Irina

Kur flasim për dimrin përjetimet dhe mendimet mund të jenë të ndryshme. Ka persona që stinën e ftohtë e pëlqejnë dhe ka të tjerë që nuk e preferojnë aspak.

Përtej preferencave, dimri njihet si stina ku viruse të ndryshme gripale prekin organizmin për shkak të motit të ftohtë.

Pyetjes se, nëse kjo periudhë e vitit i bën mirë trupit i përgjigjen e ekspertët.

I ftohti dhe truri

Nëse e keni pyetur veten a është i ftohti mirë për shëndetin e trurit tuaj, përgjigja është po. Ekspertët thonë se, truri funksionon më mirë dhe më shpejt kur ndodhet në një ambient të ftohtë të, në krahasim me të nxehtin. Kështu që shëtitjet herë pas here jashtë ambienteve të mbyllura gjatë dimrit janë rifreskuese për trurin.

Djeg kaloritë

Gjatë periudhave të të ftohtit trupi harxhon më shumë energji për të mbajtur një temperaturë të balancuar trupi. Për këtë arsye ju ndihmon që të digjni më shumë kalori e të dobësoheni.

Largon alergjitë

Nëse keni alergji nga mjedisi i jashtëm, gjatë dimrit nuk keni pse të shqetësoheni. Polenet, lulet apo pemët gjatë dimrit nuk janë aspak prezente, ndaj ju mund të dilni e të shëtisni të qetë kudo që dëshironi.

Kundër inflamacionit

Nëse vuani nga fryrja e kyçeve, duarve apo e këmbëve, gjatë dimrit ky problem do të jetë më pak i pranishëm. Kjo sepse temperaturat e ftohta e ndihmojnë organizmin që të qetësojë zonat ku po zhvillohet inflamacionit.

Flini më mirë

Temperatura e trupit është më e ulët gjatë kohës kur flini gjumë. Gjatë verës procesi i uljes së temperaturës për të siguruar gjumë të mirë zgjat rreth dy orë, ndërsa në dimër kryhet shumë më shpejt.

I bën mirë lëkurës

Moti i ftohtë i bën mirë lëkurës sipas ekspertëve. Temperaturat e ftohta ngushtojnë enët e gjakut që kalojnë në lëkurë dhe funksionojnë si një tonik natyral. Sigurisht bëhet fjalë për temperatura të ftohta normale dhe jo për periudha të acarta të papërballueshme për trupin e njeriut./atsh

Sot është 100-vjetori i lindjes së Anton Çettës, profesorit, humanistit, folkloristit e studiuesit të shquar kosovar.

Me këtë rast Presidenti i Republikës së Kosovës, Hashim Thaçi ka kujtuar veprën dhe kontributin e Anton Çettës. “Para një shekulli u lind Anton Çetta, njeriu që do mbetet në historinë e kombit tonë për kontributin e jashtëzakonshëm në mbledhjen e folklorit shqiptar në Kosovë, duke e bërë të pavdekshëm këtë thesar të kulturës sonë shpirtërore. Ai do mbahet mend përjetë si njeri i urtë, i mençur, humanist dhe kontribues i shërimit të plagëve të gjakmarrjes në fillim të viteve të dekadës së fundit të shekullit njëzet. Kombi ynë do të mburret për jetë dhe mot me figurën e albanologut Anton Çetta”, shprehet Thaçi.

Anton Çetta lindi në vitin 1920 në Gjakovë, ku edhe kreu shkollën fillore. Më pas arsimimi i tij i mesëm vazhdoi në Tiranë e Korçë. Studimet e larta i kreu në Universitetin e Beogradit, në degën Gjuhë e Kulturë Romane. Njihet si mbledhës i folklorit nga trevat shqipfolëse, duke botuar rreth 16 libra. Nga viti 1968 Anton Çetta ka qenë udhëheqës i departamentit të Folklorit në Institutin Albanologjik të Prishtinës. Në vitin 1990 profesor Çetta u zgjodh kryetar i Këshillit Qendror të Lëvizjes Kombëtare për Pajtimin e Gjaqeve. Në vitin 1992 u zgjodh deputet i Kuvendit të Kosovës nga radhët e LDK-së./KosovaPress/

Janë 472 aplikimet për shërbimet që deri dje krijonin radhë nëpër sportele thjesht për një aplikim, i cili tanimë mund të bëhet online, përmes smartfonit apo kompjuterit.

Kryeministri Edi Rama deklaroi sot se qytetarëve nuk do t’u kërkohen më dokumente shtetërorë kur aplikojnë, po vetëm dokumente individuale.

