Irina

Mbështetja financiare, 5,41% e PBB-së; 63 042 punonjës kanë marrë “pagën e luftës” deri tani

Aktualitet, Lajmi i fundit / /

Kryeministri Edi Rama deklaroi sot se mbështetja e qeverisë për përballimin e situatës së krijuar nga pandemia COVID-19 në vendin tonë ka qenë 5,41% e PBB.

“Instituti i Studimeve Ndërkombëtare të Vjenës, i cili është një institut shumë prestigjioz dhe që flet për gjerësinë e mbështetjes në raport me Prodhimin e Përgjithshëm Bruto, thotë: Më 16 prill (mos harrojmë që jemi para paketës së dytë), Shqipëria 3,2%. Bosnjë-Hercegovina 3,3%, Bullgaria 2,4%, Republika Çeke 3%, Kosova 3,1% dhe më pas vazhdon me Lituaninë e këto të tjerat”, tha Rama në një intervistë televizive.

“Fondi shtesë për sektorin e shëndetësisë 0,15%, mbështetja e biznesit të vogël, të vetëpunësuarve që janë detyruar të mbyllin aktivitetin e tyre etj etj 0,39%. Mbështetja për të papunët në bizneset dhe industritë më të prekura 0,42%, rritja e shpenzimeve të emergjencës për ndihmat humanitare 0,12%, pagesa e tatimfitimit për ndërmarrjet e vogla, 0,02%, fondi i garancisë 0,66%, qeveria për kosto e interesit 0,02%, fondi i garancisë së pjesshme për kompanitë e prekura 1,79%, heqja e kamatëvonesave 0,89% etj. Në fund del 5,41%. Që të jemi të qartë. Ky është kontributi i qeverisë shqiptare. 5,41% e Prodhimit të Përgjithshëm Kombëtar”, tha Rama.

I pyetur se sa para kanë marrë shqiptarët cash nga pagat e luftës, Rama tha se, “po të jap të përditësuar shifrat e ditës së djeshme. Të sotmen e kisha, por nuk e kam parë akoma. Deri dje, për paketën e parë, kemi 69 532 aplikime dhe 63 042 punonjës që kanë marrë paratë dhe i kanë në xhep”, tha Rama.

Rama tha se, “vlera e paguar në transhin e parë, se janë tre transhe për punonjësit e paketës së parë është sot që flasim 1 miliard e 571 milionë e 622 mijë lekë të reja. 2950 persona të tjerë janë aktualisht për t’u paguar se janë bërë verifikime ankesash”.

“Më pas problemi i madh i këtij procesi është se disa që ankohen kanë çuar llogaritë bankare gabim kështu që po ripërsëritet dhe e dyta kemi problemin e tatimpaguesve që nuk kanë bërë aplikimin si duhet”, tha Rama.

“Vazhdojmë me paketën e dytë janë aprovuar për 31 mijë e 445 subjekte dhe faktikisht janë 102 mijë individë. Në total numri i përgjithshëm i tyre që kanë marrë pagë sot që flasim është afro 150 mijë”.

“65 milionë dollarë është mbështetja për bizneset e vogla, që shkojnë për paketën e parë. 7 miliardë e 40 milionë është e dyta, që është paketa e 400 mijë lekëshit. Të dyja bashkë këto janë pagesa direkte nga shteti”, theksoi kryeministri.

“Vazhdojmë me kamatëvonesat se janë para, të cilat do i paguajnë, por nuk ua merr shteti. Kamatëvonesat janë 15 miliardë lekë, 150 milionë dollarë të tjera që janë para që rrijnë në xhepat e tyre. 150 milionë të tjera, janë tatimfitimi për biznesin që janë të falura. Tani çfarë janë këto kur unë them që unë si shtet do t’i fal këto nuk quhet kjo mbështetje”, tha Rama. /atsh

Mbështetja financiare, 5,41% e PBB-së; 63 042 punonjës kanë marrë “pagën e luftës” deri tani Read More »

Numri i testimeve/ 100% besim tek ekspertët shqiptarë, rezultati është në favor të tyre

Aktualitet, Shendetesi / /

Kryeministri Edi Rama deklaroi sot se Komiteti Teknik i Ekspertëve nuk i bindet Kryeministrit, por i bindet Kryeministri Komitetit Teknik të Ekspertëve.

