Një nga hitet më të bukura të vitit të kaluar që vazhdon edhe sot e kësaj dite të na shoqërojë në ditët më të lumtura është padyshim “Skifterja e Zemrës” e Bes Kallakut dhe Klajdi Harunit.
Edhe pse në shtator bëhet plot 1 vit që prej publikimit, kënga vazhdon të dëgjohet si të ishte publikuar dje.
Ama, jo vetëm shqiptarët, por edhe grekët duket se janë “çmendur” pas skifteres.
Reperi i njohur grek TUS i njohur nga bashkëpunimi me Brunon, “Shqiptare” ka risjellë “Skifterja e Zemrës” në versionin grek, të titulluar “Zemra”.
Kënga është në bashkëpunim me Plazan dhe sigurisht i këndohet një vajze shqiptare, të cilën këngëtarët e kërkojnë në Shqipëri.
E kam thënë edhe herë të tjera që fjalët e mira dhe epitetet e mëdha i rezervojmë për artistët kur ata nuk janë më mes nesh. Edhe pse të paktë janë atë që meritojnë fjalën “artist” e që meritojnë të lëvdohen e shpërblehen sa janë në jetë, rrallë ndodh që të dëgjosh vlerësime prej vërteti për ta. Dua të them nderime me tituj, siç ndodh në të gjithë botën, ku për shkak të kontributit që jep, një artist merr tituj e dekorata. Zakonisht ne kemi qejf t’ua japim kur nuk u hyjnë më në punë, pikërisht kur nuk janë mes nesh.
Nejse, bëra gjithë këtë hyrje për të thënë se kisha shumë dëshirë ta bëja këtë shkrim për një artiste me A të madhe si Aurela Gaçe e nuk dua të pres kur të mos jetë më, për t’i kushtuar një status epik apo shkrime pa fund, siç e do zakoni. Rastisa të dëgjoja në Youtube disa këngë të vjetra të muzikës botërore dhe nga faqja në faqe më doli përpara kënga “Nata” e Aurelës.
Doni ju që u bëra nostalgjike dhe fillova të dëgjoja gjithë repertorin e saj! Është e tepërt të flas për tekstin, muzikën apo interpretimin e saj fantastik, por çfarë më bëri përshtypje më shumë ishte çmenduria, guximi artistik i saj. Në një kohë kur vështirë të konceptoheshin thyerjet e tabuve dhe daljet nga klishetë, Aurela kapërcente veten në çdo performancë e dalje publike. E them me bindje se kjo artiste ka qenë një revolucionare që ka ndihmuar edhe në emancipimin e femrës shqiptare.
Artistja “e çmendur” që dilte zbathur në festival apo që qethte kokën dhe e bënte të bardhë e që çuditërisht nuk shikohej me dyshim nga publiku. Karizma e saj është e lindur, Aurelën e duan, e kanë dashur që në momentin e parë që e kanë dëgjuar. Ndoshta sepse ajo nuk përpiqet të jetë skandaloze dhe nuk i bën çmenduritë për të rënë në sy. Ajo nuk ka nevojë të tërheqë vëmendjen me zhveshje të sforcuara apo skandale që nuk i rrinë personalitetit të saj.
Aurela është një vullkan dhe si e tillë është e paparashikueshme, me të mund të ndodhë gjithçka në skenë. Ajo nuk është thjesht këngëtare dhe performuese, ajo është një showgirl. Mbaj mend koncertin e saj të parë recital dhe emocionet që kam ndierë kur e shikoja. Kam qenë e vogël, por mbaj mend që Aurela ka qenë artistja ime shqiptare, ndoshta e vetmja, e preferuar. Teksa e shikoja të imitonte kolegët e saj apo edhe legjenda si Charlie Chaplin apo tek bënte humor e shkëmbente batuta me publikun, shtuar kësaj edhe interpretimet rrëqethëse, si “E pafajshme jam” ose “E kemi fatin shpresë dhe marrëzi”, kuptoja që kjo figurë ishte poliedrike, ishte përkufizimi i fjalës artiste.
Më vonë, kur u rrita dhe fillova të kuptoja më shumë, habitesha gjithsesi për gjurmët që kishin lënë tek unë këngët dhe performancat e Aurelës që në vegjëli. Të prekësh shpirtin e një fëmije është gjenialitet.
