Aurora

“Policia e Shtetit ka vepruar qartazi sipas ligjit me rastin “Xhesila”. Këtë pohoi të shtunën gjatë një deklarate për mediat, Romina Kuko, zv.ministre e Punëve të Brendshme.

“Pas një hetimi të hollësishëm të rastit të Xhesila Malokut, rezulton qartazi se Policia e Shtetit ka vepruar në mënyrë strikte konform ligjeve të shtetit dhe procedurave standarde,
gjë e cila është verifikuar edhe nga Shërbimi i Çështjeve të Brendshme dhe Ankesave si dhe Drejtoria e Standardeve të Policisë së Shtetit”, tha Kuko.

“Ne i qëndrojmë fort linjës institucionale e ligjore për të pasur një Polici të pandikuar ne veprimtarinë e saj nga askush pavarësisht ngjyrimit partiak, funksionit apo pozitës shoqërore. Në jo pak raste ne kemi dëshmuar për qëndrime të ashpra të Ministrisë së Brendshme ndaj çdo lloj devijimi në respektimin e këtij parimi”, theksoi ajo.

“Pezullimi i menjëhershëm nga detyra dhe referimi në prokurori i oficerit i cili nuk zbatoi siç duhet ligjin; pikërisht vlerësimi i rrethanave dhe mos tërheqja e policisë. Referimi i rastit në prokurori edhe pas tërheqjes së vetë kallëzueses. Bashkëpunimi me prokurorinë për t’i shkuar kësaj çështjeje deri ne fund, si dhe hetimi, i cili po vazhdon nga Shërbimi i Çështjeve të Brendshme dhe Ankesave, siç u prezantua dje me detaje, janë prova më e qartë e punës korrekte dhe institucionale e policisë”, nënvizon ajo.

“Hedhim poshtë me keqardhjen më të thellë të gjitha akuzat, shpifjet dhe insinuatat në kurriz të Policisë së Shtetit. Shprehim keqardhje që po abuzohet me të vërtetën dhe me vetë vajzën e cila sot ka nevojë për solidaritetin e të gjithëve. Keqardhje dhe për përdorimin si flamur beteje të letrës së një ish-oficeri policie i cili ka shkelur ligjin, ka braktisur detyrën dhe që i përdor këto për interesa të ngushta personale”, tha Kuko.

“Ne nxisim fort SHÇBA dhe Prokurorinë të vazhdojnë me vendosmëri punën e tyre për t’i shkuar deri ne fund hetimit te ngjarjes konkrete për të ndëshkuar ashpër çdo shkelje të mundshme ne strukturat e Policisë se Shtetit, ashtu si edhe ndëshkimin e çdo abuzimi me detyrën dhe ndëshkimin çdo lloj shpifje që synon te ndikoje apo të godasë autoritetin dhe imazhin e Policisë së Shtetit. Ne inkurajojmë procesin e nisur nga Avokati i Popullit për të verifikuar ligjshmërinë e veprimeve të Policisë”,  theksoi zv.ministrja Kuko./atsh

“Vajza meriton drejtësi dhe mbështes institucionet e drejtësisë t’i shkojnë deri në fund çështjes” ka deklaruar sot, kryeministri Edi Rama në një konferencë për mediat, nga Korça, duke theksuar se askush s’është mbi ligjin.

Pyetjes për rastin e Xhesila Malokut, ku është përfolur edhe emri i dy deputetëve të PS-së, Rama iu përgjigj se “qëndrimi im është ai që ka qenë gjithmonë. Për mua askush nuk është mbi ligjin dhe për Partinë Socialiste askush nuk është mbi ligjin. Në këtë qëndrim se kemi me fjalë, por e kemi materializuar sa herë jemi ballafaquar me fakte”.

“Së pari, jetojmë në një kohë dhe fatkeqësisht në një mjedis ku kjo kohë e mbrapshtë e gënjeshtrës dhe e shpifjes është kthyer në terror informativ për qytetarin dhe mishërohet te partia kryesore e opozitës, që do të thotë se nuk jam këtu t’u përgjigjem akuzave haluçinante, të pabazuara në asnjë fakt që bëhen për mua apo koleg të mi”, tha ai.

“Nga ana tjetër, për sa i përket vajzës mund të  them se së pari Policia e Shtetit ka bërë detyrën në përputhje me ligjin dhe djali i deputetit nuk ka  pasur trajtim preferencial. Për një shkelje të procedurës, oficeri i policisë është pushur nga detyra dhe policia ka kryer të gjithë procedurat dhe e ka çuar çështjen, prokurorisë”, shtoi kryeministri.