Në një intervistë në media, Kryeministri Edi Rama bëri të ditur se testimi i COVID-19 bëhet bazuar në gjurmimin e kontakteve dhe se strategjia është e koordinuar dhe e miratuar nga OBSH.

OBSH, vuri në dukje Kryeministri, ka përfaqësues në vendin tonë, me të cilët bashkëpunojmë.

Falë kësaj strategjie, tha Kryeministri, Shqipëria ka sukses spektakolar në këtë fazë të parë, ndërsa theksoi se në fazën e dytë do të jetë më e vështirë, sepse hapja sjell më tepër risqe.

“Në pozitën dhe rolin që kam unë duhet të jem një nxënës i mirë e i vëmendshëm për të mësuar jo si bëhen testimet, por logjikën e gjërave dhe për të qenë në gjendje të jap përgjigje, kur del përballë një gazetari. Dhashë një përgjigje, bazuar nga ajo që unë di nga ata që merren me këtë punë. Unë them që ai komiteti që ti e quajte komitet parti, sot meriton të gjithë admirimin tim për shkak të rezultatit. Nëse ai do të thoshte se kemi testime të mjaftueshme dhe rezultati do të ishte keq, do të binte një barrë të madhe për ta. Çfarëdo që të thotë partia juaj i merr era”, shtoi Kryeministri Rama gjatë intervistës.

Rama u shpreh se ne jemi gati të përballojmë çdo lloj situate.

“Ia kam thënë kryetarit të partisë tënde, në rast se Komiteti i Ekspertëve deklaron se na duhen 10 mijë teste në ditë, unë i kam siguruar se do t’i gjenim. Numrin e testeve nuk e përcakton PD me 7X7=42, as media, por ekspertët. Faktet flasin vetë”, deklaroi Rama.

Lidhur me akuzat e ngritura nga opozita për sigurimin e mjeteve mbrojtëse për mjekët e infermierët në vijën e parë të fronit, Rama u shpreh se “ne i kishim të siguruara”, sepse, tha Rama, “nëse nuk do t’i kishim patur, situata do të ishte si në Itali, Nju-Jork apo Angli”.

“Nuk kemi asnjë fatalitet dhe mjekët e infermierët ishin të mbrojtur, siç dëshmonte fotografia triumfaliste e një mjeku protestues aktiv të partisë tuaj, i cili nga një anë kishte fotografuar veten si kozmonaut, e nga ana tjetër dilte e fliste për mungesë të mjeteve mbrojtëse për mjekët e infermierët”, deklaroi Kryeministri.

Sipas Kryeministrit, tjetër është realiteti shqiptar dhe tjetër deklaron opozita reale, duke mos pasur lidhje me realitetin shqiptar.

“Unë i besoj 100% ekspertëve tanë dhe rezultati është në favor të tyre”, deklaroi Kryeministri.

Rama siguroi se qeveria i kishte filluar përgatitjet për t’u përballur me situatën me kohë. /atsh

Numri i testimeve/ 100% besim tek ekspertët shqiptarë, rezultati është në favor të tyre Read More »

Parashikimi i motit, e premte 8 maj 2020

Aktualitet / /

Shërbimi Meteorologjik Ushtarak bën me dije se moti për ditën e sotme parashikohet të nisë i kthjellët, ndërsa në mesditë dhe pasdite vranësirat marrin zhvillim në pjesën më të madhe të vendit.

Era do të fryjë me drejtim Juglindje-Veriperëndim me shpejtësi 1-10 m/s. Valëzimi në dete parashikohet 3 deri 4 ballë. Deti më i forcuar në orët e mëngjesit, më pas vjen në dobësim.