Unë e them pa frikë se Aurela është një dhe e vetme në llojin e saj; çuditërisht nuk ka ndryshuar fare që nga recitali i saj i parë e deri në daljet e fundit. Është një burim i pashtershëm energjish, vazhdon eksperimenton deri në hallakatje me stilin e saj, pa e vrarë mendjen nëse e kalon masën apo se nuk i shkojnë. Aurelës i shkojnë të gjitha, sepse kur ajo hap gojën askush nuk e ka mendjen te çfarë ka veshur apo sa e ka masën e gjoksit; i ka fryrë buzët apo jo.
Është një personazh i thjeshtë dhe komunikon lirshëm me fansat e saj, pa u fryrë e u pompuar duke reklamuar jetën luksoze apo eurot që i hedhin në performancat e saj. Ajo e merr gjithçka lehtë dhe me humor. Po ta ndiqni në Instagram e Facebook e kuptoni mirë për çfarë e kam fjalën.
Përveç publikut që, siç e thashë, gjithmonë e ka dashur dhe e ka mbështetur dhe përveç anës materiale që, si e zonja që është, nuk ia lë rastësisë, do të doja që figura si ajo të nderohen e të quhen pika referimi për të rinjtë e industrisë së muzikës. Një këngëtare që nuk u zhvesh kurrë për ca klikime më shumë, që nuk u komprometua nga muzika e shëmtuar dhe që nuk ndryshoi asnjëherë marrëdhënien me publikun dhe që sot është në rangun e një ylli.
Ashtu si në skenë, kush ka pasur fatin ta njohë në jetë e di se ajo është po aq energjike, sportive e pa komplekse.
Nuk bën Aurelën e Olimpit, por përkundrazi flet me një lirshmëri që të duket sikur e ke shoqe prej vitesh, sepse njeh Aurelën e ekranit.
Një vullkan si Aurela Gaçe jam e bindur që do e kemi në skenë për shumë kohë, sepse ajo nuk njeh moshë dhe kohë dhe, siç e ka thënë vetë, edhe kur të jetë 80 vjeçe do të jetë po aq e çmendur në look, me flokët blu ndoshta e fustan me zinxhirë, por e sigurt është se fuqia e saj skenike do të jetë e njëjtë me atë të Aurelës 20-vjeçare. Një artiste si ajo është përgjithmonë 20 vjeç, një sfidë e hapur për çdo të ri që kërkon të lërë gjurmë… sepse yjet lindin, nuk bëhen.
Hetimi Tatimor ka bllokuar një resort luksoz buzë detit në fshatin turistik të Qeparoit.
Dyert e resortit janë bllokuar me shiritat e Tatimeve pasi është gjetur pa kupon tatimor për herë të dytë, shkelje që në raste të ngjashme këtë verë, është ndëshkuar me mbyllje të aktivitetit për 30 ditë, raporton Newsbomb.al.
Sipas opozitës ky resort i ndërtuar buzë detit pak vite më parë i përket ish deputetit Koço Kokëdhima. Por ky i fundit gjatë një interviste televizive në atë kohë tha se s’ka asnjë lidhje me resortin që është në pronësi të vëllait të tij dhe familjes.
Gjatë këtyre ditëve, masa të ngjashme për moslëshimin e kuponit tatimor janë marrë edhe ndaj bizneseve të tjera në bregdet nga Velipoja në Sarandë./newsbomb
Sezoni turistik i këtij viti ka qenë i suksesshëm në Gjirokastër. Të paktën nëse i referohemi vetëm numrit të vizitorëve në kala.
Shifrat e bëra publike nga Drejtoria e Kulturës Kombëtare në Gjirokastër, tregojnë për rritje me mbi 60% të numrit të vizitorëve për 7 muajt e parë të këtij viti krahasuar me të njëjtën periudhë të vitit të kaluar.
Gjatë vitit 2017 për periudhën janar-korrik, numri i vizitorëve është 31,085 ndërsa po për të njëjtën periudhë të vitit 2018 numri i vizitorëve është rritu në mënyrë të ndjeshme me 50,481 turistë vendas dhe të huaj të cilët vendet që mbartin histori i kanë kthyer tashmë në destinacionet më të preferuara gjatë viteve të fundit.
Kalaja është një histori e lidhur me qytetin e Gjirokastrës dhe përmendet për herë të parë si qytet dhe kështjellë në vitin 1336.
