Orikuminews

Ditën e zgjedhjeve, më 30 qershor, askush nuk duhet të ketë të drejtë, mundësi apo shans që të prekë integritetin e një procesi që është thelbi i demokracisë së vendit”, – deklaroi ministri i Brendshëm Sandër Lleshja gjatë takimit të zhvilluar sot me anëtarët e taskforcës qendrore, prefektët, drejtorët e Policive Vendore, drejtorët e Kufirit dhe përfaqësues nga taskforcat vendore lidhur me masat dhe ecurinë e luftës kundër kultivimit të kanabisit.

“Vendi është pothuajse i futur në fushatë, të gjitha agjencitë ligjzbatuese kanë detyra dhe përgjegjësi për një proces zgjedhor sikur e kërkon ligji në fuqi. Zhvillimi i zgjedhjeve në prag të vendimmarrjeve të rëndësishme që lidhen me të ardhmen europiane të vendit u jep atyre një rëndësi shumë të veçantë, sikurse edhe për shkak të kontekstit politik i cili karakterizohet për shkak të një polariteti dhe përpjekje për të krijuar vështirësi për zhvillimin e procesit. Të gjitha strukturat, sidomos prefektët, të vihen në krye të procesit të koordinimit të institucioneve vendore dhe atyre qendrore që janë të përfaqësuara në nivelin lokal, me qëllim që të ofrohen të gjitha mundësitë që qytetarët të kenë mundësi të shprehin të drejtën për të votuar”, – deklaroi ministri.

Përgjegjësi, tha ai, ka edhe Policia, që duhet të krijojë mjedis të sigurt, që zgjedhjet të realizohen në mjedis të sigurt, dhe që të realizohet kjo, çdo drejtues i policisë duhet të jetë i angazhuar dhe i motivuar që procesi të zhvillohet si duhet.

Sipas tij, roli i policisë është jashtë palëve dhe përtej palëve, nuk ka asnjë peshë apo përgjegjësi për t’u angazhuar politikisht.

Lleshaj theksoi se askush nuk mund të cenojë procesin zgjedhor, pasi është një e drejtë e qytetarëve.

Gjatë këtij takimi, ministri u ndal edhe në luftën kundër kanabisit, duke deklaruar se puna e policisë do të matet me rezultate konkrete. “Çdo fidan që kapet në Shqipëri deri në 15 qershor është meritë e juaja, drejtuesve të policisë, çfarë kapet pas 15 qershorit, është përgjegjësi e secilit prej jush e drejtpërdrejtë. Kjo datë ndan përgjegjësinë, dhe në funksion të kësaj detyre duhet të organizohet puna në nivel vendor dhe qendror”, – tha Lleshaj.

Për sa i përket luftës kundër krimit të organizuar, ministri Lleshaj kërkoi angazhimin e të gjitha strukturave për të thelluar punën, që vendi të plotësojë të gjitha parametrat e sigurisë. /a.g/

Guvernatori i Bankës së Shqipërisë Gent Sejko, deklaroi të mërkurën se, “2018 ishte një vit progresi për ekonominë dhe financat shqiptare. Aktiviteti ekonomik dhe punësimi vijuan të zgjerohen, pagat dhe presionet e brendshme inflacioniste erdhën në rritje, treguesit kryesorë të shëndetit të sektorit bankar shënuan përmirësim, dhe një sërë indikatorësh të balancave të brendshme dhe të jashtme ekonomike erdhën drejt forcimit”.

Gjatë raportimit të veprimtarisë vjetore të Bankës së Shqipërisë për vitin 2018, në seancën plenare të Kuvendit të Shqipërisë, Guvernatori Sejko, tha se, ritmi i rritjes ekonomike u përshpejtua në 4,1% gjatë vitit 2018. Ajo pasqyroi kontribute pozitive nga zgjerimi i konsumit familjar, i investimeve të biznesit dhe i eksporteve”.

