Irina

Robert Ndrenika, Luftar Paja, Viktor Zhusti e dhjetëra artistë të tjerë thirrje Metës dhe Bashës: Mos e pengoni Teatrin e Ri, është nevojë urgjente për ne, boll me lot krokodili

Aktualitet, Art-Kulture / /

Një grup aktorësh dhe regjisorësh të kryesuar nga të mëdhenjtë e skenës së artit shqiptar: Robert Ndrenika, Luftar Paja, Viktor Zhusti, Artan Imami, Spiro Duni, Leka Bungo, Altin Basha, Arben Derhemi etj., i janë drejtuar pasditen e sotme me një peticion Presidentit të Republikës, Ilir Meta, Kryeministrit Edi Rama, kryetarit të Partisë Demokratike, Lulzim Basha dhe kryetares së Lëvizjes Socialiste për Integrim, Monika Kryemadhi, për t’iu përsëritur edhe njëherë vullnetin e tyre pro ndërtimit të një Teatri të ri Kombëtar, në vendin ku ndodhet godina e vjetër.

Dhjetëra aktorët dhe regjisorët e kanë firmosur peticionin, i cili në fakt është peticioni i tretë që i drejtohet krerëve të shtetit për çështjen e Teatrit Kombëtar që nga viti 2018, ku deklarojnë se ndërtimin e Teatrit të Ri e konsiderojnë të mbyllur me sukses në emër të interesit kombëtar dhe u bëjnë thirrje atyre që t’i lënë lojërat politike, sepse pikërisht nga këto lojëra komuniteti i artistëve ka mbetur edhe sot pa Teatër.

“Me këtë peticion ne kërkojmë që politika e të gjitha anëve, të mos na bëjë as ne, as projektin e Teatrit të ri Kombëtar, pjesë të lojës apo çorbës së saj. Ne Ju drejtohemi me kërkesën publike që të ndaloni menjëherë politizimin e mëtejshëm të kësaj çështjeje! Ju lutemi na mirëkuptoni, por durimi ynë ka sosur dhe nuk përballojmë dot më as edhe një kokërr loti krokodili në mexhelis për teatrin tonë! 50 vjet në atë ndërtesë-karantinë dhe të harruar nga politika na dalin e na teprojnë! Ne dhe brezat e aktorëve e regjisorëve pas nesh meritojmë një Teatër dinjitoz, që të na shërbejë jo vetëm neve, por edhe publikut teatërdashës”, shprehen artistët në peticionin drejtuar Metës, Ramës, Bashës dhe Kryemadhit.

Ndërkaq, për grupimin e Aleancës për Mbrojtjen e Teatrit, artistët shprehen se disa i kanë miq, po disa të tjerë as nuk i njohin kush janë, por u bëjnë thirrje të ndahen nga politikanët, sepse Teatri Kombëtar nuk është “Astiri” dhe as “tokë e xanun”.

Grupi firmëtar shprehet se peticioni po vazhdon të nënshkruhet edhe nga shumë artistë në këto momente, të cilët mbështesin planet për Teatrin e Ri Kombëtar.

Teksti i plotë i peticionit:

Ne aktorët, regjisorët dhe përfaqësuesit e artit skenik shqiptar, detyrohemi sot të rimerremi me një debat të shteruar plotësisht, të cilin nga ana jonë e konsiderojmë të mbyllur me sukses në emër të interesit kombëtar dhe të interesit të komunitetit tonë! Me anë të këtij peticioni publik, nuk duam të flasim më për nevojën e lashtë që komuniteti ynë ka për një Teatër të ri Kombëtar, modern dhe bashkëkohor, i cili duhet të ndërtohet pa asnjë diskutim në truallin e kompleksit ekzistues, sepse ai truall ka qenë, është dhe duhet të mbetet trualli material e shpirtëror i komunitetit tonë në breza.

Me këtë peticion ne kërkojmë që politika e të gjitha anëve, të mos na bëjë as ne, as projektin e Teatrit të ri Kombëtar, pjesë të lojës apo çorbës së saj. Ne Ju drejtohemi me kërkesën publike që të ndaloni menjëherë politizimin e mëtejshëm të kësaj çështjeje! Ne duam të ndajmë me Ju dhe publikun shqiptar, bindjen tonë se kushdo që do të përpiqet ta përdorë më tej emrin dhe skenën e Teatrit Kombëtar për teatro të natyrave të ndryshme, pa asnjë lidhje me teatrin tonë, nuk do as të mirën e kulturës shqiptare, as të mirën e Teatrit Kombëtar dhe as të mirën tonë jo dhe jo!

