Serialet turke janë më të ndjekurit në vendin tonë dhe aktorët e tyre janë kthyer në të preferuarit e publikut shqiptar. Ndër to përmendim Çağatay Ulusoy, i cili me rolin e ‘Sarpit’ ka rrëmbyer zemrat e të gjithëve.
Lajmi i hidhur vjen nga ‘Ensonhaber’ për të gjithë fansat. ‘Sarpi’ dhe aktorja me origjinë shqiptare, Gizem Karaca, janë arrestuar pas një aksioni policor.
Ata të dy dhe figura të tjera të njohura janë gjetur me sasi kokaine dhe kanabisi. Aktorët janë dënuar me 4 vjet e 2 muaj burg me akuzën e trafikimit të drogës dhe pritet që ky vendim të dërgohet në Gjykatën e Apelit.
Ti Lul je dembel. Ta kanë ngec at punë në dorë dhe duket që e bën si për ta hequr qafe. Ti s’ke ëndërr të drejtosh Shqipërinë dhe me vete thua – “ca më duhet mua kjo punë” dhe fort faj nuk ke, por tashmë je brenda my wannabe leader dhe pozicioni ta kërkon të jesh më ngjitës, më i besueshëm për njerëzit.
Shkruan Keti Bazhdari
Skenari i 5 ditëve më parë me Agronin(Geronin) nuk ngjiti. Do të mund të realizoje plot të tjerë, po të ishe vetë i pastër dhe pak më punëtor.
Ti Lul je dembel. Ta kanë ngec at punë në dorë dhe duket që e bën si për ta hequr qafe. Ti s’ke ëndërr të drejtosh Shqipërinë dhe me vete thua – “ca më duhet mua kjo punë” dhe fort faj nuk ke, por tashmë je brenda my wannabe leader dhe pozicioni ta kërkon të jesh më ngjitës, më i besueshëm për njerëzit.
Duket që politikën e ke ndjekur nga televizori, me ato turmat energjike, që rrethonin gjysh Saliun, dajë Fatosin e axhe Edin, dhe ke menduar pse jo edhe unë, por nuk është se e ke fort haberin si arrihet deri aty.
Njerëzve mund t’u thuash plot gënjeshtra, sic bën cdo ditë, por ajo që ka rëndësi është t’i besosh ti i pari, pasi dallohesh lehtë që s’i beson as vetë dhe nëse në cdo aspekt të jetës realizmi është dicka e mirë, në lojën politike të gënjeshtrës, të tradhëton.
Mund të rreshtoje edhe të vërteta. Oh sa shumë të vërteta do të mund të rreshtoje, por kjo kërkon moral, kurajo e aftësi të gjithanshme, gjë që s’është rasti yt.
Por të rrimë te skenari i para 5 ditëve.
Unë s’kam asnjë interes në këtë histori të mbroj njërin apo të fajësoj tjetrin. Unë kam qenë e do të mbetem një person i vendosur në luftë me injorancën e krimin e sidomos krimin penetrues në politikë, edhe pse kjo më ka penalizuar në jo pak raste.
Por a ia ka arritur ajo video 2minutëshe, që Fatmir Xhafën t’na e shesë tashmë, si përfaqësues të krimit apo familjeve mafioze në Shqipëri? Dhe, a gëzonte videoja besueshmërinë e duhur për ta përmbushur këtë mision, pavarësisht e montuar apo jo?
Këto janë cështje që cdo rregjisor politik duhet të ngrejë, para se të hedhë në treg prodhimin e vet.
Cdo njeri në këtë botë ka një aureolë, të dhënë nga Zoti apo natyra, quajeni si të doni dhe është tejet e vështirë t’i gjeneroni, një tjetër të re, krejt të kundërt me origjinalen, e aq më tepër me një përpjekje kaq naive.
Pse e quaj naive? S’dua të flas hic për vertetësinë e videos, e përsëris. Le të jetë e vërtetë si buka që hamë.
