Kryeministri Edi Rama, pasditen e stë enjtes ka risjellë në fokus portalin “Infermierë për Shqipërinë”, që u ka mundësuar që prej çeljes së tij, 2 200 infermierëve të bëhen pjesë e sistemit të shëndetësisë publike, në bazë të meritës.
Kryeministri Edi Rama thekson se vetëm 2 muajt e fundit, 191 infermierë dhe profesionistë të shkencave mjekësore teknike janë bërë pjesë e sistemit shëndetësor publik.
“191 infermierë dhe profesionistë të shkencave mjekësore teknike janë bërë pjesë e sistemit shëndetësor publik vetëm gjatë dy muajve të fundit. Sot, sistemi i shëndetësisë publike është i hapur për çdo profesionist që kërkon të punësohet në bazë të meritës në qendrat shëndetësore dhe spitalet tona, duke klikuar në portalin “Infermierë për Shqipërinë” http://infermierepershqiperine.al/”, – theksoi Rama.
“2200 infermierë janë punësuar nga hapja e portalit që ndryshoi një herë e mirë mënyrën e rekrutimit të profesionistëve të shëndetit. Pa ryshfet, pa parti, pa krushqi. Si ka mundësi?! Ja pra që ka mundësi dhe janë plot 2 200 dëshmitarë që mund t’ua tregojnë po t’i pyesni“,- përfundoi Kryeministri Edi Rama. /atsh