Më tej, ai theksoi se  “Së dyti: Vajza e dhunuar meriton vetëm drejtësi dhe inkurajoj dhe mbështes organet e drejtësisë të çojnë çështjen deri në fund. Së treti; Abuzimi i lig me vajzën e dhunuar dhe trasformimin e dramës së saj në një motiv të një lufte politike është një ridhunim i saj nga Partia Demokratike dhe media, analistët të cilat e kanë kthyer vajzën në mish për top të luftës mediatike-politike”.

Së fundmi, tha Rama, dua të siguroj të gjithë se ç’ka ka të bëjë me të drejtën dhe drejtësinë është e panegociueshme për asnjë interes politik të partisë time apo të forcës politike që unë drejtoj.

“Ju të bëni detyrën tuaj,të zbardhni të vërtetën në lidhje me një horr të kthyer në hero në vend që të dënohej nga të gjithë se ka shpërdoruar detyrën dhe e ka përdorur rastin për përfituar azil politik. Nuk do t’i ndahemi këmba-këmbës atij horri”, tha Rama.

I pyetur se ndërsa ekspertiza e vajzës ka treguar se është dhunuar deri në plagosje, pse nuk pati një arrestim siç ndodh me burrat që dhunojnë gratë, Rama theksoi se “së pari arrestimet si bën qeveria dhe kryeministri, se po t’i bëja unë do kishit parë shumë. Është prokuroria që duhet të kryejë deri në fund hetimet dhe të marrë vendimin për ta çuar hetimin drejt gjykimit”.

“Ndërkohë që diskutojmë për këtë çështje po ridhunohet publikisht vajza, jo vetëm nga Partia Demokratike, por dhe nga mediat në këndvështrimin tim. Nga ana tjetër deputeti duhet të hetohet njësoj si gjithë të tjerët, nëse ka implikim në këtë proces. Por fakti është, që askush nuk ka bërë asgjë edhe nëse ka tentuar mbi procesin sepse policia ka respektuar proceduarën. Jetojmë në një sistem se çdokush që mbush moshën 18 vjeç përgjigjet vetë para ligjit, cilido qoftë dhe askush tjetër nuk mban përgjegjësi, veçse ai që është përgjegjës”, tha kryeministri.

“Për mua, theksoi Rama, çështja është e qartë si drita e dielli. Vajza meriton drejtësi dhe të gjithë të duhet të japin  kontributin e tyre në këtë çështje duke ia kursyer ridhunimin në publik dhe përdorimin e abuzimin si mish për top për qëllime politike apo mediatike, po drejtësinë nuk e bëj unë, as media, as PD. Drejtësinë e bën drejtësia. Është prokuroria që bën hetimin dhe pastaj i takon gjykatës të japë vendimin. Ne jemi në anën e vajzës pa asnjë ekuivok dhe për ne askush nuk është mbi ligjin, jo djalë deputeti apo deputet. Ne jemi të barabartë para ligjit”.

“I takon akuzuesve të provojnë se janë përfshirë apo jo deputetë të PS-së janë përfshirë në këtë çështje, nuk më takon mua. Unë thjesht pres përfundimin e hetimit, duke e konsideruar sulmin ndaj Taulant Ballës, përfshirjen e mediave, qoftë dhe me indiferencë ndaj personit të tij, qoftë dhe për arsye tregtare për audiencë në këtë sulm, si një qenëri të neveritshme. Kjo është për mua ajo që i bëhet Taulant Ballës”, tha kryeministri.

Në fund Rama shtoi se “Për sa i përket të atit të djalit, nëse nga hetimi do të ketë një provë të përfshirjes së tij,  atëherë hajde e më pyesni mua se çfarë qëndrimi kam unë”. /atsh

Presidenti i Serbisë Aleksandër Vucic ka dhënë urdhër që ushtria të jetë në gatishmëri të lartë, pas rrethimit të liqenit të Ujmanit nga Forcat Speciale të Kosovës në veri të vendit.

Nga zyra e Presidentit të Serbisë, njoftohet se Vuçiç ka dhënë urdhër që ushtria e Serbisë të vihet në gjendje gatishmërie për luftë, pasi Njësitet Speciale kanë kryer ndërhyrje në veri të Kosovës.

Edhe ministri i Punëve të Brendshme i Serbisë, Nebojsha Stefanovic, tha sot se e ka urdhëruar drejtorin e policisë serbe që të gjitha njësitet speciale të policisë të jenë në gjendjen më të lartë të gatishmërisë, pas raportimeve të mediave serbe se forcat speciale të Policisë së Kosovës kanë hyrë në veri.

Mediat serbe bëjnë me dije se ushtria serbe ka shkuar tashmë në kufirin e Kosovës.