Idea, qasja dhe aktorët në video janë njëri më naiv se tjetri. Për aq sa ne si popull arrijmë të intuitojmë dhe njohim Fatmir Xhafën, s’ka kurrëfarë lidhje ajo cfarë ai përfaqëson e reflekton me atë cfarë llafos ky tipi Agroni apo Geroni i videos, që përvec se i lehtë nga natyra duket qartazi viktimë e gjysh Saliut, sot edhe dje. Biles do thoja, që kur të vijë koha të bëhet një muze në nder të bacës Sali, këtë videon me e projektu aty me deciturën “para dhe pas Saliut”.
Pasi falë vullnetit të këtij “vigani liberator”, Saliut te I, rinia e vitit 97 u katandis “mo Zo mà keq” në rrugët e botës, duke shitur trupin e c’ka kishte, palè pastaj ca cigare ashash e viza kokainë.
Tani s’ka faj, i takon edhe të tallet Saliut te II, me viktimat e veta. Agroni apo Geroni, në cdo realitet tjetër, do ishte një punonjës apo zyrtar i rëndomtë, që as ashashin s’do i kishte rënë rasa me e provu, por ja falë Saliut i erdhi dita me u bo “vagabond i madh” ne jetë e kapobandë me bashkëpunëtorë të rrezikshëm në film(si ky derëziu që do të shikoni në seritë në vazhdim të videos).
Tani, Lul, të dalim prapë te Fatmir Xhafaj.
Sipas teje, ca e lidh konkretisht apo virtualisht Fatmirin si personalitet me këto personazhet e telenovelës suaj me pjese, përvec të qenurit vëllezër biologjikisht e shokë kodra pas bregut të vëllait?!
Mos po kujton se njerëzia është zgjuar mjesin e 15 majit duke menduar se Fatmir Xhafaj qenka një i tmerrshëm, që drejtoka trafiqe të mëdha me këtë Geron “kokën” apo më shumë mundësi jemi zgjuar këto dy muajt e fundit dhe kemi parë se si me shumë delikatesë, pa rënë shumë në sy, ministri i brendshëm në bashkëpunim dhe me Interpol, po u pret kokat ca tipave kriminelë 24 karatësh, që si duket dinë shumë për ju të gjithë dhe ndaj nuk pritët sahatin t’i inskenonit me ca mundët e si mundët, rrap shkrap, një audiocimkë vetëm për ta hequr qafe?!
O Lul djali, edhe ti si lider, edhe une si popull e dimë që është kjo e dyta. Por edhe amerikanët.
Dhe që të mos ta zgjasim, në nivel operacioni politik, kruajtja me Fatmir Xhafën, është më e pabesueshmja.
Iu nxjerr ju si opozitë edhe më viktima dhe vërteton gojët e hallkut se cuni i Saliut, por edhe ndonjë tjetër, janë vërtetë të lidhur me punëra të pista. Duke i rënë daulles së Fatmir Xhafës vetëm sa tërhiqni vëmendje për keq drejt vetes, pasi amerikanët kanë për ta mbështetur dhe është e drejtë të ndodhë kështu.
Në Shqipëri në këta 27 vjet, është thurur një shkul aq i madh, se fjala lëmsh duket modeste dhe për ta zhdërvilluar,në shumë raste, do të ketë nevojë për gërshërë. Dhe ky ishte rasti konkret. Asgjë s’e lidh më Fatmir Xhafën me vëllain e tij, që shkoi të ndjekë fatin e vet përball drejtësisë italiane.
Por puna do të jetë, ju tjerët, ca ju lidh me ata që po kapen e që janë planifikuar të kapen. A thua do të ketë gërshërë t’ua këpusë fijet apo do jenë aq të forta sa t’ju marrin pas vetes?!
Ka rreth 5 vite që Partia Demokratike e ka shndërruar në kalë beteje luftën kundër drogës e sidomos kundër kultivimit të bimëve narkotike si cannabis sativa. Drejtuesit e rinj dhe të vjetër të PD i harruan si me magji mëkatet e tyre të vjetra gjatë kohës që ishin në pushtet, që kulmonin me Lazaratin ose siç njihej rëndom me “Republikën e Hashashit”.
