Kryetari i Partisë Demokratike, Lulzim Basha ka deklaruar sot se përgjegjësit e dhunës te banorët e “Astirit” do të përballen me drejtësinë.
Pas takimit në Spitali i Traumës me banorë të Unazës së Re, kryetari i PD-së Lulzim Basha tha se gjendja e banorëve vazhdon të jetë e rëndë, ata janë dhunuar në mënyrën më barbare.
“Kam parë disa të moshuar mbi moshën 70 vjeç të gjakosur nga dhuna me shkopinj dhe me grushta, gra të alivanosura nga përdorimi genocidal i gazit lotsjellës, prania një numër i madh i banorëve të lënduar. Një pjesë prej tyre ndodhen të shtruar, një pjesë nuk janë shtruar në spital dhe ne po marrim të gjitha masat për ti dhënë ndihmën e nevojshme. Sipas raportimeve janë plagosur dhe 5 efektiv të policisë të cilët janë larguar nga Spitali Ushtarak, pasi kanë marrë ndihmën e parë. Ky është një bilan i një goditje të planifikua ndaj qytetarëve të pafajshëm që mbronin shtëpitë e tyre. Ky është një skenar i përgatitur me kujdes dhe ka një qëllim të çonte drejt gjakosjes dhe përgjakjes së qytetarëve dhe konfrontimit me forcat e rendit për të fshehur vjedhjen e madhe që Erjon Veliaj ka planifikuar tek i ashtuquajturi projekt i unazës së re”, tha ai.
Po ashtu Basha shtoi se “Është e rëndësishme që qytetarët të kuptojnë sot se nuk bëhet fjalë për një projekt zhvillimi”. Basha theksoi se përgjegjësit e dhunës do mbajnë përgjegjësi para ligjit.
“Dënojmë me ashpërsinë më të madhe këtë sjellje kriminale, pralajmëroj gjithsecilin përgjegjës për këtë nga urdhëruesi, ekzekutorët se do të mbajnë përgjegjësi para ligjit për këtë dhunë barbare mbi qytetarët. Do t’i bëj thirrje qytetarëve dhe punonjësve të policisë që të mos bien pre e këtij skenari që zhvendos lajmin nga vjedhja e 40 milionë eurove tek dhuna që kanë planifikuar kundër banorëve të Unazës së Re”, tha ai.
Gjithashtu, Basha tha se kemi një zotim politik me shkrim, çdo centimetër do të kompensohet me vlerën e tregut me ardhjen e PD-së në pushtet.
“Opozita ka qenë dhe është në krah të banorëve të Astirit, ndaj opozita është njësh me qytetarët për të mbrojtur ligjin, Kushtetutën dhe interesin publik”,-tha në fund ai. /atsh