Ju lutemi na mirëkuptoni, por durimi ynë ka sosur dhe nuk përballojmë dot më as edhe një kokërr loti krokodili në mexhelis për teatrin tonë! 50 vjet në atë ndërtesë-karantinë dhe të harruar nga politika na dalin e na teprojnë! Ne dhe brezat e aktorëve e regjisorëve pas nesh meritojmë një Teatër dinjitoz, që të na shërbejë jo vetëm neve, por edhe publikut teatërdashës, që nuk mund të vazhdojë të ndjekë edhe për 50 vjet të tjera teatrin politik me Teatrin Kombëtar, në vend të shfaqjeve tona.

Ndaj, të nderuar zotërinj, kërkojmë nga Ju të mos përziheni më me nevojën urgjente që ka komuniteti ynë për ndërtimin e Teatrit të ri Kombëtar! Sepse boll dekada janë djegur duke pritur që të merreni vesh Ju me njëri-tjetrin për zgjidhjen e këtij halli jetik për ne. Keni boll punë të tjera edhe më të mëdha, prandaj me konsideratën më të lartë, ne Ju kërkojmë të mos kërkoni tek Teatri Kombëtar as punë dhe as masha për këtë punë!

Kryeministri Rama le të merret me Armikun e Padukshëm, Lulzim Basha le të merret me Ramën, Presidenti Meta le të merret me Kushtetutën, ndërsa ne të mos merremi më nëpër këmbë me ose pa dashjen Tuaj!

Sa për ata pak kolegë dhe “kolegë” që mendojnë se kanë marrë përsipër të mbrojnë godinën, shumicën e të cilëve nuk i njohim kush janë apo disa i kemi edhe miq (pavarësisht se nuk e gjejmë dot mbi çfarë karriere skenike kanë monopolizuar dhe devijuar totalisht kauzën tonë), ne kemi lutjen publike që të ndahen nga politikanët! Sepse Teatri Kombëtar nuk është “Astiri” dhe skena kombëtare nuk është “tokë e xanun”!

Historia e Teatrit Kombëtar nuk shkruhet tek dera e godinës, po në qendër të skenës!

Duke ju uruar suksese në punën Tuaj dhe shëndet në familjet Tuaja, urojmë që të mos e konsideroni këtë thirrje publike si një letër më shumë pa përgjigje.

Me respekt,

Robert Ndrenika
Luftar Paja
Viktor Zhusti
Artan Imami
Spiro Duni
Leka Bungo
Altin Basha
Arben Derhemi
Pëllumb Kulla
Arben Kumbaro
Marjana Kondi
Zamira Kita
Helidon Fino
Ema Andrea
Hervin Çuli
Luli Hoxha
Laert Vasili
Salsano Rrapi
Gazmend Paja
Lulzim Zeqja
Genc Shkodrani
Gjergj Mena
Sonila Kapidani
Iliriana Basha
Marin Orhanasi
Bajram Dosti
Ledio Lako
Jonida Beqo
Josif Sina
Aleksandër Grami
Eriola Kakeli
Erblin Bajko
Edvin Mustafa
Laejda Hajdari
Jorkë Brokaj
Jaho Guma
Roland Saro
Edmond Rrapi
Kozeta Kurti
Kristo Cala
Albana Perhati
Dervish Biba
Armela Demaj
Algiona Aga
Alex Seitaj
Genti Deçka
Donald Shehu
Klesta Shero
Roerd Toçe
Amri Hasanlliu
Andon Koço
Laid Ymeri
Besart Cani
Afrim Agalliu
Artan Islami
Margent Caushi
Agron Hamo
Artur Dhamo

Robert Ndrenika, Luftar Paja, Viktor Zhusti e dhjetëra artistë të tjerë thirrje Metës dhe Bashës: Mos e pengoni Teatrin e Ri, është nevojë urgjente për ne, boll me lot krokodili Read More »

Fituan betejën ndaj COVID-19, çifti nga Shkodra mesazh prekës mjekëve të Infektivit

Shendetesi / /

Çifti Kraja ka arritur të fitojë betejën e vështirë me COVID-19 dhe në shenjë falenderimi i ka bërë një dedikim shumë prekës mjekëve të spitalit Infektiv.

