Ministri në Detyrë për Europën dhe për Punët e Jashtme , Gent Cakaj deklaron se pavarësisht mungesës së konsensusit në Këshill për çeljen e negociatave, Shqipëria do të vazhdojë angazhimet e saj reformatore dhe përpjekjet e mëtejme në shërbim të aspiratës evropiane.
Sipas ministrit në detyrë Cakaj, anëtarësimi me Shqipërinë nuk vjen si rrjedhojë e interpretimeve kundërthënëse lidhur me progresin e vendit, por si pasojë e vizioneve të ndryshme për reformën strukturore të Bashkimit Europian në përgjithësi.
“Nuk ka një ujdi absolute për të filluar bisedimet për anëtarësim me Shqipërinë dhe Maqedoninë e Veriut, ekziston një pajtueshmëri e plotë se të dy vendet kanë përmbushur të gjitha kushtet e paraqitura në konkluzionet e qershorit të vitit 2018” -u shpreh Cakaj. /atsh
Asambleja e Akademisë së Shkencave ka miratuar ditën e sotme akademikun Skënder Gjinushi, si kryetar të këtij institucioni. Kreu i rikonfirmuar i Akademisë së Shkencave, Skënder Gjinushi shprehet se kjo shënoi përmbylljen e reformës së Akademisë së Shkencave që sot dëshmoi se qëndron jashtë ndikimeve politike.
“Në Shqipëri reformat shpeshherë janë ngatërruar vetëm me lëvizje njerëzish, nëse kjo edhe në administratë nuk pranohet, në Akademinë e Shkencave jo e jo. Ka pasur një presion të vazhdueshëm që reforma në ASH të ishte njësoj si në ligjin e IAL, që të hiqeshin titujt profesorë edhe ribëhej kjo trupë, që se di kush do e përbënte. Sot ndihem shumë mirë, se nuk u soll vullneti i politikës në Akademinë e Shkencave. Por është e kundërta, fakti që faktorë të ndryshëm në momente të caktuara kanë kundërshtuar, por edhe pengesat e tyre që tregonin qartë që reforma ishte jashtë ndikimeve politike në tavolinë, që kërkonin ndërhyrje në Akademinë e Shkencave. Edhe mesa duket edhe presidenti në një moment u bë palë me këto lloj segmentesh. Por rrjedhimisht, ligji, kuvendi i dha të drejtën Akademisë së Shkencave, sepse Akademia e Shkencave është një institucion autonom. Rektorët i zgjedh vetë trupa e pedagogëve edhe kryetarin e ASH-së e zgjedhin vetë akademikët. Por 43 vota akademikësh vlejnë më shumë se një firmë Presidenti”, shpjegoi Gjinushi.
Kryesia e Akademisë së Shkenca ka miratuar sot edhe statutin e ri të këtij institucioni, duke u bazuar në ligjin e ri “Për Akademinë e Shkencave të Shqipërisë” që ka hyrë në fuqi në 8 tetor. Gjithashtu një nga pikat e tjera që është miratuar gjatë mbledhjes së kryesisë është edhe hapja e vendeve të reja për anëtarë të Asamblesë me titullin “akademikë” dhe “akademik i asociuar”.
“Sot u kurorëzua mbyllja e reformës në ASH nëpërmjet akteve themelore të saj. Prej datës 9 tetor ligji ka hyrë në fuqi, edhe sot u miratua statuti i ri në zbatim të këtij ligji. Këto akte kanë disa risi, sepse bëjnë një hapje të konsiderueshme të ASH-së ndaj pranimeve të reja, duke futur konceptin që anëtarët mbi 75 vjeç lirojnë vendin për anëtarë të rinj apo duke futur statusin e anëtarëve të jashtëm për t’u anëtarësuar të gjithë intelektualët edhe kërkuesit më të suksesshëm, që ka Shqipëria jashtë vendit etj. Por duke futur edhe konceptin që homologët tanë në Kosovë, Maqedoni të Veriut etj., mund të bëhen anëtarë të jashtëm të ASH. Përpos kësaj statuti bën një sërë rregullimesh, për të treguar që ASH është një grup njerëzish, që për meritat e tyre kanë fituar titullin akademikë edhe mblidhen këtu për të mundësuar, ndihmuar qeverinë edhe institucionet e tjera, për të evidentuar rritjet e shkencës përmes botimeve edhe konferencave. Puna bëhet përmes anëtarëve, që duhet të jenë edhe aktiv në atë që bën ASH. Ndërsa, kryesia edhe asambleja kanë vetëm rolin e koordinimit të këtyre aktiviteteve”, shprehet Gjinushi.
