Berisha, thirrje për armatosje të popullsisë dhe përplasje me armë me qeverinë “Rama” si rruga e vetme për t’i shpëtuar burgut: Derri do plumb!
Ish kryeministri Sali Berisha është njeriu që për herë të parë në historinë e shtetit shqiptar ka tentuar të bëjë luftë civile.
Tentativa e tij për luftë civile dhe përplasjen e Veriut me Jugun e vendit ka qënë me e dukshme në marsin e vitit 1997 kur shteti ra për tre ditë dhe armët kaluan në duart e popullit.
Të gjithë e mbajnë mend atë periudhë te tmerrshme për fatet e shqiptarëve, kur Sali Berisha mobilizoi ushtrinë, policinë, SHIK-un dhe forcat paramilitare të mbledhura dhe në veri të vendit, që nën udhëheqjen e ish kreut të SHIK-it të graduar gjeneral, Bashkim Gazidede sulmuan jugun e vendit.
Madje Sali Berisha ngriti dhe avionët për ti përdorur kundër Jugut, si dhe përdori lëndët helmuese luftarake ndaj popullsisë, por që falë përgjegjësisë së ushtrisë dhe disa elemtëve të përgjegjshëm në atë kohë nuk u bë katastrofa dhe u shmang lufta civile.
Megjithatë armët ngelen deri në vonë në duart e qytetarëve shqiptarë, dikush për t’u mbrojtur në kohën kur nuk kishte shtet apo për shkak të pasigurisë, dikush për të grabitur, dikush për të vrarë apo bërë ndonjë hakmarrje të vonuar, dikush për të kërcënuar.
Me kalimin e viteve, falë dhe asistencës dhe financimit të partnerëve tanë ndërkombëtarë, shumica e armëve u dorezuan dhe u asgjësuan bashkë me municionet.
Pavarësisht se sërish morën jetë dhe kur shteti u mor me atë punë, ku këtu kujtojmë tragjedinë e Gërdecit kur djali i Sali Berishës kryeministër ngriti këtë punishte vdekjeje që mori jetën e 26 personave dhe plagosi mbi 300 të tjerë.
Por Sali Berisha nuk heq dorë nga armët, megjithëse tentoi më 14 shtator të vitit 1998 të bëjë një grusht shteti të armatosur.
Duke dështuar falë ndërhyrjes së ndërkombëtarëve dhe që tashmë me ardhjen e Izet Haxhisë, ish truprojës së tij nga Turqia mund t’i kthehet në një akuzë të fortë që mund ta lërë në burg për jetë.
Shtuar këtu dhe për akuza të tjera, që nga Rruga e Kombit, Gërdeci, 21 janari e deri tek afera miliona dollarëshe e CEZ dhe DIA.
Duke e parë që Lulzim Basha është i pafuqishëm për të sjellë PD në pushtet, duke parë se LSI nën drejtimin e Monika Kryemadhit po rrudhet çdo ditë dhe është vetëm një “apendiks” për opozitën dhe jo për ta sjellë në pushtet, dhe mbi të gjitha duke parë se burgu për të dhe familjen e tij është më afër se kurrë, Berisha ka vendosur t’i drejtohet asaj që di më mirë: dhunës.
Ish kryeministri Sali Berisha më se njëherë ka bërë thirrje për armatosjen e popullsisë dhe që populli të ngrihet me armë në dorë për të rrëzuar qeverinë e Ramës, pasi ajo nuk i mbron.
Këtë thirrje e ka bërë në Kuvend disa herë, ndërkohë që jashtë kuvendit është moderuar, duke tentuar të mos ketë punë me ligjin.
Por në këtë situatë të vështirë për të dhe familjen e tij biologjike e politike që është në prag të burgut, ka vendosur dhe njëherë t’i drejtohet thirrjes së tij të hershme dhe të përsëritur për armatosjen e popullsisë dhe rrëzimin me armë të Edi Ramës nga pushteti.
Por këtë thirrje ka vendosur ta bëjë në mënyrë indirekte, duke shfrytëzuar si gjithnjë “qytetarin dixhital”, që në 90 përqind të rasteve është vetë Sali Berisha.
Kështu, Berisha ditën e sotme ka shfrytëzuar një video të nisur që nga Saranda nga Mul Noka i cili gjendet për fundjavë në një nga shtëpitë që ka marrë me kredi lehtësuese si i vetmi Ministër i Brendshëm në atë kohë “i pastrehë”, dhe e ka hedhur në adresën e tij në facebook, me 1 milionë ndjekës sipas tij si e dërguar nga “qytetari dixhital”.
Këtë video që paraqet një aksion të policisë së shtetit për heqjen e një lulishteje sipas tij, me urdhër të deputetit të PS Alket Hyseni, e ka shoqëruar dhe me një tekst që ia atribuon ‘qytetarit dixhital’, që godet deputetin socialist por dhe policinë e Fatmir Xhafajt, si për ta aktualizuar situatën.
Por me sa duket Berisha, teksa ka përgatitur tekstin e mesazhit është kujdesur që të dalë në pah vetëm thirrja e tij për armatosjen e popullsisë, thirrje kjo indirekte e vënë në ligjeratën e “qytetarit dixhital”, që i jep të drejtë ish kryeministrit kur ka kërkuar armatosjen e popullsisë me argumentin se “derrat duan plumbin”.
“Ja se si banda e Alket Hysenit bashke me policine e Fatzi Droges shkaterrojne lulishten ne Ksamil. Ndiqni videon dhe lexoni mesazhin e qytetarit dixhital. sb
“Pershendetje doktor, sot banda e Alket Hysenit me policine e shtetit ne krye, pa asnje lloj dokumentacioni ne sy te shume turistëve kane shkatërruar lulishten para një lokali ne ksamil duke ju bere presione njerëzve përreth.
Derri do plumb doktor dhe thirrjes jote per armatosjen e popullit i jap plotesisht te drejt. Alket Hyseni apo kushdo tjeter qe fshihet pas kesaj ska me i gezu”, shkruan me dialektin verior “qytetari dixhital” sarandiot.
Kjo është thirrja e Berishës për armatosjen e popullsisë dhe përplasjen me armë me qeverinë, një thirrje destabilizuese që duhet të vërë në lëvizje Prokurorinë./Pamfleti
