Irina

“Lufta me koronavirusin nuk fitohet nëse nuk përshkallëzojmë masat deri në ekstrem”, deklaroi sot Kryeministri Edi Rama, përmes një mesazhi drejtuar gjithë shqiptarëve.

Kryeministri theksoi se “këto masa janë domosdoshmëri për të ruajtur Shqipërinë nga përshkallëzimi agresiv i koronavirusit”.

Rama tha se “do të ishte akoma më e mira të zbatojmë me symbyllur këshillat praktike në këtë situatë lufte”. “Larjen e duarve, daljen sa më pak nga shtëpia, vetëizolimin për peronat e ardhur nga vendet e prekura dhe moslejimin e më të moshuarve të dalin nga shtëpia”, tha Rama.

Kryeministri theksoi se “ky grip i pazakonshëm nuk ndalet të shkoj kudo si çdo grip i zakonshëm, por ndryshe nga çdo grip i zakonshëm që kalon pa trauma kombëtare apo botërore ky grip luftohet me masa që përshkallëzohen deri në forma drastike të ngjashme me reagimin në rast lufte”, tha Rama.

Kryeministri sqaroi shumëkënd që mendon mendon gabimisht se po të kishim mbyllur kufijtë Shqipëria nuk do të prekej. “Jo, po të ishte kështu murtaja e mesjetës kur nuk kishte transport ajror nuk do të kishte marrë miliona jetë. Mbyllja e kufijve nuk e ndalon prekjen nga virusi por vetëm e ngadalëson dhe duhet bërë as më para, as më vonë veçse kur shfaqet”, tha Rama.

Kryeministri theksoi se kushdo duhet të ngulisë mirë në kokë se 80% e atyre që do të preken nuk do ta marrin kurrë vesh që janë prekur, sepse nuk do të kenë asnjë shenjë, do ta ngordhin koronën si çdo trup i shëndetshëm që lufton viruset. “Vetëm 20% të tjerë do të kenë shenja të ndryshme, dhe këtu ka shumë rëndësi të kuptohet se 80% e kalojnë njësoj si një grip, duke ndenjur në shtëpi. Për këta këshillohet mbajtja larg e më të moshuarve, jo shtrim në spital, vetëizolim. Vetëm 20% rezultojnë me shenja shqetësuese që janë të sëmurë kronikë, me zemër, tension, sëmundje mushkërish. Vetëm për ata duhet regjim spitalor përjashtuar rastet që u shfaqën të parat”, tha Rama./atsh

Kryeministri Edi Rama i bëri thirrje sot çdo qytetari që të bëjë detyrën e vet, ndërsa theksoi se masa drastike janë marrë në terren për personat e kthyera nga vendet e prekura.

“Mënyra se si ne reagojmë dhe masat që ne do të marrim ndryshojnë edhe formën që merr epidemia dhe aftësinë për ta vënë në kontroll pasi nëse shpërthen kolapson sistemin. Kolapsoi në Itali, ka ardhur puna që Italia trajnon mjekë të profileve të tjera për të bërë reanimatorin, të mos ketë pajisje, sepse masat u morën në një ritëm që rezulton të mos jetë i duhuri”, tha Rama.

Ai kërkoi që të mos bëhen karshillëqe, pasi koronavirusi është kërcënim jo vetëm personal, por edhe për të afërmit e miqtë. “Në Itali u bënë shumë karshillëqe nga të rinj e të reja duke thënë se nuk ‘pyesim për koronën’, ‘këto nuk ndihmojnë’”, tha Rama.

Kryeministri paralajmëroi se tani që flasim do të fillojnë të dalin forcat e Policisë dhe ato ushtarake për të kontrolluar ata që duhet të jenë në shtëpi, sepse ata duhen mbrojtur, dhe familjet e tyre, se nesër mund të jetë vonë./atsh

Ministrja e Shëndetësisë dhe Mbrojtjes Sociale, Ogerta Manastirliu deklaroi sot se në rast se qytetarët nuk respektojnë rregullat dhe masat drastike të ndërmarra nga qeveria, sipas planit parashikohen qindra të prekur me koronavirus.

“Plani ynë i bazuar në planin e Organizatës Botërore të Shëndetësisë në tre drejtime kryesore, kufizo përhapjen e virusit, vono përhapjen e tij, lehtëso pasojat e tij ka rëndësi edhe në atë që po bëjmë sot si qeveri dhe ministri e Shëndetësisë duke zbatuar një plan masash agresiv, një plan masash i cili ndryshon çdo ditë në bazë të dinamikës dhe të gjithë ngjarjeve që ndodhin në territor në raport me epidemiologjinë, në raport me zbulimin e rasteve dhe kontakteve të tyre. Është e rëndësishme për të theksuar dhe për t’iu dhënë një informacion sesi qëndron e vërteta kur flasim për zbatimin e rregullave dhe prandaj e kemi vënë theksin në zbatimin e rregullave. Sa më shumë masa marrim në këtë moment duke forcuar ditë pas dite masat, aq më shumë, aq në kurbën normale që është kurba lejla, ne do të vijojmë normalitetin e pandemisë sa i përket asaj që do të ndodhë në Shqipëri. Ne kemi realizuar disa skenarë. Sigurisht që këto janë skenarë që rifreskohen çdo ditë, janë fleksibël. Në skenarët tanë ne parashikojmë disa qindra të prekur në Shqipëri, të cilëve padyshim duhet t’u ofrojmë mundësinë që të marrin shërbimin adekuat në sistemin tonë shëndetësor”, -u shpreh Manastirliu.

Duke iu referuar grafikut të Qendres së Kontrollit dhe Parandalimit të Sëmundjeve, ajo tha se “në këtë grafik të thjeshtë dhe shumë të kuptueshëm të Qendrës së Kontrollit dhe Parandalimit të Sëmundjeve i cili thotë se nëse ne nuk i zbatojmë rregullat e nëse nuk merren masat e duhura, atëherë vendos në rrezik sistemin shëndetësor sepse nuk arrin dot sistemi shëndetësor të përballojë fluksin që do të shkojë në spitale për raste të cilat duhet të trajtohen. Dhe duhet të kuptojmë diçka që sistemi duhet të jetë i përgatitur jo vetëm për raste që janë dhe duhet të trajtohen me koronavirusin e ri por ndërkohë duhet të trajtojë të gjitha rastet të cilat vuajnë nga sëmundje të tjera, të cilat kanë nevojë të marrin shërbim shëndetësor”.

Ministrja u bëri apel edhe mjekëve e infermierëve të jenë të kujdesshëm.

“Thirrja edhe njëherë: sa më shumë ne të zbatojmë masat që qeveria ndërmerr aq më pak kosto do të kemi. Ndaj është momenti i duhur që të reflektojmë për sjelljen individuale. Pikërisht, kjo kurbë apo këto kurba na mësojnë si të sillemi, çfarë të masash të marrin dhe të vlerësojmë kapacitetet tona. Sigurisht që, kapacitete tona varen nga shumë elementë që është numri i mjekëve, infermiereve, mundësia për t’u ruajtur për mjekët dhe infermierët është shumë e rëndësishme nëpërmjet materialeve të mbrojtjes personale, pajisjeve të mbrojtjes personale, sepse ka shumë rëndësi që mjekët dhe infermierët të mos preken nga virusi. Kam një thirrje për mjeket dhe infermierë: ju lutem të jeni të kujdesshëm dhe mos neglizhoni në përdorimin e mjeteve mbrojtëse sipas OBSH”, -tha ndër të tjera Manastirliu./atsh