Prej shumë kohësh akuzat e politikanëve të PD-së ndaj qeverisë socialiste për lejimin e kultivimit masiv të cannabaisit si dhe trafikimin e tij dhe drogërave të tjera të forta janë kthyer në rutinën e betejës politike si brenda, ashtu edhe jashtë vendit.
Një strategji kjo që deri diku i kishte shërbyer opozitës për të vënë në vështirësi mazhorancën qeverisëse. Por çuditërisht PD-ja dje me publikimin e deklaratës së regjistruar të Dëshmitarit X, Albert Veliut, i ashtëquajturi Babale, ka rrëzuar brenda pak orëve imazhin e një fushate disavjeçare.
Në deklaratën e regjistruar të Albert Veliut, ku ai ka sqaruar rrethanat e arsyet e bisedës së pretenduar midis tij dhe Agron Xhafajt, vëllait të ministrit të Brendshëm Fatmir Xhafaj, Veliu ka pranuar publikisht se ka blerë 20 kilogramë hashash për t’i trafikuar.
Pavarësisht pretendimit nga Veliu që e kishte bërë këtë blerje për të provokuar vëllain e ministrit, fakti është se i ashtëquajturi Dëshmitari X ka blerë 20 kilogramë drogë dhe ka deklaruar se nëse nuk do të kishte pasur atë natë kohë të keqe do ta kishte trafikuar në Itali.
Pra ai ka blerë lëndë narkotike nga një person që nuk e tregon dhe e ka poseduar atë për një periudhë të gjatë kohe, sipas deklaratës së tij, dhe nuk dihet se ku e ka çuar atë. Duke pasur parasysh se sipas legjislacionit aktual në vendin tonë quhet shkelje ligji dhe dënohet me burg, posedimi edhe i një sasie prej disa gram cannabis, atëherë drejtuesit e Partisë Demokratike që e kanë pasur në dorë deklaratën e Albert Veliut kanë qenë në dijeni se ky person kishte shkelur ligjin duke trafikuar dhe poseduar drogë.
Po sipas legjislacionit në fuqi çdo qytetar i thjeshtë i Republikës së Shqipërisë e ka detyrim ligjor që kur është në dijeni të një shkelje ligjore të bëjë denoncimin e saj, ndryshe përballet me akuzën për “moskallëzim krimi” dhe kjo një shkelje e rëndë penale që dënohet me burgim. Pra, drejtuesit e PD-së kanë shkelur ligjin duke moskallëzuar një person i cili posedonte jo pak por 20 kilogram drogë. Sasia e cannabisit prej 20 kilogramësh që ka deklaruar se kishte blerë Veliu shkon si vlerë në rreth 20-24 mijë euro, kur blihet me shumicë në vendin tonë dhe kur shitet në Itali në sasi të vogla mund të shkojë deri në 100 mijë euro.
Këtu tashmë nuk kemi të bëjmë më me një sasi të vogël, por me një trafik të pastër me sasi e shuma të mëdha të lëndëve narkotike. Përse drejtuesit e Partisë Demokratike nuk kanë bërë detyrën e tyre ligjore për të kallëzuar këtë shkelje të rëndë të ligjit? Nga padija? Jo! Dy prej personave që dolën publikisht për të bërë denoncimin e përgjimit Enkelejd Alibeaj e Gazmend Bardhi janë të dy ish-ministra Drejtësie dhe jurist në profesion dhe vetëm të paditur nuk mund t’i quash. Duket qartazi se kjo është një zgjedhje politike e PD-së. Një kthim pas i saj. “Lejimi i cannabisit në Lazarat ishte vendim politik”, deklarata e para disa viteve e Sali Berishës demonstron rrënjët e këtij mentaliteti. Për të bërë politikë, për të goditur politikisht kundërshtarin politik lejohet çdo gjë, qoftë kjo edhe shkelja e rëndë e ligjit.
