Irina

“Shqipëria e ka të domosdoshme një dimension të ri social dhe pozitiv”, është shprehur Presidenti i Republikës, Ilir Meta, i cili zhvilloi sot një takim me përfaqësinë e grupimit “UnionS” të nismës “Unë e Dua Vullnetarizmin”.

“Energjia dhe vizioni i të rinjve për ndërtimin e një të ardhmeje të sigurtë në Shqipëri janë përherë frymëzuese. I tillë ishte edhe takimi që zhvillova sot me përfaqësinë e grupimit “UnionS” të nismës “Unë e Dua Vullnetarizmin”, me një kontribut të spikatur në shërbim të familjeve të prekura rëndë nga tërmeti”, ka thënë Meta.

Meta i ka falënderuar të rinjtë për shembullin e duhur, jo vetëm për zhvillimin dhe konsolidimin e humanizmit dhe solidaritetit, por edhe për ndihmën e çmuar të dhënë ndaj komuniteteve në nevojë.

“Shqipëria e ka të domosdoshme një dimension të ri social dhe pozitiv, që bazohet tek kontributi vullnetar i secilit prej nesh, për një shoqëri më njerëzore, më të përgjegjshme dhe më europiane, por edhe më të fortë dhe të pathyeshme përballë sfidave të globalizimit”, është shprehur Meta.

“Aktivizimi vullnetar është një vlerë e shtuar, fuqizimi i të cilit na bën të gjithëve qytetarë më të mirë dhe shoqërinë tonë më të dashur, më njerëzore dhe më optimiste”, është shprehur Meta./atsh

Vetëm në muajin nëntor 2019, aksidentet rrugore në 76,1 % të rasteve kanë ndodhur si pasojë e sjelljes së drejtuesit të mjetit.

Institutit i Shëndetit Publik ka bërë të ditur se numri më i lartë i aksidenteve në këtë periudhë është kryer nga grup-mosha 25–34 vjeç, duke zënë 32,1 % të numrit të aksidenteve gjithsej.

Krahasuar me të njëjtën periudhë të një viti më parë, sipas ISHP-së, aksidentet në këtë grup-moshë janë ulur me 22,2 %.

Në njëmbëdhjetëmujorin e 2019, aksidentet rrugore në 15,2 % të rasteve kanë ndodhur si pasojë e sjelljes së këmbësorit./atsh

Temperaturat e ulëta që kanë prekur vendin tonë kanë bërë që në Pukë sipërfaqja e liqenit të ngrijë.

Përmes një njoftimi, bashkia e Pukës njoftoi qytetarët e saj të bëjnë kujdes, teksa ka publikuar edhe foto nga liqeni i ngrirë.

“Për shkak të temperaturave të ulëta që kanë karakterizuar qytetin tonë prej ditësh, Liqeni i qytetit të Pukës është ngrirë në të gjithë sipërfaqen e tij”, thekson bashkia e Pukës.

“Përballë kësaj situate porositni fëmijët tuaj të shmangin aventurën për të hipur mbi sipërfaqen e akullt të qytetit, pasi është me mjaft rrezikshmëri”, thekson bashkia e Pukës./atsh

Kryeministri Edi Rama ishte sot në njësinë numër 8 në Tiranë, në familjen e Dallëndyshe Lurit, e cila u godit nga tërmeti e humbi strehën dhe sot, njësoj si mijëra familje të tjera të prekura është sistemuar në një shtëpi me qira.

“Deri në ndërtimin e shtëpisë së re apo meremetimin e shtëpisë së dëmtuar, familja e Dallëndyshes dhe të gjitha familjet që kanë humbur shtëpinë në qytetet e prekura, rreth 8190 të miratuara aktualisht, do të qëndrojnë me qira të paguara nga shteti”, – tha Rama.

Kryeministri Rama u shpreh se “ne duam t’i përcjellim të gjithëve atë mesazhin se do të qëndrojnë nën kujdesin tonë në shtëpitë me qira deri kur të jenë gati shtëpitë”. Rama tha se faktikisht në Tiranë, “nuk kemi probleme fare”. “Por kemi pasur nja dy probleme me disa në zonën e Kurbinit dhe në zonën e Krujës, që ishin në hotel nuk donin të dilnin etj., por pak nga pak po i sistemojmë edhe ata”, – shtoi Kryeministri.

“Njeriu është krijuar për të harruar shpejt të keqen, shqiptari është edhe më i shpejtë. Tani natyrisht që sidomos për godinat me shumë banesa na duhet një vlerësim inxhinierik i thelluar, që duhet marrë në fund mendimin e grupeve të inxhinierëve ia vlen apo jo, duhet shembur apo duhet të meremetohet, sepse përndryshe nxjerrim sytë për të vënë vetullat”, – tha Rama.

Kryeministri theksoi se “ne kemi vënë gjithë fondin në dispozicion dhe bashkitë kanë hapur procesin e kontraktimit të grupeve për vlerësimin e thelluar, ndërkohë që vlerësimi paraprak është bërë. Tani duhet vlerësimi final, çfarë do të ndodhë me këtë pallat? Duhet ta prishim, apo ta mbajmë, që të jemi ligjërisht në rregull, por edhe nga pikëpamja teknike të mos kemi asnjë dyshim”, – tha Rama.

Kryetari i bashkisë së Tiranës, Erion Veliaj u shpreh se “familja e Dallëndyshes me bonusin e qirasë që ka marrë vendosi të marrë një vilë këtu, se sa një apartament të Medreseja”.

“Për pallatin do të bëhet studim i thelluar me fondin që akorduat Ju për studimin e thelluar. Bonusi i qirasë na jep ne komoditetin që të mos i bëjmë me ngut vlerësimet e thelluara. Për sa kohë që familja ka qira 1 vit, kemi gjithë kohën e nevojshme që t’i themi inxhinierëve: merrni gjithë kohën për të bërë testet e betonit, të hekurit dhe na jepni një përfundim për të mos i bërë gjërat me ngut. Tani që po vinim kishim një debat me disa që thonë: na bëj kopshtin e shkollat më shpejt. U thashë se ne do të fusim kalamaj dhe jo bagëti, kështu që më mirë t’i bëjmë tamam këto gjëra dhe vendimin final do t’jua sjellim Ju dhe pastaj në varësi të vendimit do të financojmë shtëpitë e reja”, – iu drejtua Veliaj, Kryeministrit Rama.

Veliaj tha se “sapo kemi marrë një aplikim në Tiranë për 300 taksi elektrike”. “Ata më kanë kërkuara 300 shoferë për taksi elektrike, pas vendimit që mori qeveria në fund të vitit që e bëri taksën zero për mjetet elektrike, që janë me zero ndotje. Është shtuar shumë interesi dhe për autobusët, dhe për taksitë”, – tha Veliaj.

Ai e informoi Kryeministrin se “kemi filluar rehabilitimin e lumit, është bërë korsia e biçikletave dhe tani po bëhet gjithë bregu”. /atsh

https://www.facebook.com/edirama.al/videos/480092079586199/?t=0