Irina

Ministrja e Mbrojtjes, Olta Xhaçka vlerësoi reagimin dhe ndihmën e vendeve të BE-së pas tërmetit tragjik në Shqipërisë, ndërsa siguroi se çdo banesë në Durrës apo Thumanë do të rindërtohet .

Në një konference të përbashkët për shtyp me ambasadorin e Delegacionit të BE-së, në Tiranë dhe drejtuesin e Mbrojtjes Civile të BE-së, Xhaçka shprehu besimin se partnerët do të bëjnë çmos për të ndihmuar shqiptarët.

“Miku i mirë njihet në kohë të vështira. Shqipëria nuk është vetëm. Ju do të bëni çmos për të ndihmuar shqiptarët dhe ndihma juaj ka një impakt të madh. Përmes jush dua të falenderoj vendet e BE-së që na u gjenden në një kohë rekord, taksapaguesit europian për bujarinë dhe solidaritetin e tyre dhe mbi të gjitha ekspertët që na kanë ndihmuar aq shumë përgjatë këtyre ditëve tragjike”,- tha Xhaçka.

Vetëm ata që kanë kaluar në një eksperiencë të tillë, vijoi ajo, mund t’a kuptojnë se sa e rëndësishme është që në një kohë traumatike si kjo, ku e ke të pamundur t’i besosh as tokës mbi të cilën ecën, të mos ndihesh vetëm, të dish që nuk je i detyruar të përballesh i vetëm me furinë e natyrës, por mund të mbështetesh te solidariteti i miqve dhe partnerëve shqiptarë.

“Tërmeti ishte shkatërrues, por do ia dalim që të ndërtojmë çdo banesë në Durrës dhe Thumanë. Na lëndojnë jetët e humbura. Duhet të kalojë shumë kohë përpara se plagët të shërohen. Bëmë gjithçka për të ndihmuar për cilindo që kishte nevojë për ndihmë”, theksoi Xhaçka.

Ministrja vuri në dukje se mes zisë edhe dhimbjes, e vetmja gjë e bukur që të jep shpresë është solidariteti i jashtëzakonshëm që vërshoi nga shqiptarët dhe partnerët.

“Ajo që ne na mundon vërtet janë jetët e humbura, është një nga ato fakte që mendja e shpirtit e kanë të vështirë ta pranojnë dhe kuptojnë. Do të duhet të kalojë shumë kohë para se plagët të shërohen nëse do të mund të shërohen.Do të kishim pasur më shumë jetë të humbura, pa 780 ekspertët nga 14 vendet që luftuan për shqiptarët. Do të jenë në mirënjohjen dhe zemrat e shqiptarëve. 400 është numri i objekteve të vlerësuara deri tani. Shifrat flasin për përmasa apokaliptike të dëmtimeve. Sfidë është rimëkëmbja, unë jam optimiste nga mesazhet, gatishmëria dhe ndihmat e vendeve të BE-së që nuk do të jemi vetëm në këtë sfidë”, – tha Xhaçka.

Sipas ministres së Mbrojtjes, aktivizimi i mekanizmit të mbrojtjes civile tregoi edhe një herë, ashtu si 2 vite më parë gjatë përmbytjeve që preken Vlorën, Fierin apo Shkodrën, apo si dy muaj më parë, gjatë tërmetit që goditi vendin se Shqipëria nuk është vetëm.

“Ka miq, aleatë e partnerë që nxituan të sjellin ekipet më të specializuara të kërkim-shpëtimit, ekspertë të vlerësimit të dëmeve, apo qindra ton ndihma që janë shpërndarë, duke lehtësuar dhimbjen e traumën e jashtëzakonshme që kanë pësuar ata qytetarë.

Tërmeti i 26 nëntorit ishte vërtet shumë i fortë dhe dëmet që ka shkaktuar janë të mëdha dhe sfida për “, shtoi ministrja.

Më tej, ajo theksoi se përballimi i këtyre dëmeve është shumë i vështirë. Por, siguroi ajo, sado e vështirë të jetë, sado punë do të duhet për t’a përballuar, jam e bindur që së bashku do të ja dalim.

“Bëmë gjithçka që mund të bëhet për të ndihmuar këdo që kishte nevojë për ndihmë. Për të shpëtuar jetë. Reaguam me shpejtësi që në minutat e para dhe efektivët e forcave të armatosura, policisë, zjarrfikësit mbërritën në një kohë të shkurtër në zonat e prekura për të ndihmuar çdo banor të mbetur në nevojë. Lan pas familjet e tyre, në një moment ankthi për tu shërbyer atyre që kishin më nevojë, shpesh duke rrezikuar edhe jetët e tyre”, nënvizoi ministrja.

Po ashtu ministrja informoi se grupi i ekspertëve të vlerësimit të banesave, i përbërë nga 70 ekspertë të organizuar në 11 grupe, por dhe dhjetëra të tjerë që priten të vijnë në ditët në vijim, i mbështetur nga mekanizmi i përbashkët i emergjencave të Bashkimit Europian e Kombeve të Bashkuara po vazhdon vlerësimin teknik të banesave, duke e çuar sot në 400 numrin e objekteve të vlerësuara.

Ministrja Xhaçka vlerësoi se duhet paraqitur një plan i qartë për tejkalimin e situatës në mënyrë që të kthehet siguria tek njerëzit.