Shkelja ligjore
Sipas legjislacionit në fuqi çdo qytetar i thjeshtë i Republikës së Shqipërisë e ka detyrim ligjor që kur është në dijeni të një shkelje ligjore të bëjë denoncimin e saj, ndryshe përballet me akuzën për “moskallëzim krimi”./Shqiptarja.com
Ahmet Zogu u shfaq. Dhe vendi u transformua. Fillimisht, ai krijon një Kushtetutë. Dy dhoma. Dhoma e Deputetëve, e zgjedhur me votim të drejtpërdrejtë nga populli; Ajo e Senatit, në të cilën një e katërta caktohet nga Presidenti, pjesa tjetër zgjidhet si deputetët. Presidenti i Republikës është në të njëjtën kohë President i Këshillit, si në Shtetet e Bashkuara.
Shkruan Aurenc Bebja (Francë)
“Comoedia” ka botuar, të enjten e 6 shtatorit 1928, në faqen n°3, shkrimin e shkrimtarit, romancierit dhe gazetarit, Pierre Chanlaine, në lidhje me arritjet (sukseset) e Ahmet Zogut gjatë udhëheqjes së tij. Aurenc Bebja, nëpërmjet blogut të tij “Dars (Klos), Mat – Albania”, ka sjellë për publikun shqiptar, tekstin ekskluziv të gazetës franceze:
Pse shqiptarët e duan Zogun I ?
“Z. Ahmet Zogu, President i Republikës së Shqipërisë, që prej 31 janarit 1925, sapo u shpall Mbret i Shqipërisë. Nëse disa kurora rrëzohen, të tjera shfaqen. Kompensim i merituar.
Kur luftova në Shqipëri, ishte vendi më i prapambetur që ekzistonte. Një vend i bukur, ku përrenjtë kapërcejnë me gëzim pranë maleve gjigante, një vend gjithashtu simpatik. Shqiptarët e kanë mbrojtur gjithmonë gjuhën e tyre ndaj shtypjes greke apo turke. Shqiptari është besnik ; Ai e ruan nderin. Nga tradita, ai është një ushtar i mrekullueshëm. Etërit e tij luftuan në Fornovo (Fornoue) në ushtritë e Henry III, Maximilien-it dhe François I.
Ai është i matur. Është trim. Si mund të mos e duam atë ?
Po, por para Ahmet Zogut, duhet të thuhet se vendi nuk ishte shumë i sigurtë. Ky organizëm i vogël ishte i infektuar me mikrobe – komitadjis – që e hanin atë. Nuk kishte pushtet qendror. Dhe nëse rastësisht fuqitë e mëdha do të kishin vendosur një, askush nuk do t’u bindej atyre.
Anarkia mbizotëronte dhe lindi pyetja, pavarësisht simpatisë që shqiptarët kishin ngjallur, pavarësisht protestave të tyre të rrepta dhe legjitime, nëse do të ishim të detyruar që t’i ndajmë ata mes grekëve dhe jugosllavëve.
Ahmet Zogu u shfaq. Dhe vendi u transformua. Fillimisht, ai krijon një Kushtetutë. Dy dhoma. Dhoma e Deputetëve, e zgjedhur me votim të drejtpërdrejtë nga populli; Ajo e Senatit, në të cilën një e katërta caktohet nga Presidenti, pjesa tjetër zgjidhet si deputetët. Presidenti i Republikës është në të njëjtën kohë President i Këshillit, si në Shtetet e Bashkuara.
Ai formon Kabinetin dhe është përgjegjës për Dhomën e Deputetëve. I investuar në detyrat e tij dhe i shqetësuar nga përgjegjësitë e tij, Ahmet Zogu punon. Ai ndërtoi rrugë : atë të Durrësit për në Tiranë; atë të Elbasanit për në Korçë ; atë të Tiranës për në Shkodër, e cila ndahet nga një urë madhështore mbi lumin Mat.
Kompania Franceze e “Fives-Lille” ka ndërtuar dy nga këto vepra arti, midis Durrësit dhe Tiranës, për të cilat mund të jetë krenare. Këtyre rrugëve u shtohet ajo e Beratit për në Tiranë, e ndërtuar kohët e fundit, dhe ajo e Santi – Quaranta për Selanik, të cilën e kishim riparuar gjatë luftës dhe që ai e riparoi sërish.
Ahmet Zogu urdhëron që të qarkullojnë rrugëve shërbime të rregullta auto-transporti. Por, pavarësisht gjithçkaje, meqë komunikimet janë të ngadalta, ai krijoi tri linja avionësh : Tiranë, Vlorë, Korçë; Tiranë – Shkodër, Brindisi, Vlorë.
