Irina

Qyteti i Vlorës do të ketë një bregdet të pastër për sezonin turistik të këtij viti. Kjo, falë një investimi të realizuar nga Qeveria Shqiptare dhe bashkia e Vlorës në rrjetin e kanalizimeve në qytet.

Ndërmarrja e Ujësjellës Kanalizime Vlorë ka hartuar këtë projekt që tani po zbatohet. Në zonën e ish-Fabrikës së Çimentos po punohet për shtrimin e rrjetit të ri të kanalizimeve, ndërsa kryetari i bashkisë së Vlorës, Dritan Leli shoqëruar nga Drejtori i Ujësjellës Kanalizime, Dorian Xhelili, ndoqën sot ecurinë e punimeve.

Kryebashkiaku Leli theksoi se “ky investim me vlerë 4.6 miliardë lekë të vjetra është nga më të rëndësishmit që garanton turizëm cilësor dhe ujëra të pastra në gjirin e Vlorës. Investimi radhës do të shkojë në çdo familje për të garantuar lidhjen e kanalizimeve të ujërave të zeza familjare me sistemin e kanalizimeve në të gjithë territorin e Vlorës për të shkuar në pikën që ne kemi përfunduar pak kohë më parë të hidrovorit të qytetit. Të gjitha lidhjet klandestine po zbulohen një nga një ato që derdheshin në mënyrë të pakontrolluar në kanalizimet e qytetit për tu lidhur tani falë këtij projekti me sistemin total të pastrimit të ujërave të zeza”.

Sipas tij, po evidentohen të gjitha lidhjet abuzive të kanalizimeve.

Ai siguroi se për sezonin turistik të këtij viti “Lungomare” do të jetë tërësisht e pastër nga ujërat e zeza./atsh

Ministria e Turizmit dhe Mjedisit objektiv për vitin 2020 ka rritjen e numrit të turistëve me 10%.

Ministri i Turizmit dhe Mjedisit, Blendi Klosi, në një intervistë për Agjencinë Telegrafike Shqiptare theksoi se është shumë e rëndësishme që në vitin 2020 të ruajmë trendin rritës të numrit të turistëve dhe të mos kemi kriza të cilat ndikuan në turizëm gjatë 2019-s.

Sipas Klosit, protestat e opozitës dhe tërmeti ishin faktorë që ndikuan negativisht në turizëm, në krahasim me vitin 2018.

“Objektivi jonë është të kemi një rritje me 10% të turistëve për vitin 2020. Natyrisht shpresojmë shumë të mos kemi disa kriza që patëm në vitin 2019, të cilat ndikuan në rritjen e turizmit, krahasuar me vitin 2018. Ju kujtoni mjaft mirë disa ngjarje të ndodhura në vitin e shkuar, protestat e janarit dhe qershorit, në prag të protestave lokale, si dhe shtatori e nëntori, dy muaj këto ku vendi ynë u godit nga tërmeti”-, theksoi Klosi.

Ai tha se “turizmi është një industri e lidhur në detaje dhe shpresojmë që këtë vit detajet të jenë në favorin tonë. Sezoni i ri 2020 do të vazhdojë të na gjej të gatshëm për të pritur miliona turistë dhe do ta gjejë Shqipërinë një destinacion unikal turistik, pasi ofrohen të gjitha format e turizmit. Tur operatorët kanë dëshmuar se nuk ka cedime apo ndryshime të ofertës turistike pavarësisht tërmetit. Po ashtu tërmeti nuk preku dëshmitë kulturore, kalatë, kështjellat, zonat historike dhe kulturore. Një komponent tjetër i rëndësishëm janë blogerët dhe njerëzit e medieve masive, të cilët luajnë një rol të rëndësishëm në promovimin e turizmit të vendit tonë”-, tha Klosi gjatë intervistës për Agjencinë Telegrafike Shqiptare. /atsh