Irina

Redaksia e së përjavshmes prestigjioze “Paris Match”, e intriguar nga një postim mbi verërat në Instagram, i ka kushtuar një artikull Shqipërisë mbi këtë temë.

“Kushte klimatike ideale, një tokë e pasur dhe varietete rrushi shumë të vjetra, po, është e vërtetë, Shqipëria është gjithashtu një vend prodhues verërash”, e nis redaksia artikullin.

”Është e vërtetë që tek ne rrallë hapet ndonjë shishe verë e prodhuar në Shqipëri. Ajo nuk gjendet nëpër supermarkete dhe restorantet shqiptare nuk bëjnë promovime në rrugët e Belgjikës, as për të ofruar në menunë e tyre. Shumë ndryshe nga markat kroate, boshnjake apo edhe ato serbe, pa harruar restorantet greke që janë të shumta.

Ka kaq shumë shishe origjinale nga Ballkani, që, të pasuruara në mënyra të ndryshme, kanë ardhur te ne.

Por, kjo mund të ndryshojë. Këtu keni një sërë arsyesh pse duhet të provoni përvojën e shijes së verërave shqiptare, nëse ju rastis të ndesheni me ndonjërën!

Shqipëria, një nga prodhueset më të vjetra të verës në Europë

E vinit në dyshim? Shqipëria mund të krenohet me një vreshtari gati 3000-vjeçare. Gjurmët më të lashta (800 p.e.s) na vijnë nga Iliria, rajoni aktual i Shkodrës, në veri të vendit.

Pas diktaturës komuniste dhe ndalimit të privatizimit të prodhimit të verës, pas uljes së konsumit të alkoolit të imponuar nga islamizimi i rajonit, shqiptarët gjetën recetat e së shkuarës dhe mënyrat stërgjyshore të veprimit, për të rimarrë veten.

Historia e vreshtarisë në këtë vend nuk ka shkuar vaj, deri në atë pikë, saqë “The Guardian” flet sot për një rilindje të saj!

Varietete rrushi endemike

Sheshi i Bardhë (rrush i bardhë) dhe Sheshi i Zi (rrush i kuq), me origjinë nga fshati Shesh, janë më simboliket e vendit. Përkrah tyre, përmendet edhe rrushi i llojit Kallmet (i kuq) dhe Vlosh (i kuq dhe i trëndafiltë). Përmenden, gjithashtu, edhe pse më pak, varietetet Debin dhe Vranac.

Në total, ai përfaqëson rreth 75 % të furnizimit me verëra të ndryshme.

Ekzistojnë, gjithashtu, edhe varietete më tradicionale: Merlot, Cabernet, Pinot, Tokai. Këto janë katër rajonet që organizojnë kultivimin e hardhisë.

Tani për tani, vendi prodhon vetëm një milion shishe, çdo vit.

Pjesa më e madhe e konsumit vendas ende mbështetet nga importi masiv i verërave italiane.

Vreshta lehtësisht të arritshme

Shqipëria turistike është e njohur për bregdetin e saj të mrekullueshëm dhe klimën e përsosur të stinës së verës. Natyra, me burimet, liqenet, malet, luan gjithashtu një rol mjaft tërheqës.

Por, nëse planifikoni një udhëtim në vendin e flamurit me kokë shqiponje, synoni zona të ndryshme të vizitueshme: Kantinën e Verës “Arbëria”, Kantinën e Verës “Çobo” dhe Kantinën e Verës “Kokomani”. Një përvojë sa unike, aq edhe origjinale.

Nuk ka dyshim që do të priteni mirë, sepse edhe brenda kufijve të vendit, verës vendase nuk i bëhet një reklamim i mirë dhe vreshtarët nuk marrin një meritë apo çmim të denjë për këtë emër, përfundon ”Paris Match”. /atsh

Forcat e Armatosura i janë bashkuar fushatës për dhurimin e gjakut për t’u ardhur në ndihmë njerëzve me nevoja jetike.

Ministrja e Mbrojtjes, Olta Xhaçka, shprehet krenare për iniciativën e ndërmarrë nga FA.

“Kontributi i FA për komunitetin nuk mjaftohet vetëm gjatë emergjencave civile apo përmirësimit të infrastrukturës në zonat rurale”,- theksoi Xhaçka.