Menjëherë, vendi u bë i sigurtë. Ahmet Zogu do t’i sigurojë atij mjete që do të mundësojnë shkëmbime. Ai po ndërton portin e Durrësit. Një kompani shqiptare është themeluar për të prodhuar energjinë hidroelektrike të nevojshme për veprimtarinë e qytetit. Një hekurudhë – e para në këtë vend – është ndërtuar mes Tiranës dhe Durrësit ; tani ajo shtrihet deri në portin e Vlorës.
Dhe pastaj, presidenti, metodikisht, por me energji, shfrytëzon – së fundi – pasurinë e tokës : bakrin e rajonit të Pukës, shfrytëzimin e naftës së Elbasanit dhe të Vlorës prej katër kompanive – një franceze, një italiane, një angleze dhe një amerikane ; peshkarexhat e gjirit të Vlorës, që një kompani franceze i ka dhënë me qera, perlat e liqenit të Ohrit, kuajt e vegjël të fushës së Mukrës (Mursisë), të cilët njihen për rezistencën e tyre dhe shitja e të cilëve në vendet fqinje është një burim fitimesh i rëndësishëm për Shqipërinë.
Industritë e vjetra – fabrikat e sapunit, rafineritë e naftës (vajit), fabrikat e duhanit dhe të alkoolit – mbrohen ; kultivimi i drithërave dhe hardhive, zhvillohet. Dhe kur një vend i organizuar tërheq vëmendjen e të tjerëve, dhe meqë duhet frymëzuar frika së bashku me admirimin, Ahmet Zogu krijoi një ushtri dhe një xhandarmëri.
Oficerë italianë dhe anglezë janë përgjegjës për organizimin e njërës dhe tjetrës. Forcat e armatosura përbëjnë totalisht rreth njëzet mijë burra. Ahmet Zogu ka bërë për Shqipërinë, atë që asnjë kryetar shteti nuk ka bërë për vendin e tij. U tha se ai kishte bërë vetëm një koloni italiane…Një interpretim i gabuar! A do t’a lejonte patriotizmi shqiptar një gjë të tillë ?
Në të vërtetë, shqiptari, si të gjitha vendet në zhvillim, shfrytëzon pasurinë e tij nëpërmjet kompanive të huaja. Por konçesionet jepen në bazë të gjykimit (analizës) dhe vetëm në rast të ofertave të barabarta fitojnë kompanitë italiane.”
Shqipëria dhe Greqia mund të përmbyllin brenda Qershorit marrëveshjen për kufirin detar dhe po ashtu t’i japin zgjidhje çështjeve të mbetura pezull nga lufta e dytë botërore. Në një deklaratë pas punimeve të samitit të Sofjes, ku pranoi se Shqipëria dhe Greqia janë ende në gjendje lufte kryeministri grek Aleksis Tsipras konfirmoi përparimin e bisedimeve, që sipas tij ishin tejet të vështira.
“Negociatat me Shqipërinë ishin më të vështira se me Maqedoninë, na kanë marrë më shumë kohë. Imagjinoni që kemi për të zgjidhur çështje që janë të hapura që nga Lufta e Dytë Botërore. Jemi ende në gjendje lufte. Është çështja e Zonave Ekskluzive Ekonomike, një çështje e rëndësishme si dhe të tjera mes të cilave edhe respektimin i të drejtave të minoritetit grek. Jemi në rrugë shumë të mbarë, nuk dua të them i sigurt, por jam shumë optimist se do të kemi zhvillime pozitive për këto çështje brenda Qershorit”.
I pyetur nëse Shqipëria do të marrë dritën jeshile për negociatat e anëtarësimit me Bashkimin Evropian, Tsipas tha se kjo nuk varet vetëm nga zgjidhja e problemeve dypalëshe mes Shqipërisë e Greqisë, duke shtuar se në gjirin e BE-së ka vende që kanë mendime të ndryshme për këtë çështje./JavaNews
Këngëtarja me origjinë shqiptare në Greqi, Eleni Foureira ka folur për herë të parë pas Eurovisionit, ku zuri vendin e dytë si përfaqësuese e Qipros.
