Irina

Pas dy javëve sfiduese, në Tiranë kanë mbërritur zyrtarisht festat e fundvitit. Në një ceremoni të organizuar mes dhjetëra qytetarëve, mes të cilëve edhe fëmijë, Kryeministri Edi Rama dhe kryetari i bashkisë së Tiranës, Erion Veliaj, ndezën dritat e pemës së madhe për Festat e Fundvitit, në sheshin “Skënderbej”.

Atmosfera filloi me një koncert të korit të fëmijëve, nën drejtimin e artistes Suzana Turku, e cila ishte kujdesur për të krijuar një atmosferë festive, duke përzgjedhur një repertor të pasur.

“Dua vetëm t’ju uroj të gjithëve një vit të ri të gëzuar, si këto drita që do të ndizen dhe dua po ashtu t’i siguroj të gjithë për një gjë, çfarë nuk të vret, të bën më të fortë. Dhe ne sot jemi të gjithë së bashku më të fortë. Shqipëria sot është më e fortë, shqiptarët sot kudo ku janë dhe ngado ku ku shohin janë më të fortë. Të gjithëve gëzuar dhe kalamaja shumë faleminderit për muzikën e ëmbël, qofshi gjithmonë kështu si muzika që kënduar. Gëzuar dhe prindërve”, tha Kryeministri Edi Rama.

Gjithashtu kryeministri Edi Rama përmes një foto të shkëputur nga kjo atmosferë festive shprehet se, “mes dritave të shpresës që sot është më e fortë pas errësirës së madhe të dëshpërimit”.

Ndërsa kryetari i bashkisë së Tiranës, Erion Veliaj theksoi se pavarësisht se ky fundvit pati edhe një ngjarje sikurse ishte tërmeti, Tirana ndezi dritat e shpresës.

“Ky ka qenë një vit shumë i vështirë, është viti i 99-të i Tiranës si kryeqytet. Ne mbushim 100 vjeç vitin tjetër dhe le ta pranojmë, nuk e mbyllëm shumë kollaj këtë shekull. Ishte një shekull që në fund fare na rezervoi një nga fatkeqësitë më të mëdha të vendit tonë. Jo vetëm në Durrës, në Thumanë, por edhe këtu në Tiranë, ndjemë shumë dhimbje, ndjemë shumë trishtim. Patëm shumë fëmijë që u mërzitën, por e di çfarë? Kur po pyesja xhaxhi Edin, që na ka ardhur sot të na nderojë me prezencën e tij, çfarë do bëjmë në këtë situatë, vendimi ishte jo vetëm për Tiranën, por për gjithë kryetarët e bashkive që ne duhet t’i ndezim dritat, ne duhet të sjellim shpresën, duhet të ketë gëzim në qytet, duhet që energjia pozitive të na kaplojë. Patjetër do respektojmë të gjitha ato ngjarje, patjetër që do trajtojmë me shumë dinjitet të gjitha vështirësitë, por mbi të gjitha do t’i kujtojmë secilit që jeta vazhdon”, tha Veliaj.

Kreu i bashkisë nënvizoi se Tirana diti si të ngrihet shumë shpejt, duke filluar që me hapjen e çerdheve, kopshteve, shkollave dhe fillimin e procesit të ndërtimit.

“Jeta është e bukur, dhe nëse duam diçka në fund të shekullit të parë si Tirana kryeqytet. Dhe ne jemi të fortë kur jemi bashkë. Ne mund të rrëzohemi shpesh, por ne edhe ngrihemi shpejt. Dhe ka ardhur momenti që pas këtij rrëzimi të madh që patëm para dy javësh, ne të ngrihemi. U ngritëm, filluam çerdhet, kopshtet, shkollat, filluam rindërtimin, filluam jetën normale. Dhe sot jemi gati të ndezim dritat në Tiranë”, tha ai.

Veliaj u kërkoi të gjithë fëmijëve të kryeqytetit që të bëjnë nga një dhuratë për fëmijët në zonat e prekura nga tërmeti.

“Kemi një operacion që quhet operacioni ‘kutia’, secili prej jush do të marrë një kuti bosh këpucësh dhe do ta mbushë me lodra, me lapsa, me stilolapsa, me fletore me gjëra që do të donte t’ia bënte dhuratë një çuni apo një goce në Durrës, në Thumanë, në Krujë, në Laç apo në Vlorë. Nëse siç po merret qeveria dhe të gjithë të tjerët që po të punojnë për shtëpitë edhe për të gjithë sistemimet e tjera, nëse dhe ju do të na ndihmoni që të bëjmë nga një dhuratë për të gjithë kalamajtë që janë në zonat e prekura ky do të jetë realisht Viti i Ri më i bukur në botë”, theksoi kryebashkiaku Veliaj. /atsh

https://www.facebook.com/edirama.al/videos/849136328877282/?t=0

Shqipëria i ka përmbushur të gjitha kushtet e nevojshme teknike për të filluar procesin e bisedimeve për anëtarësim

Ministri në Detyrë për Europën dhe Punët e Jashtme, Gent Cakaj zhvilloi sot në Bruksel edhe një takim me Komisionerin e sapozgjedhur për Politikat Europiane të Fqinjësisë dhe Zgjerimit, Olivér Várhelyi.

