Aurora

Zëvendëskryeministri dhe Ministri i Brendshëm Nebojsha Stefanoviq, tha sot se qeveria e Serbisë do të ndalojë blerjen e pronave serbe nga shqiptaret e Kosovës në Luginën e Preshevës.

Stefanoviq, kur u pyet në një konferencë shtypi që policia po punojnë për të parandaluar shqiptarët e Kosovës që janë gjithnjë e më shumë bleres të pronës në jug të Serbisë dhe në këtë mënyrë po bëhet ndryshime demografike, tha se ekziston një pjesë e qytetarëve tanë të kombësisë shqiptare të cilët janë duke u përpjekur për të blerë pronat serbe.

Disa qytetarë të nacionalitetit shqiptar janë duke blerë prona, dhe  tokë te kompanive në territorin e Serbisë qendrore./njekomb

Pas zjarrit masiv që shkrumboi disa zona në periferi të Athinës, duke lënë pas mbi 88 viktima e qindra të lënduar, ngrihet shqetësimi nëse edhe vendi ynë rrezikohet nga zjarret.

Vala e nxehtësisë në verë është rritur dukshëm në dekadat e fundit, çka sjell për rrjedhoje edhe rrezik të shtuar për prani të vatrave të zjarrit. Në parashikimet e tyre, sinoptikanët flasin për rritje të temperaturave në ditët në vijim, ndërsa vendi pritet të pushtohet nga i nxehti afrikan.

Instituti i Gjeoshkencave ka dalë me një njoftim ku sqaron se Shqipëria nuk kërcënohet nga zjarret këtë verë, dhe kjo për faktin se vendi është dominuar nga masa ajrore të paqëndrueshme, ku nuk kanë munguar reshjet e shiut.

Megjithatë, rreziku mbetet. Precedentët kujtojnë se dukuritë natyrore nuk janë i vetmi shkaktar i vatrave të zjarrit. Dora e njeriut, apo zjarret e qëllimshme, mbeten ende një rrezik i këtij fenomeni.

Drejtori i Shërbimit Zjarrfikës për Tiranën, Shkëlqim Goxhaj, është shprehur se edhe vendi ynë është i rrezikuar nga zjarret në pyje, shkurre dhe kullota. Sipas tij, më të rrezikuara janë vendet bregdetare.

Në emisionin “Kjo javë” në “News24”, ai tha Shërbimi Zjarrfikës ka marrë një sërë masash për të parandaluar zjarret, dhe për të koordinuar strukturat në mënyrë që situata të tilla të menaxhohen në mënyrën më të mirë të mundshme.

“Mendoj se edhe vendi ynë është i rrezikuar nga zjarret në pyje, shkurre dhe kullota. Më të rrezikuara janë vendet bregdetare. Siç kem parë dhe nga viti i kaluar, pavarësisht se Tirana pati një numër të madh zjarresh, ne nuk patëm dëme në banesa ose në jetën e qytetarëve. Kjo për arsye edhe të rrymave të ajrit. Vitin e kaluar zjarret më të rrezikshme kanë qenë në Lezhë, Vlorë, në Llogara. Edhe në zonën e Tiranës jemi gjendur nën ndryshimin e rrymave të ajrit në zona të ndryshme, duke ndikuar tek përhapja e zjarreve”, u shpreh Goxhaj.

Ai bëri apel që qytetarët të bëhen më të ndërgjegjshëm sa i takon rrezikut nga zjarret, dhe të mos tentojnë të djegin mbeturina, apo territore të caktuara me të mbjella, apo bimësi./news24

Kryeministri Edi Rama ka reaguar pas qëndrimeve të vazhdueshme të opozitës lidhur me vendimet e Komisionit të Pavarur të Kualifikimit për gjyqtarët dhe prokurorët.

Në një postim në facebook, Rama thekson se “Vetingu vijon të godasë me sukses në kokë oktapodin e korrupsionit degjenerues në drejtësi”.

