Vendosja e moratoriumit për ndalimin e gjuetisë në pyje dhe shtimi i zonave të mbrojtura natyrore po sjellin gjithnjë e më shumë rigjenerimin e faunës së egër dhe të pasur shqiptare.
Mali i Tomorrit ka qenë shënjestra e radhës e kamerave të stafit të zonave të mbrojtura, të cilat kanë fiksuar në këtë habitat të lëvizin lirshëm kafshë si kaprolli, derri i egër apo edhe ariu i murrmë.
“Kamerat kurth në Parkun e Malit të Tomorrit, ofrojnë spektaklin e pyllit me pamjet e kaprojve, derrit të egër apo ariut të murrmë. Zonat e mbrojtura janë një shtëpi e sigurtë për zhvillimin e faunës dhe një aset i çmuar për biodiversitetin tonë,” shprehet Ministria e Turizmit dhe Mjedisit.
Fauna në Malin e Tomorrit është mjaft e pasur. Në terrene e pjesë pylli takohet më shpesh ariu i murrmë, por nuk mungojnë as ujku, dhelpra, kunadhja, baldosa, derri i egër, apo lepuri i egër. /atsh