Ndërsa, për zgjedhjet në Akademinë e Shkencave që u bënë me ligjin e vjetër dhe emërimin e tij si kryetar me ligjin e ri shprehet se: “Vetëm në Shqipëri kur ndërrohet ligji, ndërrohet institucionet ndonjëherë. Kjo praktikë është e gabuar, ligjet nuk cenojnë mandatet e caktuara, ligji i ri përpiqet që të rregullojë më mirë funksionimin, madje demokracinë, sigurinë juridike etj. Në rast se shton dispozita kalimtare siç ka ndodh në vitin 2007 edhe siç u përpoqën tani, për të heq mandatet e fituara kjo është e papranueshme, edhe e ka rrëzuar gjykata kushtetuese. Ligjet vijojnë, si vendimet e qeverisë. Sipas ligjit të vjetër presidenti duhet të bëjë vetëm emërim, nuk ka asnjë target tjetër. Edhe ligji i ri ia merr në konsideratë edhe refuzimin edhe thotë: Vendimin e merr asambleja. Pra i jep fuqi, se më parë ishte fare paçavure. Anëtarët e asamblesë edhe kryesisë janë zgjedh me ligjet e vjetra, sepse kështu janë dispozitat, mandatet vazhdojnë. I vetmi rast që cenohen mandatet me ligj të ri është kur ndryshon struktura e institucionit”.
Sa i takon diskutimeve që janë bërë mbi funksionin e tij politik, ku njëkohësisht ka qenë kryetar i Partisë Social Demokrate edhe anëtar i rregullt në ASH, duke bërë edhe kandidimin për kryetar Gjinushi thotë se: “Ligji i ri është më i qartë se tregon se në cilat poste duhet dhënë dorëheqjen, i pari nuk e thotë fare. Kjo është ajo përpjekje e dëshpëruar e presidentit për të gjetur ndonjë lajthitje. Nga viti 1989 jam anëtar i rregullt i ASH. E dyta, dorëheqja nga PSD është datë 15 maj 2019. Dorëheqja është vendim personal. Vetëm, një tjetër të tregon se kur ka hyrë në fuqi dorëheqja jote”. /atsh
Deputetja socialiste Blerina Gjylameti deklaron se “Jo-ja” e Francës nuk kishte asnjë lidhje me Shqipërinë, por buron nga debati i njohur i rritjes së ekstremizmit në Europë kundra zgjerimit të BE-së.
Gjylameti thekson se Shqipëria realizoi një nga reformat më të suksesshme atë në drejtësi, duke shënuar qartësisht një standard të zhvillimit europian. “Jo-ja e Francës buron nga debat i njohur i rritjes së ekstremizmit në Europë që hodhën tezën kundra zgjerimit. Jo-ja e Francës nuk kishte asnjë lidhje me Shqipërinë. Shqipëria realizoi një nga reformat më të suksesshme atë në #drejtësi, edhe mbi të gjitha e ka moderuar në mënyrë aq të kujdesshme, ku nuk duhet të harrojmë faktin se të marrësh përsipër të pastrosh drejtësinë e kalbur nga korrupsioni 30 vjeçar, shënon qartësisht një standard të zhvillimit europian. Opozita e baltës me në krye Bashën që po bën sikur i vjen keq për Shqipërinë duke shpifur ende në kurriz të saj, duhet pyes veten se si mund të jetë me Europën kur deri tani shqiptarëve i ka propozuar veç rrëmujë dhe baltë?”, thekson deputetja socialiste.