“Po për fatkeqësinë e zgjedhësve të saj që e mbështesin Vetingun, njësoj si gjithë qytetarët e për turpin e saj më të madh, opozita hidhet përpjetë pas çdo goditje. Humbësa Pa Pikë Dinjiteti”, deklaron Kreu i Ekzekutivit./atsh

Me nderime të larta shtetërore, i ëtshë dhënë sot lamtumira e fundit veprimtarit të njohur politik dhe aktivistit për të drejtat e njeriut, Adem Demaçi. Ai vdiq të enjten në Prishtinë në moshën 82-vjeçare.

Gjatë fjalimit të tij në ceremoni, Presidenti Hashim Thaçi, vlerësoi lart jetën dhe veprën e veprimtarit të çështjes kombëtare Adem Demaçi.

Kreu i Shtetit në ceremoninë mortore kushtuar Demaçit, tha se sot po i thonë lamtumirë personit më emblematik prej periudhës së Gjergj Kastriotit-Skënderbeut. Sipas tij, kombi shqiptarë po ndahet fizikisht nga “kolosi Adem Demaçi”.

“Kosova dhe mbarë bota shqiptare po ndahet nga Adem Demaçi, një personalitet historik, i jashtëzakonshëm, me integritet të lartë intelektual, letrar, politik dhe kombëtar. Bota po ndahet nga mandela i Europës. Adem Demaçi me tërë qenien fizike, mendore, intelektuale e morale, jetoj për një qëllim, çlirimin e shqiptarëve nga Jugosllavia dhe Serbia de bashkimin e shqiptarëve. Rininë, shpirtin e talentuar e plotë dhunti dhe moshën e burrërisë Adem Demaçi i flijoj 28 vite në burgjet jugosllave pa u thyer e pa u mposhtur ndonjëherë”, tha Thaçi.

Vdekja e Demaçit, sipas presidentit Thaçi ka lënë një zbrazëtirë të madhe në historinë e kombit shqiptarë. Kreu i shtetit shtoi se ngjarjet e mëdha e të lavdishme ishin vet Adem Demaçi.

“Adem Demaçi ishte dhe do të mbetet ndërgjegjja jonë kombëtare e demokratike, simbol i qëndresës e humanizmit, i burgosuri shqiptar politik numër një në ish Jugosllavi, i burgosur i ndërgjegjes numër një në Evropë. Nga i munguar në 28 vjet, ai u shndërrua në frymëzues të gjithë pranishëm për brezat e ardhshëm që ndoqën dhe përqafuan idealin e lirisë dhe rrugën e çlirimit. Adem Demaçi ideal jetësor e kishte bashkimin e shqiptarëve. Parmi themelor i filozofisë së tij politike mbështetej tek ideja që hapi i parë i lirisë dhe çlirimit duhet të merret nga vetvetja. Prandaj Adem Demaçi ishin ngjarjet dhe kthesat politike të Kosovës me 1968, 1981, 1989, Adem Demaçi, ishte lufta e lavdishme e UÇK-së”, theksoi Thaçi.

Presidenti i Shqipërisë Ilir Meta, tha se sot t’i japin lamtumirën e fundit heroit të pa shembullt të rezistencës për liri dhe dinjitet kombëtar e njerëzor.

“Qëndroj, luftoj dhe fitoj, duke u bërë për të gjithë shqiptarët modeli dhe shembulli i përkushtimit për atdheun, i sakrificës dhe i dashurisë për të, i vetëmohimit dhe i dedikimit për gjithçka e pa cak për lirinë e popullit. I dashur baca Adem, jeta jote ishte luftë, dhe ti këtë luftë e fitove, jeta jote ishte sakrificë pa mbarim, por ti ja dole ta përballosh e t’i sfidosh ato si rrallë kush me urti e fisnikëri, sepse ti ishe dhe mbete Adem Demaçi i Kosovës dhe Kosova, dashuria e shpirtëzuar në ty”, ka thënë presidenti Meta.

