Andueli

Kryeministri Edi Rama iu përgjigj deklaratave të Presidentit Ilir Meta se Shqipëria ka humbur miliona euro prej gjyqeve të humbura në arbitrazh, në konferencën e përbashkët me homologun e Kosovës, Avdullah Hoti.

Pa i përmendur emrin Presidentit, ai tha se i qëndron besnik bindjes se në praninë e miqve nuk flet për punët e brendshme të shtëpisë.

Por shtoi se në emër të fakteve, ka disa kohë që është ngulur në opinion ideja se kemi humbur arbitrazhe, madje tha se një pjesë e njerëzve mendojnë se janë paguar edhe paratë e humbjeve.

“Po ju gazetarët dhe mediat çfarë bëni, pse nuk shikoni a është e vërtetë kjo? Dei më tani nuk kemi ne asnjë proces në arbitrazh të përfunduar që ne të kemi humbur, kemi skuadra të përbashkëta të avokaturës së shtetit dhe avokaturës së huaj që punojnë për ti zmbrapsur këto vendime që janë të natyrës paraprake, se mirë ata që e kanë detyrë ndaj një populli të tërë që mos t’ia kërcasin kokoshkës, por ju duhet të bëni verifikime dhe të mos mbytet për ditë në llumin e gjysmë të vërtetave, që janë gënjeshtra më të rënda”, u shpreh Rama.

Ai tha të kundërtën se Shqipëria ka fituar procese në arbitrazh, por nuk ka humbur asnjë prej arbitrazheve që diskutohen, por se vazhdojnë betejën për ti zmbrapsur.

Lidhur me Presidentin, deklaroi se nuk duhet bërë koment sa kohë nuk është vendim përfundimtar dhe se çdo koment është shkelje e procesit, duke thënë se “Imagjinoni se sa shumë autori i këtyre deklaratave e ka mendjen te Shqipëria”.

Kryeministri Edi Rama e nisi fjalën çelëse të mbledhjes së përbashkët të qeverisë së Shqipërisë me Kosovën, duke thënë se mbledhja e gjashtë e dy kabineteve mbahet në Tiranë, me rastin e 100-vjetorin e pavarësisë së kryeqytetit shqiptar.

Ai kërkoi që të dy vendet të investohen së bashku për 150-vjetorin e Lidhjes së Prizrenit, për të cilin tha se është ende larg në kohë, por jo aq larg sa të mos mendohet që sot për një projekt të përbashkët për rikualifikimin urban tërësor të qytetit historik të shqiptarisë.

Kryeministri Rama tha se “Ambicia jonë është heqja e kufirit në funksion të zbatimit të katër lirive të Bashkimit Europian në rajonin tonë duke nisur nga më e thjeshta dhe më kuptimplota heqja e kufirit mes Shqipërisë dhe Kosovës. Është e rëndësishme që të dyja ministritë e Brendshme e dy qeverive të intensifikojnë punën dhe të krijojnë një database të përbashkët për të mundësuar kontrollin në kohë reale të hyrjeve e daljeve në të gjitha pikat kufitare të perimetrit tonë të përbashkët që do na mundësonte hapjen përfundimtare të kufirit pa humbur asnjë centimetër në frontin e betejës kundër aktiviteteve të paligjshme dhe abuzimit me lirinë e lëvizjes.”

Ai tha më tej do të firmoset marrëveshja mes dy qeverive edhe për hyrje-daljen e mallrave të përbashkëta në Portin e Durrësit.

“Marrëveshja që së shpejti do të firmosim për hyrje-daljen e mallrave na çon në një destinacion të paimagjinueshëm, deri para pak vitesh, shndërrimin e këtij porti në një port de facto edhe të Kosovës. Ky është një hap i rëndësishëm drejt realizimit të objektivit që Porti i Durrësit të kthehet në një port të rëndësishëm jo vetëm në Shqipëri, por edhe në rajon”, deklaroi Rama.

14 marrëveshjet që pritet të nënshkruhen

Marrëveshje për Zbatimin e Lehtësirave të Ndërsjella në Procedurat Doganore të Kontrollit të Hyrje-Daljeve së Mallrave.

– Bashkëpunim në fushën e transportit hekurudhor

– Krijimi i fondit të përbashkët në mbështetje të Luginës së Preshevës

– Bashkëpunim dhe ndihmë të ndërsjelltë në raste fatkeqësish Natyrore dhe fatkeqësive të tjera

– Bashkëpunim të ndërsjellë në fushën e sigurisë

– Marrëveshje për shmangien e Tatimit të dyfishtë mbi të Ardhurat dhe mbi Kapitalin si dhe për Parandalimin e Evazionit Fiskal

– Marrëveshje bashkëpunimi mes MF dhe Ministrise së Ekonomisë dhe Punësimit

– Krijimi i Korridorit Digjital 5G

– Themelimi i Ligës së Përbashkët të Basketbollit

– Platformë e përbashkët digjitale të Arsimit parauniversitar

– Kalendar i Përbashkët Kulturor vjetor

– Marrëveshje për bashkëprodhim të Filmit

– Memorandum bashkëpunimi mes Ministrive të Kulturës

– Marrëveshje për përballimin e Covid 19 /noa.al

“Nuk është Edi Rama që ka sjellë në pushtet socialistët, ai ka sjellë në pushtet bandat dhe ka përvetësuar oligarkët”.

Kështu deklaroi Presidenti Ilir Meta në konferencën e sotme për mediat, pas pyetjes nëse gjuha e ashpër e përdorur prej tij në ditët e fundit, ka lidhje me fushatën elektorale.

Kreu i shtetit tha se socialistët e kanë marrë Edi Ramën nga refugjat dhe e kanë bërë ministër dhe e kanë mbajtur 20 e ca vjet në pushtet, por shtoi se, ai është i pashpresë në rast se humbjen e tij, kërkon ta kthejë në një tragjedi për Shqipërinë.

Ndaj e ftoi që “Të respektojë marrëveshjen e 5 qershorit dhe të bëjë listat e hapura. Me lista të hapura Edi Rama në asnjë qark të Shqipërisë nuk del deputet. Ai di shumë mirë që del jashtë kontrollit Partia Socialiste, se do të votojnë socialistët dhe jo biznesmenët, por sepse ai nuk del deputet.”.

Sipas tij, Edi Rama nëë politikë humbet si kudo, ndaj tha se është koha të mbledhë forcat dhe të ketë dinjitet për të pranuar humbjen.

Lidhur me ndryshimet në kodin zgjedhor, tha se kush do të shkelë 5 qershorin do e cilësojë atentat ndaj Shqipërisë dhe përpjekje për të instaluar një grusht shteti apo juntë.

“Ne nuk do të lejojmë kurrsesi instalimin e një grushti shteti. Çdo shqiptar, me votë apo çdo mjet tjetër do të vendosë rendin kushtetues që ka kaq vjet që nëpërkëmbët. Socialistët do të jenë të parët, pasi ata i dhanë Kushtetutën demokratike Shqipërisë në vitin 1998 me referendum”, tha Ilir Meta. /noa.al