tij. Kjo histori ka gati 16 apo 17 vjet, dhe këtë Ben Blushi e mban mend shumë mirë.

Dhe mos kujtoni se Ben Blushit i “digjet barku” as për Top Channel-in, as për Vjollcën, as për Valbonën, as për gjë tjetër. Ben Blushi luan vetëm për xhepin e vet dhe interesin e tij personal. Për më tepër sot ai është një nga njerëzit që i urren edhe më shumë shqiptarët, pas “shpullës” që i dhanë dhe dështimit me projektin e tij “LIBRA” në zgjedhjet e vitit 2017.

Dhe tani për të dalë në sipërfaqe, për të shpëtuar dhe për të qëndruar në treg, del e luan me karta morale. Por, a mund të ketë moral dikush i cili nuk ka pasur ndjesi as për një nënë shtatzënë. Një njeri i cili e tha publikisht se fajtori që ai nuk u bë më deputet dhe nuk eci në politikë ishin shqiptarët. A thua po i “digjet” më barku Ben Blushit për shqipatët dhe Shqipërinë.

‘As gjermani nuk kishte aq mllef gjatë luftës’, kështu u shpreh për newsbomb.al Esmeralda Bala banore në Jalë.

E shkatërruar mes lotëve që mezi e linin të fliste ajo tregonte tmerrin që kishin përjetuar dje gjatë aksionit të IKMT nga i cili u shembën 9 ndërtesa pa leje.

Banorët e kësaj zone kanë hedhur akuza të forta ndaj efektivëve të policisë.

Esmeralda Bala është një ndër personat që pretendon se i kanë shembur pa te drejtë banesën e vjetër e cila ka qenë e ndërtuar në vitet 1990.

E kontaktuar nga newsbomb.al Esmeralda me zërin që i dridhej nga të qarat tregon se policia i ka vjedhur asaj dhe familjes lekë dhe sende me vlere brenda shtëpisë.

“Na plaçkitën, na kanë shkatërruar jetën, jemi në qiell të hapur. Policët nuk na lanë të marrim as rrobat e trupit. Na kanë vjedhur lekët që kishim të vendosura në dollap dhe gjithë sendet me vlere, ora syze varse.

Kërkojmë ndihmë për vete edhe për fëmijët, pasi nuk kemi ku të fusim kokën. Na katandisën në gjendje të mjerueshme. As gjerman nuk kishte aq mllef gjatë luftës”, shprehet duke qarë Esmeralda Bala.

Në fotot e siguruara nga newsbomb.al duket qartë situata e rëndë në banesën e Esmeraldës e cila është shkatërruar edhe plaçkitur.