Irina

Kryeministri Edi Rama përcolli sot fjalët e shenjta të Kuranit, në një mesazh për t’u solidarizuar me të prekurit nga tërmeti i fortë i 26 nëntorit dhe lehtësimin e pasojave që ky tërmet la pas.

Kryeministri përcolli fjalët:

“Kur të dridhet toka me dridhjen e saj të fuqishme,

dhe të nxjerrë toka atë që ka në brendinë e saj (barrën nga brenda),

dhe njeriu të thotë: Ç’ka kjo (që bën këtë dridhje)?,

atë ditë, ajo i rrëfen tregimet e veta,

ngase zoti yt e ka urdhëruar atë.

Atë ditë njerëzit shfaqen të ndarë në grupe që të shpërblehen për veprat e tyre.

E kush punoi ndonjë të mirë, që peshon sa grimca, atë do ta gjejë. Dhe kush punoi ndonjë të keqe, që peshon sa grimca, atë do të gjejë”.

Tërmeti i 26 nëntorit që shkaktoi 51 viktima dhe dëme të mëdha materiale ka nxitur edhe një solidaritet të madh jo vetëm mes shqiptarëve, por edhe nga vendet fqinje dhe partnerët ndërkombëtarë. /atsh

Autoriteti Rrugor Shqiptar njofton se të gjitha akset rrugore kombëtare janë të kalueshme, ndërsa apelon drejtuesit e mjeteve të vogla të përdorin zinxhirë në rrugën e Dradhës, qarku Korçë.

Sipas ARRSH-së, në qarkun Korçë gjatë natës ka patur reshje shiu dhe bore.

“Po punohet në aksin Qafa e Qarrit-Korçë-Ersekë, në rrugën e Dardhës dhe atë të Voskopojës për pastrimin e rrugës. Nuk ka probleme në qarkullim e mjeteve në të gjitha akset kombëtare”, thuhet në njoftimin e ARRSH-së.

Po ashtu, bëhet e ditur se puna do të vazhdojë pa ndërprerje gjatë ditës nga kontraktorët e mirëmbajtjes, nisur edhe nga parashikimet e motit për orët në vijim.

“Drejtuesit e mjeteve që zgjedhin të kalojnë këto akse të tregohen të kujdesshëm, të respektojnë sinjalistikën dhe udhëzimet e Policisë Rrugore”, thuhet në njoftim./atsh

Të gjitha drejtoritë rajonale të sigurimeve shoqërore kanë nisur punën për dhënien e përfitimeve për qytetarët që përfitojnë pension për shkak të profesionit dhe për shtesë të pensionit të pleqërisë ose invaliditetit.

Përfitimet vijnë nga ligji “Për trajtimin financiar suplementar të punonjësve që kanë punuar në miniera në nëntokë, të punonjësve të industries së naftës e të gazit dhe të punonjësve që kanë punuar në metalurgji”.

Tashmë, pas përgatitjes dhe përfundimit të kuadrit të plotë ligjor, të gjitha Drejtoritë Rajonale të Sigurimeve Shoqërore kanë nisur punën për dhënien e këtyre përfitimeve.

Në këtë kuadër, Instituti i Sigurimeve Shoqërore për të lehtësuar procedurën e informimit të përfituesve do të publikojë çdo ditë listat emërore në faqen zyrtare www.issh.gov.al.

ISSH ka publikuar listën emërore prej rreth 1028 personash që iu lind e drejta për marrjen e përfitimit, nga data 3 dhjetor deri më datë 10 dhjetor.

Deri tani janë depozituar rreth 17 400 kërkesa për përfitim nga ky ligj, të cilat do të marrin përgjigje brenda një kohe të shkurtër./atsh

Kryeministri Edi Rama përcolli mëngjesin e sotëm fjalët e shenjta të Kuranit, në një mesazh inkurajimi dhe solidariteti pas tërmetit të fuqishëm që goditi vendin më 26 nëntor, ndërsa Shqipëria ndodhet në fazën e rindërtimit.

“Çdo kohë është e humbur përveç kohës kur mbjell mirësi, t’i shërbesh popullit tënd është mirësia më e madhe!”, citon kryeministri Rama fjalët e Kuranit të shenjtë.

Pas tërmetit të 26 nëntorit, po vijon verifikimi i dëmeve në objekte, ndërsa të pastrehët që la pas tërmeti janë sistemuar në struktura hoteliere, banesa me qira apo në çadra pranë vendbanimit në zonat rurale. Tashmë, pas përfundimit të verifikimit të dëmeve, pritet të dalë edhe një faturë e plotë financiare për Rindërtimin./atsh

Kryeministri Edi Rama e cilësoi një lajm të shumëdëshiruar, marrjen e vendimit të Këshillit Europian për mbajtjen e Konferencës së Donatorëve në Tiranë, në fund të muajit janar, me qëllim mbështetjen e Programit të Rindërtimit nga të gjitha shtetet anëtare të BE.

“Mbajtja e premtimit që mora nga shumë prej liderëve europianë për këtë konferencë të domosdoshme, më mbush me energji e me optimizëm për suksesin e përpjekjes që të dalim të gjithë më të fortë nga kjo tragjedi, duke nisur nga motrat e vëllezërit tanë fatkeq, të cilët duhet t’i rikthejmë në shtëpi më të mira se ato që humbën, si edhe nga fëmijët e tyre, të cilëve do t’u bëjmë shkolla më të mira nga ato që kishin”, – tha Rama.

Kryeministri i shprehu mirënjohjen presidentes Von der Leyen dhe liderëve të vendeve anëtare të BE-së për mesazhin e fortë të solidaritetit me Shqipërinë në këtë kohë dramatike e përcaktuese pas tragjedisë që shkaktoi tërmeti.

“Faleminderit edhe për vendimin e mbajtjes së Konferencës së Donatorëve në Tiranë”, – tha ai. /atsh