Në një intervistë për mediat greke, ajo u është përgjigjur kritikëve në Greqi që thanë se në Eurovision duhet të përfaqësojë Shqipërinë dhe jo Qipron, për shkak të origjinës së saj.
“Në kaq shumë emisione më trajtuan si fundërrinë që ta bënin lajm dite, duke thënë gjëra të pavërteta. M’u kthye kundër i gjithë vendi që unë dua. Ata më lënduan, jo grekët. Të gjithë ata që dikur më bënë të kisha frikë dhe të më vinte turp të thoja kush isha, nuk do t’ia dalin të më bëjnë që të urrej Greqinë”.
Eleni i ktheu përgjigje edhe politikanes greke Rachil Makri, e cila kishte folur kundër saj.
“Doli dhe tha që unë harxhoja paratë e Greqisë, sepse u rrita këtu. Unë punoj në këtë vend dhe jap një përqindje të madhe të të ardhurave të mia. Nuk kam vjedhur asnjë lek nga shteti. Paguaj ERT-në(televizioni shtetëror grek) bashkë me të gjithë grekët e tjerë, dhe ditën që unë këndoja ERT arriti 70% të audiencës. Nga paratë e mia paguhej znj.Makri kur ishte deputete”.
Sa i përket kritikave ndaj Shqipërisë nga mediat greke, për faktin pse vendi ynë i dha 10 pikë dhe jo 12 pikë të plota në Eurovision, Eleni Foureira u shpreh se llogaridhënia në këtë rast duhet të nisë fillimisht nga Greqia, që i dha vetëm 7 pikë.
“Nëse këto pikë ishin raciste, atëherë më vjen shumë keq. Ky vlerësim dëmtoi më shumë Qipron se sa mua. Gazetarët më pyetën nëse u mërzita që Shqipëria më dha 10 pikë dhe jo 12. Askush nuk më pyeti përse Greqia më dha 7 pikë në gjysmëfinale. Një sistem i tërë po përpiqet që të tregojë gjëra të cilat nuk ekzistojnë”, tha Eleni Foureira. /tvklan
Analisti Mustafa Nano ka fyer live në emisionin “Opinion” ish-ministrin e Drejtësisë, Gazmend Bardhi.
Debati degjeneroi në sharje dhe fyerje, menjëherë pas ndërhyrjes në debat të zyrtarit të PD-së, Gazmend Bardhi në lidhje me prezantimin e argumenteve nga analisti Nano në studio për audio-përgjimin e vëllait të ministrit Xhafaj, publikuar nga opozita për përfshirje në trafikun e drogës.
Në një moment Bardhi i kujtoi Nanos se ka një vilë në Gjirin e Lalzit, por gazetari i është kthyer ashpër.
“Vila e sat ëme!”
Ndërsa zyrtari i Partisë Demokratike tha se nuk ka asgjë të keqe që përmendet ajo vilë nëse është blerë me para të justifikuara.
Analisti Mustafa Nano i është përgjigjur se vila është e justifikuar, por nuk i ka kursyer fyerjet ndaj ish-ministrit të drejtësisë duke e quajtur atë “kërriç” dhe “zuzar”.
Bardhi: Vilë në Surrel ka Edi Rama nuk ka ndonjë nga opozita. Po flasim për përgjegjësinë ligjore të ministrit.
Nano: Pse për kunatin të mos flasim.
Bardhi: Jo të flasim për vilën tëndë në Lalëz.
Nano: Për vilën time, vilën time, vilën e sat ëme…
Bardhi: Pusho se nuk kam ardhur të bëj debat me ty.Ekspres.
Laureta Halili, një qytetare e komunitetit egjiptian në qytetin e Vlorës, denoncoi në emisionin “Stop” arrestimin dhe mbajtjen pa të drejtë të djalit të saj Kevi Bilaj në qelitë e paraburgimit.
