Irina

KESH plan për menaxhimin e rrezikut ndaj ndryshimeve klimatike

Aktualitet, Lajmi i fundit / /

Sektori i hidroenergjisë është veçanërisht i ndjeshëm ndaj ndryshimeve klimatike për shkak të varësisë së tij nga reshjet dhe prurjet si dhe ekspozimit të tij ndaj riskut natyror.

Për Korporatën Elektroenergjetike Shqiptare, e cila menaxhon kaskadën në lumin Drin, përmirësimi i aftësive ripërtëritëse nga klima e aseteve dhe aktiviteteve është një objektiv strategjik.

Në përgjigje të ndikimeve në ndryshimet klimatike, KESH si prodhues dhe furnizues i energjisë elektrike ka miratuar Planin e Menaxhimit të Rrezikut ndaj ndryshimeve klimatike, duke ofruar një qasje të formalizuar dhe analitike drejt menaxhimit të kapaciteteve për të përballuar ndryshimet klimatike.

Në këtë plan, janë identifikuar një numër masash strukturore dhe jostrukturore. Disa nga këto masa janë në proces zbatimi, të tjerat janë masa potenciale që kërkojnë zhvillim të mëtejshëm dhe mobilizim të burimeve.

Masat e identifikuara janë zhvillimi i mëtejshëm i sistemit të monitorimit hidrologjik dhe ngritjen e qendrës, rehabilitimi i plotë i shkarkuesve në Fierzë, Koman dhe Vau i Dejës, krijimi i një njësie tregtare dhe një strategjie tregtare, zhvillimi i një strategjie prodhimi, trajnimet e vazhdueshme dhe aktivitete për ngritjen e kapaciteteve në të gjitha fushat përkatëse./atsh

KESH plan për menaxhimin e rrezikut ndaj ndryshimeve klimatike Read More »

Basha: Asnjë kompleks për t’u ulur në dialog për kapërcimin e krizës

Aktualitet, Opinione, Politike / /

Kryetari i Partisë Demokratike, Lulzim Basha u shpreh sot në një intervistë televizive se, “nuk ka asnjë kompleks për t’u ulur dhe për të diskutuar për kapërcimin e krizës politike”.

“Nuk kam asnjë kompleks as të ulem, as të diskutoj. Ka një problem. Për të paktën tre herët e fundit, kryeministri aktual e ka abuzuar vullnetin e opozitës dhe timin personal, për të zgjidhur problemet me dialog. Pra, është e qartë që kemi të bëjmë me mungesë vullneti, dëshire, do të thoja edhe kapacitetesh, nga kjo qeveri dhe nga ky kryeministër”, u shpreh Basha.

I pyetur mbi kërkesën e vazhdueshme të PD-së për zgjedhje të parakohshme dhe sesi do të arrihet kjo me Ramën kryeministër apo me qeveri tranzitore, Basha tha se “nuk kemi ne asnjë problem, as si opozitë, as si Parti Demokratike dhe as unë personalisht, sepse Edi Ramën e kam mundur edhe tek e tek dhe e kemi bërë atë betejë”.

“E kam mundur dhe e mund çdo ditë. Nuk është problemi te njeriu, problemi është: do të ketë një palë zgjedhje të tjera si 2016-ta, 2017-ta, ku në vend që të votojnë qytetarët, në vend që të diktojë sovrani me votë, të diktojë krimi?! Oligarkët?! Avdylajt?”, tha Basha.

I pyetur mbi takimin e opozitës së bashkuar për Reformën Zgjedhore, Basha tha se “janë vendosur piketat për çështje kryesore që kanë të bëjnë me reformimin e partive politike, ligji për partitë politike”.

“Së dyti, problem shumë kryesor do të thoja më kryesori i reformës, ndarja e politikës nga krimi. Hapi tjetër ka të bëjë me garantimin e votës së lirë. Dhe këtu, natyrisht do të ketë propozim, një propozim prej vitit 2016 që Edi Rama e zvarrit që është ai për votimin elektronik dhe numërimin elektronik si edhe identifikimin me shenjat e gishtërinjve të zgjedhësve për të, në mos zhdukur, për të zvogëluar mundësinë për abuzime”, tha ai.

Basha komentoi edhe deputetët e rinj të ardhur nga opozita në Kuvend, Për të cilët tha se “është një shans për reflektim dhe për ndryshim që kjo të mos përsëritet më kurrë”.