“Këmbyem pikëpamjet mbi përmbajtjen e metodologjisë së re të negocimit dhe rëndësinë e procesit të zgjerimit të BE-së në Ballkanin Perëndimor në përgjithësi”, u shpreh Cakaj.

Në thelb, theksoi Cakaj, “ndamë qëndrimin e njëjtë se Shqipëria i ka përmbushur të gjitha kushtet e nevojshme teknike për të filluar procesin e bisedimeve për anëtarësim. Pas miratimit të metodologjisë së re, pritet një dinamikë e shtuar në politikat e zgjerimit të BE-së që do të mundësojnë hapjen e bisedimeve për anëtarësim me Shqipërinë”.

Sidoqoftë, vijoi Cakaj, “pavarësisht shtyrjes së vendimit dhe procesit të reformimit të metodologjisë së negocimit, Shqipëria do të vazhdojë punën e pakursyer për reforma modernizuese dhe transformime demokratike”./atsh

“Në 9 dhjetorin ndërkombëtar të Antikorrupsionit, Ministria e Drejtësisë vijon të udhëheqë me përgjegjshmëri të plotë të gjitha detyrimet e saj në luftën kundër praktikave korruptive. Me të tillë rikujtesë ndërkombëtare, kaq pranë sprovave tona kombëtare, rikujtojmë sesi të luftuarit e korrupsionit është detyra më e lartë patriotike e çdonjërit prej nesh”, shprehet zv.ministrja e Drejtësisë Fjoralba Caka.

Ajo nënvizon se “nuk ka kthim pas në luftën e pakushtëzuar që kemi nisur kundër korrupsionit prej ndryshimeve kushtetuese të 2016 në legjislativ, ekzekutiv dhe gjyqësor”

Duke u ndalur në shifra, Cakaj shprehet se “vetëm në 3- tremujorë të vitit, ne mund të krenohemi me: rritje në 598 të numrit të shërbimeve administrative të ofruara elektronikisht për qytetarët, duke luftuar kështu “korrupsionin e vogël” që zë fill në sportelet e shërbimit; 951 vepra penale korruptive të identifikuara nga strukturat antikorrupsion në vend; 1391 subjekte të hetuara, nga të cilat 126 persona të dënuar nga Gjykatat e Shkallës së parë dhe 162 të dënuar nga Gjykatat e Apelit për veprën penale të korrupsionit; 13 institucione shtetërore të inspektuara plotësisht dhe 13 struktura të tjera shtetërore në proces inspektimi nga Task Forca Antikorrupsion, shumë punë na pret ende për çrrënjosjen e kulturës së “favoreve” dhe “njohjeve” për të fituar shërbimin e takuar dhe të drejtën e merituar”.

“Megjithatë, çmimi që do na duhet të paguajmë për të ndërtuar shtylla të shëndetshme në qeverisje, administratë dhe drejtësi-dhënie, ia vlen për të ruajtur fort deri në fund dinjitetin tonë drejt hapjes së dyerve ku na pret familja jonë evropiane”, shprehet më tej zv.ministrja.

Cakaj falënderon “ BE, Këshillin e Europës, GRECO-n dhe miqtë tanë të palodhur ndërkombëtarë për shembujt vetjakë drejt Shqipërisë së transparencës, integritetit e shtetit të së drejtës dhe pakorrupsion”. /atsh

Zv/Ministri i Infrastrukturës dhe Energjisë, Artan Shkreli deklaroi sot se për godinat e shembura janë marrë të gjitha provat.

“Prokuroria këtë moment, ashtu sikundër menjëherë pas kalimit të fazës së parë të traumës filloi të interesohet për marrjen e provave sidomos në objektet ku pati viktima. Domethënë u ndalua shkatërrimi i pjesës ekzistuese të objekteve pasi u nxorën viktimat”, tha Shkreli gjatë një emisioni televiziv.

Shkreli tha se, objektet e tjera u shkatërruan pasi u morën provat.

‘Tek objektet me viktima po e po, por dhe më vonë dhe tek këto në vazhdim çdo objekt që shpallet që do të shkatërrohet , Instituti i Ndërtimit është i detyruar në prani të oficerit gjyqësor të marrë prova nga elementët konstruktiv, themele, kolona, trarët, se kur ka element konstruktivë sic janë diafragmat apo kullat e ashensorëve edhe prej tyre merren”, tha Shkreli.