“Jam nëna e 4 fëmijëve dhe jam e divorcuar. Janë vjedhur dy trupe motorash në lagjen “Çole” dhe më akuzojnë djalin. Më thanë do bëjmë kontroll në shtëpi dhe kanë bërë një procesverbal që nuk është gjetur asnjë send. Në të njëjtën kohë janë gjetur dy grupe motorash në shtëpinë e Eljo Muratit nga OPGJ dhe i plotfuqishmi i rajonit numër 4. Si përfundim, pas 72 orësh djali im ka shkuar në burg, ndërsa Eljo Muratin e kanë lënë të lirë. Unë kërkoj drejtësi!”, u shpreh e shqetësuar Laureta.
Gazetarja e emisionit “Stop” komunikoi nëpërmjet një telefonate me avokaten e Kevi Bilaj, Odeta Alirraj.
“Kevi Bilaj është ndaluar në datën 4 Mars. Unë kam qenë në komisariat, ndërkohëqë para se të merrej në pyetje u bë masa e arrestit. Pastaj gjyqtarja vendosi “vleftësimin e paligjshëm të arrestit”. Caktoi si masë sigurimi personal “arrest me burg”. Neni e parashikon që ndërkohë që gjykata vendos që arresti është i paligjshëm, duhet të vendosë lirimin e menjëhershëm. Bëra ankimimin dhe Gjykata e Apelit vendosi “lënien në fuqi të vendimit të Gjykatës së Shkallës së Parë”. Sa të vijë dosja nga apeli, do bëjmë kërkesën për ndryshimin e masës së sigurisë”.
Pra Gjykata e Shkallës së Parë e quajti të paligjshëm mbajtjen në paraburgim të Kevi Bilaj dhe po kështu Gjykata e Apelit, ndërkohë që ai mbeti në qeli.
Kryetarja e shoqatës egjiptiane “Nefreta”, Zhaneta Veizaj u shpreh se gjithë lufta e tyre për të nxjerrë fëmijët nga burgjet në mënyrë që t’i drejtojnë në bankat e shkollës po hidhet poshtë.
“Unë i bëj thirrje dhe apel të gjitha organeve kompetente të të gjitha rangjeve: Mos na i largoni fëmijët nga bankat e shkollës dhe të na i mbyllni prapa hekurave të burgjeve. Mos na i detyroni fëmijët të largohen nga puna, gjiri i familjes dhe shteti!”
Gazetarja e emisionit “Stop” sëbashku e të ëmën e të burgosurit iu drejtuan Drejtorisë Vendore të Policisë Vlorë për të pyetur për këtë çështje, por e vetmja përgjigje ishte që duhej të dërgonin një kërkesë te zyra e informacionit.
Më pas gazetarja komunikoi me oficerin e policisë gjyqësore, Bardhosh Gjon Dedën, i cili pretendoi se ka vepruar drejt në këtë çështje, pasi as prokurori nuk ia ka dhënë lirimin e menjëhershëm të dënuarit.
Gazetarja – Ku e ke gjetur mjetin “Piaggio”?
OPGJ Bardhosh Gjon Deda – Të dy personat janë arrestuar dhe…
Gazetarja – E ke gjetur te dy vëllezërit Eljo dhe Kevin Murati, të cilët e kanë pranuar në seancë gjyqësore që mjetin e kemi ne dhe e kemi vjedhur ne të dy.
OPGJ Bardhosh Gjon Deda – Po, po, po!
Gazetarja – Ku e ke kapur në flagrancë djalin tjetër të komunitetit egjiptian?
OPGJ Bardhosh Gjon Deda – Nuk të shpjegoj dot flagrancën unë ty tani, që të shpjegoj ku është flagranca..
Gazetarja – Nuk është flagrancë zotëri sepse ta ka sjellë vetë nëna me dorën e vet! Ke dhe një prind tjetër këtu që e ke thirrur për verifikim!
OPGJ Bardhosh Gjon Deda – Nëse veprimet tona do të ishin të gabuara, prokurori i çështjes do ta kishte bërë lirimin e menjëhershëm. Prokuroria dhe gjykata ka vendosur për atë, që më 16 vjeç të hetohet në gjendje të lirë.
Gazetarja – Po pra, se është bazuar te faktet e tua!