“Punësimi në ekonomi u rrit me 1,6% gjatë vitit të shkuar, ndërsa norma e papunësisë u ul në nivelin 12,3%, nga 13,4% një vit më parë. Deficiti i llogarisë korrente zbriti në 6,7% të PBB-së gjatë vitit 2018, nga niveli 7,5% i një viti më parë. Përmirësimi i tij reflektoi në një masë të madhe rritjen e aktivitetit turistik”, – deklaroi Sejko.

Sipas tij, deficiti buxhetor dhe borxhi publik vijuan të shënojnë një tendencë rënëse, duke pasqyruar si kursin konsolidues të politikës fiskale, ashtu dhe rritjen ekonomike dhe forcimin e kursit të këmbimit. Ndërsa sektori bankar forcoi pozitat e mirëkapitalizimit.

Inflacioni vjetor, vijoi Guvernatori, rezultoi mesatarisht 2,0%. Ndërsa Banka e Shqipërisë, ka ndjekur një politikë monetare stimuluese, e cila ka nxitur rritjen ekonomike zgjerimin e konsumit të biznesit, familjeve dhe sektorit publik.

“Politika monetare lehtësuese, (ulja e norms bazë të interesit për lekun në nivelin 1%) ka ndikuar në rritjen me 0,5% të ekonomisë, rritjen e konsumit, zgjerimin e kreditimit dhe të aktivitetit të sipërmarrjes”, – theksoi Guvernatori.

Sipas tij, gjatë vitit 2018 është rritur cilësia e kredisë. Kredia me probleme u ulë në nivelin 11,1% kundrejt 13% që ishte një vit më parë. Ndërsa sistemi bankar vijoi konsolidimin dhe sot operojnë në treg 12 banka nga 14 që ishin një vit më parë. Në fund të vitit 2018, rezerva valutore arriti nivelin 3.4 miliardë euro, i mjaftueshëm për të mbuluar 6,7 muaj importe mallrash dhe shërbimesh dhe 156% të borxhit të huaj afatshkurtër.

Guvernatori informoi se, BSH ka rritur masat për parandalimin e pastrimit të parave dhe ky hap u vlerësua nga institucionet ndërkombëtare të linjës. Ruajta e stabilitetit financiar dhe arritja e inflacionit në objektivin 3% mbetet mision i punës së Bankës Qendrore. /e.xh/ /a.g/

Shembull: një teleskop sapo ka dalluar një asteroid me diametër nga 100 deri në 300 metra që po lëviz me shpejtësinë 14 kilometra në sekondë dhe ndodhet 57 milionë kilometra larg Tokës.

Astronomët e vlerësojnë me 1% rrezikun që të përplaset me Tokën më 29 prill 2027.

Çfarë do të bëjmë?

Ky është skenari katastrofik dhe tërësisht imagjinar mbi të cilin pothuajse 300 astronomë, shkencëtarë, inxhinierë dhe ekspertë të emergjencave po punojnë këtë javë në periferi të Uashingtonit.

Sa?

Vetëm asteroidët në orbitë që afrohen më shumë se 50 kilometra me Tokën na interesojnë.

”Astronomët zbulojnë të tillë çdo ditë: më shumë se 700 këtë vit me një total të regjistruar 20 001”, deklaroi Lindley Johnson, nga zyra e koordinatave të mbrojtjes planetare (ESA) në NASA, krijuar në vitin 2016.

”Një ndër më të rrezikshmit, është një shkëmb i pagëzuar me emrin 2000SG344: me një diametër rreth 50 metra dhe me një mundësi nga 2 096 të tilla për t’u përplasur me Tokën pas 100 vitesh”, sipas ESA-s.

”Pjesa më e madhe janë më të vegjël, por 942 janë më shumë se një kilometër”, thotë astronomi Alan Harris, i cili ka informuar auditorin që disa asteroidë të mëdhenj fshihen akoma në qiell: ”Pjesa më e madhe mund të jenë pas Diellit”.

