Nata e tretë e festës së birrës në Korçë ka krijuar një atmosferë të shkëlqyer për vendasit dhe turistët e huaj.
E ndarë në dy pole të qytetit, tek sheshi para stadiumit “Skënderbeu” dhe tek Pazari i Vjetër i Korçës, kjo festë ka arritur të konsolidohet dhe t’i sjellë qytetit shumë turistë e vizitorë. Bashkia e Korçës ka bërë të ditur se nata e tretë ka krijuar atmosferë të shkëlqyer për vendasit dhe vizitorët.
“E mrekullueshme nata e tretë e Festës së Birrës tek Pazari i Vjetër.
Atmosferë e shkëlqyer me muzikën e zgjedhur, pjesëmarrje rekord dhe sigurisht birra pa limit”, bën të ditur bashkia.
Në natën e tretë të festës të gjithë janë harruar mes gotave të birrës e gatimeve tradicionale. Për pjesëmarrësit kjo festë mbetet e veçantë dhe sjell shumë gjallëri në qytet.
Për 5 mbrëmje Festa e Birrës në Korçë sjell një atmosferë të veçantë me show birra dhe gatime tradicionale. Festa e Birrës në Korçë u themelua në vitin 2007, si një iniciativë e kësaj bashkie. /atsh