Kulmin e historisë së saj kjo kështjellë do ta kishte në periudhën e Pashallëkut të Janinës, kur Ali Pashë Tepelena do të realizonte një sërë ndërtimesh të reja apo ndërhyrje të tjera, duke i dhënë Kalasë së Gjirokastrës fizionominë arkitektonike dhe ndërtimore që ka sot.
Duke filluar nga viti 1968-t skena e gurtë e Kalasë së Gjirokastrës do te priste me bujari instrumentistët, këngëtarët dhe valltarët e folkut ne kuadër të Festivalit Folklorik të Gjirokastrës.
Njëkohësisht gjatë këtyre viteve mjediset e Kalasë kanë shërbyer edhe për organizimin e koncerteve, spektakleve dhe panaireve të ndryshëm kulturorë. Kalaja e gurtë është edhe një prej pikave më tërheqëse në guidat e grupeve turistike vendase dhe të huaja që vizitojnë Gjirokastrën e mbrojtur nga UNESCO.
Falë vlerave historike dhe arkitektonike që mbart kështjella e gurtë e Gjirokastrës, vazhdon të ngelet monumenti më i preferuar për tu vizituar nga grupet turistike vendase dhe të huaja përgjatë guidave dhe udhëtimeve të tyre në zonën e Gjirokastrës. /atsh
Prefekti i Gjirokastrës, Astrit Aliaj, mblodhi në një takim të jashtëzakonshëm Komisionin e Planifikimit, Përballimit të Emergjencave dhe Krizave për qarkun e Gjirokastrës.
Duke marrë shkas nga situata e rëndë e ndodhur si pasojë e zjarreve të mëdha në shtetin fqinj, Greqi, në hapje të këtij takimi prefekti i qarkut propozoi mbajtjen e 1 minute heshtje në nderim të viktimave të kësaj tragjedie.
Në vazhdim të takimit, Prefekti i qarkut Astrit Aliaj ka vënë në dukje disa problematika të krijuara në qarkun e Gjirokastrës si pasojë e zjarreve.
Në zbatim të planit të masave, Prefekti i qarkut kërkoi angazhimin e të gjitha strukturave shtetërore dhe njësive të vetëqeverisjes vendore për marrjen e masave të nevojshme për menaxhimin e situatave të mundshme që mund të krijohen nga zjarret në pyje dhe kullota. Është konsideruar si domosdoshmëri përshpejtimi i masave tekniko-organizative të strukturave monitoruese dhe vepruese për parandalimin, shmangien dhe minimizimin e dëmeve nga situatat e mundshme emergjente. /atsh
Kanë mbetur më pak se 24 orë nga koncerti madhështor i këngëtarit nga Porto Rico, Daddy Yankee, në sheshin “Skënderbej”, në kryeqytet.
Organizatorët po vijojnë punën për të ngritur një skenë prestigjoze, ku do të performojë këngëtari, por edhe krijimin e ambienteve mikpritëse për të gjithë spektatorët.
Koncerti do të startojë me Encën dhe Ledri Vulën, që do të ngrohin atmosferën, para se Daddy Yankee të nisë performancën e tij madhështore, që do të zgjasë rreth 90 minuta.
Këngëtari i hiteve reggaeton Dura, Gasolina e Despacito do bëj që fansat e e tij të argëtohen dhe të kërcejnë nën ritmet latine në këtë sezon veror.
Biletat shiten në sheshin “Skënderbej”. Të ndara në disa kategori, ato nisin nga 19.5 euro, ndërsa për ata që duan më shumë komoditete si tavolina, ndenjëse dhe një pamje më të mirë të skenës, koncerti rezervon zonat Vip Gold, Platin dhe Diamant./atsh
Veliaj: “Je frymëzim për të rinjtë; solidaritet me situatën në Athinë”; Foureira: “Tirana qytet shumë i bukur, ka ndryshuar; dua t’ju bëj krenarë”
TIRANË, 27 Korrik/ATSH-A.Fortuzi/- Pas performancës së shkëlqyer mbrëmjen e dy ditëve më parë në sheshin “Skënderbe”, kryetari i Bashkisë së Tiranës, Erion Veliaj priti dje këngëtaren e njohur me origjinë shqiptare, Eleni Foureira.
Pasi e falënderoi spektaklin që u ofroi qytetarëve të Tiranës me muzikën e saj, Veliaj i dorëzoi Elenit “Çelësin e Tiranës”, në shenjë mirënjohje për frymëzimin e shumë të rinjve shqiptarë.