Temperaturat parashikohen:

QYTETET Temperaturat në °C Sigla
Shkodër 5/24 Diell re
Kukës 3/17 Diell re
Lezhë 9/23 Diell re
Dibër 1/20 Diell re
Durrës 12/23 Diell re
Tiranë 8/25 Diell re
Elbasan 7/25 Diell re
Berat 6/26 Diell re
Vlorë 10/25 Diell re
Korçë 3/17 Diell re
Gjirokastër 10/25 Diell re
Sarandë 10/24 Diell re/atsh

Parashikimi i motit, e premte 8 maj 2020 Read More »

Basha: E ardhmja europiane e Shqipërisë varet nga zbatimi i kushteve

Opinione, Politike / /

Partia Demokratike është e angazhuar për procesin jetik të integrimit europian.

Kryetari i PD, Lulzim Basha, shpërndau një postim të Kryetares së Komisionit Europian, Ursula von der Leyen për prioritetet kyçe të Samitit të Zagrebit për vendet e Ballkanit Perëndimor: sundim i ligjit, vlera demokratike, luftë kundër krimit të organizuar dhe korrupsionit.

Duke shprehur mirënjohjen për ndihmën e Bashkimit Europian kundër COVID-19 dhe për solidaritetin për të ndihmuar rimëkëmbjen ekonomike të Shqipërisë, Basha theksoi rëndësinë që kanë për vendin zbatimi i prioriteteve kyçe të Samitit të Zagrebit për vendet e Ballkanit Perëndimor.

“Gjatë Samitit të EPP në Zagreb rikonfirmova angazhimin e PD për procesin jetik të integrimit europian dhe udhërrëfyesit të qartë prej 15 kushtesh. E ardhmja jonë europiane varet nga zbatimi i këtyre kushteve”, u shpreh kreu i opozitës.

Në njoftimin e PD thuhet se, qëllimi kryesor i PD dhe i opozitës në Shqipëri janë zgjedhjet e lira e të ndershme, të pandikuara nga korrupsioni dhe krimi i organizuar me mbështetjen e qeverisë aktuale./atsh

Basha: E ardhmja europiane e Shqipërisë varet nga zbatimi i kushteve Read More »

“Ulje e thirrjeve drejt Urgjencës Kombëtare”/ Brataj: Pjesa më e madhe e të prekurve nga COVID-19 kërkojnë të mjekohen në shtëpi

Shendetesi / /

Skënder Brataj, drejtor i Qendrës Kombëtare të Urgjencës Mjekësore u shpreh se, ekipet e mjekëve vijojnë kontrollin e situatës shëndetësore të të prekurve nga COVID-19, ndërsa është fakt rënia e ndjeshme e numrit të thirrjeve drejt 127 të Urgjencës Kombëtare.

Gjatë takimit online të Komitetit Teknik të Ekspertëve për situatën e COVID-19, ai tha se “janë kryer 222 mijë thirrje nga 9 mars deri më sot, me një mesatare mbi 4 800 thirrje telefonike në ditë, ndërsa në ditën e sotme kemi 2 035 thirrje telefonike. Po ashtu edhe numri i thirrjeve drejt numrit 08000 është ulur ndjeshëm”.

Fakt tjetër tha ai, “është ulja e numrit të vizitave në përgjithësi. Kemi arritur në 300 vizita nga 600 dhe pozitive është fakti që të sëmurët që janë konfirmuar COVID-19 por kanë simptoma të lehta kërkojnë që të trajtohen në banesë dhe jo në spital. Transportohen në spital vetëm kur ka përkeqësim të situatës, vështirësi në frymëmarrje dhe që kanë nevojë për oksigjen. Pra qytetarët janë sensibilizuar dhe pjesa më e madhe e qytetarëve që janë asimptomatikë mjekohen në shtëpi me medikamente”.

Brataj konfirmoi se situata është në kontroll.

Brataj informoi se, “janë dy autoambulanca në dispozicion të sëmurëve me COVID-19 për Tiranën dhe 5 të tjera me respiratorë që për fat janë përdorur shumë pak”./atsh

“Ulje e thirrjeve drejt Urgjencës Kombëtare”/ Brataj: Pjesa më e madhe e të prekurve nga COVID-19 kërkojnë të mjekohen në shtëpi Read More »

Shqipëria me shkallën më të ulët të përhapjes së pandemisë dhe me ritmin më pozitiv të ecurisë për daljen prej saj

Aktualitet, Shendetesi / /

Shqipëria dhe fqinjët e saj të drejtpërdrejtë përbëjnë rajon model në Europë, me shkallën më të ulët të përhapjes së pandemisë dhe me ritmin më të lartë të procesit të daljes prej saj.

