Aurora

E gjithë industria e verës përfshirë prodhim vendas dhe import vlerësohet të ketë një volum tregtar prej rreth 2 miliardë lekë apo 15 milion euro, ku pjesën më të madhe e zë prodhimi i huaj. Shifrat e sakta të prodhimit të verës mungojnë, por  prodhuesit vlerësojnë që në total të qarkullojnë në treg rreth 500 mijë shishe verë të llojeve të ndryshme.

Konsumi në Shqipëri vijon të jetë i ulët, megjithëse regjistrohet një rritje çdo vit pothuajse 10%,  ndërsa renditemi në vendet e fundit të konsumit të verës në Europë.  Kështu konsumi për individ, llogaritet mesatarisht dy litra në vit.  Raporti në tregun e verës në Shqipëri është 70 për qind import dhe 30 për qind prodhim vendas, gjë që konsiderohet një lajm i mirë për prodhuesit shqiptar të verës pasi vetëm pak vite më parë ky raport ka qenë 90 për qind me 10 për qind.

Raporti i vendosur para disa vitesh ka qendruar në të njëjtat shifra edhe gjatë vitit 2017, duke bërë që prodhimi vendas të jetë i avashtë në fitimin e terrenit ndaj markave të huaja. Referuar shifrave zyrtare të Ministrisë së Bujqësisë, sa i përket importeve, vihet re blerja nga jashtë në masë të madhe e verës prej rrushit të freskët, tregues që ka pësuar rritje gjatë vitit që lamë pas në krahasim me vitin paraardhës.

Kështu, është importuar rreth 4900 ton verë nga rrush i  freskët gjatë vitit 2017 me vlerë 12 milion euro nga 4100 ton që është importuar gjatë 2016-ës me vlerë 8.6 milionë euro.  Sipas prodhuesve dhe të dhënave të Ministrisë së Bujqësisë,  në të gjithë Shqipërinë janë rreth 100 kantina serioze, ndërsa vetëm rreth 10 prej tyre kanë prodhim sasior më të lartë dhe në normat e prodhimit të standardeve që kërkon kjo industri.

Këtë vit, atë të ardhshëm si dhe në 2020, Shqipëria do të jetë ekonomia me rritjen më të shpejtë në Ballkanin Perëndimor, thotë Instituti i Vienës për Studime Ekonomike në një raport të publikuar së fundmi për Europës Qendrore dhe Lindore. Për këtë vit, Instituti i Vjenës, projekton një rritje ekonomike të vendit tonë në 4.1%, ndërsa për vitin e ardhshëm në 4%, për të zbritur më pas në 3.9% në 2020.

Projeksionet e reja shënojnë një zhvlerësim të ekonomisë shqiptare. Në raportin e kaluar vlerësohej se, ekonomia e vendit tonë do të rritej me 4.2% këtë vit dhe 4.1% vitin e ardhshëm. Pra, kemi të bëjmë me një zhvlerësim minimal të projeksioneve, me vetëm 0.1%. Edhe sa i përket normës së papunësisë, projeksionet më të fundit tregojnë se, Shqipëria do të jetë ajo me normën më të ulët këto tre vite, me 13%, 12.5% dhe 12% respektivisht.

Pavarësisht optimizmit të Institutit të Vienës sa i përket indikatorëve kyç makro-ekonomikë, një rënie e papunësisë me vetëm 0.5% në një vit është minimale. Sa i përket normës së inflacionit ndërkohë, projeksionet mbeten të pandryshuara. Instituti i Vienës është i radhës ndër institucionet prestigjioze që ka tentuar të shfryjë disi optimizmin e tepruar sa i përket rritjes ekonomike të vendit tonë.

Tërheqja e investimeve të huaja madhore dhe mosafrimi i investimeve të reja do të prodhojë për rrjedhojë një ngadalësim të hapit të rritjes, duke i`u larguar kështu objektivit të shumë kërkuar të qeverisë, në të paktën 5% rritje ekonomike, që sipas ekzekutivit do të kishte impakt të drejtpërdrejtë në xhepat e qytetarëve.

E ndërkohë që projeksionet tregojnë një situatë ku Shqipëria është e para në rajon, realiteti flet ndryshe, duke i vendosur shqiptarët në vend të fundit kur bëhet fjalë për ekonominë reale, pra Prodhimin e Brendshëm Bruto për frymë dhe pagat.

Edhe këto të dhëna janë publikuar nga Instituti i Vienës për studime ekonomike dhe tregojnë se sa larg është realisht një vend nga Austria, e marrë si ekonomia referencë në këtë rast. Kur bëhet fjalë për PBB për frymë, në Shqipëri ky indikator është sa 1 e katërta e Austrisë.

Më keq se shqiptarët e Shqipërisë janë vetëm ata të Kosovës në këtë drejtim dhe ukrainasit. Por ekonomia e Ukrainës është zhytur thellë në recesion pas konfliktit të fundit në vend. Sa i përket pagave ndërkohë, shqiptarët e Shqipërisë zbresin në vend të parafundit, më mirë vetëm se ukrainasit.

Pagat në vendin tonë vlerësohen sa 30% e austriakëve, thotë Instituti i Vienës për Studime Ekonomike. Serbia, Maqedonia, Bosnje Hercegovina dhe Mali i Zi, janë të katërta më mirë se Shqipëria në drejtim të ekonomisë reale, asaj familjare, paçka se projeksionet dhe vlerësimet e fundit makroekonomike, po të Institutit të Vienës, tregojnë se Shqipëria i ka lënë pas në 2017 këto vende dhe do të vijojë ti lërë pas në tre vitet e ardhshme.