“Absolutisht, jam i hapur për ndryshimin e sistemit zgjedhor. Personalisht e kam shprehur preferencën time për sistemin mazhoritar dhe lidhjen e drejtpërdrejtë të deputetit me zgjedhësit. Kjo i jep shumë mundësi zgjedhësit dhe deputetit, që të përfaqësojnë interesin publik drejtpërdrejt në Parlament, pavarësisht nëse partia e tij është në qeveri apo jo, dhe të mos shohin faktin që, kur partia është në qeveri, deputetët kthehen në kukulla dhe ngrenë dorën çfarë t’u thotë kryeministri, sepse e kanë të lidhur fatin me kryeministrin dhe, shpeshherë, me interesa korruptive, që vijnë nga qeveria, por ta lidhin ekzistencën e tyre politike me fatin e votuesit”, tha Basha./atsh

Basha: Asnjë kompleks për t’u ulur në dialog për kapërcimin e krizës Read More »

Zakonet e këqija që dobësojnë sistemin imunitar

Shendetesi / /

Sistemi imunitar është ai që na mbron nga mikrobet pushtuese dhe substancat e ndryshme që mund të shkaktojnë sëmundje dhe probleme të tjera. Nëse mekanizmi mbrojtës i trupit tuaj dobësohet, ju jeni më shumë herë më të rrezikuar të prekeni nga të gjitha llojet e problemeve që lidhen me shëndetin, duke filluar nga ftohja e zakonshme, tek kanceri vdekjeprurës.

Duke pasur një dietë të shëndetshme dhe jetë aktive ju mbani në formë sistemin tuaj imunitar.

Janë disa zakone që dobësojnë imunitetin tonë. Ja disa prej tyre:

Stresi kronik

Rrija e kortizolit (hormonit të stresit) ul nivelet e prostaglandinës. Prostaglandina rregullon presionin e gjakut, parandalon inflamimin dhe mbështet sistemin imunitar. Përpiquni sa më shumë të shmangni situatat stresuese dhe angazhohuni në aktivitete që ju qetësojnë si yoga, masazhet, dëgjimi i muzikës, piktura etj..

Sasia e tepërt e alkoolit

Pirja e tepruar e alkoolit mund të zvogëlojë aftësinë e qelizave të bardha për të vrarë mikrobet.

Privimi nga gjumi

Është pikërisht koha kur ne flemë, momenti kur sistemi imunitar përpiqet të rigjenerohet dhe të përgatitet të mbrojë organizmin nga gjithçka që e dëmton. Orët e pakta të gjumit me siguri do të dobësojnë mekanizmin tuaj të mbrojtjes. Ekspertët thonë se privimi i gjumit shkakton një reduktim të numrit të qelizave të bardha të gjakut, në veçanti qelizat T të sistemit imunitar që ju mbrojnë nga infeksionet.

Mbipesha

Kilogramët e tepërt rrisin ndjeshëm rrezikun për t’u prekur nga problemet si sëmundjet e zemrës, goditjet, diabeti, kanceri dhe osteoartriti. Por ajo që nuk dini është se mbipesha gjithashtu ul imunitetin tuaj. /atsh

Zakonet e këqija që dobësojnë sistemin imunitar Read More »

I mituri shqiptar në kampin në Siri/ Rama: Përpjekje të vazhdueshme

Aktualitet, Lajmi i fundit / /

“Për çështjen e 11-vjeçarit që ndodhet në kampet e ISIS në Siri, ne po bëjmë përpjekje të vazhdueshme dhe shpresojmë shumë që të ditët e ardhshme të ketë një moment stabilizimi të situatës dhe të mundohemi të ecim më tej me autoritet turke”, tha sot në mbrëmje kryeministri Edi Rama.

Rama tha se “prej disa kohësh për këtë çështje kemi çdo javë një takim informues dhe kemi shumë përpjekje dhe kontakte të vazhdueshme”.

Rama tha se është tërësisht i pavërtetë lajmi se kjo varet nga ambasadori ynë në Turqi.

“Nuk mjafton asnjë lloj përfaqësuesi. Kemi një urdhër të klasifikuar sensitiv të bazuar në informacione të mbledhura bashkë me partnerët për numrin e shqiptarëve”, tha Rama.

Sipas tij, “ka një plan evakuiimi dhe informacioni është se ka rreth 70 persona, gra dhe fëmijë dhe një numër i caktuar burrash nga Shqipëria”.

“Nëna e djalit të vogël, person i radikalizuar e ka marrë me vete dhe ka qenë pjesë e forcave dhe ajo. Ne kemi punuar ngushtë me aleatët amerikanë që kishin një plan me vende të ndryshme për të organizuar evakuimin por ata nuk janë më aty”, tha Rama.