Në buletinin e Akademisë së Shkencave për pandeminë jepen disa fakte lidhur me këtë konstatim.

“Në shumicën e vendeve të Europës Perëndimore zhvillimet e djeshme përforcuan kursin e daljes nga pandemia. Me një ritëm shërimesh më të ulët se vendet e Ballkanit, vendet nordike përforcojnë trendin zbritës të numrit të të sëmurëve në ditë. Në shkallë globale, në Europë dhe në SHBA, u vërtetua ulje e treguesve të rritjes ditore të të sëmurëve: më të ulëtit deri më tani. Sot në botë një në çdo tre të prekur nga sëmundja rezulton i shëruar. Kurba e rritjes ditore në SHBA prej dy javësh është identike me atë të Europës më herët, me një zhvendosje prej 11 ditësh. Sëmundja po arrin pikun në shkallë botërore dhe në SHBA, sipas treguesve kryesorë”, cilëson Akademia e Shkencave.

Shqipëria dhe fqinjët e saj të drejtpërdrejtë, si dhe rajoni i Ballkanit në tërësi, rezultojnë me shkallën më të ulët të përhapjes së pandemisë dhe me ritmin më pozitiv të ecurisë për daljen prej saj. Mbi 80 për qind e numrit të të sëmurëve në Mal të Zi regjistrohen tashmë të shëruar. Ky tregues në Shqipëri u ngjit në 71,5 për qind, në Maqedoninë Veriore në 68,6 për qind, në Kosovë në 58 për qind dhe në Greqi në 52 për qind. Në të gjitha vendet e rajonit, përveç Greqisë, nga fillimi i muajit maj deri më sot, ky tregues në tërësi është rritur me 9-10 pikë. Edhe Kroacia e Turqia e kanë përmirësuar ndjeshëm këtë tregues, duke përforcuar trendin zbritës të kurbës së të sëmurëve faktikë. Ndërsa Bosnje-Hercegovina shenjoi sërish ecje me lëkundje në fazën dalëse, Bullgaria po shkon drejt rrafshimit të kurbës, megjithëse një rritje ditore mbi të tjerët, me rreth 3 për qind.
Ndërkaq, vendet e Europës Perëndimore, duke përfshirë shtetet e mëdha (Francë, Gjermani, Itali, Spanjë), si dhe Çekinë e Sllovakinë, shenjuan rritje minimale të numrit të të sëmurëve, në kufirin nën 1 për qind. Në shumicën e këtyre vendeve u përforcua kursi i daljes nga pandemia. Vendet më të avancuara janë Austria, Zvicra, Gjermania dhe Luksemburgu, ku mbi 80 e të sëmurëve janë shëruar tashmë. Ndërsa Belgjika dhe Holanda, me rritjet minimale të ditëve të fundme, vlerësohet se tashmë e kanë rrafshuar kurbën e pandemisë. Vendet e Europës Qendrore (Poloni, Rumani, Hungari) gjithashtu kanë hyrë në fazën e rrafshimit të kurbës.

Më tej, në shpjegimin që jep Akademia e Shkencave thuhet se “vendet nordike, duke përfshirë republikat priballtike (Letoni, Lituani, Estoni), me një ritëm të shëruarish më të ulët se rajoni ynë, gjenden në fazën e zbritjes së numrit të të sëmurëve në ditë. Edhe Suedia, e njohur për politikën e saj më liberale ndaj kufizimit të kontakteve sociale, po shkon drejt pikut të pandemisë dhe më tej drejt zbutjes së ritmit të përhapjes së saj.
Sipas ASH, Në shkallë globale, në Europë dhe në SHBA, dje është vërtetuar ulje e treguesit të rritjes së numrit të të prekurve rishtas nga “Corona-virus-i” i ri. Ky tregues ishte gjegjësisht në nivelet rekord prej 2.23 për qind, 1.6 për qind dhe 2 për qind. Vlen të theksohet se prej dy javësh, ritmi i rritjes së numrit të të sëmurëve në SHBA është identik me atë të Europës më herët, me një zhvendosje prej 11 ditësh. Kjo do të thotë se, pas tri javëve rritjeje eksponenciale me koeficient me të lartë se ai i Europës në javët e para të pandemisë, SHBA kanë hyrë në të njëjtin ritëm”.