Kryesisht dallohen nga teleskopët amerikanë në Arizona dhe Havai.

ESA ka instaluar një teleskop në Spanjë dhe planifikon të tjerë në Kili dhe Siçili. Astronomë të shumtë thonë se një teleskop në hapësirën tokësore nuk mund të shikojë një objekt në anën tjetër të Diellit.

Shmangia e asteroidit

Ushtrimi i kësaj jave ka për qëllim stimulimin e mënyrës se si bota do të reagonte ndaj një kërcënimi të tillë. Do të duhej që të gjithë teleskopët të drejtoheshin drejt objektit për të llogaritur saktësisht shpejtësinë dhe trajektoren e tij, vëzhgimet fillestare mund të jenë të pasakta.

Pastaj zgjidhjet janë dy: shmangia e objektit ose evakuimi.

Nëse madhësia është më e madhe se 50 metra, konsensusi ndërkombëtarë thotë që duhet të evakuohet zona që dyshohet të goditet.

Sipas Detlef Koschny, dy javë para goditjes mund të parashikohet vendi i prekur. Disa ditë para, saktësia është në disa qindra kilometra.

Për objektet e mëdha, ideja nuk është që të goditet me një bombë atomike si në filmin ”Armageddon”, pasi mund të krijohen copa po aq të dëmshme. Ideja është që të lëshohet një objekt drejt asteroidit për ta devijuar… si një makinë goditëse kozmike.

NASA do të testojë idenë me një asteroid të vërtetë 150 metra, në vitin 2022, gjatë misionit DART.

”Mbetet problemi politik”, thotë Romana Kofler nga zyra e çështjeve hapësinore në OKB: ”Cili do të jetë autoriteti vendimmarrës?”.

”Deri më sot kjo pyetje nuk ka marrë përgjigje”, shpjegon ai.

Sidoqoftë, Këshilli i Sigurimit i OKB-së e lë hapur këtë çështje./ /esko/ /v.b/ a.jor.

Tirana është kthyer në një qendër atraksioni turistik për turistë nga rajoni, Europa, por edhe më gjerë.

Në vetëm 15 kilometra katrorë sipërfaqe, në Tiranë mund të shijosh thuajse të gjitha format e turizmit, duke nisur nga ai kulturor, historik, duke vijuar te turizmi arkitekturor e kulinar, e mandej te turizmi malor dhe i aventurës.

Mirela Koçollari, drejtoreshë e Turizmit në bashkinë e Tiranës tregon për Agjencinë Telegrafike Shqiptare se vetëm gjatë muajve të parë të 2019 ka një rritje me rreth 25% më shumë turistë në Tiranë, krahasuar me të njëjtën periudhë të një viti më parë.

”Është evidente prezenca e turistëve në rrugët e kryeqytetit. Ka një rritje të fluksit të turistëve dhe të Tiranës si destinacion, dhe gjatë 2019 janë 150 mijë turistë që e kanë vizituar kryeqytetin. Kryesisht turistët që vizitojnë Tiranën vijnë nga vende që kanë linja direkte, ku pjesa më e madhe janë gjermanë, italianë, janë shumë dhe nga Turqia dhe padiskutim nga Kina”, tha Koçollari.

Ajo tha se, “atraksionet më të frekuentuara nga turistët janë pjesa qendrore e Tiranës, si sheshi ‘Skënderbej’, i cili është kthyer në një epiqendër dhe pikënisje e itinerarit të turistëve të huaj. Gjithashtu atraksione të tjera janë Pazari i Ri, i cili është kthyer në një oaz interesant gjelbërimi i frutave dhe perimeve si dhe gatimeve tradicionale, si dhe Kalaja e Tiranës, e cila ka tërhequr shumë vëmendje si nga pozicioni dhe historiku që mbart, ashtu dhe nga mënyra se si është rijetëzuar”.