Çifti nga Shkodra i është drejtuar me një letër personelit mjekësor që u kujdes për ta në QSUT. Ata janë shprehur shumë mirënjohës ndaj tyre duke i falënderuar familjarisht ata bashkë me fëmijët, nipërit e mbesat e tyre, sepse bënë të mundur që të riktheheshin shëndoshë e mirë në shtëpi.

“Drejtuar personelit mjekësor të COVID-19, spitalit Infektiv QSUT. Ju urojmë nga zemra, shëndet jetë të gjatë e lumturi pa kufi me familjet tuaja. Ju ruajt Zoti. Jemi shumë mirënjohës ndaj Jush. Punë të mbarë nga familja Kraja”, thuhet në letër.

Shefja e Infektivit Najada Çomo ka dhënë lajmin e mirë për çiftin Kraja. “Dy shkodranë të fisëm fituan betejën me COVID-19, betejë shumë e vështirë, ky falënderim vlen shumë për gjithë stafin e shërbimit infektiv. Mirënjohje çifti Kraja për këtë dedikim të ndjerë”, është shprehur Çomo./atsh

Fituan betejën ndaj COVID-19, çifti nga Shkodra mesazh prekës mjekëve të Infektivit Read More »

18 raste të reja në 24 orët e fundit, Manastirliu: Nevojitet përgjegjshmëri, jemi në kufirin ekstrem të lejuar për fazat e rihapjes

Lajmi i fundit, Shendetesi / /

Gjatë 24 orëve të fundit janë identifikuar sërish 18 raste të reja me COVID-19. Në Durrës janë identifikuar 7 raste në një fasoneri, kontakte të një rasti pozitiv. Janë 5 raste të reja në Berat, 4 raste në Tiranë dhe 2 në Krujë, të gjitha kontakte.

Duke ngritur shqetësimin për rritjen e rasteve pozitive në ditët e fundit, Ministrja e Shëndetësisë dhe Mbrojtjes Sociale Ogerta Manastirliu kërkoi nga qytetarët respektimin e rregullave për të mos u kthyer në gjendjen e mëparshme.

“Ekspertët tanë e kanë thënë që në kryer të herës. Faza e lehtësimit merr kuptim vetëm nëse shoqërohet me një ulje të qëndrueshme të numrit të infektimeve. Plani i lehtësimit të masave varet vetëm nga bashkëpunimi me ju. Është e vërtetë që ndëshkimet nuk janë zgjidhja, por është po aq e vërtetë se nuk mund të penalizohet një popull i tërë nga një pakicë, veprimet e së cilës mund të shkaktojnë dëme të pallogaritshme”, tha Manastirliu.

Duke deklaruar se Ministria e Shëndetësisë dhe Mbrojtjes Sociale mbështet planin e hapjes dhe lehtësimin e masave, Manastirliu deklaroi se nëse do të vijojnë rritje të rasteve, sipas skenarëve, mund të përdoren frenat e emergjencës.

“Rritja në këto shifra e rasteve të reja është maksimumi i lejuar nga skenarët tanë të hapjes. Rritja e mëtejshme do të na detyronte të ndërmerrnim hapa të menjëhershëm për të mos lejuar një valë të dytë goditëse, që do të hidhte në erë atë që është arritur deri më sot”, nënvizoi Manastirliu.

Ministrja Manastirliu u shpreh se “nëse do të vazhdohet me tendencën përkeqësuese të ditëve të fundit, do të jemi të detyruar të bëjmë hapa pas. Dhe kjo nuk është në interes të askujt! Sigurisht nuk ka vend për alarm, por jemi në një moment ku kërkohet përgjegjshmëri nga çdo qytetar”.

Sipas saj, mbrojtja e shëndetit të qytetarëve është mbi gjithçka.

“Ditët në vijim do të jenë vendimtare për planin e rihapjes”, tha Manastirliu./atsh

18 raste të reja në 24 orët e fundit, Manastirliu: Nevojitet përgjegjshmëri, jemi në kufirin ekstrem të lejuar për fazat e rihapjes Read More »

Situata në spitale e qëndrueshme, 19 të shtruar dhe 4 në terapi intensive

Lajmi i fundit, Shendetesi / /

Situata në spitale paraqitet e qëndrueshme me 19 qytetarë të shtruar, prej të cilëve 4 janë në terapi intensive.