Që prej një jave kurba e të sëmurëve në terapi intensive është në rënie në nivel botëror. Sot në Botë një në çdo tre të prekur nga sëmundja rezulton i shëruar. Vetëm gjatë ditës së djeshme numri i të shëruarve u shtua me 46 mijë vetë. Treguesit kryesorë të pandemisë dëshmojnë se sëmundja në shkallë botërore po arrin pikun, ndërsa SHBA po shkojnë drejt rrafshimit të kurbës së të sëmurëve faktikë.

Disa vende të Lindjes, si Ukraina, Bjellorusia e Rusia, ndonëse me një përhapje të kufizuar të pandemisë, kanë ende tregues sëmundshmërie në ngjitje. Veçanërisht i lartë është shtimi ditor i të infektuarve të rinj në Rusi, me 6-7 për qind, vend që ndërkohë ka dhe numrin më të lartë të testeve për një të infektuar të detektuar dhe indeksin e vdekshmërisë nën 1 për qind, ndër më të ulëtit në gjithë Botën./atsh

Shqipëria me shkallën më të ulët të përhapjes së pandemisë dhe me ritmin më pozitiv të ecurisë për daljen prej saj Read More »

Hapje e kufijve tokësorë për turistët nga vendet fqinje, në fund të majit fluturimet e para charter

Aktualitet, Turizem / /

Shqipëria synon të jetë vendi i parë në rajon, por edhe më gjerë, që pritet të hapë turizmin.

Ministri i Turizmit, Blendi Klosi deklaroi sot në një intervistë në media se vendi ynë në krahasim me Kroacinë, Greqinë dhe Turqinë favorizohet nga strukturat e vogla hoteliere të cilat menaxhohen më lehtë.

Sipas tij, parashikohet që fluturimet e para charter me turistë të huaj të mbërrijnë në fund të këtij muaji, ndërkohë që do të synohet që kufiri tokësor të hapet përpara kësaj date për të pasur më shpejt turistë nga vendet e rajonit.

“Nuk do të kemi shifrat e vitit 2019, por do të kemi turistë të huaj këtë sezon. Bashkë me ministrin Ahmetaj që menaxhojmë situatën e krizës së pandemisë, do t’i propozojmë qeverisë hapjen e kufijve tanë tokësorë për të pasur mundësinë e lëvizjes së turistëve nga vendet fqinje dhe do të synojmë që në fund të muajit maj të kemi çarterat e parë me turistë të huaj. Janë disa vende me të cilat ne kemi komunikim të shpeshtë si Çekia, Polonia, vendet Skandinave, Ukraina, Bjellorusia, që janë të gatshme të dërgojnë çartera nëse ne si struktura shtetërore e hoteliere i garantojmë standarde të higjienës.

“Po synojmë hapjen e parë në rajon”, deklaroi ministri i Turizmit.

Klosi tha se do të synohet së pari një turizëm rajonal për të shpëtuar sektorin nga kriza. Jemi qeveria e parë në rajon, nënvizoi ministri Klosi që kemi ofruar një paketë mbështetëse për industrinë e turizmit. Lidhur me ligjin që do të përcaktojë rregullat për funksionimin e plazheve, ai tha se pritet të jetë gati brenda kësaj jave.

Ministri Klosi vuri në dukje se protokolli i paraqitur për rregullat e pushimeve është pranuar nga 95% e operatorëve turistikë, ndërsa shtoi se ka disa elementë që pritet të ndryshohen.