“Përveç pjesës qendrore atraksione të frekuentuara nga turistët janë dhe muzetë, si Muzeu Historik Kombëtar, Muzeu i Gjetheve, i cili ka një dyfishim të numrit të turistëve pasi trajton tematika që të huajt kanë interes”, u shpreh Koçollari.

Ajo shtoi se, “së shpejti qytetit të Tiranës do i shtohet dhe një atraksion i ri, që do jetë shtëpia muze e shkrimtarit Ismail Kadare. Ky muze do jetë shumë pranë qendrës së Tiranës dhe do jetë shumë ndryshe nga muzetë e tjerë. Ai është konceptuar brenda një pallati banimi dhe aty do jetë një studio, e cila do i ftojë të gjithë jo vetëm të apasionuarit e letërsisë, por të gjithë turistët për të kuptuar jo vetëm figurën e vet shkrimtarit, por dhe mënyrën dhe tipologjinë e të jetuarit gjatë periudhës së komunizmit”.

Gjatë vitit 2018, Tiranën e kanë vizituar rreth 2 milionë turistë. Ndryshe nga vitet e tjera, tashmë turistët e zgjedhin Tiranën jo më për një ditë, por për disa ditë qëndrimi. /r.e/

Shkëmbim më efikas i informacionit midis strukturave inteligjente, bashkëpunim kundër trafiqeve të paligjshëm, lehtësim dhe thjeshtëzim i lëvizjes së pasagjerëve dhe mallrave.

Këto ishin temat kryesore që diskutuan gjatë një takimi bilateral Drejtori i Përgjithshëm i Doganave Shqiptare, Arlind Gjokuta, me Drejtorin e Përgjithshëm të Doganave Greke, Kostandinos Mourtidis.

Gjatë këtij takimi, i cili u zhvillua në qytetin e Gjirokastrës, dy homologët diskutuan mbi rritjen e bashkëpunimit në fushën e shkëmbimit të informacioneve, që ndikon shumë në sigurinë e të dy vendeve, si dhe të eksperiencave për të përmirësuar punën e Administratave Doganore.

Drejtori i Doganave Shqiptare, Gjokuta, e njohu homologun grek me disa nga arritjet e administratës që ai drejton, si në luftën kundër trafiqeve të paligjshme, atyre të qenieve njerëzore dhe lëndëve narkotike, kontrollit të flukseve të parasë fizike që kalon në kufi dhe kontrabandës së mallrave.

Gjatë këtij takimi u vlerësua me interes për të dy palët shkëmbimi i informacioneve dhe kryqëzimi i tranziteve që nisen nga Porti i Pireut me destinacion Shqipërinë, për të parandaluar kontrabandën. Për këtë do të ndihmojë shumë eksperienca pozitive në shkëmbimin e informacioneve dhe në kryqëzimin e tranziteve në kuadër të projektit të SEED të implementuar nga Bashkimi Europian.

Ndërkohë u dakordësua nga dy drejtuesit e Doganave respektive se ngritja dhe funksionimi i Qendrës Operacionale të Përbashkët me përfaqësues të Policisë dhe Doganave të të dy vendeve, do të shërbejë për zgjidhjen e shumë problematikave kufitare. Një marrëveshje e tillë mes dy vendeve tashmë është drejt përmbushjes.

Greqia është tashmë prej vitesh një ndër partnerët kryesorë në shkëmbimet tregtare me vendin tonë, dhe në këtë aspekt, bashkëpunimi midis administratave doganore luan një rol të rëndësishëm. /a.g/

Moti ditën e sotme parashikohet me vranësira mesatare dhe të dendura në të gjithë territorin.

Shërbimi Meteorologjik Ushtarak bën me dije se deri në mesditë reshjet do të jenë të pranishme në jugperëndim të vendit me intensitet të ulët e mesatar. Më tej reshjet do të përfshijnë të gjithë vendin me intensitet deri mesatar. Lokalisht në formën e shtrëngatave. Në orët e vona të mbrëmjes reshjet do të jenë me intensitet të lartë në qarqet në jugperëndim e veriperëndim.