Për të aplikuar për pension një qytetari i duhej të mblidhte në sportelet e disa institucioneve një numër të madh dokumentesh.

Kryeministri Rama shpjegoi konkretisht se si do të jetë kjo procedurë që nga data 6 janar.

”Sot 16 dokumente që nevojiten për të plotësuar dosjen e për të përfituar pension pleqërie do t’i sigurojë vet Instituti i Sigurimeve Shoqërore”, tha Rama.

“16 rrugë për të bërë këto lloj dokumentesh, për të bërë një mal me letra. Tashmë të gjithë këto dokumente do t’i sigurojë vetë Instituti i Sigurimeve Shoqërore. Aplikanti do të duhet të dorëzojë vetëm 5 dokumente që janë libreza e punës, diploma e shkollës së lartë, vërtetim nga qendra e fundit e punës, vërtetim page, sipas së cilit është derdhur kontribut që nga viti 1994 deri në momentin e lënies së punës, si dhe vërtetim nga shkolla kur fëmija është mbi 18-25 vjeç”, u shpreh Kryeministri.

Qytetarët do të mund ta ndjekin online ecurinë e aplikimit të tyre dhe do të paraqiten në sportel vetëm nëse prezenca e tyre është e detyrueshme nga përcaktimet ligjore për të marrë shërbimin.

Ky proces transformues rrënjësor do të zhdukë brenda 2020-s radhët për të kërkuar një shërbim; shkurtojë kohën e humbur për të marrë një shërbim; eliminojë masivisht ryshfetin.

Kryeministri u ndal edhe në një nga çështjet e diskutuara që ka të bëjë me aplikimin nga ana e të moshuarve.

Sipas tij, nga eksperienca me platformën e bashkëqeverisjes ka rezultuar që ky proces është i thjeshtë, sepse janë zgjidhur shumë halle që kanë ngritur të moshuarit.

”Por, ata mund të përfitojnë online këto shërbime ose duke shkuar në një pikë shërbimi, si postë, njësi administrative, apo duke iu kërkuar ndihmë familjarëve, djalit, vajzës, nipit, apo fqinjit”, shtoi Rama.

“Do të ketë një fazë tranzicioni. Në periudhën e parë, muajin e parë dhe të dytë, sportelet do të asistojnë personat për t’a bërë më të lehtë aplikimin, siç bëmë dikur në aeroporte kur u vendosën biletat elektronike dhe stjuardesat ndihmonin pasagjerët”, tha Rama.

”Data 6 janar është fillimi i një revolucioni kundër radhëve, zvarritjeve e ryshfetit për të lehtësuar maksimalisht procesin e marrjes së dokumenteve dhe shërbimeve nga qytetarët”, theksoi ai.

“Ky shërbim do të ofrohet si për shqiptarët në Shqipëri edhe për ata jashtë. Nuk do të kenë më nevojë të vijnë me pushime e të rrinë në sportele për të marrë një numër të madh shërbimesh. Ndërkohë janë vetëm një numër i vogël shërbimesh që për çështje sigurie kanë të nevojshme prezencën e qytetarit”, deklaroi Kryeministri Rama.

Në qershor do të hyjë online blloku i dytë prej 395 shërbimesh dhe deri në fund të vitit 2020 do të jenë 91% të të gjitha aplikimeve për shërbime (me pak përjashtime të paevitueshme dot për shkak të nevojës së paraqitjes së personit për një aplikim) do të bëhen vetëm online në https://e-albania.al

Sistemi nuk do të paraqesë probleme pasi e-albania është një platformë e konsoliduar tashmë, dhe të gjitha institucionet janë gati./atsh

https://www.facebook.com/edirama.al/videos/1253055768415203/?t=0

Buxheti i vitit 2020 vijon garantimin e mbrojtjes sociale për individët, familjet në nevojë, personat me aftësi të kufizuar dhe nënat me foshnja të porsalindura.

Mbështetja synon të zbusë varfërinë dhe përjashtimin shoqëror për individët dhe familjet, si dhe të krijojë mundësi për integrimin e tyre, nëpërmjet sigurimit të një sistemi ndërhyrjesh e shërbimesh për përmirësimin e jetesës së tyre.

Ky buxhet mbulon fondin e përcaktuar për ish-të përndjekurit në masën një miliard lekë, fondin e përcaktuar për ish-pronarët në masën 4,5 miliardë lekë, fondin e përcaktuar për mbështetjen sociale, ndihmën ekonomike dhe pagesën për aftësi të kufizuar në masën 21 miliardë lekë si dhe fondin për bonusin e bebes prej dy miliardë lekësh./atsh