Irina

Kryetari i Kuvendit, Gramoz Ruçi, priti sot sizmiologun grek, Spiros Pavlidis.

Kryetari Ruçi e falënderoi profesorin Pavlidis mbi kontributin e tij në studimin e hartës dhe dukurive sizmike të Shqipërisë si edhe për mesazhet e qarta për shkencëtarët, politikanët dhe qytetarët shqiptarë pas tërmetit të 26 nëntorit.

“Tërmeti i 26 nëntorit më ka shtyrë mua personalisht, por edhe si Kryetar i Kuvendit, të reflektoj mbi nevojën e rishikimit të legjislacionit e procedurave, jo vetëm në fushën e ndërtimeve, por në të gjitha marrëdhëniet e veprimet tona mbi natyrën dhe burimet e saj. Unë kam vlerësim të lartë për punën tuaj si edhe të gjithë ekspertëve grekë dhe bashkëpunimin tuaj rezultativ me Parlamentin dhe Qeverinë, për të hartuar legjislacionin, procedurat dhe rregulloret antisizmike. Prandaj, e konsideroj të nevojshme rishikimin e kujdesshëm të legjislacionit mbi tokën, mjedisin, ndërtimet, ujërat, parandalimin e fatkeqësive natyrore e çështje të tjera që lidhen me natyrën, burimet, pasuritë, por edhe dukuritë e saj. Asnjë paragraf i legjislacionit tonë nuk duhet të devijojë nga mirëkuptimi me natyrën dhe ligjësitë e saj. Kuadri ynë ligjor duhet të respektojë në mënyrë rigoroze ligjësitë e saj dhe rezultatet e shkencave natyrore, gjeologjike, fizike etj. Për këtë do të mirëprisnim edhe kontributin tuaj si edhe të universiteteve dhe ekspertëve të shquar grekë dhe nga vende të tjera”, tha Ruçi.

Profesori Pavlidis dhe Ruçi diskutuan për çështjet të zhvillimeve sizmike në Shqipëri si edhe vlerësuan qasjen e drejtë që për trajtimin e tyre duhet një bashkëpunim shumë i ngushtë midis shkencëtarëve sizmologë, gjeologë, inxhinierë dhe politikanëve e ligjvënësve.

“Greqia dhe Italia kanë përvoja të shkëlqyera në studimin e dukurive sizmike, mbrojtjen prej tërmeteve, kufizimin e pasojave të tyre dhe edukimin e popullsisë me kulturën antisizmike. Ju kini shkencëtarë të shquar, me të cilën ne kemi bashkëpunuar dhe po bashkëpunojmë. Legjislacioni dhe rregulloret greke dhe italiane mund të përshtaten mjaft mirë për Shqipërinë sepse jemi në të njëjtën zonë sizmike. Kjo gjë duhet bërë menjëherë. Legjislacioni dhe rregulloret duhet të parashikojnë dy aspekte: të gjitha ndërtimet e reja duhet të mbështeten në rregullat e rrepta antisizmike, ndërsa ndërtimet ekzistuese duhet të kontrollohen nga aftësitë e tyre për të përballuar lëkundje të mundshme sizmike, karakteristike për zonën sizmike ku bën pjesë Shqipëria”-tha ai.

Po ashtu ai tha se “Ju keni një një hartë sizmike të hartuar nga sizmologë të shquar shqiptarë, por mendoj se kjo hartë duhet të detajohet në harta zonale për të gjithë territorin e vendit. Përveç kësaj, duhet të bashkëpunojmë për të kultivuar kulturën sizmike të popullsia dhe çlirimin e saj prej stresit që shkaktojnë tërmetet dhe fatkeqësitë e tjera natyrore.”.

Gjatë takimit, kryetari i Kuvendit, Ruçi, dhe profesori Spiros Pavlidis diskutuan edhe mbi aspekte e detaje të tjera të konsolidimit të masave kundër tërmeteve dhe kultivimit të kulturës sizmike të shoqërisë. /atsh

Përkeqësimi i motit në vend ka prekur edhe portin e Durrësit, që përmes një informacioni theksoi se situata e krijuar gjatë orëve të fundit ka krijuar problematika në veprimtarinë portuale, kryesisht në nisjen/ mbërritjen e trageteve të linjës Durrës-Bari/Ankona.

Trageti i linjës Durrës-Bari(Aurelia), i parashikuar për t’u nisur në orën 12:00 të mesditës së sotme, është nisur në orën 15:20, për shkak të erës së fortë dhe detit të trazuar.

