“Sot është një ditë e madhe, e cila ngrihet mbi çdo virus dhe na mbush me krenari”, tha ministri i Brendshëm, Sandër Lleshaj lidhur me vendimin e Këshillit Europian për çeljen e negociatave për Shqipërinë.
Ministri Lleshaj, në një njoftim të publikuar prej tij, thekson se ka zhvilluar një videokonferencë me disa nga ambasadorët e BE, duke folur për luftën ndaj krimit të organizuar.
“Gjatë një videokonference me ambasadorët e BE, SHBA, Gjermanisë, Francës, Mbretërisë së Bashkuar, Italisë dhe Holandës, ku diskutuam për çështje të luftës kundër krimit të organizuar dhe për ecurinë e deritanishme të Operacionit Forca e Ligjit, pata kënaqësinë e madhe të pres edhe urimet e tyre për vendimin historik të hapjes së negociatave të anëtarësimit të Shqipërisë në Bashkimin Europian”, njofton Lleshaj.
“Sot është një ditë e madhe, e cila ngrihet mbi çdo virus dhe na mbush me krenari, shpresë, por më së shumti me përgjegjësi të reja. Shqipëria është Europë!” – nënvizon ministri i Brendshëm, Sandër Lleshaj./atsh
