Drejtori i Përgjithshëm i Policisë së Shtetit, Ardi Veliu do t’i nënshtrohet procesit të vetingut më datën 6 shkurt, ndërsa më 5 shkurt do të skanohet komandanti i Gardës, Gramos Sako.
Këtë të enjte, komisioni i jashtëm i vlerësimit njoftoi 3 emrat e rinj që do përballen me vetingun. Më datë 5 shkurt do të dalin para komisionit të përkohshëm për vlerësimin e figurës zyrtarët, Gramos Sako, me funksion Komandant i Gardës së Republikës.
Trupa që do kryejë rivlerësimin e Sakos përbëhet nga Mirela Ujkani (Miti), Alban Laska, Artur Baku.
E njëjta trupë do kryejë rivlerësimin në 3 kriteret dhe për drejtorin e Përgjithshëm të Policisë së Shtetit Ardi Veliu. Për këtë të fundit seanca është caktuar më datë 6 shkurt.
Për vlerësim kalimtar do të paraqitet dhe Artan Shkëmbi, i cili aktualisht mban funksionin e Drejtorit të Drejtorisë Hetimore Qendrore, në Departamentin për Policinë Kriminale në policinë e shtetit.
Deri më tani nga procesi i Vetingut në Polici, janë konfirmuar në detyrë 4 punonjës policie, një është përjashtuar dhe dy të tjerë kanë dhënë dorëheqjen. /atsh