Sipas tij, “ky burg nuk është në një zonë të aksesueshme”. “Gazetarët kanë metodat e tyre. Problemi është se nuk ke me kë flet dhe ndërmarrja e një operacioni me forca civile apo ushtarakë të veshur civilë, pasi nuk ka autoritet me kë të flasësh. Kam folur personalisht me koordinatorin amerikan të procesit. Ambasada amerikane është shumë e interesuar por e vetmja mënyrë teorike është të shkohej me forca. Nëse shkojnë si autoritete civile nuk mund të hysh në atë zonë”, tha Rama.

Rama tha se “ky kamp është pak matanë kufirit të zonës së paqes”. “Nuk është në atë 30 km. Në këto kushte nuk ka shanse të zgjidhet gjë, është matanë zonës. Duhet të futesh në një zonë ku nuk dihet çfarë është dhe me kë do merresh. Janë 72 mijë veta në total ku ne kërkojmë 70 veta. Nuk mund të nisesh qorrazi”, tha Rama, duke shtuar se deri tani nuk i ka tërhequr asnjë shtet. /atsh

I mituri shqiptar në kampin në Siri/ Rama: Përpjekje të vazhdueshme Read More »

Tetori i Librit, një prurje e re në letërsinë për fëmijë

Arsim, Art-Kulture / /

Në muajin e librit, një botim i ri i shtohet letërsisë shqipe për fëmijë dhe bibliotekave të fëmijëve. Është “Supa Magjike e Dragoit” një përrallë dygjuhëshe në vargje.

Në shqip dhe në anglisht vjen historia e tre dragojve të vegjël të cilët mësojnë si të hanë shëndetshëm kur takojnë një dragua, kuzhinier me famë, i cili gatuan një supë me perime dhe me një përbërës magjik.

Përralla në vargje është shkruar në anglisht nga Stela Gega – Mçonaghy për t’u sjellë më pas në shqip nga Matilda Vangjeli. Me situata me humor dhe imagjinatë, përralla është ilustruar bukur nga Ledia Kostandini dhe është redaktuar nga shkrimtarja e njohur për fëmijë, Adelina Mamaqi.

Në një botim cilësor kjo prurje e re e letërsisë shqipe për fëmijë vjen për lexuesit e vegjël si një argëtim ndërsa për prindërit e tyre si një ndihmë për t’i mësuar fëmijët që të duan perimet.

Ashtu si ka ndodhur edhe Stela Gega-Mçonaghy e cila është frymëzuar për këtë përrallë teksa mundohej ta mësonte djalin e saj trevjeçar që të hante perimet. Libri rekomandohet për fëmijë mbi 4 vjeç. //atsh

Tetori i Librit, një prurje e re në letërsinë për fëmijë Read More »

Parashikimi i motit

Aktualitet / /

Shërbimi Meteorologjik Ushtarak bën me dije se moti ditën e sotme parashikohet i kthjellët me vranësira të pakëta. Në bregdet vranësira deri në mesatare.

Mjegulla e dendur do të jetë prezente deri në orët e para të ditës kryesisht përgjatë luginave.

Era do të fryjë me drejtim Juglindje – Veriperëndim 1-4m/s, në bregdet deri 8m/sek.

Valëzimi në det do të jetë i forcës 1-2 ballë.

Temperaturat parashikohen:

QYTETET Temperaturat në °C Sigla
Shkodër 13/26 diell
Kukës 9/22 diell
Lezhë 12/25 diell
Dibër 9/21 diell
Durrës 13/26 diell pak re
Tiranë 13/28 diell
Elbasan 12/29 diell pak re
Berat 11/29 diell
Vlorë 13/26 diell re
Korçë 8/23 diell pak re
Gjirokastër 7/28 diell
Sarandë 15/27 diell re/atsh

Parashikimi i motit Read More »

Kryhet ndërhyrja e rrallë në QSUT, del me sukses operacioni i vajzës 1-vjeçare

Shendetesi / /

Një ndërhyrje e ndërlikuar kirurgjikale është kryer me sukses në Qendrën Spitalore Universitare “Nënë Tereza”, operacioni i parë i zëvendësimit të një organi që mungonte, ezofagut, me pjesë të stomakut.

Ndërhyrja e parë e këtij lloji në Shqipëri, me teknikë të avancuar, u realizua nga dr. Dritan Alushani dhe ekipi i mjekëve të Kirurgjisë Infantile.

Ministrja e Shëndetësisë dhe Mbrojtjes Sociale, Ogerta Manastirliu tregon rrëfimin e nënës së Amelias, e cila ishte diagnostikuar me një defekt madhor në lindje.

