Aurora

Zbardhet pasuria e deputetëve të Partisë Demokratike për vitin 2017. Inspektorati i Lartë i Deklarimit dhe Kontrollit të Pasurive më 31 mars mbylli procesin e deklarimit dhe pas përpunimit të deklaratave tashmë gjithçka është gati. Gazeta ka arritur të sigurojë të dhënat për pasuritë e të gjithë parlamentarëve, teksa sot po publikon të ardhurat e demokratëve, ndërsa në ditët në vijim të partive të tjera.

Ajo që bie në sy është se në radhët e demokratëve ka ende emra me pasuri shumë të lartë. Deputetët që kryesojnë janë kryesisht emrat e vjetër, ndërsa emrat e rinj që hynë për të parën herë në Parlament kanë pasuri kryesisht të ulëta. Nëse i marrim me radhë, deputetët që dominojnë në PD, janë Astrit Veliaj dhe Agron Shehaj.

Astrit Veliaj është biznesmen i njohur dhe pasuritë e tij janë të shumta. Vetëm apartamente ka në pronësi rreth 35, ndërsa po ashtu ka banesa private dhe shumë troje. Ndërsa pas tij vjen Agron Shehaj, i cili po ashtu është biznesmen i njohur dhe vetëm gjatë vitit 2017 ka përfituar rreth 7 milionë euro të ardhura. Fitimet kanë ardhur nga shitja e aksioneve, apo dhe nga përfitimet e kompanive të tij.

Pasuria e Berishës dhe Bashës

Një rëndësi zënë dhe pasuritë e deklaruara nga kreu i PD Lulzim Basha dhe ish-kryeministri Sali Berisha. Sa i takon Bashës, duket se është bashkëshortja e tij që ka fitime shumë të larta. Basha ka deklaruar vetëm të ardhurat nga paga si deputet dhe nga drejtimi i Partisë Demokratike, ndërsa bashkëshortja e tij ka deklaruar rreth 19 mijë euro fitime nga drejtimi i disa programeve.

Ndërsa si takon Berishës, ata që kanë pasuri shumë të lartë janë fëmijët e tij. Vetë Berisha ka deklaruar 4 llogari bankare të tij dhe të bashkëshortes, si dhe pagën e tij si deputet dhe pensionin e zonjës Liri Berisha. Por ajo që bie në sy janë të ardhurat e fëmijëve Shkëlzen Berisha dhe Argita Malltezi. Shkëlzen Berisha ka përfituar rreth 30 mijë euro nga konsulencat, ndërsa duket se ka një rënie në llogaritë bankare dhe ka shlyer shumë borxhe.

Në 5 llogari bankare ka pasur rënie të parave, ndërsa bie në sy se Shkëlzen Berisha ka një llogari bankare dhe në Suedi. Ndërsa sa i takon Argita Berishës pasuria e saj është relativisht më e lartë. Në 7 llogari bankare ka pasur shtim të të ardhurave, ndërsa rënie ka pasur në 2 prej tyre. Zonja Malltezi ka deklaruar 22 977 euro nga konsulenca dhe rreth 40 mijë euro nga qeratë. Po ashtu të ardhura ka nga mësimdhënia si pedagoge në universitete publike dhe private dhe nga shitja e librave.

Ish-ministrat e PD

Nga deklarimet për vitin 2017, ajo që bie në sy është se ish-ministrat apo ish-zv/ministrat e PD vijojnë të kenë pasuri relativisht të larta. Florion Mima rezulton të ketë një pasuri vërtet të lartë. Ai ka të ardhura nga qeratë, nga bashkëshortja, ndërsa rezulton me shumë llogari bankare. Ndërsa Edmond Spaho, kreu i grupit parlamentar të PD, ka shpenzuar rreth 8 mijë euro për të shkolluar fëmijët jashtë vendit. Një tjetër ish-ministër është Halim Kosova, i cili rezulton me të ardhura shumë të larta.

Ai ka deklaruar fitime nga qeratë, si dhe nga fitimet si mjek pranë spitaleve private. Po ashtu me të ardhura të larta rezultojnë bashkëshortja dhe fëmijët e tij, duke marrë mijëra euro në vit. Edhe Tritan Shehu renditet në këtë mes, i cili gjatë vitit 2017 ka shitur apartamentin. Ndërkohë ka shumë deputetë që deklarojnë vetëm të ardhurat nga paga e tyre dhe e bashkëshortëve.

