“Për personat me aftësi të kufizuara në Shqipëri vitet e fundit janë bërë hapa përpara. Kemi modele të suksesshme të përfshirjes sociale dhe gjithnjë e më tepër po flitet për të drejtat e tyre”, u shpreh sot Darjan Konomi, komisioner për mbrojtjen nga diskriminimi.
Në vijim, Konomi shton se “Shqipëri edhe pse janë bërë ndryshime ligjore në përputhje me konventën për të drejtat e personave me aftësi të kufizuara mbetet ende shumë për t’u bërë sa i përket zbatueshmërisë. Mbi të gjitha mbetet shumë për t’u bërë sa i përket ndryshimit të mentalitetit. Të gjithë duhet të kuptojnë se integrimi i një personi me aftësi të kufizuara në shoqëri si pjesë aktive e saj është një e mirë jo vetëm për individin, por për shoqërinë në tërësi. Aktivist të kësaj kategorie shprehen se nuk kërkojnë lëmoshë, por politika dhe mundësi të barabarta dhe njëkohësisht dhe trajtim të barabartë jo vetëm sa i përket të drejtave por edhe detyrimeve”.
“KMD ka qenë dhe do të jetë gjithnjë pranë grupeve vulnerabël duke i trajtuar ata si partner të rëndësishëm në promovimin dhe mbrojtjen e parimit themelor kushtetues, barazisë”, tha ai./atsh
