Në zonën e tragjedisë, ku do të ndërtojmë një shembull rrezatues të Shqipërisë që duam për fëmijët tanë, u shpreh Kryeministri, Edi Rama në Thumanë.
Rama së bashku me ministrin e Shtetit për Rindërtimin, Arben Ahmetaj, ministren e Kulturës, Elva Margariti dhe kryebashkiakun e Krujës, Artur Bushi inspektuan sot zonat ku do të ndërtohen banesat për banorët e Thumanës, të cilëve iu janë prishur shtëpitë prej tërmetit të 26 nëntorit.
Ministrja Margariti u shpreh se, “aty ku mbaron parcela e vilave individuale, do të ketë edhe rrugë biçikletash, sepse ideja është që të lidhet lagjja e re e vilave, të jetë si nga pjesa anësore edhe përmes. Të jenë rrugë të cilat pastaj aksesojnë drejt liqenit. Do të krijojmë pastaj edhe një kalim për të vajtur tek merkata, qendra komunitare”.
Zona që do të ndërtohet do ketë rrugë të brendshme, kanalizime, ujësjellës, ndriçim, dhe pastaj do të fillojë puna me ndërtimin.
Qyteza që do të ndërtohet do të ketë të gjitha shërbimet. Do të ketë edhe një bibliotekë, do të ketë edhe terrene sportive, fushë futbolli, qendër komunitare, park lojërash për fëmijët dhe parku çlodhës për të moshuarit./atsh
