Ministrja e Financave dhe Ekonomisë, Anila Denaj, gjatë prezantimit të p/buxhetit për vitin 2020 në Komisionin e Ekonomisë bëri të ditur se pritet të krijohen rreth 35 mijë vende pune në vitin që vjen.
Realizimi e një rritjeje ekonomike, e cila parashikohet të jetë në nivelin 4.1% në vitin 2020, një rritje e gjeneruar kryesisht nga kërkesa e brendshme, si konsumi ashtu edhe investimet, sipas Denajt do të përkthehet në më shumë punësim.
Për vitin 2020, rritja ekonomike mbështet krijimin e rreth 35 mijë vendeve të reja pune, si dhe uljen e mëtejshme e shkallës së papunësisë poshtë nivelit 11%.
Tregu i punës ka shfaqur një ulje tё mëtejshme tё shkallës së papunësisë nën nivelin prej 12% në tremujorin e dytë, niveli më i ulët i regjistruar gjatë dy dekadave e fundit.
Punësimi, sipas ministres Denaj, u rrit me 3.3%, e ushqyer kjo kryesisht nga rritja e shkallës së pjesëmarrjes në forcat e punës.
“Rritja e punësimit është kyçe për gjenerimin e të ardhurave të disponueshme të familjeve, e për rrjedhojë për të nxitur konsumin, kursimet e investimet, dhe rritjen e mëtejshme të ekonomisë”, deklaroi Denaj./atsh
