Porti i Vlorës është pika më e rëndësishme e turizmit në jug të vendit në çdo stinë të vitit. Gjatë vitit 2019 dhe fillimit të vitit 2020 ka patur një fluks të lartë të hyrjeve dhe daljeve të udhëtarëve shqiptarë dhe të huaj.
“Në bazë të statistikave, gjatë muajit dhjetor 2019 – 13 janar 2020, nga Porti i Vlorës kanë hyrë dhe kanë dalë rreth 21 642 udhëtarë dhe 3 322 automjete”, bën të ditur porti i Vlorës.
Sipas portit, duke e krahasuar këtë shifër me vitin e kaluar shohim një rritje të konsiderueshme me rreth 1705 udhëtarë dhe 940 automjete më shumë.
Një rol të rëndësishëm në përpunimin e udhëtarëve këtë vit ka luajtur edhe terminali i ri i pasagjerëve në portin e Vlorës.
“Ndryshe nga vitet e tjera edhe pse fluksi ka qenë i lartë, nuk janë krijuar pritje të gjata si në hyrje dhe në dalje, kjo për shkak të masave të marra nga Autoritetet Portuale dhe funksionimit të Terminalit të Ri të Pasagjerëve”, – thuhet në njoftimin e portit të Vlorës, i dyti më i madh në vend./atsh