OPGJ Bardhosh Gjon Deda – Të lutem, më fal tani më duket, se u sqaruam!
Laureta Halili iu drejtua gjykatës për t’i kërkuar llogari gjyqtares së çështjes, Vjola Canajt se përse e ka lënë të birin në burg, ndërkohë që hajduti e ka pranuar vjedhjen.
Qytetarja –Ka pasur djali në masë arresti dhe keni nxjerrë Eljo Muratin, domethënë që është hajduti dhe keni lënë Kevi Bilaj brenda.
Gjyqtare Vjola Canaj – Kam bërë edhe të drejtën e Apeli.
Qytetarja – Eljo Murati e pranoi që Kevi Bilaj nuk ka lidhje, unë e kam vjedhur. Për çfarë arsyeje ma lë djalin në burg o zonjë, se unë jam për bukën e gojës. Kam kërkuar diskun (e seancës gjyqësore) dhe ju kemi thënë që është minoren.
Gjyqtare Vjola Canaj – Çfarë rëndësie ka? E kam dhënë vendimin tim!
Qytetarja – Për çfarë arsye më keni lënë djalin brenda? Unë atë dua të di, kur ke nxjerrë hajdutin, o e nderuar gjyqtare!
Gjyqtare Vjola Canaj – Unë të sqarova, pak a shumë…
Qytetarja – Me çfarë akuze më ke lënë fëmijën brenda?
Gjyqtare Vjola Canaj – Zonjë…
Qytetarja – Kur Eljo Murati e pranoi që e kam vjedhur unë…Kevi Bilaj nuk ka…
Gjyqtare Vjola Canaj – Keni të drejtën e ankimimit, shko…!
Qytetarja – Moj më kthe një përgjigjie, të lutem!
Gjyqtare Vjola Canaj – Nuk kam unë përgjigjie…
Qytetarja – Gjyqin për çfarë e ke bërë pa disk?
Ndërkohë që vetë autori i grabitjes, Eljo Murati pranon fajësinë para të ëmës së të akuzuarit, duke thënë se këtë gjë e ka thënë edhe në gjykatë.
Qytetarja – O Eljo, mua më tha avokatja që ti e pranove në sallë..
Eljo Murati – Po!
Qytetarja – Me kë i vodhe dy grupet e motorit?
Eljo Murati – Po… vetëm.
Qytetarja – Me kë?
Eljo Murati – Mora edhe vëllain. Vëllai ishte larg, me vëllanë e vogël edhe.. ashtu thashë edhe në gjykatë. I mora unë i thashë, ky (Kevi Bilaj) s’ka punë fare!
Qytetarja – Bardhoshi( OPGJ) ku e gjeti mallin?
Eljo Murati – Te shtëpia ime.
Qytetarja – Dy grupet e motorave…
Eljo Murati – Te shtëpia ime.
Policia dhe Gjykata e Rrethit Gjyqësor Vlorë, pasi u informuan që emisioni “Stop” po ndiqte këtë çështje, më datë 30.04.2018 vendosën të ndryshonin masën “arrest me burg” për 19 – vjeçarin, në “detyrim paraqitje”.
“Dua të falenderoj emisionin “Stop” sepse sa morën vesh që “Stop” po merrej me çështjen e djalit, gjykata, prokuroria dhe policia, nga “arrest me burg” që ma kishin lënë djalin ma nxorën me “detyrim paraqitje”. Me këtë masë që ka marrë gjykata e kundërshtoj sepse djali është i pafajshëm dhe nuk ka lidhje në këtë çështje. Më ka bërë 2 muaj burg pa të drejtë!”, tha Laureta Halili.
Nga ana tjetër, i dënuari për vjedhje u shpreh: “Kam kaluar 2 muaj stres atje brenda për diçka që nuk e kam bërë. Jam i pafajshëm! Pse duhet të dënohesha unë për diçka që nuk e kam bërë? Kërkoj drejtësinë time!”
Ndërkohë që Kevi Bilaj kërkon ende pafajësinë, i duhet të paraqitet dy herë në javë te OPGJ deri në momentin që do të merret vendimi përfundimtar për të. /Tvklan.al/
