Irina

Prokuroria përveç marrjes së përgjigjet nga ekspertiza, gjithashtu ka zbuluar përmes përgjimeve se Albert Veliu në bashkëpunim me kunatin e tij, Fredi Alizoti kishin sajuar përgjimin me vëllain e Fatmir Xhafajt. Burimet thonë se në bisedën e përgjuar, Alizoti e pyet në telefon “Babalen” se kur do paguhen. Ndonëse ekspertiza e audio-përgjimit e kryer në laboratorin anglez ende nuk është e qartë se çfarë ka përcaktuar, sërish edhe kjo sipas Prokurorisë tregon se gjithçka ishte një inskenim.

Pasi Gjykata firmosi urdhërarrestet e Prokurorisë së Krimeve të Rënda për Albert Veliun dhe kunatin e tij, Fredi Alizotin, Policia ekzekutoi vetëm një nga këto urdhra, duke arrestuar Alizotin. Ndërsa për “Babalen”, ende nuk është arritur të ekzekutohet vendimi i Gjykatës, për arsye se ai ndodhet në Kosovë. Burime nga Policia thanë se kanë nisur procedurat me Policinë e Kosovës, në mënyrë që të bëhet e mundur kthimi i tij në Shqipëri, por ende nuk ka një vendim konkret. Sa i përket gazetarit Jetmir Olldashi, Gjykata ka vendosur detyrim paraqitjeje, me kërkesë të Prokurorisë së Krimeve të Rënda.

POLICIA

Në njoftimin e Policisë së Shtetit thuhet se më datë 06.10.2018, nga ana e oficerëve të Policisë në Drejtorinë Vendore të Policisë Tiranë u bë ekzekutimi i Vendimit të Gjykatës së Shkallës së Parë për Krimet e Rënda për shtetasit: Fredi Aalizoti, 45 vjeç, banues në Fier (për këtë shtetas është caktuar masa e sigurisë “Arrest me burg”, për veprat penale “Kallëzim i rremë i kryer në bashkëpunim”) dhe Jetmir Olldashin, 37 vjeç, banues në Tiranë (për këtë shtetas është caktuar masa e sigurisë “Detyrim paraqitjeje”). “Shtetasin Albert Veliu, 51 vjeç, banues në Vlorë, ndaj të cilit është caktuar masa e sigurisë ‘Arrest me burg’, për veprat penale ‘Kallëzim i rremë i kryer në bashkëpunim’ dhe ‘Kalim i paligjshëm i kufirit’, parashikuar nga nenet 305,25 dhe 279 të Kodit Penal), shërbimet e Policisë nuk e kanë ndaluar ende. Po kryhen procedurat e duhura për ekzekutimin e këtij vendimi”, thuhet në njoftimin e Policisë së Shtetit.

HETIMET

Pikë e fortë referuese e Prokurorisë për rastin në fjalë ka qenë ekspertiza e britanikëve, të cilët përmes një letërporosie të përcjellë nga Ministria e Drejtësisë, thoshin se audio-përgjimi i sekuestruar nga Prokuroria nuk ishte autentik.

Gjithashtu, zëri në audio-përgjim, që pretendohej se i përkiste Agron Xhafajt, nuk mund të konfirmohej se ishte i tij, pasi cilësia ishte shumë e dobët. Madje, britanikët flasin për dy zëra të ndryshëm në audio- përgjim, në rolin e Agron Xhafajt. Prokuroria e Krimeve të Rënda pati vënë në përgjim Fredi Alizotin dhe Albert Veliun për rastin në fjalë. Gjatë gjithë kësaj kohe, është mundur të zbulohet nga bisedat telefonike të këtyre të fundit se audiopërgjimi nuk ishte gjë tjetër vetëm se një inskenim dhe se rolin e Agron Xhafajt e ka luajtur në bisedë shtetasi Fredi Alizoti, që është edhe kunati i Albert Veliut./PANORAMA

Historia e saj solli tronditje në politikën shqiptare, pasi në mes ishte djali i deputetit të PS-së. Por, historia e Xhisiela Maloku mbete ende e veshur me mister.

Ajo u ndalua sot nga gazetarët teksa hipi në makinën e saj. Më shumë se me detajet, gazetarët u morën me lajmin e ditës, i cili është shpërthimi i tritolit në shtëpinë e gjyshërve të saj, ku edhe vetë Xhisiela jeton. Xhisiela deklaroi se besonte se tritolin ia kishte vendosur opozita me arsyen se ajo i kishte prishur lojën politike që ata kishin ngritur në kurriz të saj.

Por, përtej deklaratave, në prononcimin e shkurtër që Xhisiela dha për gazetarët të bën përshtypje një detaj i rendësishëm që zbërthen ndoshta edhe një pjesë të të gjithë kësaj historie të ngatërruar mes saj dhe Rexhep Rrajës, i akuzuar se e ka rrahur. Xhisiela Maloku u filmua teksa drejtonte një makinë tip Peugeot 208.

Ky version u hodh për herë të parë nga kompania franceze në vitin 2012, ndërsa prodhimi seri filloi një vit më vonë. Makina që drejton Xhisiela, e cila nuk është në emrin e saj por të një koncesionari në Tiranë është e vitit 2017 dhe e re kushton minimumi 20 000 euro. Ndërkohë, një makinë e tillë e përdorur kushton mesatarisht 8 000 euro në treg.

Gjithashtu, në duart e Xhisielës gazetarët panë një celular iPhone X, ndërsa në kokë një palë syze Guçi, të cilat nëse janë origjinale shkojnë deri në 400 USD. Nga ana tjetër, Xhisiela Maloku ka deklaruar se në shtëpinë e saj punon vetëm mami. Ka mjaft të rinj dhe të reja në Tiranë që punojnë nga një apo dy punë për vite të tëra, por nuk arrijnë të kenë një jetë të tillë si e vajzës me histori kontradiktore nga Nikla e Fushë-Krujës.