“Ashtu si çdo vit, burrat dhe gratë në uniformë iu bashkuan masivisht fushatës së dhurimit të gjakut, për t’u ardhur në ndihmë njerëzve me nevoja jetike. Krenari për FA”,- nënvizoi ministrja Xhaçka./atsh

“Pavarësisht se cili do të jetë vendimi i radhës në aspektin e çeljes së negociatave, ose shtyrjes së vendimit, ne do vazhdojmë të bëjmë të njëjtën gjë edhe po të hapeshin tashmë negociatat. Ne këtë e bëjmë për veten tonë dhe të ardhmen tonë, nuk e bëjmë se na i kërkon Presidenti i Këshillit, Parisi, apo Haga”.

Kështu deklaroi kryeministri Edi Rama në konferencën e përbashkët për shtyp me Presidentin e Këshillit Europian Charles Michel, pas takimit mes tyre në Tiranë.

“Më vjen shumë mirë që ka një qartësi për faktin se reformat po ecin dhe rezultatet e pritura po vijnë dhe do vazhdojnë të vijnë. Kam ndarë me Presidentin edhe ambicien për të hedhur një hap të ri dhe pa humbur kohë në luftën kundër krimit të organizuar dhe KÇK-së. Kështu do të vazhdojmë hap pas hapi”, – tha Rama.

Kreu i qeverisë u shpreh se “kjo që po kalojmë është një fazë që BE-ja ka një diskutim të brendshëm dhe me të gjithë mirënjohjen për vëmendjen që asnjëherë nuk ka munguar, në raport me nevojën time për të përcjellë opinionet e mia, qoftë në Paris apo në kryeqytete të tjera, jam i vetëdijshëm dhe ju duhet të jeni të vetëdijshëm, që nuk varet nga çfarë themi apo bëjmë ne në këtë moment, por varet nga sa dhe si miqtë tanë nga BE-ja do të bien dakord për atë që quhet metodologjia e re dhe cila do të jetë qasja e përgjithshme e BE-së”.

Kryeministri Rama u shpreh se “e kam thënë edhe më parë dhe e përsëris, në këto kushte edhe Franca të ishte duke kërkuar të hynte në BE, nuk do pranohej nga Franca, përpara sesa të bihej dakord se si do zhvillohej procesi. Është një diskutim konceptual brenda BE-së që ne duhet ta respektojmë dhe nga ana tjetër ajo unë konstatova me shumë kënaqësi nga biseda me Presidentin e Këshillit dhe që u tha këtu prej tij, është qasja që ai kërkon të sjellë së bashku me të tjerët, për një dimension të ri në marrëdhëniet mes BE-në dhe vendeve të Ballkanit Perëndimor në aspektin e zhvillimit ekonomik dhe social. Pra, ajo që po ndodh në funksion të një metodologjie te re duhet parë si një mundësi e re për të pasur zhvillime pozitive, jo thjesht në raport me hapjen e negociatave nga pikëpamja formale, por në raport me marrëdhëniet mes nesh dhe BE-së”.

“Nëse çfarë Presidenti shpreh sot si një vizion dhe objektiv do të materializohet në investime të inkurajuara dhe mbështetura nga BE, përmes Bankës Europiane dhe instrumenteve të tjera, në më shumë mbështetje financiare në vendet e rajonit në funksion të sektorëve kyçë dhe të politikave europiane në tërësi kjo përbën një arsye për të qenë shumë pozitivisht të inkurajuar”, – tha Rama.

Duke folur për Programin e Rindërtimit, Rama theksoi se “ajo që ka rëndësi është që në fund të këtij viti Shqipëria të jetë një vend më i mirë dhe ne të kemi arritur së bashku me Bashkimin Europian si një mbështetës kryesor t’u kemi dhënë atyre që kanë pasur tragjedinë e madhe të nëntorit, drejtpërdrejt në kurriz, jo më vetëm thjesht shpresë, por shtëpi të reja dhe perspektivë të qartë për të hyrë në shtëpi, jo më larg se fundi i vitit të ardhshëm për ata që jetojnë në qytet”.

Kryeministri u shpreh se “dua ta falënderoj Presidentin e KE-së, Michel për ngushëllimet dhe interesimin e posaçëm lidhur me situatën e vështirë të krijuar pas tërmetit të 26 nëntorit, si dhe për angazhimin e tij personal për të ndihmuar që konferenca e donatorëve e thirrur nga Presidentja e Komisionit Europian, në 17 shkurt në Bruksel të jetë një sukses dhe populli shqiptar e në mënyrë të posaçme afro 15 mijë njerëz që kanë humbur strehën të marrin mesazhin e qartë që Europa është pranë dhe nuk do të na lërë vetëm në përpjekjen e madhe për rindërtimin”.