Silva Bino, përgjegjëse e departamentit të sëmundjeve infektive në Institutin e Shëndetit Publik në komunikimin e përditshëm të Ministrisë së Shëndetësisë për situatën COVID19 në vend theksoi sot se deri tani janë kryer rreth 12 mijë testime dhe kanë kaluar 900 raste pozitive nga fillimi i epidemisë, ndërsa aktualisht janë 180 persona aktivë me COVID19, kryesisht në Tiranë, Krujë, Shkodër, Kamëz, Durrës dhe Berat”.

“Prandaj është vendi për një apel për të gjithë qytetarët: të respektojmë masat, të mos dalim nga shtëpia pa arsye të domosdoshme, të mos neglizhojmë shenjat e sëmundjes dhe duhet telefonuar 127 nëse keni shenja të Covid-19”, – tha Bino.

Gjatë 24 orëve të fundit janë identifikuar sërish 18 raste të reja me COVID-19.

Në Durrës janë identifikuar 7 raste në një fasoneri, kontakte të një rasti pozitiv. Janë 5 raste të reja në Berat, 4 raste në Tiranë dhe 2 në Krujë, të gjitha kontakte./atsh

Situata në spitale e qëndrueshme, 19 të shtruar dhe 4 në terapi intensive Read More »

Cakaj: Fillimi i negociatave, kurorëzim i reformave madhore në pesë prioritetet kyçe

Aktualitet / /

“Fillimi i negociatave është kurorëzim i reformave madhore, që ka bërë Shqipëria në pesë prioritetet kyçe”, deklaroi sot ministri në detyrë për Europën dhe Punët e Jashtme, Gent Cakaj.

Cakaj raportoi sot në Komisionin parlamentar për Integrimin Europian ku u shqyrtua raporti i Këshillit të Ministrave “Për ecurinë e procesit të integrimit për vitin 2019”.

“Sapo mbylla raportimin pranë Komisionit për Integrimin Europian, lidhur me të gjithë punën madhore që kemi bërë deri më sot dhe detyrat që na presin në të ardhmen, për të përparuar drejt anëtarësimit në BE”, u shpreh Cakaj.

“Pavarësisht pandemisë COVID-19, puna e Shqipërisë për ngritjen e grupit negociator, përgatitjet teknike për zhvillimin e bisedimeve për anëtarësim në BE dhe përmbushjen e të gjitha detyrimeve që janë përcaktuar nga përfundimet e Këshillit, ka vazhduar pandërprerë”, tha Cakaj.

“Fillimi i negociatave është kurorëzim i reformave madhore, që ka bërë Shqipëria në pesë prioritetet kyçe por, natyrisht, edhe hapje e detyrave të reja që kërkojnë punën e pakursyer të gjithsecilit e bashkëpunimin e të gjithëve”, theksoi Cakaj./atsh

Cakaj: Fillimi i negociatave, kurorëzim i reformave madhore në pesë prioritetet kyçe Read More »

“Debati ka hyrë në axhendë politike”, Çuli: Godina e Teatrit Kombëtar ka humbur çdo gjë nga identiteti i vet

Aktualitet, Art-Kulture, Lajmi i fundit / /

Drejtori i Teatrit Kombëtar, Hervin Çuli, deklaroi sot se “godina e Teatrit Kombëtar ka humbur çdo gjë nga identiteti i saj”.

Në një intervistë televizive Çuli u shpreh se “çështja e teatrit nuk është një diskutim që bëhet prej dy vitesh, por prej 6 vitesh”. “Që në momentin e parë që kam qenë drejtori i Teatrit kam bërë publik shqetësimin tim që Teatri është jashtë kushteve funksionale si për aktorët, edhe për spektatorët”, tha ai.

“Më vjen keq për çdo copëz jete që kam kaluar në institucionin e teatrit ku kam punuar prej 24 vitesh nuk po arrij ta kuptoj se çfarë do të thotë ky debat për një godinë që e ka mbaruar misionin e saj dhe nga brenda është shndërruar në një godinë të arnuar, sepse ka pasur ndërhyrje këto 30 vite edhe më parë në teatër që jo vetëm nuk kanë përmirësuar cilësinë, por e kanë shkatërruar atë”, – nënvizoi Çuli.