Era do të fryjë me drejtim Juglindje-Jugperëndim 1-10 m/sek, në bregdet deri 20-25 m/sek në mesditë, duke u pasuar nga një valëzim i forcës 3-4 ballë.

QYTETET Temperaturat në °C Sigla
Shkodër 12/18 shi pak diell
Kukës 9/16 shi pak diell
Lezhë 12/18 shi pak diell
Dibër 8/14 shi pak diell
Durrës 12/19 shi pak diell
Tiranë 10/19 shi pak diell
Elbasan 10/19 shi pak diell
Berat 7/20 shi pak diell
Vlorë 11/20 shi pak diell
Korçë 6/14 shi pak diell
Gjirokastër 5/19 shi pak diell
Sarandë 12/19 shi pak diell

TIRANË, 1 maj /ATSH-Megi Zonja/ – Rreth 60 mijë shqiptarë që jetojnë dhe punojnë në Kanada nuk do të humbasin asnjë ditë kontribute, pavarësisht se ku kanë punuar.

Ministrja e Financave dhe Ekonomisë, Anila Denaj ka bërë të ditur sot nënshkrimin e marrëveshjes për “Mbrojtjen Shoqërore mes Shqipërisë dhe Kanadasë si edhe Rregullores Administrative” ndërmjet Ministrisë së Financave dhe Ekonomisë të Shqipërisë dhe Departamentit të Punësimit dhe Zhvillimit Social të Kanadasë.

Për Kanadanë, marrëveshja u nënshkrua nga ministrja e Punëve të Jashtme, Chrystia Freeland, ndërsa për Republikën e Shqipërisë, nënshkroi ambasadori i Shqipërisë në Kanada, Ermal Muça.

Qëllimi i kësaj marrëveshje është shmangia e mbulimit të dyfishtë për të njëjtën periudhë dhe bashkimi i periudhave të sigurimit të realizuara në dy vendet. Në bazë të marrëveshjes asnjë qytetar nuk do të humbasë asnjë ditë kontribute, pavarësisht se ku ka punuar, pasi bashkimi i periudhave do të bëjë të mundur plotësimin e kushteve ligjore për përfitimin e pensionit në të dy vendet.

Gjithashtu, pjesë e kësaj marrëveshjeje është edhe eksporti i pensioneve, që do të thotë që pensioni do t’u paguhet qytetarëve shqiptarë në vendin që do të zgjedhin të jetojnë. Kështu, shtetasit shqiptarë do të kenë mundësi që të marrin pensionin kanadez edhe nëse zgjedhin të jetojnë në Shqipëri, duke mos humbur asnjë të drejtë.

Nënshkrimi përfundimtar i kësaj marrëveshjeje erdhi pas një periudhe të gjatë negociatash për njohjen reciproke të skemave të sigurimeve shoqërore dhe hartimit të marrëveshjeve administrative, duke nisur që prej vitit 2013.

Gjatë nënshkrimit të marrëveshjes në Kanada, u vlerësuan marrëdhëniet shumë të mira mes Shqipërisë dhe Kanadasë si edhe u trajtuan disa çështje me interes të ndërsjellë si dhe u theksua vullneti i përbashkët i të dy vendeve tona për forcimin dhe zgjerimin e mëtejshëm të bashkëpunimit dy dhe shumëpalësh. Ndërkohë që Ambasada Shqiptare në Kanada dhe Instituti i Sigurimeve Shoqërore do të jenë të gatshëm të asistojnë me informacion komunitetin e interesuar shqiptar të Kanadasë në lidhje me procedurat e mëtejshme për njohjen e kontributeve.

Që nga viti 2015 Shqipëria ka nënshkruar marrëveshje me 7 vende të Evropës, dhe aktualisht ndodhet në proces negociatash dhe me 4 vende të tjera ku jetojnë dhe punojnë qytetarët shqiptar.

/a.g/