Deputetja Gjylameti nënvizon se hiperbola e madhe e baltosjes ndaj Shqipërisë, se gjoja vendit tonë nuk iu hapën negociatat nga që qeveria nuk bëri detyrat, është një farsë e madhe, ndërsa vlerëson edhe qëndrimin që mbajti Gjermania në mbështetje të hapjes së negociatave me vendin tonë.
“Jo-ja e Francës nuk ka lënë Shqipërinë jashtë Europës, Shqipëria aty është! Të udhëhequr që prej historisë sonë nga vlerat europiane, harmonia e etniteteve, qasjes ndaj perëndimit dhe Europës fituam emërtimin që në tavolina e ekrane thuhet se “Shqipëria është një vend pro europian”. Hiperbola e madhe e baltosjes ndaj Shqipërisë, se gjoja vendit tonë nuk iu hapën negociatat nga që qeveria nuk bëri detyrat, është një farsë e madhe duke e përdorur mosmarreveshjen e njohur të krizës së azilantëve që BE-ja ka mes saj.
Edhe megjithatë është për t’u vlerësuar pjesa që Gjermania mbështeti Shqipërinë duke i tërhequr vëmendjen dhe politikave të Francës, se nuk janë arsye për mos të hapur negociatat”, deklaroi Gjylameti./atsh
Zv.kryeministri Erion Braçe, ka reaguar pas bllokimit që Franca i bëri hapjes së negociatave për Shqipërinë dhe Maqedoninë e Veriut
Braçe ka falenderuar të gjithë liderët e Bashkimit Europian të cilët mbështetën Shqipërinë në rrugëtimin për integrimin europian dhe për deklaratat e tyre që bënë sot në samit.
“Faleminderit shumë për gjithçka, gjithçka, gjithçka, zonja Merkel, kancelare e Gjermanisë. Faleminderit shumë që njeh historinë tonë te dhimbshme prej 1400-tës, aspiratën tonë europiane, te përjetshme, ja dëshmon kujtdo që s’na njeh, zoti Conte, kryeministër i Italisë. Faleminderit shumë për ndihmën, mbështetjen, kursin e reformave, vlerësimin dhe gjykimin e drejtë e të ndershëm, zoti Tusk, president i Komisionit Europian! Faleminderit shumë për vizionin e qartë politik për Europën e sotme e të nesërme, ndarë me ne e për ne, zoti Sassoli, president i Parlamentit Europian. Ju jemi mirënjohës pa fund! Ju na njihni, vlerësoni e gjykoni”‘, shprehet Braçe.
Nga ana tjetër Braçe i është përgjigjur edhe presidentit francez Emmanuel Macron i cili vendosi veton si e vetmi vend që të mos lejonte hapjen e negociatave për Shqipërinë dhe Maqedoninë e Veriut.
Braçe thekson se argumenti i Macron ishte se ka shumë shqiptarë azilantë në Francë dhe ky është faktor kundër Shqipërisë, por sipas tij, Macron duhet të na shohë si punëtorë pasi punët më të rënda atje i bëjnë shqiptarët.
Madje sipas Braçes, shqiptarët në Francë janë të keqpaguar e të diskriminuar.
Braçe shprehet se, “kush pretendon se na njeh prej “azilantëve”, gjykon me bezdi qënie humane thjesht si problem për çështje të politikës së brendshme, nuk na njeh hiç; duhet te hedhë sytë nga tregu i tij i punës, me siguri duhet ta dijë se nuk është çështje burokratike vizash, por ofertë në atë treg. I bëjmë ne punët tuaja, madje më të rëndat, madje duke keqpaguar e diskriminuar. Të paktën ti njihni shqiptarët si punëtorë”. /atsh
Kryeministri Edi Rama ka reaguar pas deklaratës së Departamentit Amerikan të Shtetit mbi “Konkluzionet e Këshillit Europian për Zgjerimin”.
