Në Divjakë në një sipërfaqe prej 3.6 hektarësh ndodhet sera më e madhe për kultivimin e fidanëve në Ballkanin Perëndimor është në Shqipëri, ku prodhohen 15 milionë fidanë çdo vit.
Ministri i Bujqësisë dhe Zhvillimit Rural, Bledi Çuçi, vizitoi “Lisar Seedlings” në Divjakë, një serë me teknologji moderne holandeze furnizon me fidanë jo vetëm tregun vendas, por edhe eksporton.
Për zgjerimin e saj, “Lisar Seedlings” është mbështetur nga programi IPARD.
Ministri Çuçi tha se “kombinimi i mbështetjes për zgjerimin e serrave dhe pikave të grumbullimit është një garanci për të zhvilluar më tej sektorin bujqësor dhe për të patur produkte më cilësore”.
“Modele të tilla duhet të na udhëheqin më tej për zhvillimin e bujqësisë. Kjo serë është një garanci për gjithë fermerët që të marrin fidanë cilësorë. Garancia për cilësinë e produkteve bujqësore fillon që tek fidanët. Ne do të vazhdojmë të mbështesim zgjerimin e serrave në Shqipëri, për të krijuar avantazh jo vetëm në tregun vendas por edhe për eksport”, u shpreh ministri Çuçi.
“Lisar Seedlings” eksporton një pjesë të madhe të fidanëve në Perëndim. Numri i të punësuarve në këtë serë është rreth 50 vetë.
Pritet që kjo sipërmarrje të zgjerohet edhe më tej falë skemave mbështetëse të qeverisë shqiptare për bujqësinë dhe fondeve të programit IPARD./atsh