“‘Çelësi i Tiranës’ është për njerëz shumë, shumë të veçantë, një mënyrë për të treguar se për miqtë tanë dyert e qytetit janë gjithmonë të hapura. Ti je pjesë e familjes tonë dhe ne jemi shumë krenarë për atë çka ti bën, jo vetëm si artiste e madhe, por njëkohësisht si njeri shumë i mirë”, tha Veliaj.
Këngëtarja Foureira u shpreh e lumtur për këtë vlerësim, ndërsa theksoi se ndihej krenare që ishte shqiptare. “Faleminderit shumë! Jam shumë e lumtur, pasi gjithmonë jam ndierë krenare për faktin e të qenit shqiptare dhe jam shumë e lumtur dhe krenare që ndihem kështu. Shumë faleminderit për këtë. Gjyshja ime që ndodhet tani në Vlorë, do ndihet shumë e lumtur! Edhe unë jam shumë e lumtur që ju kam bërë krenarë dhe gjithmonë do mundohem t’ju bëj ju (Shqipërinë), Greqinë dhe Qipron, të 3 vendet e mia, krenarë”, tha këngëtarja me origjinë shqiptare.
Ajo vlerësoi ndryshimin që ka pësuar Tirana, duke theksuar se i ka bërë shumë përshtypje bukuria dhe mikpritjen e kryeqytetit të shqiptarëve. “Faleminderit shumë Shqipëri. Është një vend ndryshe, Tirana është një qytet shumë i bukur. Përgëzime për çka keni bërë; njerëzit janë të mrekullueshëm. Jam tejet e impresionuar nga fakti se sa të mirë janë dhe me sa respekt të trajtojnë. Koncerti ishte i mrekullueshëm, turma ishte e jashtëzakonshme, ndaj sa herë që ju të më ftoni, unë do të jem këtu”, u shpreh Foureira.
Kryebashkiaku Veliaj shprehu edhe solidaritetin e Tiranës me popullin grek për fatkeqësinë që përfshiu Athinën me zjarret dhe informoi Elenin me vendimin më të fundit të Këshillit Bashkiak, për t’i ofruar ndihmë financiare për tejkalimin e situatës.
“Jemi shumë të lumtur sot që Këshilli Bashkiak miratoi një fond ndihme për vëllezërit e motrat tona në Greqi, sepse mendoj që është e rëndësishme që në kohë nevoje, zbulojmë se cilët janë miqtë tanë të vërtetë. Mendoj se Greqia dhe populli grek hapën dyert për ju, atëherë kur ti dhe familja jote kalonit kohë të vështira, ashtu si edhe unë, një 10-vjeçar, kalova në Greqi përmes maleve, ndaj kam një respekt të madh dhe mendoj se është mirë që të tregojmë në kohë krizash, pavarësisht se çfarë politika apo njerëzit civilë thonë, shumica kujdeset dhe duan njëri-tjetrin”, përfundoi Veliaj. /atsh
Vëzhguesve të qiellit do t’i ofrohet sot eklipsi më i gjatë i hënës së përgjakur në gjithë këtë shekull.
Ndërsa ngrihet, gjatë eklipsit total, sateliti natyror i tokës do të mbulohet nga një hije e kuqe apo e murrme. Periudha e eklipsit total, kur drita e hënës do të zbehet plotësisht, do të zgjasë për një orë e 43 minuta.
Eklipsi është i dukshëm nga Europa, Lindja e Mesme, Afrika, Australia, pjesa më e madhe e Azisë dhe Amerika e Jugut. Në rajonin tonë, ai do të mund të shihet rreth orës 22.00. Po sonte dhe gjatë ditëve në vijim, marsi do të jetë në pikën më të afërt me tokën që nga 2003, dhe do të jetë i dukshëm në formën e një ylli të shndritshëm të kuq, kur qiejt të jenë të pastër.
Sipas shkencëtarëve, shfaqja e marsit në të njëjtën kohë me eklipsin hënor, nuk është e vetmja koincidencë. Bëhet fjalë sipas tyre për një procesion planetësh, një renditje e fqinjëve tanë qiellorë që do ti ofrojë vëzhguesve të qiellit një shikim veçanërisht të rrallë të Afërditës, Jupiterit, Saturnit dhe marsit./atsh