“Faleminderit SHBA”, shprehet Rama ndërsa publikon edhe qëndrimin e SHBA-së.
“Shtetet e Bashkuara mbështesin përkushtimin e Maqedonisë së Veriut dhe Shqipërisë ndaj integrimit transatlantik dhe aspiratat e tyre për anëtarësim në Bashkimin Europian. Jemi të zhgënjyer që Këshilli Europian nuk njohu përpjekjet shumë të forta për reforma të secilit vend me anë të një vendimi për të hapur negociatat për anëtarësim në këtë kohë”, thuhet në deklaratën e DASH.
“Ne njohim faktin që Këshilli Europian nuk i tha “jo” as Shqipërisë dhe as Maqedonisë së Veriut, dhe as nuk përcaktoi kushte të reja për hapjen e negociatave për anëtarësim. Shpresojmë që Këshilli Europian do të arrijë konsensus për një vendim pozitiv për të dy vendet kohë përpara Samitit BE-Ballkani Perëndimor verën tjetër”./atsh
Kur i nënshtrohen kushteve të veçanta të stresit, qelizat e burrave kryejnë ”vetëvrasje”, ndërsa qelizat e grave rezistojnë dhe mbijetojnë, sipas një studimi botuar në revistën ”Cell Death and Disease”, që siguron një tjetër provë shkencore që konfirmon se të qenit burrë apo grua kushtëzon fillimin e sëmundjeve dhe përgjigjen ndaj trajtimit.
Studimi arrin të identifikojë disa komponentë molekularë që mbështesin përgjigjen e ndryshme të qelizave mashkullore dhe femërore ndaj stresit.
“Në përgjithësi qelizat mashkullore (XY) i përgjigjen stresit duke shkuar në një vdekje të programuar (apoptozë), një formë e ‘vetëvrasjes’ qelizore të rregulluar, ndërsa qelizat femërore (XX), si përgjigje në të njëjtin stres, aktivizojnë mekanizmat e mbijetesës (autofagji) dhe i rezistojnë vdekjes së qelizave”, shpjegohet në studim./atsh
Kancelarja e Gjermanisë, Angela Merkel deklaroi sot se nuk është arritur vendim unanim për hapjen e negociatave mes Bashkimit Europian dhe Shqipërisë, edhe pse siç tha ajo, Shqipëria ka bërë përparime.
Merkel shprehu keqardhje për këtë vendim duke theksuar se qëndrimi i Gjermanisë ka qenë për të nisur bisedimet me Shqipërinë.
“Më vjen shumë keq për këtë vendim. Pozicioni i Gjermanisë ka qenë për të nisur bisedimet. Janë disa vende që kanë rezerva. Ne kemi diskutuar në lidhje me këtë. Patjetër që do të zhgënjehen, si kryeministri i Maqedonisë së Veriut dhe ai i Shqipërisë”, tha Merkel.
Kancelarja u shpreh se “kur bëjmë premtime patjetër që duhet t’i përmbajmë ato. Nuk do t’i kthejmë shpinën vendeve ndërkohë që kemi bërë premtime”.
“Unë e mbështes në një pikë presidentin Macron për sa i përket procesit të zgjerimit që duhet reformuar”, u shpreh kancelarja.
“Kemi rënë dakord për disa gjëra që duhen bërë. Gjermania dëshiron që të hapen negociatat me Shqipërinë dhe Maqedoninë e Veriut. Maqedonia e Veriut ka bërë shumë sa i përket hapjes së negociatave deri tek ndryshimi i emrit. Ka qenë progres i madh. Edhe Shqipëria ka bërë progres. Mendoj që Shqipëria ka bërë shumë progres, por nuk u arrit të marrim një vendim unanim për sa i përket Shqipërisë”, tha ajo.
Merkel u shpreh se bëhet fjalë për hapjen e negociatave, jo për anëtarësim.