Drejtori Çuli u shpreh se “këtu nuk iu drejtohem turmave patologjike se është e turpshme”.

“Ka njerëz që s’kanë asnjë lidhje me Teatrin Kombëtar, përveç Neritan Liçajt që është aktori i teatrit. Individët e tjerë nuk kanë ardhur ndonjëherë si spektatorë në teatër dhe për axhendat e tyre politike ulërasin me të madhe për diçka që nuk ia kanë idenë. Kjo është një godinë që ka humbur edhe nëse do kishte minimumin e vlerave historike brenda institucionit, por ajo ka humbur çdo gjë nga identiteti i saj“, – u shpreh Çuli.

I pyetur nëse mund të bëhet një restaurim i godinës ai tha se është e pamundur. “Teatri nga brenda është arnuar aq keq, saqë është e pamundur që ta kthesh me rikonstruksion në identitetit. Teatri Kombëtar nga brenda nuk e ka më funksionin e një gjëje që duhet konservuar”, u shpreh Çuli.

“Ky teatër ka edhe një arsye tjetër për të mos u rikonstruktuar, është i vetmi teatër në botë që në parametrat e tij bashkëkohorë, nuk mund t’i qëndrojë dot mizaskenave artistike të kohës. Është i vetmi Teatër Kombëtar në botë që ka xhepa skenikë nga gjysmë metri, ku aktorët përplasin kokën me njëri-tjetrin”, – tha ndër të tjera drejtori i Teatrit Kombëtar.

Duke iu përgjigjur pyetjes se pse shumica e aktorëve nuk e kuptojnë si ai pjesën se teatri ka dalë jashtë funksionit, përse nuk mendojnë dhe ata si ju, por dalin dhe bëjnë rezistencë për këtë situatë, Çuli theksoi se “ju siguroj se 90% e komunitetit artistik e ka kuptuar më në fund se kjo është një histori, që ka hyrë në një axhendë politike dhe nuk ka lidhje me një inspirim idealist”. /atsh

“Debati ka hyrë në axhendë politike”, Çuli: Godina e Teatrit Kombëtar ka humbur çdo gjë nga identiteti i vet Read More »

40 mijë qytetarë kanë marrë shërbime në “e-Albania” në dy muajt e fundit

Aktualitet, Lajmi i fundit / /

Marrja e dokumenteve të pronësisë online do ndryshojë jetën industrisë së ndërtimit dhe qytetarëve, duke shkurtuar kohë në realizimin e procedurave.

Drejtoresha e Agjencisë Kombëtare të Shoqërisë së Informacionit (AKSHI), Mirlinda Karçanaj tha se “’e-Albania’ gjatë këtyre dy muajve të pandemisë ka larguar çdo hije skepticizmi, duke qenë pranë qytetarëve që u është dashur shërbim online”.

“Siç e thamë janë automatizuar shërbimet e kadastrës dhe ka 0 kontakt me punonjësit e Kadastrës e për rrjedhojë 0 korrupsion. Risi tani është fakti se çdo hije skepticizmi është shuar gjatë dy muajve të pandemisë, pasi kanë qenë të mbyllura shërbimet e Kadastrës dhe të ADISË-s. Ishin 40 000 qytetarë, që kanë marrë shërbime online dy muajt e fundit. Shifrat thonë se shërbimi më i kërkuar ka qenë kopja e kartelës së pasurisë, që është 70% i shërbimeve vjetore që Kadastra jep. Si merret ky shërbim? Merret lehtësisht. Klik në portal, pagesë minimaliste që realizohet dhe vjen me vulë elektronike, nëse është në bashkësinë e pasurive të digjitalizuara, përndryshe brenda afatit 7-21 ditë”, – tha Karçanaj.