Kryeministri Edi Rama ka zhvendosur qeverinë në një mbledhje në Korcë, ndërsa i është përgjigjur interesit të gazetarëve nëse do vazhdojë të jetë ende deputet, Rrahman Rrahja, pas pretendimeve se djali i tij ka dhunuar ish të dashurën 25-vjecare dhe nuk është arrestuar nga policia.

“Deputeti duhet të trajtohet njësoj si gjithë të tjetër, nëse ka apo jo implikim në këtë proces, por fakti është që askush nuk ka mundur të bëjë asgjë, edhe nëse ka tentuar se policia e ka respektuar procedurën. Gjithkush përgjigjet vetë para ligjit, askush tjetër nuk mban përgjegjësi përvecse ai që është përgjegjës, për mua cështja është shumë e qartë si drita e diellit vajza meriton drejtësi dhe të gjithë duhet të japin kontributin e tyre në këtë cështje, duke ia kursyer përdorimin abuziv vajzës”- tha Rama.

Kryeministri Rama ka thënë se varianti që jep deputeti Rraja, në mbrojtje të djalit, jo vetëm që nuk i intereson, por e quan subjektiv.

“Nuk më intereson fare varianti që jep i ati i djalit, është një variant subjektiv që nuk më intereson, më intereson varianti i prokurorisë dhe i gjithkujt tjetër që sjell prova”- tha ai.

Policia e Vlorës, Plan Masash shtesë për parandalimin e zjarreve në pyje kullota, evidentimin e autorëve kapjen dhe vënien e tyrë para përgjegjësisë penale. Nisur nga rastet e shtuara dy javët e fundit të zjarrvënies me qëllim apo nga pakujdesia, Policia e Vlorës prej datës 21 Shtator, në vijim të zbatimit të Planit të masave të hartuar në Janar për parandalimin e zjarreve në Pyje e Kullota, evidentimin dhe vënin para përgjegjësisë të autorëve, ka hartuar një tjetër Plan masash shtesë, në zbatim edhe të porosive të lëna nga Ministri i Brendshëm për këtë qëllim gjatë takimit të zhvilluar me strukturat drejtuese të Policisë së Shtetit në qendër e në bazë javën e kaluar. Të gjithë Specialistët e Zonave kanë marrë detyrë dhe janë shpërndarë në të gjitha zonat që ata mbulojnë, ku kanë rimarrë dhe po vijojnë kontaktet me të gjithë barinjtë që kanë kullota në shfrytëzim, apo me banorët të cilët nga pakujdesia shkaktojnë zjarr ku shpesh këto zjarre kanë dalë jashtë kontrollit duke shkaktuar pasoja në pronën private dhe shtëtërore. Po koordinohen veprimet me shtabin e emergjencave në Prefekturë, përfaqësuesit e njësive administrative dhe drejtoritë/inspektoriatet rajonale të Mjedisit/pyjeve për të bërë të mundur parandalimin e zjarreve si dhe për të evidentuar dhe vënë para përgjegjësisë ligjore autorët e zjarrvënieve të qëllimshme apo nga pakujdesia. Zëvendës/Drejtori i Policisë Vlorë po zhvillon takime me banorë të zonave buqësore dhe blektorale, me qëllim ndërgjegjësimin e tyre për të parandaluar zjarrvënien e qëllimshme nëpër kullota apo edhe zjarrvënien nga pakujdesia. Gjithashtu janë angazhuar për parandalimin e zjarrvënies, si dhe për evidentimin e autorëve edhe agjentët e Policisë Kriminale. Si rezultat i zbatimit të masave shtesë, javën e fundit janë evidentuar dhe proçeduar penalisht 4 autorë të zjarrvënies së qëllimshme apo nga pakujdesia, në Vlorë dhe Sarandë. Janë arrestuar në flagrancë 2 autorë, janë ndaluar 2 si dhe është shpallur në kërkim 1 tjetër. Theksojmë faktin se nga Strukturat e Policisë së Qarkut Vlorë, për periudhën Janar – 30 Shtator, janë evidentuar 14 raste të zjarrvënies dhe janë zbuluar 10, janë evidentuar 10 autorë, kapur në flagrancë 4 autorë, proceduar në gjendje të lirë 5 autorë dhe 1 autor është shpallur në kërkim. Policia e Vlorës kërkon mirëkuptimin dhe bashkëpunimin e banorëve për të parandaluar zjarrvënien dhe fton ata të denoncojnë në kohë në numrin 112 çdo rast sado të vogël të shkaktimit të zjarrit në toka buqësore, kullota apo pyje. Aktualisht që raportojmë, situata në qarkun e Vlorës është e qetë dhe vazhdon monitorimi i territorit nga shërbimet tona policore. Duke ju falenderuar për vëmëndjen