Andueli

Presidenti i Kosovës, Hashim Thaçi, është paraqitur në Dhomat e Specializuara për t’u intervistuar, ashtu siç kishte marrë ftesën ditë më parë.

Në një prononcim të shkurtër për media, Thaçi tha se beson te drejtësia dhe e vërteta dhe ky ishte çmimi i lirisë që duhet ta paguajë.

“Sot jam këtu në respekt të ëndrrës time dhe për atë që kam luftuar, një Kosovë të lirë dhe të pavarur, bazuar në të drejta të barabarta dhe në sundimin e ligjit. Jam gati të përballem me sfidat e reja dhe të fitoj, për djalin tim, për familjen time dhe për vendin tim. Askush nuk mund ta rishkruajë historinë. Ky është çmimi i lirisë. Unë besoj në paqe, në të vërtetën dhe në drejtësi. Unë besoj në dialog dhe në marrëdhënie të mira me vendet fqinje. Kosova është një histori suksesi dhe unë jam shumë krenar. Destinacioni i Kosovës është integrimi në Bashkimin Europian, NATO dhe marrëdhëniet e mira me SHBA,” deklaroi Thaçi.

Ndërkohë, një grup mbështetësish të UÇK-së dhe presidentit Hashim Thaçi janë mbledhur jashtë Gjykatës Speciale në Hagë dhe kanë brohoritur emrin e kreut të shtetit, “UÇK” si dhe me pankarta në duar kanë kërkuar drejtësi për krimet e kryera në Kosovë gjatë luftës së fundit./KosovaPress/

Ministria e Shëndetësisë dhe Mbrojtjes Sociale ka apeluar edhe një herë për më shumë kujdes, edhe gjatë pushimeve dhe sezonit turistik.

“Mos e ulni vigjilencën dhe respektoni rregullat e higjienës. Pastrimi dhe dezinfektimi duhet të zbatohen me rigorozitet në bare, restorante, shezlonge dhe në çdo ambient. Stafi i shërbimit në kontakt me pushuesit apo vizitorët duhet të mbajmë domosdoshmërisht mas kë. Nëse dyshoni se jeni i prekur ose keni shenja të sëmundjes duhet të qëndroni të izoluar dhe telefononi në numrin e Urgjencës Kombëtare 127. Ministria e Shëndetësisë ka vënë në dispozicion të qytetarëve linjën e gjelbër 0800 40 40 për këshillim psikologjik apo çdo informacion për COVID19”, apeloi Ministria e Shëndetësisë.

Sipas MSH, nëse udhëtoni duhet te ndiqni këto hapa: Mbani distancë ose vendosni maskë, lani duart ose vendosni dezinfektantë. /atsh

Ministria e Financave dhe Ekonomisë planifikon një financim prej 600 milionë lekësh për studim-projektimin e tunelit të Llogorasë.

Qeveria hapi në mesin e muajit qershor garën për projektin inxhinierik për ndërtimin e tunelit të Llogorasë, i cili do të ndërtohet me fondet e buxhetit të shtetit.

Shuma e planifikuar në rishikimin që MFE ka kryer në buxhetin e vitit 2020 parashikon hartimin e studimit dhe projektimit të tunelit të Llogorasë, ndërtimi i të cilit do të krijojë një lidhje shumë të shpejtë me Rivierën shqiptare por do ta kthejë edhe vet Parkun Kombëtar të Llogorasë në një destinacion më vete, jo thjesht në një rrugë kalimi të gjithë trafikut të sezonit turistik.

Tuneli do të jetë i gjatë 6 km dhe nis pas Urës së Shën Elizës deri në Palasë.

Ndërtimi i tij synon një akses për të gjithë për të përshkruar rrugën e Llogorasë nga Dukati deri në Palasë që aktualisht nevojiten 55 minuta në vetëm 7-10 minuta.

Sipas llogaritjeve tuneli prej 6 km me një shpejtësi të lejuar 50-80 km në orë do të përshkrohet për 7-10 minuta. Ky investim do të jetë efiçent për sa i përket kohës, kostos së karburantit dhe përdorimit të automjeteve dhe mbi të gjitha ka elementin e sigurisë rrugore.

Impakti që ky tunel do të ketë në ekonominë e zonës dhe atë shqiptare i përkthyer në shifra arrin 550 deri 650 milionë euro, ndikim ky direkt dhe indirekt. Punësimi që kjo vepër do të nxisë arrin në 11 600 persona.Parashikohet që gara për ndërtimin të hapet në 29 dhjetor të këtij viti, ndërsa punimet të nisin në pranverën e vitit 2021.

Në vitin e parë të operimit të këtij tuneli parashikohet një fluks lëvizjeje nga 3 mijë që është aktualisht në 6 mijë, ndërsa në vitin e tretë parashikohet që fluksi i lëvizjes të shkojë në 10 mijë automjete.

Tuneli, do të operohet me tarifë e cila do të jetë minimale dhe do të shkojë për mbulimin e kostos së ndërtimit dhe mirëmbajtjen.//atsh