Kryeministri i Kosovës, Ramush Haradinaj tha se “baca Adem i mësoi rrugën drejt lirisë” të gjithëve.

Haradinaj, e ka quajtur veprimtarin e çështjes kombëtare Adem Demaçin si të vetmin që dha me së shumti për së gjalli nga të gjithë.  Sipas kreut të Qeverisë, Demaçi ishte sikur të gjithë, por i veçantë në veprën e tij, ndërsa i vetmi në brezin e tij.

“Kur të tjerët u ndalen, bac, ti vazhdove, kur të tjerët u gëzuan me të drejtat e pjesshme, ty të mundonte padrejtësia e djeshme. Ti ishe i vetëm në të drejtën e plotë, kur të tjerët iu gëzuan lirisë së pjesshme, ty të mundonte robëria e djeshme, ti ishe për liri me të drejta të plota. Nuk ka si ti baca Adem që për së gjalli dhanë kaq shumë sa dhe ti nga e drejta jote për jetë, e për liri, që ne të jetojmë të lirë. Ti dhe nga liria jote për lirinë tonë me së shumti, nga gjithë ne për së gjalli. T’i na mësove rrugën deri të liria”, tha Haradinaj.

Për ta nderuar këtë ceremoni, mori pjesë edhe kryetari i BDI-së në Maqedoni, Ali Ahmeti i cili tha se një jetesë si kjo e bacë Ademit që ka ndikuar tek tjerët nuk shuhet asnjë herë, vijon përjetësisht.

“Një jetë që u shndërrua në frymëzim për të gjithë ne, i një veprimtari që më së miri përfytyron rezistencën kombëtare, një karakter që qëndron themeli i pavarësisë së Kosovës, një kontribut që u bë shëmbëlltyra e përpjekjeve të gjeneratave të tëra për liri. Qiriri digjet, shkrihet për të bërë dritë të tjerëve, jeta e Demaçit i ngjason qiririt që u bë dritë dhe do të vazhdon të na ndriçon rrugën tonë përpara. Ky burrë para nesh, Adem Demaçi, i madh, i pa përsëritshëm, i pa arritshëm, i përhershëm”, u shpreh Ahmeti.

Në emër të familjes Demaçi, fjalë rasti para të pranishmëve mbajti e bija e Demaçit, Abetarja. E cila tha se ndau babain e saj me të gjithë shqiptarët.

“Ai tha, më e rëndësishme në jetë është të njohësh vetveten. Me këtë unë shumë mirë e kuptova thellësinë e mesazhit. Jam i bindur se një njeri që u sakrifikua për shqiptarizmin dhe çdo që ndërlidhej me shqiptarizmin, ai donte të thoshte se po ta njihnin shqiptarët vetën mirë do të mund të ishin kritik ndaj vetveten, do të kuptonin se si çdo e keqe rrjedh nga vetvetja, do të përpiqeshin ta përmirësonin vetveten si individ e pastaj do ta kuptoni se vetëm në mënyrë kolektive do të luftohet e keqja, do të kërkonin ta nxjerrin me të mirën nga vetvetja. Në këtë mënyrë ata asgjë nuk mund t’i ndalte çfarëdo që kërkojnë dhe donë ata. Po kështu si jemi nuk e njohim vetveten, nuk e dinë rëndësinë e bashkimit për një rrugë e një qëllim, do të na përsëritet historia”, u shpreh ajo./kosovapress

Këtë javë, rubrika “Histori e Diplomacisë Shqiptare” prezanton pjesë nga përpjekjet e qeverisë shqiptare për vendosjen e marrëdhënieve diplomatike me SHBA, proces që u finalizua me 28 korrik 1922.