“Natyrisht kemi folur me Presidentin e Këshillit edhe për procesin e reformave dhe ecurinë e procesit të integrimit, kemi ndarë pikëpamjet lidhur me çfarë është arritur deri këtu dhe çfarë duhet arritur më tutje dhe mbi diskutimin e brendshëm në BE për atë që tashmë njihet si metodologjia e re e zgjerimit dhe në tërësi më vjen shumë mirë që Presidenti Michel ka shprehur vullnetin për të qenë posaçërisht i angazhuar për rajonin, jo vetëm në funksion të procesit të integrimit të mëtejshëm individualisht të vendeve , por edhe në funksion të fuqizimit të bashkëpunimit rajonal, por edhe të një qasje të re të Brukselit në raport të zhvillimit ekonomik dhe social të rajonit”, – nënvizoi Rama.

Kreu i qeverisë u shpreh se “dua ta falënderoj edhe një herë Michel, sepse sidoqoftë në këtë rol është vetëm në momentet e para dhe ka shumë dosje të rëndësishme në tryezë për të trajtuar dhe fakti që pas një firmosje në orën 1:30 të mëngjesit, lidhur me Britaninë e Madh dhe fakti që sot i ka ardhur në Tiranë për të çelur një fazë të re të dialogut me ne dhe me rajonin, është shumë domethënës për mua”/atsh

https://www.facebook.com/edirama.al/videos/630723447761052/?t=0

Agjencia Shqiptare e Zhvillimit të Investimeve (AIDA), zhvilloi sot në në qytetin e Gjirokastrës, një takim informues me përfaqësues të biznesit mbi skemat e granteve, që ofron kjo agjenci.

Dilfirus Vrioni, drejtore e Drejtorisë Marketing, Kërkim dhe Analizë pranë AIDA-s bëri një prezantim të punës së agjencisë dhe mbështetjes që ajo ofron për bizneset në të gjithë vendin, mundësitë për ndërlidhjen e kompanive nëpërmjet platformës B2B në faqen web të AIDA-s, gjithashtu dhe faktin se agjencia është e hapur ndaj çdo komunikimi të jashtëm me qëllim lehtësimin e shërbimeve dhe adresimin e problematikave të hasura, por edhe ndaj kërkesave të ndryshme si pjesëmarrja në panaire.
Ndërsa Albana Zykaj, përgjegjëse e Sektorit të Ndërmarrjeve të Vogla dhe të Mesme (NVM) pranë AIDA-s informoi pjesëmarrësit lidhur me skemat e granteve të cilat AIDA ofron për t’iu ardhur në ndihmë bizneseve.

Pergjatë takimit, përfaqësuesit nga bizneset pjesëmarrëse ngriten çështje dhe problematika konkrete të hasura në punën e tyre të përditshme veçanërisht në sektorin e artizanatit dhe turizmit. Nga pjesëmarrësit u kërkua vëmendje dhe investime të mëtejshme për qarkun. Bizneset kërkuan trajnime, mundësi inovative për promovimin e bizneseve te tyre, asistencë nga AIDA për aplikimin e fondeve, rritjen e kapaciteteve për shitjet online etj. Nga ana e tij Maksim Hoxha, Kryetar i Dhomës së Tregëtisë së Qarkut Gjirokastër u shpreh vullneti që ky qark të përfaqësohet në panaire ndërkombëtare turistike, pikë e cila do të ndiqet nga stafi i AIDA-s. U diskutua mbi promovimin e produkteve “Made in Albania”, gjithashtu për zhvillimin e produkteve dhe shërbimeve të reja në mbështetje të biznesit shqiptar.

Ne vijim të takimit, pjesëmarrësve ju prezantua dhe Rrjeti Europian i Ndërmarrjeve (EEN Albania) dhe shërbimet që rrjeti ofron për NVM-të shqiptare me synim rritjen e aftësisë konkurruese dhe inovative të tyre në tregun Europian e më gjerë.

Këto takime të ndërmarra nga AIDA kanë si qëllim final përmirësimin e klimës së të bërit biznes në Shqipëri dhe promovimin e produkteve shqiptare nëpërmjet përkrahjes dhe përmirësimit të proaktivitetit ndaj tyre. /atsh