Irina

Në kuadër të nismës së ndërmarrë prej Tij, “Aleanca për Dhurimin e Gjakut”, Presidenti i Republikës, Ilir Meta së bashku me anëtarë të Kabinetit dhe punonjës të Institucionit, dhuruan sot gjak në Qendrën Kombëtare të Tranfuzionit të Gjakut.

Me këtë rast, Presidentit Meta u shpreh se, “ishte kënaqësi, por edhe përgjegjësi e imja për të dhuruar gjak pas apelit të Qendrës Kombëtare të Transfuzionit të Gjakut, pasi vetë situata është e tillë që kërkon një sensibilitet, humanizëm, solidaritet dhe përgjegjshmëri më të madhe, sidomos në ndihmë të fëmijëve, të të gjithë atyre që e kanë të domosdoshme dhurimin e gjakut për shkak të problemit të talasemisë”.

“Të mos biem pre e panikut, aq më tepër që ky është një proces mjaft i garantuar dhe tërësisht i shëndetshëm. Duhet ta vijojmë këtë aksion, sidomos për sa u takon të gjithë vullnetarëve të dhurimit të gjakut, të cilët janë të qëndrueshëm, aq më tepër në këto ditë kur nevoja është më e lartë dhe besoj se edhe solidariteti duhet të jetë më i forte”, ka theksuar Meta.

“Dëshiroj të falënderoj edhe personelin mjekësor për punën që po bën, si dhe të gjithë ata që i janë përgjigjur këto ditë këtij mesazhi dhe që jam i sigurt se do të vazhdojnë edhe në ditët e ardhshme të kontribuojnë vullnetarisht me dhurimin e gjakut”, ka shtuar ai.

I pyetur se përse nuk ka përdorur maska në këtë situatë gatishmërie, Meta ka thënë se, “të jeni të sigurtë se vij këtu pasi kam bërë një test të dyfishtë. Nuk kam kontaktuar askënd. Kam bërë gjithçka për të ruajtur distancat e domosdoshme. Ju kam tërhequr edhe ju vëmendjen që të mos rrini kaq pranë njëri-tjetrit, dhe ju përgëzoj që përdorni maskat”.

I pyetur në lidhje me masat që ka ndërmarrë deri tani qeveria shqiptare për parandalimin e përhapjes së rrezikut të “Coronavirus-it”, në një moment kur edhe Presidenca ka ngritur një Task-Forcë, Meta ka shtuar se, “Task Force” në Presidencë nuk zëvendëson apo dublon “Task Force”-n e qeverisë. Këto janë dy gjëra të ndryshme. Kjo është në funksion të Presidentit për shkak të atyre detyrave që ka Kreu i Shtetit për arsye të një situate, që kërkon monitorim të vazhdueshëm. Duhet të përqendrohemi që të gjithë te mesazhet e autoriteteve të shëndetit publik, te udhëzimet që jepen nga autoritetet shtetërore dhe qeveritare. Të gjithë ta kenë parasysh t’i referohen numrin 127, por ndoshta duhet parë mundësia edhe për ndonjë numër tjetër për të përballuar fluksin, kërkesat apo sqarimet, që kanë qytetarët. Të gjithë po bëjnë përpjekjet më të mira dhe vetëm të gjithë së bashku do ta kalojmë këtë situatë me sa më shumë kujdes, por e theksoj, edhe pa panik”.

“Në këtë drejtim sot mesazhi im shkon për të gjithë dhuruesit e qëndrueshëm, për vullnetarët e dhurimit të gjakut, të cilët kanë bërë një punë të shkëlqyer në vazhdimësi. Kjo Qendër Kombëtare ka nevojë edhe më shumë për ju, në mënyrë që t’u shërbejë të gjithë fëmijëve, të gjithë qytetarëve, të cilët kanë nevojë dhe të domosdoshme marrjen e gjakut”, ka theksuar kreu i Shtetit./atsh

Kryeministri Edi Rama përcolli mbrëmjen e sotme mesazhin e Igli Tares, i cili nga shtëpia e tij në Romë theksoi se ato masa që u morën në Shqipëri në Itali u bënë me vonësë

““Frikë jo, kujdes po! Dhe ju lutem:Të ruajmë veten dhe njëri-tjetrin duke kufizuar sa më shumë kontaktet fizike! Të lajmë duart sa më shpesh për jo më pak se 20 sekonda! Të kufizojmë daljet dhe uljet nëpër kafene e restorante, vajtjet në palestra, disko e në mjedise të mbyllura me kontakte të shumta! Të mbrohemi me maskën e arsyes nga INFODEMIA – lajmet, kronikat, komentet, debatet që krijojnë konfuzion, pasiguri, shkurajim! Të ndjekim me rigorozitet këshillat e autoriteteve shëndetësore dhe t’u referohemi informacioneve zyrtare!Faleminderit për këtë kontribut”, u shpreh Rama.

Mesazhi i Igli Tares, nga shtëpia e tij në Romë:

“Ato që u bënë në Shqipëri në Itali u bënë me vonesë. Ne jemi mbyllur në shtëpi dhe ju lutem bëjeni dhe ju. Mos dilni për qejf rruigëve dhe zbatoni rregullat se kjo është një luftë që fitohet me mbrojtje dhe jo me sulm. Duke u ruajtur mbrojmë njerëzit e familjes, mbrojmë veten tonë. Mos kini frik dhe ruajuni nga lajmet e rreme. Lani duart, hapni dritare, luani me fëmijët tuaj dhe kini besim se çdo gjë do të kalojë me sukses”, shprehet Tare./atsh

Nesër administrata shtetërore do të jetë pushim

Në kuadër të masave për parandalimin e koronavirusit, Kryeministri Edi Rama ka deklaruar sot se, nesër administrata shtetërore do të jetë pushim.

“Për kryerjen e detyrës në shërbimet shtetërore ose publike brenda perimetrit Tiranë – Durrës, gjatë periudhës së “shtet-rrethimit” të fundjavës, punonjësit e aeroportit apo të institucioneve të tjera shtetërore që kryejnë funksione të domosdoshme dhe e kanë të pamundur lëvizjen në këmbë, duhet të akreditohen pranë Drejtorisë së Përgjithshme të Policisë së Shtetit, emër për emër”, ka theksuar Rama.

“Marrja në automjetin e punës e personave të familjes apo personave të tjerë që s’kanë lidhje me detyrën shtetërore është rreptësisht e ndaluar dhe do të ndëshkohet me sanksione të rënda”, ka vijuar Rama.

Kryeministri ka shtuar se, “për vajtje – ardhjet nga aeroporti drejtuesi i automjetit duhet t’i tregojë post-bllokut, biletat e fluturimit të personave që do të largohen apo foton e biletave të personave që do të mbërrijnë’

“Frikë aspak, kujdes po! Shumë fare!”, ka përfunduar Rama./atsh