Ai theksoi se si prova, “merren kampione të betonit, merren kampione të seksioneve të kolonave sesi janë vënë hekurat aty, të cila më vonë do të kontrollohen me projektin nëse janë bërë në funskion të projektit apo janë ndryshuar nga projekti. Kjo do të nxerrë ëprgjegjësinë nëse është e projektuesit apo e zbatuesit”.

Shkreli tha se, “edhe tek ato godina që projektet nuk gjenden provat merren njësoj dhe do shihet nëse kompania që i ka bërë, pavarësisht se nuk gjendet projekti se mund të jetë pa leje, nuk ka zbatuar kushtet teknike. Se ka dhe objekte pa leje që i zbatojnë kushtet teknike, sikurse dhe ka objekte me leje që nuk i zbatojnë kushtet teknike”.

“Kompania nuk është fantazëm, banorët e dinë kush e ka bërë. Do pyetet administratori lokal, në rastin kur është bërë me kompani të ndryshme. Ndërtimet pa leje shprehin mënyrën e tranzicionit që ka bërë Shqipëria, si në politikë ashtu dhe në infrastructure”, theksoi Shkreli.

Ai gjithashtu theksoi se për ҫdo godinë që shembet me shpërthim të kontrolluar ka një dosje të përgatitur me të gjithë provat.

I pyetur për formularët e grupeve të inspektimit, Shkreli tha se, “kanë qenë dy formularë që ndryshonin nga forma, por jo nga përmbajtja. Për këtë u vendos me ndihmën e një njësie të UNDP të OKB të bëhet një formular që të njihet ndërkombëtarisht dhe ky formular është hedhur në qarkullim dje. Sot janë bërë të gjithë konstatimet me I Pad”./atsh

Kryeministri Edi Rama përcolli sot fjalët e shenjta nga shkrimtari i madh shqiptar, Naim Frashëri, ashtu sikundër ka bërë këto ditë pas tërmetit të 26 nëntorit.

“Mos e ndy shpirtin në jetë, zemrënë mos e lyej, shko n’udhëzët të vërtetë, mos u kthe e mos u thyej”.

“Fjalët e shenjta: Nga Naim Frashëri, faqja 26 tek “Mirësija”, në Fletoren e Bektashinjët” shkruan kryeministri Rama.

Prej disa ditësh kryeministri,ka zgjedhur që të publikojë thënie nga njerëz të urtë, apo nga librat e shenjtë siç janë Kurani apo Bibla, duke i titulluar si ‘Fjalët e shenjta’./atsh

Drejtoresha e përgjithshme e ATSH-së, Armela Krasniqi, ka nënshkruar një memorandum mirëkuptimi me presidentin e Agjencisë Saudite të Shtypit (SPA) Abdullah bin Fahd Al-Hussein për bashkëpunimin dhe shkëmbimin e lajmeve midis të dy agjencive.

Nënshkrimi i memorandumit u krye gjatë një takimi të zhvilluar në selinë e SPA-së në Riad, midis Al-Hussein dhe drejtoreshës së përgjithshme të ATSH-së. Në takim merrte pjesë edhe zv.presidenti i SPA-së Ahmed bin Ibrahim Al-Awadh.

Gjatë takimit, Krasniqi e informoi presidentin e Agjencisë Saudite të Shtypit për pasojat e tërmetit në Shqipëri dhe për ndihmën e çmuar të komunitetit ndërkombëtar. Ajo theksoi rolin e marrëveshjeve të tilla, të cilat i cilësoi si dritare të rëndësishme për informimin e opinionit publik të vendeve respektive.

Krasniqi vizitoi Ministrinë saudite të Medias, ku u njoh me teknologjitë e reja që përdoren në këtë sektor.

Presidenti i Agjencisë Saudite të Shtypit (SPA), Abdullah bin Fahd Al-Hussein bëri një përmbledhje të punës që zhvillon institucioni që ai drejton, duke u përqendruar sidomos tek media sociale, e cila sipas tij, përbën një instrument të ri për të qenë më pranë opinionit publik.

Pas takimit, drejtoresha e përgjithshme e ATSH-së, Armela Krasniqi e shoqëruar nga Al-Hussein, vizitoi departamentet e SPA-së, duke përfshirë redaksinë e gazetarëve, e-median, departamentin e fotografisë, qendrën e prodhimeve multimediale, si dhe u informua për strukturën e punës.

Drejtoresha e përgjithshme e ATSH-së, Armela Krasniqi e ftoi homologun saudit për një vizitë pune në Shqipëri.

Kjo marrëveshje me SPA është e treta e nënshkruar nga ATSH, pas asaj me agjencinë polake të lajmeve, PAP në janar dhe me agjencinë rumune të lajmeve, Agerpress në muajin nëntor të këtij viti./atsh