“Ata patjetër duhet të përballen me disa kushte që kemi vendosur. Në Shqipëri vijon të ketë probleme përfshi dhe emigrimin. Megjithatë Shqipëria ka bërë maksimumin sa i përket emigracionit. Kur bëjmë premtime patjetër që duhet t’i përmbajmë ato. Dhe nuk do t’i kthejmë shpinën vendeve ndërkohë që kemi bërë premtime. Në fakt ka disa faza për sa i përket anëtarësimit. Vërtet dua që këto vende të bëhen anëtare, por më parë duhet të kalojnë në faza të ndryshme të këtij procesi”, tha ajo.
“Franca dha refuzimin e saj për hapjen e negociatave. Duhet gjithmonë të shohim anët pozitive dhe anët negative të një vendimi të caktuar. Si Maqedonia e Veriut dhe Shqipëria kanë bërë shumë progres. Rasti i Maqedonisë së Veriut ka qenë më i veçantë pikërisht për marrëveshjen e emrit. Nuk është se bëmë një votim. Në rastin e Shqipërisë pati disa vende nga BE që kundërshtuan hapjen e negociatave me Shqipërinë”, theksoi Merkel./atsh
Kryeministri Edi Rama duke iu përgjigjur pyetjes gjatë Konferencës për shtyp në lidhje me një mocion besimi në parlament pas mosarritjes së dakordësisë për çeljen e negociatave në Këshillin Europian, u shpreh se verdikti final ishte i Francës, për shkak të përplasjeve me Gjermaninë mbi metodologjinë e funksionimit të BE.
“Mund t’ia kërkoj parlamentit francez, popullit shqiptar s’kam pse ia kërkoj”, – u shpreh Kryeministri. “Maqedonia ka 14 vjet që pret çeljen e negociatave. Ka 14 vjet nga Këshilli në Këshill merr sinjale pozitive dhe s’merr PO. E detyruan të ndërrojë emrin, duke premtuar që, “u bë kjo, u zgjidh”. Ja ku jemi! Kishte plot që thonin “do ndahet Shqipëria nga Maqedonia e Veriut”. Por kishte dhe zëra dhe zëra brenda familjes europiane që thonin se asnjëherë nuk ka qenë opsion. E kemi rrezikuar në maj-qershor, për shkak të katrahurave këtu. Nuk ka lidhje vendimmarrja me çfarë ka bërë njëri apo tjetri. U gjendën në një moment të historisë së BE, ku ndodh një përplasje mes Francës e Gjermanisë jo thjesht për zgjerimin, por edhe për elementë të tjerë të funksionimit të BE”, – u shpreh Kryeministri Rama.
Duke iu referuar deklaratës së homologut holandez, Kryeministri tha se asnjë prej arsyeve nuk qëndron, pasi e vërteta e kësaj vendimmarrje ishte diku tjetër.
“Dëgjova kryeministrin e Holandës. Tha se Shqipëria ka bërë progres të madh, por jo mjaftueshëm. Mjaftueshëm në raport me çfarë? Se nëse e konsiderojmë progresin si një progres lidhur me gatishmërinë e Shqipërisë për t’u bërë anëtare e BE është e pamjaftueshme, por nëse krahasojmë çfarë na është kërkuar dhe çfarë kemi bërë është shumë më tepër, jo se jemi më të zotë, por sepse procesi ka ardhur duke u bërë më i vështirë e kërkues. Shtimi i bishtave nuk është korrekt. Cilido nga vendet që ka hyrë në BE pas rënies së komunizmit të ishte në vendin tonë nuk e merrte PO-në, sepse tema ishte gjetkë, “çfarë do bëjmë me BE?””, deklaroi Rama, duke shtuar në anën tjetër, se, “Presidenti i Francës ishte brutalisht i hapur në atë që tha. Vuri në pikëpyetje gjithë metodologjinë e negociatave, gjithë procesin, duke kërkuar ndryshimin e procesit, sipas tij për ta bërë më efektiv për BE. E quajti proces ultraburokratik dhe kërkon ndryshim metodologjie. Është në të drejtën e tij. Po ku hyjmë ne tani këtu në këtë mes?!” /atsh