Sipas informacioneve, gjatë vitit 2018 ILDKP ka planifikuar të zhvillojë një kontroll të plotë të pasurisë për ministrat, deputetë dhe funksionarët e tjerë. Kjo do të thotë se do të kontrollohen të ardhurat që nga dita e parë e deklarimit të pasurisë dhe deri më sot. Kush rezulton me pasuri të pajustifikuar do të duhet të përballet me ligjin./ SOT

Lëvizja Socialiste për Integrim prej disa kohësh është përfshirë nga një krizë e brendshme. Edhe pse kryetarja e LSI, Monika Kryemadhi e ka evituar këtë fakt, duke mos e pranuar, një krizë e tillë sa vjen dhe bëhet më e dukshme. Që prej daljes në opozitë dhe më konkretisht qysh në momentin që LSI faktoi aleancën opozitare me Partinë Demokratike disa deputetë të kësaj force nuk po i binden më Kryemadhit. Konkretisht bëhet fjalë për deputetët Robert Bitri, Vangjel Tavo, Nasip Naço, Lefter Koka, Agron Çela, Edmond Haxhinasto dhe Viktor Tusha.

Të gjithë këta deputetë gjatë gjithë kësaj legjislature në një farë mënyre janë treguar të distancuar ndaj Kryemadhit, pasi disa herë radhazi nuk i janë bindur urdhrave të saj sa i takon aksionit opozitar. Madje këta deputetë janë shfaqur indiferent edhe sa i takon bashkëpunimit me Partinë Demokratike.

Kjo për faktin se shpesh në komisionet parlamentare, por edhe në seancat plenare ka pasur një moskoordinim veprimesh apo më saktë një distancim të deputetëve të LSI ndaj atyre demokratë. Madje, një gjë e tillë është pasqyruar më së shumti gjatë këtyre javëve të fundit.

Në seancën plenare të së enjtes deputeti Robert Bitri, i cili ka qenë dhe deputeti i parë rebel ndaj Kryemadhit, nuk iu bashkua sërish grupit parlamentar të LSI dhe atij të PD gjatë bojkotit të Parlamentit. Madje, ai përveç kësaj u rreshtua krah deputetëve të mazhorancës gjatë miratimit të rendit të ditës.

Sakaq, po dy javë më parë deputeti tjetër i LSI, Agron Çela qëndroi në seancë duke mos iu bashkuar grupit gjatë bojkotit të seancës. Ndërsa të njëjtën gjë bënë dhe deputetët Vangjel Tavo dhe Lefter Koka në seancën plenare të tre javëve më parë. Veprime që ndonëse u justifikuan para pak ditësh nga ana e Kryemadhit se kanë qenë për arsye teknike, duket se më së shumti kanë qenë një rebelim kundër aksionit opozitar të ndërmarrë nga LSI.

“Rebelët” rrëzojnë aksionin opozitar

Bashkëpunimi Basha-Kryemadhi ndonëse u krijua kundër qeverisë ka shkaktuar përçarje brenda kampit të LSI. Qysh prej caktimit të aksionit opozitar për mosbindje civile dhe bojkot të komisioneve parlamentare, deputetët e LSI kanë qenë të parët që kanë rrëzuar këtë aksion. Ishte fillimisht deputeti i LSI, Robert Bitri ai i cili hodhi poshtë urdhrat e Bashës dhe Kryemadhit dhe më pas Edmond Haxhinasto, Nasip Naço etj.

Kjo për faktin se deputetët e LSI, kanë marrë pjesë rregullisht në komisionet parlamentare madje përveç diskutimeve ata kanë bashkuar edhe votat e tyre me mazhorancën gjatë miratimit të projektligjeve. Por përveç kësaj, në radhët e aksionit opozitar deputetët “rebel” janë shfaqur të distancuar edhe gjatë aksioneve që ka ndërmarrë opozita në Parlament ku ka bllokuar foltoren në shenjë proteste kundrejt kryeministrit.

Veprime që shpesh nuk janë mirëpritur nga ana e 6 deputetëve të LSI, të cilët nuk janë bërë pjesë e këtyre shfaqjeve ndonëse Kryemadhi apo deputetë të tjerë të kësaj force janë bashkuar me demokratët. Ndërkaq, distancimi i deputetëve të LSI nga PD u pa dhe para pak ditësh në protestën që opozita zhvilloi para Ministrisë së Brendshme ku deputetët e LSI nuk morën pjesë ndonëse Kryemadhi tha se partia e saj do rreshtohej krah PD.

Deputetët “braktisin” Kryemadhin

Kryetarja e LSI, Monika Kryemadhi duket se po braktiset nga deputetët e saj. Kjo sepse deputetët rebel përveç distancimit ndaj PD po shtojnë pakënaqësitë edhe ndaj Kryemadhit. Madje ata po braktisin edhe seancat plenare. Deputeti Vangjel Tavo si dhe Agron Çela për rreth 6 muaj nuk janë bërë pjesë e punimeve parlamentare. Kohë që tregon se pavarësisht problemeve që mund të kenë, është dhe një sinjal rebelimi ndaj Kryemadhit.

Kjo sepse deputeti Tavo edhe pse ka munguar për arsye familjare, akuzat e LSI të bëra ndaj tij në lidhje me lobimin në SHBA, duket se kanë ngjallur tek ky i fundit një pakënaqësi. Megjithatë ngelet për tu parë sesi do të vijohet nga ana e Kryemadhit për të shuar këto rebelime pasi gjatë ditëve të fundit janë shtuar akoma më shumë./ SOT