Pas vendimit të 9 nëntorit 1921 të Konferencës së Ambasadorëve , i cili rinjohu statusin juridik të shtetit shqiptar, si shtet i pavarur e sovran,  dhe kufijtë politikë të tij të përcaktuar në Konferencën e Ambasadorëve 1913, u hap drita jeshile për njohjen e qeverisë së re shqiptare. Pas njohjeve të para nga disa prej Fuqive të Mëdha, qeveria shqiptare nxitoi të kërkonte edhe njohjen e qeverisë amerikane. Me 17 nëntor 1921, Komisionieri (përfaqësuesi jo-zyrtar) i qeverisë shqiptare në Uashington, Konstantin Çekrezi, dorëzoi kërkesën për njohje në Departamentin e Shtetit.

Kërkesa u përsërit nga qeveria shqiptare në 7 qershor 1922. Qeveria e SHBA kishte dërguar në Shqipëri përfaqësuesin e saj  jo-zyrtar  Maxwell Black,  me një mision hetimi paraprak për situatën politike në Shqipëri pas mbërritjes së kërkesës së qeverisë shqiptare për njohje. Black kreu disa takime me përfaqësues të qeverisë shqiptare si dhe ndoqi zhvillimet politike në vend .

Me 28 korrik 1922, ai i dorëzoi Xhafer Ypit në cilësinë e Kryeministrit të vendit  dhe Ministrit të Punëve të Jashtme notën e njohjes së qeverisë shqiptare nga SHBA. Deri në vendosjen e marrëdhënieve të rregullta diplomatike Black do të qëndronte në Shqipëri si Komisionier i SHBA në rangun e Ministrit të Jashtëzakonshëm e Fuqiplotë të SHBA. Në fillim të dhjetorit 1922 mbërriti në Tiranë përfaqësuesi i parë diplomatik i qeverisë amerikane  U.Grant-Smith, në cilësinë e  Ministrit të parë Fuqiplotë dhe të Jashtëzakonshëm të SHBA në Shqipëri. Me 4 dhjetor ai paraqiti letrat kredenciale.

Deri në prill 1922 qeveria shqiptare u përfaqësua nga Komisionieri Çekrezi në Uashington.  Me 25 gusht 1922 qeveria shqiptare vendosi të hapte Legatë shqiptare  në Uashington dhe caktoi si Ministër Fuqiplotë dhe të Jashtëzakonshëm të Shqipërisë në SHBA Mit’hat Frasherin. Për arsye financiare të shtetit shqiptar Frasheri nuk u nis në Uashington dhe qeveria shqiptare u përfaqësua nga konsujt e saj në New York, Koço Tashko e më pas Abdi Sula. .

Në korrik 1926 emërohet Ministri i pare Fuqiplotë dhe i Jashtëzakonshëm shqiptar në Uashington, Faik Konica, i cili hapi Legaten shqiptare në SHBA dhe kreu këtë detyrë deri pak muaj pas pushtimit të Shqipërisë Gjatë kësaj periudhe  u nënshkruan  disa marrëveshje midis dy vendeve, ku mund të veçojmë disa prej tyre si; traktati mbi njohjen e pasaportave amerikane shtetasve amerikanë me origjinë shqiptare, traktati mbi suprimimin e taksës së vizës për pasaportat shqiptare dhe amerikane të personave joemigrantë, , traktati i arbitrazhit, traktati i miqësisë për paqen e përgjithshme, traktati i neutralitetit, traktati i ekstradimit të personave keqbërës,ej.

Rubrika “Historia e diplomacisë shqiptare”, synon t’i ofrojë publikut informacion të plotë për pasuritë arkivore historike të diplomacisë shqiptare.

Plot 6 milion dokumente të cilat paraqesin dëshmi arkivore mbi ngjarje e figura të caktuara, të cilat lanë gjurmë në politikën e jashtme duke vendosur standarde në rrugëtimin diplomatik të shtetit shqiptar do të publikohen online për të gjithë ata qe janë te interesuar.

Kjo rubrikë do të pasurohet çdo javë me informacione dhe dokumente të reja dhe synon të nxisë interesin dhe kuriozitetin publik mbi pasuritë tona arkivore. /atsh