Ministri i Turizmit dhe Mjedisit, Blendi Klosi, u shpreh sot se, është e vështirë të flasësh për shifra konkrete të dëmeve në turizëm, nga situata e COVID-19.
“Kërkohen shifra ne situata kur ne jemi duke përpunuar skenarë të mundshëm se sa i goditur është turizmi. Unë nuk mendoj që turizmi s’do pësojë goditje. E ndaj këtë shqetësim me operatorët çdo ditë. Është një sektor shumë i goditur por shikohet me përparësi sepse është sektori që mund të rikuperohet më shumë se çdo sektor tjetër”- tha Klosi.
Sipas tij, turizmi nuk është problematikë e momentit, por e gjithë sezonit që do vijë se goditet i gjithë viti.
“Shpresojmë që problematika të mbyllet brenda muajit prill dhe me shumë pozitivitet shpresojmë disa statistika brenda sezonit. Nuk do kapim dot shifrat e vjetshme, por ne kemi punuar që të rikuperojmë sa të mundemi këtë sezon”, tha Klosi.
“E para është aktualiteti, momenti i vështirë dhe problemi më i madh çfare do bëjmë të kapim aq sa të kapim nga sezoni, se është nga ato sektorë që mund të fusë më shumë para cash nga jashtë se çdo sektor tjetër. Edhe kriza greke pati një rikuperim falë turizmit’- tha Klosi.
Ai njoftoi se me ministrin Ahmetaj po përgatisim disa skenarë që do ja paraqesim kryeministrit për të marrë një vendim në paketën 2 që do mbështesi ekonominë afatgjatë.
“Nëse ky sektor falimenton dhe i vë drynin, ne do kemi problematika të mëdha në sezon. Ne kemi shumë mundësi që nëse bashkëpunojmë fort dhe të çojmë propozime te kryeministri. Lekët janë një mënyrë, por politika janë mënyra tjetër”- deklaroi ai.
“Ka shumë sektorë që goditen, jo vetëm hotelet e mëdha. Jane 3 087 subjekte që përfitojnë 6 % e akomodimit, një pjesë e tyre janë biznes i vogël, por edhe për sa i përket biznesit të madh, kjo është situata në Shqipëri. Kontratat janë të ngrira, por jo të anuluara. Akoma ka shpresë që ky sektor të prodhojë për ekonominë shqiptare. Ne duhet ta ruajmë shumë mirë aleancën me kolegët”- tha Klosi.
Sipas tij, me një ndërhyrje të re duhet t’i paraqesim disa skenarë Kryeministrit, duke mbajtur komunikimin me kolegët, që kanë të bëjnë jo vetëm me para por edhe politika që sektori të mbijetojë dhe të shpëtojë./atsh