“Sytë i kishim nga mjeku po shpresat po na shuheshin” – më tregoi Sonila, mami i Amelias që u diagnostikua me një defekt madhor në lindje. Por pas dy ndërhyrjesh shumë delikate, e para menjëherë pas lindjes dhe e dyta 1 vit më vonë që zgjati për 9 orë me rradhë, Amelia ia ka dalë me sukses asaj që ishte e pamundur: Të jetojë dhe të ushqehet vetë pas zëvendësimit të një organi që i mungonte, ezofagut, me pjesë të stomakut”, -thotë Manastirliu.

Pas kontrollit të fundit mjekësor pak ditë më parë, Amelia rezulton plotësisht e shëndetshme. /atsh

Kryhet ndërhyrja e rrallë në QSUT, del me sukses operacioni i vajzës 1-vjeçare Read More »

Lleshaj: Të përkushtuar në luftën kundër kërcënimeve terroriste

Aktualitet, Problematika / /

Ministri i Brendshëm, Sandër Lleshaj mori pjesë në një tryezë rajonale ekspertësh ku u diskutua për sfidat që paraqet terrorizmi si fenomen dhe kthimi i luftëtarëve të huaj dhe familjarëve të tyre në vendet e origjinës.

Tema kryesore që u trajtua në këtë forum ishte “Zhvillimi dhe implementimi i strategjive për procedim, rehabilitim dhe ri-integrim lidhur me rikthimin e luftëtarëve të huaj terroristë dhe anëtarëve të familjeve të tyre”.

Lleshaj u shpreh se vendi ynë ka qenë aktiv në përpjekjet rajonale dhe globale për të parandaluar dhe luftuar kërcënimet terroriste. Ai nënvizoi aktet ligjore të miratuara dhe strukturat e posaçme që ka ngritur vendi ynë, për t’i bërë ballë këtij fenomeni.

“Shqipëria ka një emër të mirë në hetimin dhe procedimin e veprave që lidhen me terrorizmin”, theksoi ndër të tjera ai.

Në lidhje problemet që dalin tani në situatën pas rënies së ISIS, Ministri Lleshaj u shpreh se “terrorizmi nuk njeh kufij dhe asnjë vend nuk është i paprekshëm prej propagandës dhe akteve terroriste. Pavarësisht disfatës ushtarake dhe humbjes territoriale të ISIS, terrorizmi dhe ekstremizmi i dhunshëm mbeten një shqetësim madhor për sigurinë tonë. Kthimi dhe zhvendosja e luftëtarëve të huaj terroristë dhe personave familjarë të tyre, në vendet e tyre të origjinës apo kombësisë, ose në vende të treta, paraqet një sfidë të vazhdueshme dhe në rritje. Shqipëria ka qenë vazhdimisht pjesë e përpjekjeve rajonale dhe ndërkombëtare për të parandaluar dhe për t’iu kundërvënë kërcënimeve terroriste. Ne kemi miratuar ligje të reja në përputhje me rezolutat e njohura të Këshillit të Sigurimit të OKB, të cilat adresojnë rrezikun e luftëtarëve të huaj terroristë dhe ekstremizmit të dhunshëm. Shqipëria ka rezultate të mira në hetimin dhe procedimin e veprave që lidhen me terrorizmin. Shqipëria ka përmirësuar kuadrin ligjor, ka forcuar kapacitetet e agjencive ligjzbatuese për të hetuar dhe proceduar terroristët, nëpërmjet krijimit të Njësisë Anti-Terror në Policinë e Shtetit”.

Lidhur me hapat që duhen ndërmarrë nga institucionet dhe bashkëpunimi me komunitetin, Ministri Lleshaj tha se “së bashku me Qeverinë, shoqërinë civile, drejtuesit e komuniteteve fetare, shoqërore dhe edukative, si dhe të rinjtë, duhet të angazhohemi dhe veprojmë për të parandaluar dhe adresuar radikalizimin dhe rekrutimet. Vetëm duke punuar së bashku, ne do të jemi në gjendje t’i kundërvihemi ideologjisë së tyre të rrezikshme dhe të ndërtojmë komunitete të qëndrueshme.

Nën dritën e kësaj, ne besojmë fort se vetëm me një politikë rajonale konstruktive, bashkëpunim i fortë dhe mirëbesim, ne mund të adresojmë sfidat që lindin nga terrorizmi, ekstremizmi i dhunshëm dhe radikalizimi. Si anëtarë në NATO dhe vend kandidat për në BE, ne mbetemi të përkushtuar që të marrim pjesë aktivisht në luftën kundër kërcënimeve terroriste, njëherësh duke mbrojtur të drejtat njerëzore dhe sigurinë e vendit dhe qytetarëve tanë,” nënvizoi ministri i Brendshëm. /atsh

Lleshaj: Të përkushtuar në luftën kundër kërcënimeve terroriste Read More »