“Është një proces që ministria e ndjek shpesh, pra materiali është shpërndarë për mendim. E gjithë ideja e këtij manuali, është që turizmin ta kemi jo vetëm një mjet kënaqësie, por ta kemi edhe industri. Është një industri që mban me mijëra njerëz në punë, që mban rrjete të tjera industrish me punë dhe kemi mundësitë, falë investimeve që janë kryer në këtë industri, që të dalim të parët në treg”, u shpreh Klosi.

Ai theksoi se ky draft dhe ky protokoll masash është hartuar për kushtet në të cilat jemi, por nëse situata do të ndryshojë, Klosi tha se masat do të lehtësohen./atsh

Hapje e kufijve tokësorë për turistët nga vendet fqinje, në fund të majit fluturimet e para charter Read More »

Saranda, paketa 20% më të lira se një vit më parë

Turizem / /

“Saranda për herë të parë me paketa turistike 20% më lirë”, tha sot kryetari i bashkisë Sarandë, Ardian Gurma, ndërsa ftoi qytetarët të vizitojnë qytetin bregdetar.

Gurma sqaroi se Ministria e Shëndetësisë, Ministria e Turizmit dhe ekspertët e tyre kanë hartuar një draftprojekt në lidhje me protokollin e masave ndaj COVID-19 për sezonin turistik e në vazhdim.

Ai tha se “realisht ky është në fazën e një drafti dhe ne e kemi bërë të ditur me këtë draft-protokoll dhe ne ditët në vijim në bashkëpunim të ngushtë edhe me grupet e interesit dhe operatorët turistik ku do japin mendimet dhe opinionet tona në mënyrë që ky projekt të kalojë nga draft në protokoll normal masash”.

Në lidhje me njohjen e draftit, Gurma tha se “jemi në këtë fazë të njohjes së draftit dhe do hymë në fazën e diskutimeve me aktorët e tjerë dhe grupet e interesit për të dhënë mendimet tona që drafti të marrë formën përfundimtare dhe me hapjen e sezonit turistik të vihet në zbatim”.

Në lidhje me hapjen e sezonit turistik, Gurma tha se nëse do ishte në dëshirën tonë do donim sa më shpejt ashtu siç është hapur çdo vit në 15-ditëshin e parë të majit. Por, sipas tij, java e dytë dhe e tretë e majit është periudha më e përshtatshme për hapjen e sezonit turistik. Sigurisht jemi në një situatë të vështirë dhe nuk varet nga dëshirat tona, por gjykoj dhe mendoj që të paktën bashkia e Sarandës është në brezin e bashkive të gjelbra dhe kjo ditë nuk do jetë e larg. Falë këtyre masave që kemi marrë, por dhe të ndërgjegjësimit të qytetarëve, jemi më para krahasuar me bashkitë e tjera”.

Për sa i përket çmimeve, Gurma shtoi se me gjithë dëshirën e mirë për të maksimizuar fitimin nga të gjithë operatorët turistikë, këtu hyn në lojë edhe pushteti lokal me mekanizmat e vet. “Në takimet që kemi bërë kemi marrë një lloj opinioni, por kemi bërë më shumë rolin e rregulluesit dhe të këshilluesit, por është më mirë të ketë çmime më të mira se vitet e tjera”, u shpreh ai.

Gurma theksoi se Saranda për herë të parë do të jetë me paketa turistike 20% më lirë.

“Ne kemi marrë një farë miratimi, por kemi luajtur edhe rolin e këshilluesit, është më mirë që të operojnë me çmime më të lira se një vit më parë, se kjo i shërbente turistëve vendas, se duke pasur çmime më të lira do të ketë një aksesim më të lartë nga pushuesit. Hotelierët më kanë dhënë të drejtën që ta parashtroj si objektiv që në të gjitha hotelet, paketa do të jetë 20% më e lirë se vitet e tjera. Nisur edhe nga fakti që lëvizja nga shtetet fqinje është në pikëpyetje, ne jemi duke u orientuar drejt paketave vendase, dhe të gjithë operatorët kanë marrë nismën që të funksionojnë me paketa, ndryshe nga vite më parë”, tha Gurma. /atsh

Saranda, paketa 20% më të lira se një vit më parë Read More »