“Ata mijëra qytetarë që janë strehuar sot kanë nevojë për shpresë, që kjo situatë nuk do të zgjasë pafundësisht. Na duhet të tregojmë dritën në fund të tunelit të dëshpërimit e ankthit që ka shkaktuar kjo tragjedi. E vetmja mënyrë për ta bërë, është duke u treguar një plan të qartë, me angazhime të qarta, qoftë nga shteti shqiptar qoftë nga BE dhe nga vendet anëtare se do të vijojmë t’i mbështesim në sfidën e rimëkëmbjes”, u shpreh Xhaçka./atsh

Kryeministri Edi Rama vizitoi sot banorët e akomoduar në Shëngjin, Lezhë, ku ofrohet shërbim shëndetësor 24 orë, konsulta psikologjike gjatë gjithë ditës, përkujdesje e veçantë për fëmijët, mjedis lojrash në tavolinë për të rriturit dhe përgatitje për të garantuar vazhdimin normal të shkollimit për nxënësit.

“Rrëzohemi bashkë ringrihemi bashkë dhe i lutemi së bashku Zotit të na forcojë durimin e mos ta sprovojë më familjen shqiptare me goditje që na këpusin në mes e në shpirt”, tha Rama në një takim me banorët.

Kryeministri shoqërohej nga ministrja e Shëndetësisë dhe Mbrojtjes Sociale, Ogerta Manastirliu e cila e informoi mbi gjithë kujdesin e shërbimit shëndetësor që ofrohet për banorët.

Manastirliu tha se në këtë hotel janë strehuar një numër i madh banorësh nga Thumana. Ajo tha se “kemi aktivizuar hapjen e Qendrës Shëndetësore që përdorim në verë dhe sigurojmë trajtim shëndetësor për të gjithë, kryesisht për të sëmurët kronikë”.

“Kemi krijuar një dosje për të gjithë banorët për të evidentuar statusin e tyre shëndetësor, medikamentet që u nevijiten dhe trajtimin mjekësor që marrin. U kemi dhënë të gjitha medikamentet falas. Për fëmijët është zyra e psikologut që po vazhdon dhe bën këshillime të vazhdueshme”, tha Manastirliu.

Drejtori i Qendrës Kombëtare të Urgjencës Mjekësore, Skënder Brataj tha se situata është nën kontroll dhe jemi organizuar në të gjitha pikat. Sipas tij, “çdo thirje dhe çdo konsultë regjistrohet dhe jepet një përgjigje. “Kemi rreth 7 mijë thirrje nga momenti i rënies së tërmetit dhe janë mbi 1500 vizita që janë kryer”, tha ai.

Duke iu drejtuar banorëve, Kryeministri Rama tha se “kjo na ra dhe do ta kalojmë bashkë, se nuk kemi çfarë të bëjmë tjetër”.

“Rrini të qetë sepse ne do t’i bëjmë të gjitha por atje ishit në mes të të ftohtit dhe 50 m nga varri, ndërsa këtu jeni me të gjitha shërbimet. Duhet pak kohë, duhet pak durim”, tha ai.

Ndërkohë, sipas ministres Manastirliu, “fëmijët po asistohen nga psikologë, si dhe nga organizata që merren me fëmijët si World Vision, UNICEF, Save the Children, për të siguruar asistencë psikologjike.

Po ashtu, Manastirliu tha se “po bëhet lista e gjithë nxënësve dhe studentëve për të cilët do të vendosen në dispozicion autobusë dhe fugona kur të fillojë shkolla”.

Kryeministri sugjeroi që për ata fëmijë që nuk kanë mundësi të largohen të krijohen klasa në këto ambiente ku të marrin mësimet. /atsh

Gjatë vizitave që zhvilloi pasditen e sotme në qendrat sociale por edhe hotele aty ku janë akomoduar shumë familje, Kryeministri Edi Rama ka publikuar edhe një foto të veçantë.

“Ja ku e gjej energjinë! Tek Zaho dhe shoqnia e tij” shkruan Rama duke publikuar një foto me një fëmijë./atsh

Ekspertë të njohur të sizmologjisë po qetësojnë qytetarët duke u shprehur se situata më e rëndë ka kaluar.

Gjatë një interviste televizive profesori i njohur për Sizmikën dhe Tërmetet nga Maqedonia e Veriut, Mihail Garevski deklaroi se tashmë mund të ketë pas-lëkundje të vogla, por paniku ka kaluar.

Gjithashtu Garevski tha se, “jam i kënaqur për strukturën inxhinierike në Shqipëri. Nuk them se janë në kushte jashtëzakonisht të mira, por një tërmet me një magnitudë kaq të madhe, viktimat mund të ishin edhe më të mëdha, pasi ishte me një fuqi tepër të madhe”.

Profesor Mihail Garevski theksoi se, “tronditja kryesor besoj e shpresoj ka ikur. Shpresojmë që ky është tërmeti më i madh, ndoshta edhe lëkundje mund të ketë, por më të vogla se magnituda 4.0. Mund të ketë magnitudë 4 ose 4.5, por jam i sigurt që nuk ka vend për panik. Tashmë besoj se toka sa vjen e qetësohet”.

Profesori tha se është e vështirë të parashikohen tërmetet sepse askush nuk e parashikon dot tërmetin.

Garevski tha se, ” zakonisht në këtë rajon, siç ndodhi edhe në Shkup më 1963, pas tërmetit të fuqishëm kishte lëkundje, e më pas toka u zbut. Edhe më 1979 në Mal të Zi kishte magnitudë 7.4, kishte disa pas-lëkundje e më pas situata u qetësua”./atsh