Në Terminalin Lindor është pezulluar përkohësisht përpunimi i dy anijeve tregtare, si pasojë e motit të keq.

Ndërkohë, anija konteinerike ‘’X Press Shannon”, ndodhet në radë, në pamundësi për t’u akostuar në kalatë për shkak të erës së fortë.

Drejtoria e Përgjithshme Detare, Kapiteneria e Portit të Durrësit, Dispeçeria e Autoritetit Portual, Shërbimi i Rimorqimit, Shërbimi i Pilotimit, Shërbimi Ormexhimit, në gatishmëri të plotë, në funksion të hyrje-dalje të anijeve dhe trageteve dhe në kohe të keqe, 24/24 porti i hapur.

Një ditë më parë Drejtoria e Përgjithshme Detare njoftoi përkeqësim të kushteve të motit për periudhën kohore 20-23 dhjetor. /atsh

“Këto kartolina me pamje reale nga qytetet e Shqipërisë që tregojnë dëshirën për jetë me zbukurimet e festave, janë kaq inkurajuese në një të dielë me shi”.

Kryeministri Edi Rama uroi për të gjithë shqiptarët një atmosfere të dashur në shtëpitë e tyre, me anë të këtij kolazhi me kartolina festive.

“Pozitiviteti na duhet të gjithëve!”, theksoi ai në mesazhin e kësaj të diele. /atsh

https://www.facebook.com/edirama.al/videos/1372556026247404/?t=0

Numri i të punësuarve gjatë javës së fundit vetëm nga Zyrat e Punës është 615 persona.

Numrin më të lartë të punësimeve e zë Tirana, ku 232 prej aplikantëve janë punësuar në kryeqytet.

Sipas statistikave të publikuara në “Pasqyrën Javore”, bëhet me dije se shifra e punësimit vetëm nga Zyrat e Punës nga data 13-19 dhjetor është 615.

Sipas statistikave, në Tiranë janë punësuar 232 persona, në Berat, 20 persona, Durrës 72, Fier 77, Korçë 31, Dibër 11, Elbasan 35, Gjirokastër 44, Kukës 5, Lezhë 26, Shkodër 36, Tiranë 232, Vlorë 25. /atsh

Dëmet ekonomike si pasojë e katastrofave natyrore dhe njerëzore kanë qenë më të pakta në vitin 2019, në vlerën e 140 miliardë dollarëve, në krahasim me 176 miliardë dollarët e vitit 2018, sipas një vlerësimi paraprak të agjencisë zvicerane të sigurimeve “Re”.

Katastrofat natyrore kanë shkaktuar 133 miliardë dëme, 20 % më pak se në vitin 2018.

Shuma e mbetur, 7 miliardë dollarë, janë dëme të shkaktuara nga njerëzit (38 % më pak).

Për sa i përket humbjeve në njerëz, afërsisht 11 000 kanë vdekur ose janë deklaruar të humbur.

Ciklonet kanë qenë ngjarjet më shkatërrimtare.

Gjatë trimestrit të parë, ciklonet ”Idai” dhe ”Keneth”, në Mozambik dhe vendet përreth, bashkë me ciklonin ”Fani”, shkaktuan rreth 1 400 viktima.

Megjithatë, shpenzimet e kompanive të sigurimeve qenë të moderuara, për shkak të nivelit të ulët të sigurimit në këto vende.

Gjatë gjysmës së dytë të vitit, uragani ”Dorian”, që goditi ishujt Bahamas dhe Karolinën e Veriut në SHBA, shkaktoi afërsisht 4,5 miliardë shpenzime për kompanitë e sigurimeve.

Mes ngjarjeve më të kushtueshme, për sa i përket dëmeve të siguruara, tajfuni ”Faxai”, gjatë muajit shtator në Japoni, solli rreth 7 miliardë dollarë shpenzime për siguruesit.

Shpenzimet për kompanitë e sigurimeve, lidhur me tajfunin ”Hagibis”, një muaj më vonë, u vlerësuan në rreth 8 miliardë dollarë./atsh

Kryeministri Edi Rama përcolli sot fjalët e shenjta të Shën Terezës në rubrikën “Fjalët e Shenjta”.

“Bëj për njerëzit jo duke u nisur nga kush janë apo çfarë do të të japin në këmbim, po duke u nisur nga vetvetja”, citon Kryeministri Rama, si një tjetër mesazh për t’u solidarizuar me të prekurit nga tërmeti i 26 nëntorit.