“Vula elektronike rrit sigurinë e dokumentit që merr. Pasi nëse skanon barkodin, në ekran shfaqet kopja e vërtetë e dokumentit. Kjo do sjell lehtësi të jetës së qytetarëve dhe industrisë së ndërtimit, pasi do shkurtohet koha e të gjithë institucioneve vendore e qendrore, do ndryshojë sjellja e noterëve dhe tregu imobiliar, pasi do jenë shumë më të shpejtë në transaksionet e tyre të përditshme”, – theksoi Karçanaj. /atsh

40 mijë qytetarë kanë marrë shërbime në “e-Albania” në dy muajt e fundit Read More »

“Asgjë për t’u shqetësuar nga shtimi i rasteve”/Kalo: Janë kontakte me të sëmurët e mëparshëm, vetëndërgjegjësimi i qytetarëve arma për mposhtjen e COVID-19

Aktualitet, Shendetesi / /

Rastet e regjistruara sot nuk janë vatra të reja, por raste të kontakteve të mëparshme. Me rëndësi është ndërgjegjësimi i qytetarëve për respektimin e masave.

Kështu deklaroi mjeku Tritan Kalo, gjatë një interviste televizive sot, ku theksoi se, lehtësimi i masave dhe rritja e lëvizjes së popullatës e bën të pritshme shtimin e rasteve.

“Nuk janë raste të vatrave të reja, por janë kontakte me të sëmurët e mëparshëm. Kjo e bën të nevojshme që të ruajmë distancën fizike. Pra, kjo hapja dhe kjo lëvizja bën që njerëzit t’i nënvlerësojnë masat e distancimit fizik dhe kjo bën detyrimisht të shtohet numri. Kemi mbi 13 ditë që nuk kemi asnjë viktimë nga kjo sëmundje dhe këto parametra po përpiqemi t’i ruajmë. Faktori kryesor është sjellja e qytetarëve”,- tha ai.

“Gjatë këtyre ditëve po, do ketë rritje dhe pastaj shpresoj të rikthehet aty ku ishim në ditët e fundit. Mbi të gjitha, me rëndësi mbetet vetëndërgjegjësimi i popullatës për mbarëvajtjen e kësaj pandemie në vendin tonë”, – shtoi Kalo.

Ai pasqyroi dhe situatën në dy spitalet COVID. “Në të dy strukturat janë në terapi intensive tre persona jo të intubuar, por që kanë nevojë për asistencë. Jemi të lehtësuar për dy gjëra. E para, se ka më shumë jetë njerëzish të shpëtuar, ne vetë ndjehemi më të lehtësuar, sepse është lehtësuar barra. Personat më të rrezikuar në të gjithë botën është personeli mjekësor”, – tha Kalo.

“Unë e kam thënë, se mundësia është se ajo që nuk është bërë ligjore është bërë faktike nga popullata. Deri sa një gjë e tillë është bërë fakt i kryer dhe kjo është e mirë që të pranohet, por mbyllja brenda zonave është e mirë që të vijojë për ca kohë, sepse akoma kemi një numër të madh personash aktivë në Tiranë, Krujë dhe në Shkodër”, – tha ai.

Doktor Kalo u shpreh se virusi do të rishfaqet në vjeshtë, ashtu siç rikthehen infeksionet e tjera. “Unë po e shpreh tek ju, nuk është hera e parë që e kam thënë. Nuk bëhet fjalë për rikthim, por rishfaqje sepse infeksioni nuk do të zhduket. Në vjeshtë bashkë me kthimin e infeksioneve të tjera, detyrimisht një pjesë e infeksioneve do shfaqen, dhe midis tyre do të ketë të sëmurë nga COVID-19”, – theksoi ai.

“Pakënaqësia ime lidhet me dy probleme kryesore: Së pari, për shkeljen dhe mosndërgjegjësimin qytetar, i cili çalon. Një popullatë që është aktive nuk ka pse të bëhet pre e infeksionit të tillë. Nuk kemi njerëz për të humbur. E dyta, ajo që më shqetëson është politizimi i gjërave të pavlefshme. Nuk bëhet politikë me sëmundjen, me të vdekurit, me pandeminë. Politika bëhet me politika shëndetësore, me përmirësimin e sistemit shëndetësor. Një popullatë e shëndoshë tregon vitalitetin e një kombi në të ardhmen”, – përfundoi ai. /atsh

“Asgjë për t’u shqetësuar nga shtimi i rasteve”/Kalo: Janë kontakte me të sëmurët e mëparshëm, vetëndërgjegjësimi i qytetarëve arma për mposhtjen e COVID-19 Read More »