Në vijim të masave të marra për parandalimin, evidentimin dhe goditjen e prerjes së paligjshme të pyjeve, Policia e Elbasanit ka finalizuar me sukses operacionin policior të koduar “Zavalinë”, në kuadër të cilit u bë sekuestrimi i 3 kamionëve që transportonin 70 m3 dru dhe u proceduan penalisht 6 shtetas në gjendje të lirë, për veprat penale “Prerja e paligjshme e pyjeve”, dhe ” Fshehje e të ardhurave”.
Shtetasit e proceduar penalisht janë M. S., 62 vjeç, banues në Elbasan, pasi në fshatin Bathës, Elbasan, u kap nga shërbimet e Policisë duke transportuar 4 m3 dru zjarri me mjetin tip kamion; A. K., 46 vjeç, banues në fshatin Gjinar, Elbasan, pasi në fshatin Gjinar, u kap nga shërbimet e Policisë duke transportuar 4 m3 dru me mjetin tip kamion; D. D., 30 vjeç, banues në Elbasan, pasi në fshatin Benë, Elbasan u kap nga shërbimet e Policisë duke transportuar 4 m3 dru me mjetin tip kamion si dhe A. D., 42 vjeç, XH. P., 42 vjeç dhe A. D., 44 vjeç, të tre banues në Elbasan.
Procedimi penal ndaj këtyre shtetasve filloi pasi në vendin e quajtur “Guri Kopil” të Njësisë Administrative Zavalinë, Elbasan, janë konstatuar se kishin kryer prerje të paligjshme të pyjeve dhe kishin ngarkuar dru në atutomjetet e tyre tip kamion, të cilët janë sekuestruar në cilësinë e provës materiale.
Policia e Elbasanit bën me dije se operacioni po vijon. /atsh
